2011
05041558健康的人生
甲：人人叫阮是矮仔財，上愛食迄落大雞排，青菜水果阮無
愛，漢堡可樂做伙來。
乙：電視電腦阮上愛，線上遊戲我上厲害，泅水爬山無安排，
宅女就是我目鏡海。
甲：矮仔財
乙：目鏡海
甲、乙：歡喜來上台，祝逐家新春大發財。
乙：哎--哟—哟 矮仔財，歇一个寒，過一个年，汝的腹肚
哪會佫較圓？
甲：啊汝著知，過年時仔，香腸滷肉油佫芳，糖仔餅仔食規
桶，甜粿發粿呣甘放，食徦親像是汽油桶。
乙：喝！喝！喝（笑聲）汝佫有先見之名哦！知影家己親像
汽油桶。
甲：這有啥麼好大驚小怪，古早人講：「頭大面四方，肚大
居財王。」
乙：是哦！我看汝是肚大早見閻羅王。
甲：呸！呸！呸 ！汝是矮人爬壁哦。
乙：矮仔財也敢講我矮，無轉去照鏡看覓咧！
甲：人講：「擔水擔水頭，聽話聽話尾。」汝嘛聽我講煞，
我呣是講汝矮，我是講汝矮人爬壁－欠梯 。啥麼肚大
就早見閻羅王，人我這是叫做啊---福氣啦！
乙：是哦！我看是啊---好去啦！
甲：好去？好去佗位？
乙：好去西天見佛祖啊！
甲：喂！喂！喂！抑無汝是損痀兮跋落海－ 冤仇誠深的
款，過年時仔， 按呢共我咒懺。
乙：天公伯仔，冤枉哦！真正是好心予雷吻。我是共汝提醒
講，腹肚呣通佫大落去啊。汝敢呣捌聽人講？腹肚大一
吋，壽命就減三冬。
甲：唉哟！人生垛垛數十年，呣來享受等何時？看著赫濟好
食物，無食是會對不起家己。
乙：食是好，呣過，食魚食肉嘛著菜佮。像汝按呢，干但愛
食漢堡可樂大雞排，早慢著愛去予閻羅王做囝婿。
甲：我看汝是家己無閒扛棺材，猶有閒替人算命，看汝的目
鏡仁是愈來愈厚，我看汝強卜變青暝海啊！抑無汝歇寒
攏在創啥？
乙：講著寒假真精采，線上遊戲來安排，電視節目看通海，
作業趕徦誠無奈。
甲：汝真正是七月半鴨仔－ 呣知死活。規工呣是電腦就是
電視，三頓食穿無正常，三更半暝才卜睏，一睏就睏徦
日頭曝尻川才起床，我看汝才會比我較早去蘇州賣鴨。
乙：我看咱是一个半斤，一个八兩，(勿愛)佇遮龜笑鱉無
尾。汝我攏是青暝兮食圓仔－ 心內有數，若佫繼續按
呢，咱的人生就會空手掠魚－ 無望。
甲：有影就著！無按呢，為著卜慶祝咱悟出這個人生大道理，
我請汝食披薩。
乙：真正是剃頭店公休－ 無汝法，猶佫咧想食的。
甲：人我的腹肚足枵的呢！
乙：汝呣是拄食飽爾，佫在喝枵，我看咱今也著愛舁刀切肉。
甲：汝真正是我的知己，抑今也舁刀是卜切豬肉？抑是切牛
肉來食？
乙：我則切人肉咧！ 我是講舁刀切肉－ 撩落去。
甲：撩落去佗位？是卜去撩水哦！
乙：我是講撩落去運動，汝看咱班長－軂骹雄兮，籃球排球
逐項gau5，棒球骹球逐項包，泅水爬山扑死無走，考試
攏是做前頭。
甲：按呢我知，我緊來去找軂骹雄兮，扑籃球、踢骹球。看
會共伊同款赫爾軂。
乙：汝嘛莫人講一个影，就生幾偌个囝。汝呰个矮仔財，食
卜食好，做卜輕可，無煩無腦，一身食徦若阿不倒，運
動前的準備若是無做好，斷骹斷手免驚無。
甲：啊汝這烏鴉喙，胡蕊蕊，真正是車駛入去無尾巷－無路
使呢！
乙：好啦！好啦！咱莫佫佇遮互相落氣求進步。人生在世無
撇步，呣通過徦糊裡糊塗。
甲：身體健康無步數，補藥是藥呣是補。
甲、乙：認真運動呣驚苦，身體勇健才有前途。
甲：矮仔財
乙：目鏡海
甲、乙：祝逐家人生精采有向望，無煩無惱一世人。（行禮落台）
(轉去主目錄)
沒有留言:
張貼留言