有二個快快樂樂住(tua3)佇 (ti7) in老父ｅ厝內ｅ囝仔，不時就會佇黃昏ｅ時，向 (ng3) 遠遠ｅ山頂上ｅ另外一間厝看。當黃昏ｅ日頭光線tui真濟ｅ玻璃窗仔反射出來ｅ時陣，會將厝漆kah誠輝煌燦爛。有一工下晡，in出發去拜訪彼間金窗仔厝。in辛辛苦苦行過田園、屳 (nng3)過樹仔欉和林地，一直到in所期待ｅ時刻到a。in企 (khia7)佇in日思夜夢ｅ彼 (he1) 棟受著魔法ｅ厝頭前。可惜，唉呀！in發現彼棟厝空空無人閣兼真荒涼。多年來ｅ土砂粉和穢 (ue3) 土已經將窗仔門ｅ玻璃蓋 (kham3) 著咧。根本就無發射金光出來。彼間厝真寂寞、冷淡閣hoo人放sat。失望、餒志、著驚，in越頭離開。當in按呢做ｅ時陣，inｅ眼光落在in家己彼間遠遠浸佇夕陽ｅ金光內ｅ厝。
in看著這，閣比這卡濟。in悲傷ｅ經驗已經教in來體會內在ｅ光，並毋是外在反射出來ｅ光，彼款內在ｅ光佇每一間會堪lih稱呼做「兜」(tau1)ｅ所在照出來，使伊變成世界上尚明亮、尚親切ｅ地點一個避難ｅ所在、快樂ｅ所在、希望ｅ所在、以及永遠幸福ｅ所在。毋閣，就是in識 (bat4) 承受過tui窗仔門所反射出來ｅ光ｅ魔力，in才完全覺悟出兜ｅ內在和真正ｅ光kah輝煌燦爛。in二個就同齊喝出來講：「看咱ｅ厝；咱兜才是真真正正ｅ金窗仔厝！」
1995.06.07 (台音式)
1998.05.30 (TLPA)
2010.03.10 23:30 上網
【後記】
自大約半年前頭一遍看著一篇故事就想欲ka伊翻成台語，可惜因為家己非常ｅ貧憚，一直拖到cimma才來翻。
這篇是現在高中英文第二冊十二課ｅ課文。這篇ｅ翻譯原則上是盡量維持原文ｅ複雜語法結構，主要是卜hoo咱知影台語ｅ語法猶原是會凍有一個正常語言應當有ｅ複雜性。
除了這篇ｅ內容非常有意義，對咱有真好ｅ啟發性以外，本人猶想著咱若是每一項代誌攏愛經過痛苦ｅ經驗和教訓才會學乖，按呢咱實在是真悲哀，因為咱ｅ生命有限，無可能逐項代誌攏親身體驗、親身體會、親身覺悟。有ｅ代誌咱可能愛經過十年、二十年了後才會得著教訓，就驚咱得著教訓了後，無像故事這二個囡仔ciah呢幸運會凍來覺悟，猶閣執迷不悟。
其實，咱毋免每一項代誌愛親身去體驗才會曉，咱會凍透過別人講hoo咱聽ｅ和寫hoo咱看ｅ人生體驗、故事、文章、人生觀...等等各種不同ｅ表現方法來增加咱ｅ見聞。
文字尚大ｅ優點就是伊無時間和空間ｅ限制。抵抵仔好會凍來彌補咱腦筋ｅ尚大缺點：學過ｅ物件有可能會因為時空人事ｅ轉換而放未記li。文字就無按呢ｅ限制，伊會凍提供咱前人ｅ知識、智慧、經驗...等等hoo咱當做參考。透過文字咱會凍學著真濟真濟ｅ寶貴經驗。所累積ｅ成果變成咱無價ｅ文化資產。靠著文字咱才會凍做尚大ｅ保留、繼承和發揚咱ｅ文化。
台語是咱ｅ文化、咱ｅ根，愛靠咱逐家做伙來扑拚、研究、創作和發揚。咱未凍等到咱ｅ台語無根了後才來覺悟著，到彼時陣卜挽回就太慢了。咱愛覺悟著台語需要靠咱逐家貢獻著咱每一個人點點滴滴ｅ心力才會凍生存落來。
沒有留言:
張貼留言