2011
05041607台灣米上界芳
台灣米上界芳
（本校為95年度農糧署學童種稻計畫推廣學校，表演者為參與學生）
甲：比賽連鞭就卜開始啊，汝佫咧食什麼？(著急的表情)較緊ㄟ啦。
乙：好啦！好啦！我來啊啦！
甲：按呢咱就較緊來開始。(二人假影清喉嚨)
甲：古錐也！
乙：嫣頭也！
甲＆乙：上台行禮。（向觀眾行禮）
甲：欸！汝tha7 拄啊是咧食什麼？
乙：汝真正是「目睭皮無漿泔」，這就是「頂港有名聲，下港有出名」，上有台灣味的「庶饈仔」--「米芳」！
甲：「米芳」？看汝食徦sung7 sung7叫，喙瀾cham7 cham7 滴，若像咧真有滋味，敢真正茲爾好食？
乙：咱台灣的「米芳」好氣味，芳芳甜甜真紲喙，勿會 油勿會 燥食勿會 畏，外國的「爆米花」是無地比。
甲：汝是講咱台灣的「爆米芳」比外國的「爆米花」佫較好食？
乙：「規叢好好—無錯」！咱台灣的「爆米芳」是蓬萊米加麥芽膏做的，勿會 像外國的「爆米花」 燥徦卜死，呣免一面食一面配滾水，食濟嘛勿會 變肥！呣信汝食看mai7咧！（挈米芳分予甲）
甲：（雙手比叉仔呣敢挈。）多謝多謝真多謝，汝的心意我受領，呣佫頂懸全喙瀾，汝的米芳我呣敢食！
乙：欸欸欸！咱二人今仔初相會，我是剖腹來交陪，好物仔分汝食一下，沒想kau3汝看我無目地。
甲：無啦！無啦！我只是想講：米芳外口滿滿是，一百來買就規大堆，汝一塊食了猶無夠氣，我呣通佮汝來相爭。
乙：呰塊米芳有錢就無地買，包汝點燈仔火嘛無地揣，汝呣通共「鑽石當做玻璃，夜明珠看做電火」。
甲：是按怎講--呰塊米芳有錢就無地買？
乙：呣是我「賣茶講茶芳，賣花講花紅」，今仔卜有呰塊爆米芳，生產的過程就愛百偌工。
甲：汝勿愛 佇遐咧「一支喙，胡累累」，烏白臭誕歕雞閨。
乙：欸欸欸！汝「一句話，三斤六重」，真正是看阮「貓的無點」。
甲：我聽汝佇遐咧「蟾蜍展氣功—膨風」！頂擺阮學校叫一个阿婆來爆米芳---。
乙：報紙寫的就是恁學校哦！
甲：到旦汝則知！迄个阿婆爆米芳一擺嘛則幾分鐘爾爾！聽汝佇遐咧「青盲的放炮—亂誕」？
乙：汝真正是「胡蠅戴著龍眼殼—蓋頭蓋面」。汝講的是「爆米芳」的過程，啊我問汝咧，遐的「米」是按怎來的？
甲：這—這—這我呣敢「查甫人合乳帔仔—未博假博」，汝講較清楚啦！
乙：呰塊米芳用的米，是我年頭先播田，三不五時佫愛去巡田挱草，顧卜一百工，等徦稻仔大粒佫飽穗，則會當割稻仔收成，然後曝穀仔、去粗糠，則有通好挈我家己種的米來「爆米芳」。
甲：汝啊會曉種稻仔哦！真正是「烏矸仔儲（te2）豆油，無地看」！
乙：汝講呰塊米芳汝卜去佗位買？ (足受氣的面腔)
甲：歹勢啦歹勢！是我「落車頭，無探聽」，呣知影汝的本事茲呢大。
乙：人講：「年頭就愛飼雞栽，年尾則有通做月內。」我若是年頭無播田，今嘛哪有米芳通「淡sam2 」(足正經的面腔)。
甲：啊汝種稻仔的過程佮感想如何？呣就講來予逐个鼻芳一下！
乙：唉！迄工咧播稻仔，是「日頭赤炎炎」………。(足悿的感覺)
甲：「日頭赤炎炎，就愛隨人顧性命」！
乙：囡仔人有耳無喙！我是講：迄工「日頭赤炎炎」，曝徦我大粒汗、細粒汗，插萌仔插徦我腰酸背痛。
甲：汝真正是「坐轎的呣知影扛轎的艱苦—到旦汝則知」，呰擺拄著一擺教示學一擺乖，予汝知影作穡本來就無輕可，看汝後擺敢佫「食米呣知影米價無」。
乙：莫怪古早人講：「一粒米，百粒汗」。
甲：所以講：咱「食果子，就愛拜樹頭」。
乙：「食米飯，就愛敬田頭」。(呰个時陣，甲挈出壽司仔偷食)
乙：誒！誒！誒！啊汝是咧偷食什麼？
甲：「壽司仔」啊！汝卜食一喙否？
乙：多謝！多謝！（雙手比叉仔呣敢挈。）
甲：這溫若有錢無地買的呢！
乙：汝是講：這壽司是……
甲：用我家己種的米做的！
甲：古錐也！
乙：嫣頭也！
甲＆乙：落台行禮。（向觀眾行禮）
(轉去主目錄)
沒有留言:
張貼留言