2011
05041605來去嘉義遊八景
來去嘉義遊八景
甲：（唱歌—來去台東曲調）汝若來嘉義，請汝斟酌看，出名紅毛埤猶有七彩噴水池，八掌溪邊--散步唱情歌。彌陀寺，義渡碑，射日塔景緻。文化中心杉池—藝文有名聲，車頭北門驛，全省有出名。汝若來嘉義，請汝相招伴，全台第一城，予汝心快活！
全台第一城，予汝心快活！
乙：好聽佫袂跳針！借問下，汝拄cia4講咱嘉義是全台第一的「玩具反斗城」，敢會當搓我去爽？
甲：che2 che2 che2！啥麼「玩具反斗城」，汝真正是「麻餈師父」？
乙：啥麼意思？
甲：欠舂啦！（拳頭拇作卜舂人的款）
乙：汝呣則是「矮人爬厝頂--欠梯」！
甲：好啊啦！汝勿愛 佫佇遐咧烏白講。
乙：講正經的，咱今仔日參加嘉義市的答喙鼓比賽，是卜來講什麼？
甲：汝是耳空重，抑是臭耳聾？我tha7拄啊已經唱予逐个聽了啊，汝攏無咧注意聽！
乙：汝是講咱今仔日卜講的主題是---
甲&乙：(扑開書幅)來去嘉義遊八景！
甲：阮兜蹛佇在北門車頭附近，今仔日我就先來紹介北門驛！
乙：汝是講阿里山火車的起站是否？
甲：著啊！講著阿里山的火車，算起來（是）世界有出名，因為伊呣但會爬山，佫會碰壁倒退行。諸羅北門驛是大本營，沿著竹崎來起行，若有坐過的攏知影，風景是媠徦無地看。
乙：我看伊車頭舊舊，鐵枝路狹堵堵，火車頭佫黑嚕嚕，想講伊一定普普霧霧，煞呣知影伊嘛有特別的本事。
甲：今嘛知影猶會赴！
乙：後一站汝卜chua7逐个去佗位？
甲：來到北門驛，就愛一空掠雙隻！順紲去對面的文化中心行行看看咧！
乙：哦！我知！我知！文化中心是日本時代東亞地區上大的「杉池」，自古早時代就是嘉義八景之一。
甲：嘉義文化藝術真正好，書畫雕塑攏是寶，出名葉王交趾燒，油畫上媠是陳澄波。文化中心石猴排規路，博物館收藏多用途，管樂節推sat4有知名度，予嘉義成做「藝文的京都」。(京都意象是嘉義市長的施政目標)
乙：汝當時知影茲濟物件，真正是「烏矸仔貯豆油—無地看」！
甲：汝真正是「坐轎的呣知扛轎的艱苦--到旦(擔)汝則知」
乙：恁共看覓咧，呣則共伊謳咾兩句爾，伊的尾椎就翹赫懸，有夠臭屁！（搖頭）好啊啦！紲落來，咱是卜紹介佗一位？
甲：嘉義公園好景致，史蹟資料館有意義，射日塔風景真正媠，植物園佇伊隔壁邊。相招散步紅毛埤，天星月色映潭水，蘭潭後山好空氣，爬山運動上趣味！
乙：好啊！好啊！汝「阿公爬山—邊仔喘」，換我。
甲：汝若愛講就讓汝講！
乙：八掌溪邊彌陀寺，透早鐘聲傳四時，黃昏夕陽真正媠，義渡碑有溫暖的人情味！
甲：所以講：嘉義雖然是一个小城市，呣佫伊有溫暖的人情味，佇茲生活是快活佫四序。
乙：大通七彩噴水池，雞肉飯出名好氣味；暗時文化路踅夜市，人客擠（kheh4）徦滇滇滇。(註：中山路古早叫大通)。
甲：聽汝講徦哩哩嘞嘞，腹肚煞一直枵糟。汝嘛較緊chua7我去食一寡好食物仔。
乙：汝喔！「講著食，蝨母就呣肯掠」，踦佇邊仔喙箍一直搐，實在有夠歹看。汝嘛小等一下！共話講予煞，落台了後據在汝按怎食。
甲：好啦！好啦！(足勉強的感覺)
乙：嘉義有溫暖的人情味，街頭巷尾若家己，百姓熱情無地比，伊是快樂的小城市。
甲：八景出名好景致，藝文京都真拚時，汝若有盈來嘉義，相招來逸陶免細膩。
甲：***。
乙：***。
甲＆乙：落台行禮。
(轉去主目錄)
沒有留言:
張貼留言