2011
05022154媒人婆仔揣頭路
媒人婆仔揣頭路
乙：誒！踮佇古早的年代，我媒人婆的功勞是人人知，呣管生得媠抑禾黑，攏嘛靠阮來安排。呣佫今嘛時行自由戀愛，男婚女嫁呣免我紹介，害我雖然有「胡銳銳的口才」，呣佫嘛仝款做無路里來，無出來揣一下仔頭路煞勿會 使。歹勢，我呀未自我來紹介，我姓包名滿，人攏叫我包滿姨仔，當然我咧做媒人嘛絕對是包恁滿意。
甲：包滿姨仔！汝今仔來阮「永信房地產」有啥麼貴事？敢是卜來看厝？
乙：無啦！無啦！ (足歹勢的款)
甲：汝今仔遮罕行，是卜踦家抑是店面？呣就講來予阮參考看mai7啊？
乙：呣免啦！呣免啦！ (緊卜阻擋的款)我無卜看厝啦！
甲：按呢汝是卜來共阮內底的人牽親情？
乙：嘛呣是啦！呣是啦！ (歹勢歹勢佫無意無意的表情)
甲：抑無，汝嘛講看是按怎？我通好替汝服務？
乙：(看頭看尾歹勢予別人看著的表情)恁遮敢是有欠人？
甲：hen啊！汝若會知影！(小寡躊躇一下)包滿姨仔！汝共人牽親情就已經無閒叱吒，佟時開始有呰種引頭路的服務？
乙：(掩甲的耳空細聲仔講) 呣是啦！是我卜來揣頭路的。
甲：啥？媒人婆啊卜來阮「永信房地產」食頭路？我敢有聽呣著？
乙：「規叢好好—無剉」！
甲：這----萬萬不可！
乙：汝敢是驚我哄人客勿會 倒？這--汝呣免煩惱，較早我共人牽親情的經驗赫爾好，做「牽猴仔」(仲介)對我來講算是足輕可。
甲：雖然汝「牽親情」工夫佮步數，對推展業績有幫助，呣佫………
乙：我包滿姨仔有真懸的知名度，若是來恁遮食頭路，「永信」扑廣告呣免揣model，汝猶咧考慮是啥緣故？
甲：雖然汝歕雞圭的工夫對業績有幫助，呣佫「永信」的形象嘛愛顧，若無人客若買賣爭(khin5)紛惹事故，破害公司的名聲顛倒魯。
乙：恁呣通看阮「貓个無點」，「牽猴仔」佮「牽親情」是仝道理，以我呰枝「媒人喙，胡銳銳」，只要出馬講生理，厝連鞭嘛賣出去。
甲：汝只要講予對對，紅包趁了就無汝的事誌，呣佫阮「永信」呰二字，猶想卜長期經營落去。
乙：若卜「牽猴仔」做生理，就愛膨風歕雞胿，臭誕一下若有算啥麼，這汝根本就免考慮。
甲：人講事業發展卜順序，公司的形象就愛注意，若交予汝呰枝「胡銳銳的媒人喙」，雖然暫時有生理，呣佫萬不利公司的信用扑歹去，卜來反悔就已經勿會 赴飼！
乙：勿會 啦！勿會 啦！我咧講話絕對會細膩，話頭話尾攏會足媠氣（khui3），絕對勿會 佫空喙哺舌，「牽猴仔」應該是勿會 漏氣（khui3）！
甲：人講「食著藥，青草一葉；食呣著藥，人蔘一石。」我若倩汝入來做，患勢生理無做著，佫愛不時惹風波，恐驚是無屆算會合。
乙：我媒人婆也遮出名，卜引頭路人煞無卜倩，我敢真正遮歹名聲？汝嘛講看是按怎？
甲：今嘛的消費者，買賣進前攏會先探聽，汝若做了有tin4 tann5(登撣—差錯)，外口是會傳徦真歹聽，呰種代誌一擺就食勿會 凋 ，無彩阮「永信」呰幾年建立的名聲。我當然嘛無想卜「倩鬼挈藥單」！
乙：汝嘛呣通講徦遮歹聽，共我留一寡面子予人探聽，我會悔改洗清我的歹名聲，呣敢佫臭誕烏白cuann3！
甲：人講：「飯會使濫擅食，話是勿會使濫擅講」！
乙：白賊話若講傷濟，連「雞看就會扑咯雞，狗看就會吹狗螺」。
甲：講白賊話雖然會當騙人一時，呣擱「暗路行久總會拄著鬼」。
乙：有一工事誌若是來「出破」，gau3（到）時就真歹看。
甲：其實「假曲，是絕對唱勿會落調」，雖然「臭誕免繳稅」，呣佫「膨風是無底」。
乙：所以，雞胿呣通歕傷濟，豬頭皮嘛勿會使cuann3了傷超過，尤其是絕對勿會使講白賊話，若無下場一定是悽慘佫狼狽。
(轉去主目錄)
沒有留言:
張貼留言