2012
05162040阮若扑開心內的門窗
阮若扑開心內的門窗
甲：(唱--阮若扑開心裡的門窗曲調)「阮若扑開心裡的窗，就會看見心愛迄个人，雖然人去樓也空，總會暫時予阮心頭輕鬆」。
乙：誒！你今仔日的心情袂壞哦！佫會唱歌弄曲。
甲：啥款！袂歹聽hoon7！
乙：袂壞啦！
甲：毋是我「賣茶講茶芳，賣花講花紅」，呰擺我去參加歌唱比賽，一定會當得獎做頭人！
乙：人講「別人呵咾一蕊花，家己呵咾爛冬瓜」，共你褒二句仔，你就一支尾椎翹徦半天懸(高)！
甲：抑你頭拄仔無是講好聽。哪會佫「未啉假醉，未講就大心氣」，「一句話，講徦三斤六重」。
乙：你毋通「食無三把蕹菜，也想欲上仙天(西天)」，明明「無三寸水，佫想欲扒龍船」，我講的佮你想的，是「一丈差九尺」！
甲：無你嘛講看差佇佗？
乙：我是講呰條「歌」寫了袂壞，和啥人「唱」的無牽連。
甲：你的意思是嫌我「唱歌」牛聲馬喉無好聽。
乙：你毋通烏白牽拖，自頭到尾我攏無講你「唱歌」歹聽。(轉身對觀眾說)人講「惹熊惹虎，呣通去惹著赤查某」，抑是毋通得失伊則好！
甲：你對我「唱歌」有意見？
乙：(激空激憨的表情)無啦！無啦！我是對呰條歌的「歌詞」有意見。
甲：你有啥看法？
乙：「歌詞」佮今嘛的環境差傷遠。
甲：按怎講？
乙：換我唱予你聽。
甲：你是毋通「袂曉挨絃仔顧绞線，袂曉唱曲顧噴瀾」。
乙：(唱--阮若扑開心裡的門窗曲調)「阮若扑開阮兜的窗，外口（的）空氣實在臭死人，工廠烏煙一直放，佫有機車、汽車製造的汙染」。
甲：你唱的干旦有淡薄仔道理呢。
乙：猶佫有咧，逐遍若出門，看著外口的環境心就酸。
甲：你是看著什麼？會當講予逐家聽一下否？
乙：唉！「人若咧衰，種瓠仔就會生菜瓜」。
甲：你是衰按怎？毋就講予逐家聽？
乙：(唱--阮若扑開心裡的門窗曲調)「阮若散步欲去公園，一路行來就會腳手軟；(甲：是按怎？)旦仔出門幾步遠，踏著狗屎只好較緊佫來轉。(甲：喔！)糞圾、狗屎歹按算，踏著予人心酸酸。(甲：唉！)阮若散步欲去公園，一路行來就會腳手軟」。
甲：原來是按呢哦！
乙：著啊！本底是歡歡喜喜來出門，煞因為踏著狗屎，心情煞來罩烏雲。按呢，你敢佫玩會落去？
甲：當然嘛玩袂落去。其實，你講的嘛是我的心聲。
乙：你嘛有經驗哦？
甲：頂遍我阿爸chua7阮去劍湖山，一落車阮就（唱）衝、衝、衝，挈出勇氣向前衝。
乙：唉呦！危險哦！真正是「青盲的毋驚槍」，行路進前愛看分明，若無跋倒就真梟獍。
甲：呸！呸！呸！你真正是「烏鴉喙，胡銳銳」，「見講就對對」！
乙：若無注意看塗跤的物件，按呢死的就毋知影。
甲：我去踏著芎蕉皮，趨一下煞跋落去水溝仔底，規支腳石膏礦欲三個月。
乙：若按呢，是有影較衰尾！
甲：佇遮，阮欲拜託各位鄉親父老兄弟姊妹，環境是咱逐家的。
乙：若是牽狗漩尿屎，紲手愛處理予清氣代；糞圾欲撣照安排，人人歡喜笑咳咳啊笑—咳—咳！
(轉去主目錄)
沒有留言:
張貼留言