2012
05162031精神快樂上好額
答嘴鼓比賽腳本
【精神快樂上好額】
我比別人較認真，我比別人較拍拚。為啥物？為啥物？比人較歹命？淒涼的跤踏聲，愈騎心愈疼。啊…啊… 命運－命運的跤踏車。（唱歌）
阿榮：是講阿慶啊！平常時你攏歡頭喜面，為啥物今仔日憂頭結面？（懷疑狀）
阿慶：唉！講起來話頭長！咱猶是先共逐家問好。
阿榮：我是阿榮
阿慶：我是阿慶
合 ：逐家平安逐家好（行禮）
阿榮：著啦！阿慶啊！你到底是發生啥物代誌？（懷疑狀）
阿慶：講著這我就厭氣，想欲叫阮阿爸買一台跤踏車就袂用得，真正是十二月睏厝頂。（生氣）
阿榮：喔！有夠（凍霜）就著啦！恁阿爸可能毋知影，阮阿慶啊，想欲響應政府的『節能減炭』的款？是講跤踏車你敢毋是有一台矣？
阿慶：這台莫講也罷！老早就嚶嚶uainn-uainn、si-si-suainn7-suainn7矣！
阿榮：哎呀－無魚蝦嘛好－會使騎就袂bai2矣！無啥物好比較的。（安慰）
阿慶：啥物袂bai2，你看蹛佇隔壁的阿美啊，出門坐－米奶的，身軀穿鱷魚，鞋仔是六兩的；皮包仔是LV的，對頭到尾攏是名牌，金光閃閃，實在予人足欣羨的。（羨慕狀）
阿榮：唉！有的人第一代是儉腸凹(neh)肚、第二代就長衫散步、第三代就要典田賣租。（感嘆）
阿慶：你是佇咧講啥物番薯箍？（疑問）
阿榮：我是講物質的生活毋是上重要的，重要的是你生活過了有快樂無？
阿慶：我講天、你講地、我講鱟杓，你講飯篱(le7)。（生氣）
阿榮：好－好－好，莫受氣，等一下我tshua7你去一个所在。
阿慶：是欲去tai2(佗位)？
阿榮：來去－家扶－你就知。
阿慶：咦－是欲共啥扶起來。
阿榮：唉喲！毋是啦！我是講「家扶中心」的家扶，毋是共siang2(啥人)扶起來啦。
阿慶：唬！好佳哉！我當作是siang2跋倒咧，害我心肝頭掣(tshuah)一下。著啦！你tshua7我去遐(hia)是欲創啥？
阿榮：做義工啊！
阿慶：啥物？做義工───？（懷疑）
阿榮：是啊！等咧到遐你就知啦。遐的囡仔，有無爸無母的孤兒；有雙親離緣的；有的是厝裡經濟較bai2，序大人攏出外去趁錢的！真需要人的關心佮照顧。（有愛心）
阿慶：小等一下！這佮買跤踏車有啥物關係？（懷疑）
阿榮：你想看覓咧！咱雖然無阿美啊in兜遐好額，毋過，爸母嘛是共咱寶嗲嗲(te)，惜命命，驚咱寒嘛驚咱熱，食穿閣免煩惱，講起來你是毋是加誠幸福？
阿慶：喔－聽你講起來閣真有道理，親像阮阿母捌共我講過：「人比人，跤腿比煙筒，真正氣死人。」一點仔都無毋著。（認知）
阿榮：你看，你這馬穿的鞋仔，敢毋是新買的？
阿慶：有影呢！是新的！阮阿爸買的！
阿榮：後擺咱若欲受氣，就愛先想看覓，立場小換一下，心情就會無仝款。
阿慶：我知矣，咱不管好額、散，攏愛用感恩佮滿足的心，關懷家己嘛愛疼惜別人！
阿榮：這馬你知影一个人過了有快樂無？是完全對自己的想法、態度(thai7-too7)佮做法去決定的。
阿慶：有道理！決定快樂，是對我的心開始。
阿榮：袂bai2喔~我講一个影，你就生一个囝，學了真緊嘛。（讚美）
阿慶：著！對這馬開始，我莫閣怨天怨地怨家己較細个，猶是「好好仔讀冊，好好仔生活」較實在。（認知）
阿榮：這馬的阿慶啊真正是「烏矸仔貯豆油－無地(te3)看喔」（讚美）來！這罐請你，咱這馬就來去做義工！
阿慶：好！行！
合 ：毋通欣羨著別人，用心計較無彩工；
安份守己鬥相共，心情就愛放輕鬆；
做人做事愛有量，歡喜滿足規世人啊規世人。
阿榮：阿榮
阿慶：阿慶
合 ：米奶、六兩無算啥，精神快樂上好額。
合 ：感恩喔（行禮）
(轉去主目錄)
沒有留言:
張貼留言