答喙鼓：嘉義舊名諸羅山

 2012

05162050嘉義舊名諸羅山

736嘉義市100年答喙鼓比賽腳本

嘉義舊名諸羅山

登場：我是紅茶、我是豆花，兩人做伙上台共大家行禮。

紅茶：喂！請自我紹介予好勢，啥物叫做𠢕(gâu)花！

豆花：豆花佮𠢕(gâu)花，差遐爾濟！你哦，臭耳聾𠢕(gâu)彎話。

紅茶：是你家己講話親像缺喙兮咧歕鼓吹，落風兼涸涸(kho̍k)涗

(suè)，紲講我臭耳聾𠢕(gâu)彎話。

豆花：好啦！好啦！莫先祙開始，咱二个就佇遮咧掀腳底皮。

紅茶：咱既然來到貴寶地，我就先問你一个問題。

豆花：做你問，誰怕誰(國語)。我豆花毋是刣無肉的膨風水雞。

紅茶：你敢知影咱嘉義舊名是叫啥物貨？

豆花：嘉義舊名諸羅山，這个問題連三歲囡仔嘛會。

紅茶：無錯(剉)－歸欉好好攏佇咧。按呢擱再問你第二个問題。

豆花：若講到咱嘉義，無論啥物大大細細，考會倒我豆花的人是無幾个。

紅茶：我看你是尚𠢕(gâu)佇便所彈吉他－臭彈免納稅。

豆花：閒話莫講遐爾濟，第二个問題是啥物貨？

紅茶：咱嘉義的舊名是按怎哪會叫做諸羅山呢？

豆花：因為咱嘉義山真濟，而且山是一沿一沿相硩，所以講諸羅山的名就是因為諸山羅列。

紅茶：你嘛莫講笑詼，看到匏仔就給當做是菜瓜。

豆花：抑無換你來說(suè)。我毋信司公會捌比和尚較濟。

紅茶：諸羅山本名叫做「Tirosen」，伊是平埔族話的番社名，嘛是山名，佮「諸山羅列」無關係。

豆花：若按呢是按怎「Tirosen」會叫做諸羅山呢？

紅茶：「Tirosen」頭先漢人是叫「豬玀山」，後來改做「諸羅山」是因為讀起來較文雅的關係。

豆花：聽你講起來是有淡薄仔道理。抑無換我來問你。是按怎諸羅後來哪會改做嘉義。

紅茶：因為諸羅是番仔名，後來漢人來遮，就共改做嘉義較好聽。

豆花：若按呢，是按怎哪會改做「嘉義」這个名？

紅茶：這嘛……；可能佇(in)故鄉過來的人攏是「家己」，毋才號「嘉義」這个名。

豆花：你嘛莫共豬母牽對牛墟去烏白行！講一个影就生一个囡，擱炸甲這好聽！

紅茶：抑無你講是按怎，諸羅哪會變成是嘉義城？

豆花：因為佇清朝乾隆51年的時陣，台灣發生一件驚天動地的「林爽文事件」。

紅茶：發生事件，是按怎就愛改名？

豆花：因為諸羅的人民協助清朝守牢這个城，乾隆皇帝為了「嘉獎諸羅的忠義」，所以賜「嘉義」這个名。

紅茶：按呢，咱嘉義就是皇帝所賜的名，莫怪這呢好聽。

豆花：毋若按呢爾爾，無講你毋知影，咱諸羅嘛是清朝時代臺灣第一个建設的城。

紅茶：原來咱嘉義有遮濟光榮的歷史，害我聽甲險險倒摔向。

豆花：知識是萬底深坑，毋啥物好驚惶，所以大家攏無輸贏。

紅茶：若按呢，咱有閒就較捷來去嘉義史蹟資料館看看行行。

豆花：無毋對，遐有真豐富的嘉義歷史資料文件。

謝場：紅茶、豆花感謝大家用心聽，向望噗仔盡量拍予大聲。

(轉去主目錄)