2011
05290943祖傳祕方
祖傳祕方
甲：（敲鑼三下）「來來來！看看看！緊來緊看，慢來汝就減看一半；今仔汝若未赴看，記咧愛買錄影帶，看我倒底是安怎誕。」
乙：(從旁邊行出來，目睭從甲的頭看徦腳)ㄟ！我看汝「火燒豬頭—面熟面熟」，哪像ㄟ佇佗位看過？汝是迄个迄个…(甲佇邊仔一直點頭)人看人呵咾、鬼看鬼跋倒的「貴寶」。(甲聽一下險啊跋倒)
甲：呣是啦！汝「目睭扒予金」，「看予清，認好明」。看我後壁寫啥？
乙：(甲將身軀斡過來予觀眾看，乙恍然大悟)啊！我知！我知！汝是「頂港有名聲，下港有出名」的「王祿仔仙」。
甲：「無剉--規叢好好」，今仔小弟來到（kau3）貴寶地，有心卜佮逐个來交陪，祖傳的祕方、獨門的藥劑，今仔佇茲俗俗啊賣！」
乙：啊汝今仔是傳什麼仙丹妙藥卜來賣？
甲：呣是我「賣茶講茶芳，賣花講花紅」，今仔呰三項，包汝「囡仔食了好藥飼，大人食了笑微微」！
乙：誒！汝呰支「王祿仔喙」「胡蕊蕊」，講話是空喙哺舌，芭樂票烏白開，穩當擱咧歕雞胿。
甲：呰三帖藥仔有錢就無地買，包汝點燈仔火嘛無地揣，汝呣通共「鑽石當做玻璃，夜明珠看做電火」。 (從袋仔挈出三罐藥仔)
乙：「黃、綠、紅」，這咁呣是最近上時行的Madonlaw的廣告。
甲：算汝猶擱有淡薄仔理解，無將「珍珠當做老鼠屎」。
乙：想勿會 夠汝茲逮會著時代，真正是「黑矸仔儲豆油—沒地看」。
甲：呰三罐藥仔若買一罐是無夠氣，我呰一擺三罐一組做夥俗予汝！
乙：汝佇茲講徦霧煞煞，這價數到底是安怎？
甲：今仔咱二人初相會，生理免做來交陪，祖傳祕方做見面禮，三罐二百共俗俗仔賣。
乙：人講：「買著俗貨，較贏咧做工課。」這當然嘛愛趕緊買。
甲：著啦！著啦！呰三罐「運命的青紅燈」買轉去，包汝子孫有福氣。
乙：這藥仔哪會茲稀奇，會當致蔭著囝兒。藥帖的方法佮時機，倒底是卜安怎是？
甲：這藥方呣免食、呣免貼，只要掛咧汝兜的大廳，逐工目睭金金看，用心體會就知影。
乙：聽汝講徦花葛葛，阮是「鴨仔聽雷」聽攏無！
甲：今仔「頷頸生瘤—拄著啊」，阮就捯捯啊解釋予汝聽。
乙：詳情聽說！
甲：呰三罐「黃、綠、紅」，代表「運命的青紅燈」(挈出青紅燈的標誌)，黃的予咱充滿「活力」，青的是「和平」，紅的代表「熱情」。
乙：這色彩講起來擱誠有道理，抑呣過內面倒底是什麼？
甲：代誌就已經到茲來，我祖傳的祕方只好來公開，汝就骹尾绁予栽，聽阮捯捯解釋來。
乙：我已經傳便便等汝來。
甲：(扑開黃色的藥罐仔挈出捲軸)這第一帖是「飯後行百步，較好行藥鋪。」
乙：汝是講：人若捷捷做運動，身體自然就健康。
甲：著著著！(扑開綠色的藥罐仔挈出捲軸)這第二帖是「心肝放予清，知足就寬心。」
乙：這什麼意思汝呣就「開破」予阮聽。
甲：人講：「醫人先醫心」，人若知足就勿會 想東想西厚操煩，嘛勿會 佮人冤家計較想空想縫，心情若輕鬆，氣色自然就無仝。
乙：啊紅的咧？
甲： (扑開紅色的藥罐仔挈出捲軸)這第三帖是「快樂家己揣，一笑治百病。」
乙：若安呢呰三帖祕方咱若有瞭解，身體就勇健擱自在，逐工快樂笑咳咳，生活充滿希望擱精彩。
甲：著啦！著啦！佇茲阮卜送逐个幾句話--
甲&乙：ㄟ！(扑竹板)「快樂是咱家己揣，無煩無惱治百病。捷捷振動則有睏尾，身體康健食百歲啊食—百—歲。」
(轉去主目錄)
沒有留言:
張貼留言