2011
05290815日頭赤炎炎，隨人顧生命
＜日頭赤炎炎，隨人顧生命＞
甲：世間代誌，無奇不有。
乙：有的予你氣甲腹肚脹，
甲：有的予你笑甲流目油。
乙：我嘛定定攏安呢咧想：
甲：想啥麼？（張大眼，疑問樣）
乙：有寡代誌根本是無理由……...（搖頭樣）
甲：我是○ ○ ○
乙：我是○ ○ ○
合：答喙鼓，佇遮共逐家請安問好，逐家好！
甲：咦！○○也，是安怎？昨暝去做賊仔ㄛ！
哪無〜規个面哪會像「媽祖著賊偷－失神失神」咧！
乙：唉！話若卜講透機，我目屎著撥袂離。（一副無精打采樣）
甲：嗯？（疑惑樣）
乙：俗語講：「兄弟若仝心，烏塗變成金」。
甲：這甲金仔有啥麼關係？
乙：講予你識，喙鬚著好扑結。
甲：你無講，我哪會知〜。
乙：若講著昨暝，心肝頭著規腹火。
甲：安怎講！
乙：昨暝予阮阿兄用伊彼台天下無雙兮的「烏桌禾黑」（oo1 to3 bai2）
載。（機車聲）
甲：酷喔！後來咧。
乙：經過檳榔擔仔的時，看著檳榔西施頂頭穿「比基尼」、下跤穿「迷
你裙」（唸國語），害阮阿兄一時煞罩面具兼放煙霧，甲車騎對安全
島去。－碰！（音效）
甲： ㄛ！厲害ㄛ。車咧？
乙：車！（抬高聲調）撞甲咪咪貌貌，送修。
甲：啊！你哪無？？？（一副好奇樣）
乙：佇迄的時陣，「日頭赤炎炎，隨人顧生命」，危險！跳走。（做動
作，跳走樣）
甲：哇！偶像（唸國語，崇拜樣），你阿兄咧？
乙：阮阿兄ㄛ，是〜面仔腫歪歪、目箍擱畫色彩，親像鍾馗下凡來。（擺
出鍾馗的架勢）
甲：啥？（摸頭搞不懂樣）
乙：煞呣知，人是驚甲面仔青筍筍，禾黑甲有偆（ㄘㄨㄣ）。
甲：哇！你阿兄真是「田嬰經著蜘蛛網－真不幸」。伊人咧？
乙：予ㄛㄧ〜ㄛㄧ送去病院、擱予交警也開罰單。真正是了錢擱兼歹看。
甲：哇！真是「苦瓜燉鰱魚，足可憐ㄛ~！」
乙：阮阿爸講伊是「七月半鴨仔－呣知死活」，差一點著險無命。
甲：人講：求平安較好求添福壽。
※ ※ ※ ※ ※ ※
乙：著啦！著啦！你那會遐晚則來到遮。
甲：我道：一步行、二步走、三步到菜市仔口，遇著一個痟狗。
乙：有予伊咬著嗎？咬著是會著「痟狗症」耶！（緊張語調）
甲：你擱米漿咧！（生氣樣）
乙：ㄘㄟˊ！人、我是講：症頭的症、不是電視彼個「痟狗正」。
甲：無愛睬你啊！（掉頭欲走）
乙：麥生氣啦！氣死驗無傷呢？到底發生啥麼代誌？
甲：人講：千辛萬苦，攏是為著這個腹肚。
乙：這擱甲痟狗、腹肚啥麼關係？
甲：唉！為著欲看阮迄個「水餃西施」，則來市仔「吃東西」（國語）。
乙：我知、我知，是呣是予伊「giat4－lau2；車畚斗」。
甲：則呣是咧！像我若「潘安再世」，甲西施是真適配。
乙：噁ㄛ！桶仔捾來，「A－Tho－Si」。
甲：啥麼意思？
乙：會－ 吐－死。
甲：幾個月啊！當時有ㄝ，我哪會呣知。
乙：有！有你的頭啦！佇當時仔你變成潘安？（停頓）後來咧？
甲：雄雄一台「拖拉庫」駛過來，ㄍㄧ：緊急踏擋仔，運將甲車窗仔
搖落來：大聲喝：「夭壽死囡仔，你是呣是無愛命」。害我心肝差
一點跳出來…….
乙：這你呣著，交通安全攏無遵守，予人罵是應該，著呣通直咧喝咻。
甲：奉勸各位少年家
乙：寶貴性命是咱的
甲：遵守交通新條例
乙：則袂出事叫娘嬭（ㄌㄟˋ）
甲：呣通逮人硞硞遝(ㄗㄨㄥˇ)
乙：予車拖咧四界踉（ㄌㄨㄥ）
甲：交通安全有撇步
乙：遵守規矩袂塞路
甲：千萬個性著愛忍
乙：駛車呣通燒酒啉
甲：則袂目睭起薫暈(ng7)
乙：發生車禍跤手軟
合：啊！跤手軟
甲：我是○ ○ ○
乙：我是○ ○ ○
合：答喙鼓，今仔日著答到遮，感謝各位。（下臺行禮）
(轉去主目錄)
沒有留言:
張貼留言