2012
05162011放學了後
放學了後
嬌：春嬌仔！
明：志明仔！
合：上台行禮，逐家好！
明：我尚愛學校～
嬌：哪有可能？學校一工七節課，
明：對啊！
嬌：你是予老師對第一節罵到尚尾節，
明：ânn ～
嬌：有時仔罵無夠，放學擱留咧罵來湊！
明：春嬌仔！
嬌：敢無影？啊佇學校，予人罵規工，你哪有可能，會尚愛學校？
明：喂！春嬌仔，遮人遮爾濟～
嬌：安怎？
明：妳嘛小替我，留一寡仔予人探聽咧！
嬌：啊無你講～你尚愛學校？
明：我猶袂講煞啦～
嬌：猶袂講煞？
明：我是尚愛學校～放學了後！
嬌：喔～哪安內我就欲信啦！
明：拄才，是妳聽無詳細啦！
嬌：失禮、失禮，是講～放學轉去，你攏咧創啥物！
明：尚重要兮代誌，一定愛隨作！
嬌：嗯～當然！
明：冊包囥咧～
嬌：寫功課！ 明：看電視！
嬌：啥物？看電視尚重要？
明：óo～佇學校上課上規工啊！轉--來～總--嘛會當小可仔輕鬆一下！
嬌：安內講～嘛是有道理啦！
明：六點拄才欲做まんが（漫画）！嘛才看半點鐘爾爾！
嬌：嗯～啊六點半啊，電視好通關啊！
明：哪會有妳這款無愛台灣兮郎？
嬌：我～我～我哪有無愛台灣？
明：啊無～妳哪會叫我關電視？
嬌：這～為什麼關電視就無愛臺灣？
明：妳敢無知影，野球算是咱臺灣兮國球！
嬌：對啊！會當安內講！
明：安內～我哪會當，無關心，六點半開始轉播兮，野球比賽？
嬌：擱看落去喔？
明：臺灣欲愛否？
嬌：欲～
明：安內～？
嬌：看、看、看！
明：（歡喜繼續看電視兮形）
嬌：是講～啊一場比賽差不多愛看外久hânn～？
明：普通時仔，差不多攏兩點外鐘欲三點鐘啦！
嬌：普通時仔？
明：對啊！有時仔平手，會摃欲四點外鐘咧！
嬌：看完嘛差不多愛睏啊！
明：啊妳若會知？
嬌：啊～你規暝冊也無讀，字也無寫，莫怪去學校，會對第一節予老師罵到尚尾仔節！
明：啊～
嬌：喔～莫怪你毋一項進步！
明：哪會無？
嬌：叨一項？
明：我～近視兮度數有進步啦！
嬌：你兮出頭實在有夠濟呢？
明：嘿嘿～
嬌：放學兮時間，毋是安呢用兮啦？
明：放學兮時間，擱有分安怎用喔？
嬌：當然啊！學生兮本分是讀冊，對否？
明：是無毋對啦～
嬌：功課當然愛先寫予完！
明：寫完就會當看電視囉！
嬌：啊！今仔日學兮，毋免複習？明仔載欲教兮，毋免先準備喔？
明：hânn～讀冊遮厚工喔！
嬌：莫怪郎咧講：郎愛教示、牛愛貫鼻！
明：妳毋但有貫耳，擱有貫鼻喔！
嬌：較正經咧啦！
明：好啦！好啦！啊～原來妳就是攏遮認真，成績才會遮好喔！
嬌：其實，你普通時仔出頭遐呢濟，表示你嘛真巧啊！
明：嘿嘿～妳毋甘嫌啦！
嬌：你敢袂想欲予家己兮成績較進步咧？
明：當然會啊！毋過～今也才開始認真敢會赴市？
嬌：有心行，毋驚路頭遠！
明：妳安呢講嘛是有道理！嗯～我愛改變！
嬌：喔！
明：王建民去美國摃球，嘛愛會曉講英語，所以我放學了後，毋通擱干焦一直看電視啊！
嬌：讚喔～換一个想，變一个樣！
明：好啊啦，講到遮，通落台啊！妳擱，共我虧啊啦！
嬌：春嬌仔。
明：志明仔。
合：落台行禮！感謝逐家，擼力！
(轉去主目錄)
沒有留言:
張貼留言