2010
03092054看地圖
未記得佇佟時開始學會曉看咱各縣市ｅ地圖，但是，真確定ｅ一項代誌是佇大學畢業以後囉。
最近，因為最近有二遍佇學校看著高三ｅ學生咧掀地圖才想起家己以早嘛是未曉看地圖。
佇經驗中，會當真確定怹對地圖是非常生疏ｅ。因為咱目前ｅ教育制度並無教咱按怎看台灣各縣市ｅ地圖；咱ｅ學生囝仔根本就未曉使用地圖；更加毋知也地圖頂面ｅ編號和編碼所代表ｅ意思是啥麼，所以我自動過去幫忙怹，順續教怹使用地圖ｅ方法。
「妳欲揣佗位？」
「台南師專。」
「有住址否？」
「佇台南市樹林街二段33號。」
「哦，按呢咱先揣地圖上ｅ街路名索引，『樹』幾劃？」
「一、二、三、四……十六，十六劃。」
「十六劃……有啊，佇F9，來，咱看，佇地圖邊仔頂面和下面有ABCDEｅ字母，二爿邊仔有12345ｅ數字，咱先揣F字母ｅ所在，順F落來看到9ｅ所在，範圍就賰一個格仔niania……樹林街……有啊，台南師專嘛揣著啊。」
「路真複雜，毋知欲ui佗去？」
「妳欲按怎去？」
「阮爸爸欲駛車載我去。」
「您住佗位？」
「斗南。」
「若按呢，咱先來看台南縣ｅ地圖……現在咱看著地圖頂面有真濟ｅ數字，咱看著用四角框仔圍起來ｅ數字，這代表縣道；若是像這個用圓形ｅ就是省道，這個內底印"1"就是代表"台一省道，就是咱學校邊仔彼條道路……昑仔，咱先看全省ｅ地圖……咱會當看著咱學校邊仔彼條台一省道是按台北市開始，一直落南到屏東ｅ楓港……咱昑仔來看這條ｅ數字，印佇一蕊梅花形內底，代表這條是國道，就是高速公路。咱閣倒轉來看台南縣ｅ地圖……妳看，咱順這條高速公路到台南市附近有永康交流道和台南交流道，咱看樹林街ｅ所在……行台南交流道會卡順路嘛卡好行……妳看，落交流道ｅ縣道號碼是182，意思是講咱若落高速公路了後，咱一定會佇路邊ｅ路牌頂頭看著往台南ｅ路有182ｅ數字，亦就是台南市ｅ東門路，順東門路到圓環，閣順大同路行一塊仔就到樹林街……」
其實，教人看地圖對我來講毋是第一擺，時常若有機會，就會雞婆教人來學看地圖，只是欲hoo怹加學會曉一項工具冊ｅ使用而已。
有佟時仔，教人掀地圖攏用十幾分鐘ｅ時間niania，心內一直咧想，是毋是因為看地圖是一項簡單ｅ代誌，所以咱攏毋免佇學校來教咱ｅ囝仔學看地圖？或是咱本身就生活佇這個所在，根本就無需要教，家己出去行行幾遍矣就真熟矣？或是咱每一個人攏是「秀才不出門，能知天下事」？或是咱攏是「時到時擔當，無米才煮蕃薯湯」，反正「路佇嘴裡」，揣無路ｅ時才問人就會使矣？或是咱ｅ地圖攏印了真清楚，家己看就會矣，所以毋免教？或是咱ｅ交通甚方便，thakusi叫咧就給咱載到位，所以地圖看無無要緊？或是咱ｅ囝仔攏勿學會曉看地圖上好，就卡未phapha走，定定互父母操心，欲去佗位彳亍(chit4-tho5)父母載就好？
咱按看地圖這項代誌，會當了解，除了咱每日生活固定ｅ路線以外，差不多是對外口完全生疏，致使著咱變成『路盲』，到一個所在路頭攏無熟。
另外，咱閣卡真正無法度體會著咱ｅ學生囝仔有人讀到高中a，連怹兜僅單離學校十外公里耳耳(niania)，叫伊家己坐公車轉去，所得到ｅ回答竟然是伊毋知欲按怎坐車轉去。
其實，咱日常生活中需要來學會曉ｅ代誌真濟，但是咱讀冊讀hiah濟冬，到底需要學ｅ是啥麼？甘真正攏欲變成「五穀不分，四體不勤」ｅ「書呆」？逐項代誌上好是「毋知好了了」？或是講「一聲毋知，百般無代」？
1996.03.31
1996.04.15 定稿
沒有留言:
張貼留言