2010
03092052囝[囡]仔冊
四月十九號是我因為參加彰化精誠高中所舉辦ｅ三工輔導知能活動佇鹿港做客ｅ上尾一工，真正感謝主人陳賢俊 先生(鹿港 高中ｅ 老師)因一面之緣熱誠招待三工。
彼工早起，六點半卡加起床，因為時間猶略仔卡早一點仔。因此，佇洗面、刷口之後，就繼續看書房內冊架仔頂互怹兜囝仔咧看ｅ囝仔冊。因為我一直攏非常愛看囝仔冊，所以佇彼套芝麻街所編ｅ雙語教育啟思圖書中揣冊來看(雖然彼套冊冊名是用中文和英文寫ｅ，但是我並無看中文名)，第一本提起來看ｅ是："I did it." (我做到a)。
冊ｅ內容編排方式是前一半用中文，後一半用英文。大部分，一本冊若有英文內容，我攏會直接看英文故事。
故事是按呢，有一個囝仔咧疊『積木』，第一遍疊無外岏(懸)就倒去a，第二遍改變方法閣疊，這回伊就疊成功a，成功了就講："I did it." 閣來掃土腳、穿衫褲……，每一遍做完一項代誌，囝仔攏會歡歡喜喜講："I did it."
這個故事佇無形中教囝仔做代誌失敗了後愛閣繼續揣卡好ｅ方法來做，佇成功了後，除了心情歡喜以外，用"I did it."這句話來更加肯定家己ｅ成就，按呢佇無形中教咱ｅ囝仔來養成自我肯定及自信ｅ習慣。這個故事更加互我反省著咱家己本身。是毋是因為咱攏無佇做每一件非常平凡ｅ代誌了後給家己鼓勵一下a，因此，咱ｅ囝仔就失去做代誌ｅ快樂，同時嘛對家己ｅ能力失去信心？因為咱ｅ囝仔未曉自我鼓勵，更加無得著序大人ｅ呵咾，所以失去快樂和成就感？是毋是咱叫囝仔鬥(湊)做代誌是應該，囝仔若做無好就罵，肯定囝仔ｅ成就和能力(咱認為這根本無算啥麼)就真凍酸？是毋是咱未記得用每工愛做ｅ代誌來肯定家己才失去快樂，就算講是開一個門、開一扇窗仔門、倒一杯茶……？咱若會當做一項代誌了後，用一秒鐘ｅ時間停落來肯定一下a家己，是毋是會當每工攏過著加卡快樂閣真有意義咧？
這本"I did it." 看完了後，時間猶真早，因此，繼續揣另外一本冊來看，這回看著ｅ是一本冊名叫"Say the magic words." (講神奇ｅ話)
這回，這個故事是一個囝仔看著糖仔，想欲食，就講："Candy." 這時陣就會有一個聲音講："Say the magic words."(咱毋知也這是啥人講ｅ，是囝仔心內想起大人所教ｅ、老師教ｅ或是伊ｅ反省？)故事ｅ囝仔就會馬上換講："Candy, please." 囝仔就按呢得著所欲愛ｅ物件。閣來囝仔想欲過ｅ路去hong擋著，伊就講：「互我過。」這時陣又閣會出現"Say the magic words." 這時陣囝仔就講：「失禮，互我過。」
規本ｅ故事就是用類似ｅ情形佇無形中來教囝仔學會曉禮貌性ｅ用語，親像勞力、歹勢、抱歉、失禮……，來要求別人替伊做代誌。
這個故事除了教囝仔愛有禮貌以外，更加互囝仔佇複雜ｅ人際關係會當受人歡迎。反倒轉來想起咱家己，咱現在人和人ｅ關係愈來愈疏遠，是毋是咱ｅ家庭、學校和社會ｅ教育做無好，致使著咱愈來愈冷漠？
看完冊了後，想欲閣提一本"Say bye-bye."(講再見)來看，但是，看錶仔時間已經無夠通a閣看一本。
就佇這個時陣，陳 老師讀國小ｅ後(候)生入來傳(僎)物件欲去學校讀冊，看我將冊囥(khng3)落去冊架仔，伊講：「彼是囝仔冊。」
這句話互我真大ｅ省思，毋知仔伊講這句話ｅ動機是啥麼。但是我想，是毋是彼是囝仔冊，咱大人未當看，看會互人笑？是毋是咱攏大人a，囝仔冊是教囝仔ｅ，咱攏識真濟，毋免閣學？甘講咱看囝仔冊ｅ時陣未得著心內真大ｅ迴嚮和省思？甘講囝仔冊所代表ｅ是幼稚，無值得咱看？我相信，讀囝仔冊顛倒會引起咱重新來思考著咱家己ｅ思想和行為，因為佇時間ｅ流逝過程中，咱佇每日ｅ煩雜代誌衝擊了後，已經無形中失去咱原有寶貴ｅ物件，咱需要借一寡仔外來ｅ種種因素互咱來重新思考著咱家己，畢竟咱經過世俗ｅ洗禮了後才來還頭看咱卡早無注意ｅ代誌，更加會互咱真深刻ｅ體會和領悟，甘毋是？
1996.04.23
沒有留言:
張貼留言