2010
03272026歡喜講台語(1)
第一節 踏話頭
語言是一個族群的註[1]身份証，是一切文化的總根源，對日常生活的食穿、出外社交、三百六十五行的士農工商上班 做穡 (sit4) 做空課 食頭路、民間婚喪喜慶的風俗等等的一切活動攏需要用著語言，一切地方上所活動的總集合就是 (toh8-si7; ciu7-si7) 文化，和別的所在無仝的特殊活動就變成鄉土文化kah藝術，上會凍註[2]顯示地方特殊性的就是語言，若 (na7) 對家己的鄉土文化以及語言認同性愈岏註[3] (kuan5)，自然愈願意使用家己鄉土的語言，並且以會曉使用家己的語言為光榮，按呢更加會凍顯示出地方的特色。當然，一個鄉土文化水準的岏低會凍用在地人 所使用的語言詞彙做一個指標。假使一個地區有未註[4] (be7) 少的 在地人 使用著民間風俗認為的「禁忌語」(taboo)註[5]的成份愈岏，咱就會認為某一個地區的文化水準真差，時常會講in是「毋註[6]識 (m7-bat4) 字閣註[7]兼無衛生」。
咱對一個人的語言的選擇轉換 (code switching) 會凍看出伊(i1)對某一種語言使用地位的態度，咱嘛會凍對伊的詞彙 (lui7) 註[8] 選擇看出一個人的修養如何、對故鄉的愛有外濟註[9] (ce7)、對工作忠誠度有外岏、認為頭家是好頭家或毋好的頭家、翁仔某的感情如何、對另外一半的看法如何...等等。所以使用語言本身就是咱對事物的觀念以及看法的一種指標。
台語本身就是一個非常優美的語言，凡是教中 文的 老師攏知影，卜 (beh4) 教唐詩和宋詞的時，一定愛用台語吟 (gim5) 讀才註[10]會凍顯示詩中語言音韻運用的優美，也只有用台語才讀會出來「國破山何在」的第一字是仄 (cik4) 聲的詩。可見台語本身嘛是傳承了寶貴的文化遺產，甚至有冊宣稱台語根源於夏朝以及論語是用目前台語的語音來寫的。
自語言的變遷角度來看，除非教育以及學習之間是無任何失真存在，按呢才有可能是真實的代誌。因為語言本身就親像咱人仝款，伊有生命、是活的、有伊的新陳代謝。語音是會因為學習的無完全來改變。
每一個語言的地位和每一個人的生命尊嚴仝款攏是平等的，假使本文若無用台語文來寫，真明顯就是顯示咱的語言地位得未著公平的地位。如果本文受著嚴重的排斥 (thik4)，更加顯示著台語文的地位未凍和世界每一個各別的語言徛 (khia7) 註[11] 平岏的地位。如果本文佇探討的時陣猶原毋 (m7) 敢用咱本身鄉土所使用的語言來寫文章，是毋是代表寫本文的筆者對語言的態度觀念有偏差無法度正確，嘛是「講一套，做一套」的一份子而已？
第二節 台灣地區的語言
世界上的語言至少有三千種 (嘛有講六千種左右) ，每一個語言的地位，除了人為的因素以外，攏是平等的。按照語言的使用人口來講，「講台語嘛會通」的母語人口佔佇世界的排名是第二十三名，「講客語嘛會通」的母語人口所佔的排名是佇三十六名。按照排名來看，咱應該感覺著「講台語嘛會通」是一件值得驕傲 (ngo7) 和光榮的代誌。
咱台灣地區85%註[12]以上的多數人所使用的母語佇一般的情形下是予(hoo7)人通稱做「台語」(Taiwanese) ，當然這個名稱會引起不少的爭論和爭端，會引起政治方面以及族群之間的爭戰。
一般來講，咱是以一個所在所使用的語言做為語言的名稱，咱來看下面的名詞一下：日語、韓語、德語、法語、美語、英語、西班牙語、葡萄牙語、俄 (go5) 語、阿拉伯語、粵 (uat8) 語、藏語、閩南語、閩北語...等等，茲註[13] (cia1) 的名稱攏予咱真清楚in的使用地區。自然佇這塊島嶼 (su7) 上所用的語言就會無形中約定俗成共(ka7)伊號做「台語」，並且真自然的，會將大多數人所使用的語言嘛叫做「台語」。咱來看下面的圖：
圖一：台灣語言語族圖。
咱看著「台語」這個詞有兩種無仝 (kang5) 層次的定義，加上這個島嶼上特殊的政治背景、政治團體以及語族關係，因為無仝的觀念和觀點，致使著爭端四起。因此，「台語」亦有其他的名稱，親像「閩南語」、「台灣閩南語」、「台灣廈門話」、「河洛話」、「鶴佬話」、「台灣鶴佬話」、「台灣漳泉濫」...等等，無論名稱如何，所意指(refer)攏是仝一個語言，本文使用「台語」一詞只是從俗而已，因為這個名稱會使予外行人一下看就會了解「台語」所指涉 (infer) 是佗 (to2) 一款的語言。
當然咱若是提嘉義地區和宜蘭、台北、台南、台中、桃園、鹿港、茄萣、麻豆比較，咱會凍稱呼嘉義地區是「嘉義腔」，這個「腔」是屬佇「南部腔」的下面。「嘉義腔」是以漳州腔為主體的漳泉濫，如果泉音成份加一寡就會變成東石一帶的「海口腔」。相對的，若是漳州腔的成份加卡濟咧，就有可能予人稱呼做「內山腔」。
另外，提嘉義地區的語言來講，嘛有其他的語言存在，親像福州語、客語、原住民語等等，但是茲的語言使用層面真細，大部分只賰 (chun1) 和親人之間使用而已，使用茲的母語的人佇外面攏是「隱形人」仝款，in若無特別向咱提起的話，咱根本無法度知影in的身份。所以本文只介紹多數人所用的語言的音韻系統而已，當然也希望茲的少數母語使用者有人會凍 (tang3) 重視家己的母語，對家己的母語做系統性的研究，並且為家己的母語做文化的保存。
第三節 音韻系統 (phonology)
下面咱就來介紹註[14]「台語」音韻系統。咱會分做 (一) 音節 (cat4; ciat4) 結構 (syllable structure) 、(二) 聲母 (initial; onset; 簡稱做「聲」) 、(三) 韻母 (rhyme; final註[15]; 簡稱做「韻」) 、(四) 聲調 (contour tone; tone; 簡稱做「調」)、(五) 變調 (tone sandhi) 、(六) 合音等六個部分來做簡單的討論。
(一) 音節結構
每一遍咱若是講話的時，是一句一句來講。每一句內底是ui詞組合起來的，詞閣是ui字組合而成的，一個字成為咱講話的時的基本單位。音韻系統就是卜來對字的語音分析來講起。首先，咱來看「寶貝」的「寶」字音節圖，就親像圖二所表示的仝款，按呢咱就會凍真緊來了解著台語的音韻系統。
圖二：台語的「寶」字音節結構分析圖
對茲，咱會凍看著 (tioh8) 台語是一個有聲調變化分別意義的語言 (contour tone language; 簡稱tone language)，和英語的語調語言 (intonation language) 是無仝的。咱咧講話的時陣，每一個音節 (syllable) ，親像「寶貝」的「寶」是一個音節，攏會包括著聲 (initial; onset) 、韻 (rhyme; final) 、調 (tone) 三個成份要素。一般來講，咱台語有17個聲(無含零聲母)、45個韻、7個調。下面咱來繼續詳細的介紹。
註[1] 目前台語文的文字猶是佇(ti7)戰國時代，也希望本文自頭到尾所用的台語文無論是白話音、文讀音或是訓讀音，甚至用拼字攏希望咱看有，也會凍明白本文所卜(beh4)表達的意思，就親像這個「的」的台語文字，上蓋無佇台語界有八種的寫法，佇本文大部分的拼音字是無標聲調，應該對意義的表達未有真大的阻礙。希望咱靠頂下文會凍唸出正確的聲調。
註[2] 其他的寫法有「會當」。
註[3] 這字「岏」是實驗用字，其他的寫法有「懸、高、昂」。
註[4] 其他的寫法有「勿會、袂」。
註[5] 本文所附的英文第一字無大寫代表in普通時會凍用英文小寫的正常表達。
註[6] 其他的寫法有「嘸、口毋、不」。
註[7] 其他的寫法有「佫、擱、復」。
註[8] 彙：音lui7，乃是俗讀的結果，按《廣韻》的歸韻，其音應讀「ui7」。
註[9] 其他的寫法有「儕、多」。
註[10] 其他的寫法有「則」。
註[11] 其他的寫法有「企、豎」。
註[12] 這個數字逐个學者講的攏無仝，自50%到90%攏有人講，當然佇台灣並無經過嚴格的統計，只是以人口數目去推測而已。
註[13] 其他的寫法有「遮、咨、此、呰」。
註[14] 原本台語這個詞佇口語是講「紹介」，因為受著語言交流衝擊，大部分的人已經轉換成講「介紹」。
註[15] 本文附帶的英文名稱會有重覆的所在是因為無仝派系的語言學家因為分析角度無仝款，所用的英文字意思自然定義就會無仝，所以才會產生重覆的情形，所以咱會咱著final出現ti無仝的所在，其他的英文字嘛是有這款的情形，只希望咱若是有機會看著英文原文咧討論聲韻學問題的文章的時陣，會凍真緊進入狀況。
沒有留言:
張貼留言