2010
04042023歡喜講台語序
序
1994年對北部轉來南部以後，就有加減動電腦開始寫台語文佮做一點仔台語的空課。
開始寫第一篇的台語文，完全是起因佇我替台中的台語社拍字和排版的空課時，看著有人寫的台語文實在是傷過毋是款，佇看袂過的情形下，我就開始動電腦寫台語文。
會記得彼篇台語文是完全無斷句，閣攏無標點符號，嘛無分段，一張稿紙寫甲滇滇滇，內底的錯別字閣一大堆。所以，我就開始寫我的第一篇文章〈現代台語文ｅ時代優勢〉。就按呢，一篇過一篇完全義務的寫落去。
當然，佇彼時陣，台語文的用字猶佇戰國時代，每一个人攏有家己的主張。我是無想欲講理論的人，所以，我就佇實際上的寫文章過程內底用一个母語使用者的角度來寫台語文。
因為，佇彼个時陣無啥物台語文的資料，對我來講，一切攏是對零開始。所以，用字免不了會一直咧做實驗，無形中嘛是會去誤用著華語字。像明明想欲拍無字煞去拍成沒字。
自轉來南部開始，我所有寫的物件就攏總是台語的文章。因為，我無愛講理論，所以，我就實際去寫，就是一直寫、一直寫。佇寫的過程中，一直咧解決實際上會去拄著的問題。當然，上大的問題就是用字的問題，到底欲用佗一字才會當予人讀了好讀。啊若講著《歡喜講台語》，自猶未開始寫台語文的時，就已經算開始動工矣。因為，我一直共家己定位佇啥物攏袂曉的人，我干焦專攻台語的聲韻耳耳。論真講起來嘛是一个半桶師的份耳耳，袂曉寫文學性的物件，修辭的文筆嘛無好，就想講寫台語上基本的物件。對我來講，就是聲韻的物件。
我一開始就堅持用台語文來寫，到底寫偌久，我袂記得矣。干焦會當確定的是1997年七、八月左右就寫好矣。
若以歷史角度來看，真正用台語文來寫台語聲韻學方面的冊，無定著，我這本是第一本。因為我知影有人寫過規本的台語小說，嘛有人寫過規本的台語散文。
那會號做《歡喜講台語》咧？因為我想會看規本是台語文寫的人口無偌濟。聲韻學的物件對大學生本身來講就是一科ting7-khong1-khong1的學問，一般的人閣較較免講，袂當直接叫《台語聲韻學》，按呢，看的人會愈少，三想四想就叫做《歡喜講台語》會予人感覺較親切淡薄仔。
這十幾冬來，明知影電腦網路是足好用的物件，一直想欲共寫的物件送上網。毋過，因為我的物件有用著國際音標，檔案予人的話，一定愛有字型才會正常顯示。可惜，網路的使用者攏無字型通好用。我的電腦技術若講著網路的操作就完全無法度矣。所以，捌共〈對半條蕃薯講起〉送予人去上伊的網站，因為字型的問題，我感覺效果無好，所以，就無共傳檔案過矣。
最近，這幾個月，毋知啥物動機，開始耍網路的blog，一直攏失敗，到個半月前才算開站成功。家己一个人一直做試驗，嘛對blog有較熟矣。就共《歡喜講台語》的內容送上網。
雖然，這嘛猶未100%完成，至少，絲仔藝的部分我家己有法度處理矣。才閣一點一滴來解決就好矣。
講甲一大堆，結果，上重要的重點無講著。當初時，堅持用台語文來寫，目的是欲予人會當自修用的，我的對象是台語是母語的初學者。希望in會當靠著看我這本《歡喜講台語》了後，會使對咱的母語有一定的了解，更加希望逐个會使來開始歡歡喜喜寫台語。真正做到「喙講台灣話，手寫台語文」的地步。(2010.04.04囡仔節)
(轉去歡喜講臺語目錄)
沒有留言:
張貼留言