2010
04031914歡喜講台語(13)
2. 非入聲
佇本文，咱分別入聲以及非入聲二大部分是按照in 的韻尾來分別，凡是韻尾是-p, -t, -k, -h歸類做入聲，其他的韻尾攏總歸類做非入聲。因為一般佇押韻的時，攏將入聲歸類做非入聲仝一個韻腳，所以伊只是非入聲的一部分，只因為伊的韻尾無仝，咱特別將伊囥佇另外一個小節來講。
(1) 第一個聲調 (高平調)
聲調的調值只是一個相對性關係所得來的數字，每一個人的發音岏低音範圍是無仝的，所以對我來講，因為我的聲音比較卡低，所以我的上岏音可能是另外一個人的上低音。聲調的岏低音就親像母音仝款，有伊的聲調發音範圍，咱只要會凍清楚分別聲調所帶的意義差別就會使a，毋免講第一聲一定是44值，伊就未凍講55值的調值。因為佇台語來講調值44和55是無意義分別的存在的，佇本文將台語的第一調定佇44值是因為一般咱講台語的第一調和華語的第一調來比較，佇華語的第一調一般佇講話的時音調會加卡岏，假使發華語的第一聲音調卡低一點仔 (當然伊嘛未產生意義的混亂) ，會感覺著淡薄仔的台語腔華語。
咱咧講第一調的時，伊的開頭和結束攏是平平無變化，是屬高平調 (ko1-ping5-tiau7)。當然佇實際發音的音有可能產生344的調值，但是這並無影響著意義的分別，所以毋免siunn過強調第一調一定愛講成調值44才是標準的。
例字：詩、溪、腳[跤]、姑、刀、龜、；車、腰、收、獅、交、輝、瓜、沙、；超、乖、；甜、青、三、毛、；聽、薑、{荽}、肝、；猫[貓]、關；湯；金、珍/新、冰、堅、耽、安、窗、蔘[參]、聰、春；針、雙、傷、專、嚾
例詞：鉸刀、開刀、包車、秋分、非洲、拖車、山溝、金瓜、新歌、擔當、擔心、親身、偏心、天真、貪心、春秋、分擔
(2) 第二個聲調 (高降調)
第二調發音的時，是由岏音開始降低音調，變成中音，所以咱講的是調值53，咱無講伊的調值是51是因為佇台語的第二調降落程度並無遐 (hiah4) 呢大，若比較著宜蘭腔常用的「真大」 (cin2 tua7) 的「真」強調音是51調值，就明顯知影普通咱的第二調只是算是53值而已。
例字：米、馬、飽、苦、果、武；惹、錶、酒、海、九、水、火、我；鳥、拐；扁、醒、膽；餅、廠、歹、腦、每、碗；姆、軟；嬸、緊、頂、演、慘、咱、桶、爽、筍；險、享、勇、選
例詞：保守、稿紙、解酒、海水、海產、酒鬼、手稿、水果、水準、產品、敏感、本島、滾水、永遠、展覽
(3) 第三個聲調 (低降調)
佇對比的時，咱發現「狗」和「夠」二個聲調攏是降落的聲調，所以咱講伊是低降調 (假使是以開頭的音調來稱呼就變成中降調)，調值是31。若是咱比較「交」、「厚」和「夠」的發現音調變成三個階段，岏中低三階。所以咱嘛會使定伊的調值為21值。假使有人發成11值，並無影響著意義的變化，所以有人講第三調是11的調值。因為實際上「夠」的發音是降落的，所以咱稱呼伊是低降調，佇講著變調的時，咱會看著第七調變成調值11，被認為是變成第三調，是因為11值和21值接近並且可以歸成台語的第三調。
例字：四、嫁、豹、兔、靠、付；寄、票、幼、菜、透、費、稅、蔡；跳、快；箭、姓、冇、惡；鏡、醬、勿(mai3)、半；撼、鋼；禁、進、聖、戰、探、趁、粽、坔(lom3)、棟、寸；店、向、灌
例詞：報廢、太歲、泡菜、漏氣、浸泡、進化、應變、變化、戰鬥、奮鬥
(4) 第五個聲調 (低升調)
這個聲調是分別「南部腔」及「北部腔」的主要根據。當這個聲調的語音後面閣接一個語音的時，頭前的語音會產生連音變化，佇「南部腔」，「希望」和「漁網」是仝音詞。但是「北部腔」是分別會出來的無仝語音。當然，單純的第五調，南北腔是仝音的。
咱若用「cang9」註[1] 和「欉」來比較，會發現著二個語音攏是由低變成岏，只是岏低無仝，所以佇相對比較的情形下，頭前彼個咱叫伊是高升調，相對第五調就叫做低升調，調值是24值，因此若欲稱呼伊是中降調嘛會使。佇實際講話的時，語音後部分會閣降落來，所以調值243、232、132、121、13、12攏是屬佇這個聲調內底，因為茲的自由變音攏未影響著意義的混亂。
例字：魚、茶、柴、湖、桃、牛；騎、橋、油、來、頭、雷、皮、蛇；條、懷；錢、棚、林、魔；名、羊、鰻；糜；門；琴、神、明、蓮、痰、陳、紅、王、文；鹽、涼、雄、丸
例字：桃園、和諧、河南、排球、台南、才華、投球、榴槤、華陀、藍球、銀河、榮民、田園、南投、寒流、王牌、輪流、拳頭、巡迴
(5) 第七個聲調 (中平調)
咱講第三調的時，有講著「交」、「厚」和「夠」是分做三個音階，咱會發現著「厚」的音親像「交」仝款自開頭到結束攏是平平的音調，只是「厚」的音調卡低而已，所以咱會凍稱呼這個音調是中平調，調值是33調。若是發成調值22值並無影響辨義作用，所以實際發音只要未和第一調以及第三調混亂意義分別的平調攏會凍算是第七個聲調。
例字：字、會、咬、五、帽、舊；夜、廟、樹、害、豆、跪、被、大；廖；鼻、病、餡、冒、命、象、耐、鬧、檨、汗；妙、妹；毋、飯；任、面、穿、電、淡、萬、項、旺、運；念、亮、用、願
例詞：社會、社論、壽命、代號、內面、豆類、漏電、大豆、外號、外貌、外面、耐用、認命、便飯、現在、現代、陷害、順便、問號
3. 入聲
入聲的聲調特色就是發音的時間比非入聲卡短，時間短是入聲的特色，咱卜將非入聲的時間拖真長來講是真簡單的代誌，但是講入聲就有問題，甚至會改變了意思，大部分的人若將「烏白」的「白」的音調單獨講的時，將時間拖長了後，會發現「白」變成「父」的音。
佇台語有一部分的文字會同時有第四調和第八調的語音存在，但是未凍講是自由變音，親像「一百」的「一」是第八調，「一定」的「一」是第四調；「分別」的「別」是第四調，「別莊」的「別」是第八調。嘛有一部分原來是第八調因為語變的關係變成第四調，親像「碩士」的「碩」以及「夕陽」的「夕」原來攏是第八調，但是現在差不多所有的人攏變成第四調。
佇台語來講，入聲就是第四調和第八調，拼音的時字尾一定是-p(親像：「十」)、-t(親像：「一」「七」)、-k(親像：「六」)和-h(親像：「八」)四種，咱來繼續說明。
(1) 第四個聲調 (短降調)
第四調發音的時，雖然時間真短，但是咱仝款會凍發現聲調有降下的情形，並毋是平平的聲調，聲調和第三調仝款，只是賰一半時間，所以音值嘛是到中途一半，變成了32調值，仝款會凍稱呼低降調，當然，咱會凍因為調值是32而稱呼伊是中降調。因為時間真短，簡稱叫做短降調就可以a。
例字：
(A) 字尾-p：急、溼；壓、答；汁、澀
(B) 字尾-t：七、筆；撇、設；踢、察；骨、出；決、法
(C) 字尾-k:竹、叔；北、角；惡、束；約、爍；菊、淑
(D) 字尾-h：鱉、鐵；八、冊；鴨、百；朴、桌；壁、拆；借、歇；說、血；潑、闊
(2) 第八個聲調 (短平調)
第八調是上界混亂的聲調，每一個所在的調值攏無仝，會凍講是每一個所在的特色。伊的無仝產生的原因可能是因為卜和第四調分別加上語音所佔的時間有卡短，所以無形中佇語變過程中變成無仝款的聲調特色。
佇咱台灣地區大部分的人是以中平調為主，調值是33，因為時間卡短，所以是一個中短平調，會凍簡稱做短平調。因為伊的時間真短，加上調值33，和第四調的調值32非常的接近，所以用咱的耳仔來分別第四調和第八調是真困難的代誌，因此，有未少的人認為咱有真濟人佇第四調和第八調是無分別的。
對表五和表六咱會凍看著，原來的漳州音第八調的調值是13值，泉州調是35值，廈門音是44值。因此，咱差不多會凍知影一般的「內山腔」比較卡有可能聽著年長的一輩是13值，「海口腔」會聽著35值，基督教長老教會註[2]的信徒會聽著44值的調。
頂文有講著，若將第八調故意發音的時牽長伊的時間，第八調會變意思去，尤其是喉塞音韻尾 (拼音有字尾-h) 更加會凍看出來，親像「白」講卡長咧會變成「父」，假使咱若是無法度分別「白」和「父」的聲調，代表咱所發的是調值33。咱若卜確定家己的第八調的調值是外濟，咱只要講「白」的時間卡長咧，和非入聲的聲調做比較，咱著會凍知影咱是毋是屬佇其他的調值，無定著，這個結果就是各位所居住的地方特色，甚至會凍透露出原本是對佗位移居過來的。
例字：
(A) 字尾-p：立、集；合、十；粒、業
(B) 字尾-t：蜜、日；滅、穴；力、賊；律、術；略、弱；育、局；罰、奪
(C) 字尾-k：特、熟；目、六；鹿、木
(D) 字尾-h：舌、碟；白、麥；蠟、疊；薄、落；食、額；葉、石；月、襪；活、熱；物；脈
(五) 變調
台語上大的特色就是變調，這款的變調是無意識存在，若無詳細觀察，根本就毋知影變調的存在，台語的變調是根據變調規則做系統性的轉換，嘛是這個變調規則使得一個囡仔會凍佇母語的學習過程中會凍得著某一個地區的聲調腔口 (accent) ，一旦一個囡仔超過五歲搬離開某一個地區換到別的所在，伊原來的聲調腔口就真難改變，永遠會有一個「外地腔」存在。咱若卜改變聲母以及韻母來符合某一個所在的音韻是真簡單的，親像一個出外的宜蘭人，會凍將宜蘭腔的韻母-uinn [ui)] 完全改變成韻母-ng [N] 來變成一個「隱形人」，但是若有注意著in 的第七調變調以及第二調原調，就會發現in猶是無一點點仔無仝。
下面咱先看台語的變調圖，才來繼續談論基本變調、-仔前變調、三連音變調和強調變調、隨前變調以及輕聲。
圖十一：台語的連音變調圖
1. 基本連音變調
基本連音變調就是一般佇台語普遍存在的語詞正常變調。佇華語，咱只知影二個第三個聲調連做伙的時，頭前的音愛變成第二個聲調，親像『水井』、『水桶』、『水果』、『小狗』、『海狗』、『雨傘』、『螞蟻』、『馬臉』...等等。佇台語，凡是有二個語音以上成為一個語詞的，只有最後一個語音保持原來的調 (簡稱做原調) ，其他的語音全部改變原來的聲調 (簡稱做變調)。變調有固定的規則。就親像圖十一所顯示的仝款。
咱若將台語的聲調分析為「高、低、升、降、短」等五個聲調成份 (tonetic features) ，就會凍分析台語的每一個聲調 (toneme)，按呢咱嘉義腔就會凍做按呢的聲調分析。親像後一頁圖十二所顯示的情形。
咱做聲調成份分析圖了後，咱只要將會牽涉著變調變化的成份做保留，就會凍簡化成圖十一的變調規則圖。聲調變化規則圖愛用α理論 (Alpha theory；阿化理論) 來看才會發現台語變調的規則性真正原因佇佗位，就會知影變調毋是按照數字的原因。佇本文內底，咱無卜說明α理論，只要看圖十三α理論的結果圖形就好a。
圖十二：台語聲調的聲調成份分析圖。
圖十三：α理論的台語基本變調規則。
根據α理論，咱會凍講說出變調規則，只有第五調有分南部腔和北部腔的變化，咱也會凍清楚為何第五調的變調無變成第二或是第一調的原因。咱看著第五調無仝變化的原因就是有加使用一條優先規則。咱看下尾的規則使用說明：
南部腔：
(1) 優先規則：去掉聲調上升的成份，[+升] 改成 [-升]
(2) 有優先規則應用的時，停止使用α理論。
北部腔：
(1) 優先規則：去掉聲調上升的成份，[+升] 改成 [-升]
(2) 繼續使用α理論。
當然，無仝腔口的聲調語音，一定有其他的優先規則，優先規則愈濟，代表兒童學習母語的過程加卡複雜化，嘛有可能學無著某一條優先規則，因此，語言就開始起了淡薄仔變化，語變開始產生，也因為按呢才產生各所在每一個地方的特色。佇茲，咱只是簡單討論嘉義腔，並無閣詳細分別討論「海口腔」的變化，咱若有興趣，或是抵好本身所講的就是海口腔，會凍按照本文所談論的方式來自由應用。
台語的變調了後的調值原則上是和變調以後所屬的聲調的調值類似。所以佇傳統上才會大略歸類出1732 (一妻三兒) 的變調原則。
表七：台語變調了的調值。
另外，因為大部分的人第八調和第四調真接近，所以佇一般討論變調規則的資料中所講的第四調和第八調對調註[3]是無適合咱的。根據變調規則了後，咱會發現變調以後的第四調和第八調非常的明顯。也就是講，咱若欲分別第四調以及第八調的時，只要後面加一字，利用變調真緊就會凍判斷出in 的原調是第四或是第八。請試後面這幾個數目「1, 6, 7, 8, 10」，只有「7, 8」是第四調，希望咱攏會曉分別清楚。
例詞：
(A) 第一聲
第三聲
第五聲
第七聲
第八聲
對大部分的人來講，卜說出「十八」的「八」和「十六」的「六」是第四個聲調(上入調)或是第八個聲調(下入調)是非常困難的代誌，甚至對聲調真老練的人，猶是會分未清的時陣。佇茲，教咱一條秘訣就是利用變調來找本調的方法。
佇練習了未少的變調詞以後，咱發現一個詞若是佇詞尾的字就會維持本調，無佇詞尾就會變調。因此咱若是將「十八」和「十六」的詞變成「八十」和「六十」了後，會發現原本分未清的聲調因為連音的自動變調產生明顯的對比，「八十」的「八」的聲調成份變成
，按呢就會凍推測，「八」和「六」的本調是無仝的，會變成
運用這個方法愛注意著所舉的例詞著避免用著-仔前變調、隨前變調和輕聲的例，原理請看後面對怹的介紹。
例對註[5]：塔、疊；桌、火著；隻、食；借、石；歇、葉；撥、跋；急、及；執、集；溼、習；得、直；竹、特；壓、盒；識、密；北、縛；趴、曝；落、六；督、毒；貼、疊；職、一；失、實；叔、籍；色、熟；結、傑；節、鱡；察、賊；作、族；福、服；骨、滑；卒、糯；澀、涉；菊、局；淑、俗；法、罰
(轉去主目錄)
註[1] cang9 是「昨方」[tsA hN#] 的合音，ti大部分人的語感已經是變成一個語音，毋是二個分開的音，數目9代表伊是高升調，調值為35，並無ti傳統的台語聲調內底。
註[2] 基督教長老教會一直為著保存著台語做真大的拍拼，ti in 的聚會、祈禱、主日學、傳教完全是按照台語的聖經傳教，聖經本身是泉州音為主，但是教會所用的台語字典是廈門音為主，牧師的訓練也以廈門音為主，加上嘉義地區的牧師祖籍是漳州人士卡濟，所以自然是以漳州音為底所講的語言為傳教語言。
註[3] 咱愛注意一點，就是講著對調嘛是大約的規則，因為入聲無論調值如何，只要分會出岏低就會凍講in是對調。
註[4] 咱會凍用仝音字來幫助咱記憶，「八」和「跁山、跁樹」的「跁」仝音，代表『向上』，指向「上」入調；「六」和「落物件」和「落」音類似 (注意「落」本身是上入調)，代表『落下』，指向「下」入調。
註[5] 所有的例對，頭前攏是上入調，後面攏是下入調。
沒有留言:
張貼留言