106年全國語文競賽閩南語朗讀文章三、高中組

 2017

06171256106年全國語文競賽閩南語朗讀文章三、高中組

2102整理篇

三、高中組

 

　　01 日日春

　　林炤慧

　　我是一欉日日春，蹛佇這堵矮牆仔跤，你若問我今年幾歲？講實在，連我家己嘛袂記得矣！

　　我嘛毋知家己底當時，又閣是按怎會流浪到遮，講起來這个所在的環境嘛無蓋四序。正手爿是點仔膠路，倒手爿是紅毛塗牆，我干焦會當佇中央這條細細縫的所在生存，若比起牆圍仔內彼欉葫蘆竹，我就有淡薄仔怨慼。伊真正是食好做輕可，可惜伊並無照主人的向望食甲親像「阿不倒」，顛倒是一个面仔不時都黃phi-phi。上好笑的是有幾若擺因為天氣傷熱，主人閣袂記得共沃水，到欲暗仔，伊就強欲蔫去，實在有夠無擋頭。

　　閣講著伊隔壁彼欉羅漢松的運命嘛無好甲佗位去，伊本底佇我的邊仔一塊較大的塗跤蹛甲好勢好勢。有一工主人看伊遮𠢕大，葉仔生甲茂茂茂閣青ling-ling，就去攢一跤真媠的花坩，共彼欉羅漢松挖去種。彼工羅漢松煬teh-teh，目尾共我捽一下，講伊就欲好命矣，有別莊通蹛囉，叫我家己愛保重。「你請！我無閒hânn！」啥人知影伊其實是蹛入去「套」房，跤路狹閣歹出入，連欲啉水都啉袂止喙焦。無偌久伊就變甲瘦枝落葉，有當時伊就探頭出來共我投，我干焦會當共講：「你家己較保重咧！」

　　看竹仔和羅漢松兩个的遭遇，翻頭想我家己，雖然天生就是歹命囝，無人疼、無人晟，毋過阮嘛活甲真自在，規年迵天不時都咧開花。阮毋驚洘旱、毋驚空氣汙染，嘛無需要人共阮落肥，毋驚寒、毋驚熱，戇戇仔大，按呢哪有啥物通怨慼咧？

　　人講：「有時星光，有時月明。」佇花草的世界敢毋是仝款的道理咧？彼工主人對我邊仔經過，春風替我拍拍，粉紅粉紅的笑容，連我家己嘛感覺足迷人的。主人看我古錐的模樣，趕緊越頭行入去厝內，一時仔隨閣出來跔佇我的身軀邊替我翕相，主人歡喜甲笑bún-bún，我若像聽著伊咧呵咾講：「嘿！這欉日日春毋但是日日春，又閣是年年春呢！」

(TOP)

 

　　 02 膨紗衫

　　王朝源

　　接著成績單了後，我歡喜甲規个人跳起來大聲喝講：「我考牢矣！我考牢矣！」規庄仔內干焦我一个人考牢大學，親情朋友攏來共我祝賀，連村長嘛掠一隻肥tsut-tsut的鴨鵤來送阮。規庄仔內上歡喜的人，會使講就是共我鬥相共上濟的陳老師。考試煞我就去電子工場做工課，聽阿母講，陳老師捌來阮兜探聽幾若擺，問看我考了按怎？阿母聽我講考無好，就照我的話按呢共陳老師講。阿母講陳老師聽伊按呢講，規个目頭結結，一直到放榜，知影我考牢，陳老師才笑甲喙仔裂獅獅。

　　考牢的歡喜擋無偌久，閣較大的煩惱，隨落佇阿母的肩胛頭。彼張愛納三百外箍的註冊通知單，予伊煩惱甲暗時攏睏袂去，若小可仔眠去就隨會陷眠驚甲醒起來。

　　庄仔內的人雖然呵咾我真𠢕讀冊，考著遐爾好的學校，予庄裡的人誠有面子。毋過佇咧逐家攏仝款散赤的年代，準講厝邊隔壁有心欲共我鬥相共，嘛是有心鬥，做袂到。

　　考牢顛倒煞無法度去讀冊，這款的鬱卒實在是有話無地講。一向攏真儼硬的阿母，閣較是毋願為著厝裡散赤，就按呢來認輸。

　　姑不而將，阿母共伊上佮意的膨紗衫提去當店當，彼个年代用手工刺的膨紗真值錢，學費的難關總算度過矣。

　　毋過阿母上佮意的膨紗衫，有一工無的確會穿佇別人的身軀頂。若照阿母的性地，是無可能予伊上佮意的膨紗衫，穿踮別人的身軀頂，喙齒根咬咧，拚老命嘛一定欲共彼領膨紗衫提倒轉來。為著欲共彼領膨紗衫留牢咧，逐個月付出五角的利息，阿母是毋甘甲目屎㴙㴙滴。

　　阿母儉腸凹肚，拚幾若冬才共膨紗衫提倒轉來，毋過算算咧，這幾冬所納的利息，早就比當初時當的錢較濟矣，閣加上精神上的壓力、身體的拖磨，遮的閣較毋是錢會當彌補的。毋過阿母猶是真歡喜對我講，只要我後擺有出脫，伊閣較按怎艱苦、日子按怎歹過，伊嘛袂後悔、袂怨嘆。

(TOP)

 

　　 03 跤踏車

　　洪淑昭

　　這馬上時行的除了咧咧的手機仔以外，四箍輾轉不時都看會著的跤踏車嘛誠時行。真濟縣市攏咧推捒跤踏車專用道，佇都會區閣有公用的跤踏車通好租，這毋但會當用來通勤，閣會當順紲運動，真正是「一兼二顧，摸蜊仔兼洗褲」。

　　其實，往時佇庄跤，家家戶戶攏有一台跤踏車，彼毋是綴人咧時行，顛倒是誠實用的交通工具。賣魚的、賣豬肉的販仔會用伊來載貨做生理，作穡人種的菜蔬、豉的鹹菜嘛是用伊運去市仔賣，所以彼陣的跤踏車後斗攏有一个誠大的架仔，會當載規百斤的物件，聽講若是跤腿較無力的，彼款跤踏車是踏袂行的。

　　阮自細漢攏共跤踏車講做「鐵馬」，因為伊毋但實腹、耐操，閣較遠的所在便若有伊就聽好去。只不過較早的車身攏做較懸，阮囡仔人迒袂過椅坐仔頂，若欲騎，干焦會當用一跤軁過三角形的車架仔，共肩胛頭靠踮椅坐仔邊，敧一爿沓沓仔踏，有人講這號做「軁狗空」。

　　其實，較早的鐵馬攏足重的，阮囡仔人按呢騎真正足危險，所以大人攏會禁止阮騎鐵馬。猶毋過，大人愈禁阮就愈想欲騎。阮攏趁大人去園裡作穡的時，偷偷仔牽去大路邊學騎車。會記得有一改，我騎甲落輪，又閣驚予序大人知影，家已就假𠢕想欲共鬥倒轉去，想袂到無張持煞共指指的皮肉削一大片落來。爸母轉來到厝，看我流血流滴，毋但無安慰我，顛倒攑箠仔捽甲我叫毋敢。

　　一直到我讀高中，阮才知影原來毋是逐台跤踏車攏像阮兜的遐重，大部份攏是又閣輕又閣有安電火的。彼款電火是食輪仔咧走的時所發的電來發光，佇暗時騎會較安全。有人會佇跤踏車頭前，加裝一支橫杆通好載人，尤其是談戀愛的少年家仔，用這款的跤踏車來載查某朋友，會使講是糖甘蜜甜，予人真欣羨。

　　自從oo-tóo-bái普遍了後，真久無看遮爾濟人咧騎跤踏車矣！騎跤踏車毋但會減少空氣的汙染，閣會使鍛鍊身體，好處誠濟。若會當，咱盡量莫駛車，換來騎跤踏車嘛袂䆀。

(TOP)

 

　　 04 炕窯

　　林義和

　　今年歇寒的時陣，阿爸公司的同事，相招拜六欲去大肚山的望高寮𨑨迌。約定九點集合，阮七早八早就起床。阿母去菜市仔攢阮兜分配愛紮的物件。一家伙仔五个人，八點半就到約定的所在。

　　逐家攏真準時，猶未九點就攏齊到矣。遮是阿爸同事的田地，規片平坦坦攏是番薯園。這个所在離成功嶺差不多一公里，佇大肚山的嶺頂台地。向東，會當看著繁華的臺中市；向西會當看著臺灣海峽；向南會當看著八卦山大佛。看會著的所在攏真闊，莫怪會號做「望高寮」。大肚山的塗是紅仁塗，上蓋出名的土產，就是番薯佮塗豆。

　　聽阿爸的同事講，遮的田，攏是用輪作的。一季種番薯，一季種塗豆，另外一季種番麥。這季輪著種番薯，今仔日阮來遮，主要就是欲炕窯。遮的番薯，全部攏是五十七號仔，白皮黃肉，瘦抽瘦抽，袂講蓋大條。

　　逐家到位了後，大約有十口灶，五十个人彼跤兜。大人比囡仔加兩三个。田主分配工課予大人做：有人起塗窯、有人抾柴、有人掘番薯。囡仔自由踮邊仔做助手，若無，嘛會當去空地仔耍。遮有幾座報廢的碉堡，佮幾擔路邊擔仔咧烘煙腸、拍珠仔台、賣風吹……。

　　三窯塗窯起好勢了後，開始燃火，共窯內的火保持予上炎。無偌久，所有的塗就攏燒甲紅絳絳。紲落去，共拄掘起來的番薯，囥落去塗窯內底，才用「塗鍤」共塗窯摃予碎，共番薯崁甲密密密。閣挖邊仔的冷塗崁踮面頂，予燒氣較袂傷緊散。攏處理好勢了後，逐家就去空地仔耍。過成點鐘，大人開始攢中晝頓，猶未十二點就食甲半飽。紲落去就是今仔日的好戲──食炕好的番薯。

　　看大人掛手橐仔，咧挖猶閣燒hut-hut的塗窯。芳kòng-kòng的番薯味，衝入逐家的鼻空內，予阮看甲喙瀾強欲津落來。袂堪得等到冷，阮就一人提一條，開始鑑定今仔日的成績，真正芳閣𩚨。食兩條了後，腹肚嘛感覺真飽矣。有這擺難忘的經驗，我共阿爸姑情講：「以後逐年上少愛𤆬規家伙仔去炕窯一擺。」

(TOP)

 

　　 05 種番薯飼鳥鼠

　　林淑期

　　「謼！哪會遮好空，這擺種的馬鈴薯，攏無予鳥鼠仔損蕩去？」茂伯仔聽著隔壁田的旺伯仔講話，就共予鳥鼠仔食甲賰一重皮的番薯掘出來予伊看，順紲應講：「煞毋知我刁工佇田邊種番薯，共遐枵饞的鳥鼠飼飽矣。」這是我佇電視看著的報導──「種番薯飼鳥鼠」。伊會按呢做，到底有啥款緣故咧？

　　原來這个茂伯仔，少年的時佇農會咧賣農藥。有一日，伊看外國的研究報告，講農藥雖然會當防治病蟲害，毋過，煞會破壞塗肉佮四箍輾轉的生態環境。伊知影這款嚴重性了後，毋但苦勸人較莫濺藥仔咧，閣堅心做好𤆬頭，開始用有機的方式來種作。

　　拄做的前幾冬，予人破壞的塗肉猶未復原，收成誠䆀。厝邊隔壁攏笑伊是戇癮頭。茂嬸仔嘛因為按呢，不時佮伊冤家，甚至趁伊無注意，偷偷仔噴藥仔。毋過，茂伯仔猶是真堅持，伊講：「收成欲好，塗肉著愛有肥；欲有肥，著愛倚靠咱環境的生態，才會當共對抗病蟲害的好菌佮好蟲揣倒轉來。」毋過逐家攏誠憢疑，問伊講：「按呢戇戇仔等，是愛等偌久？」茂伯仔講：「逐塊地需要的時間攏無仝，上無嘛愛等三冬，啊若水稻仔田欲轉做有機的，有的閣愛五、六冬以上。」

　　人講，堅持就會看著希望，閣加上茂伯仔伊種的愛心番薯，這馬的收成予伊真滿意。看伊共一條一條予鳥鼠食賰的番薯薅起來，真得意共人講：「恁看，一條斤外重的番薯就會當飼幾若隻鳥鼠，種番薯有影是一兼二顧，毋但我的紅菜頭媠噹噹，隔壁的馬鈴薯嘛逐粒讚！」伊閣講：「菜市仔咧賣的紅菜頭攏生做差不多，我這號有機的有長有短、有肥有瘦，逐條攏有家己的生張佮個性。」坐佇田邊的茂嬸仔，紲手削幾條仔分予人客食，看電視裡的人客攏呵咾甲會觸舌，講一點仔臭腥味都無，食起來袂輸果子咧！予我真欣羨，嘛足想欲試食看覓。

　　感謝這个趣味的報導，予我對有機農業有閣較深的認捌。

(TOP)

 

　　 06 緊來去走走咧

　　鄭昱蘋

　　學生捌問我講：「老師你看起來氣色無啥好，是人無爽快是無？」無啊，食會落、睏會去啊。斟酌想想咧，可能是較少運動的款。好啦，為著欲予家己較好看咧，決定逐工提早半點鐘起來運動。

　　今欲運動矣，啊欲做佗一款呢？我的跤頭趺無啥好，毋敢做傷激烈的。拍太極拳我袂曉，跳舞無佮意，拍球閣較免想。尾仔聽後生的建議，這陣當時行的「緊行」，對我應該上合軀。就按呢我開始透早去運動。

　　透早出門，天色猶烏烏暗暗，空氣真好。路裡無啥人，因為逐家攏猶覕佇棉襀被內底。但是講無啥人，其實公園內抑是學校的運動埕，嘛已經有袂少人，早早起床佇咧走、佇咧運動矣。

　　運動是好代誌，袂使急嘛袂使超過家己的負擔，毋過愛做會久長才實在。所以我的計畫是對厝裡行到學校，按學校的外圍仔行四輾。六點進前愛轉來到厝，按呢才會赴通去上班。頭一輾沓沓仔行，輕輕鬆鬆無壓力。紲落來是行較緊咧，這時陣就感覺有淡薄仔喘矣。風向面吹來，共額頭的凊汗𤆬走，身軀毋但袂感覺袂閣遐燒熱，顛倒感覺真快活。等天拍殕仔光矣，就那行那走，轉去厝裡。

　　逐工去運動，會搪著誠濟真趣味的人。有一對老同姒仔，沿路攏咧講後生新婦的代誌，講到假油的事件就氣甲真歹聲嗽，行佇的後壁攏袂無聊。猶有一个少年家，毋管寒流偌凍，攏是穿一領吊䘥仔爾，真正是「囡仔人尻川三斗火」！另外，猶有一寡人七早八早毋是去運動的，是去咧做工課的，彼就是市府的清潔人員，透早就咧掃塗跤。看人咧運動，攏會相借問，講一聲「𠢕早！」真心感謝這陣恬恬咧付出的人，因為有的辛苦，才予這个城市有美麗清氣的面容！

　　逐工四點四十就予身體叫精神，喊我緊來去走走運動運動咧。「老師，你氣色袂䆀喔！」往過上課半工爾，就不時咧哈唏。這馬，精氣神十足，連跤頭趺嘛變較有力矣。運動的好處真正愛家己去體會啦。講到遮，逐家明仔透早做陣來去走走咧ha̋nn！

(TOP)

 

 

 

　　 07 一步一跤跡

　　蔡惠芬

　　阿添國中畢業彼年，日時綴老母去電子工廠食頭路，學車床、做水電；暗時讀苗栗建臺高工夜間部，那學功夫那提學歷。彼三冬透早出門、暗暝入門，靠家己的拍拚，改善厝內的生活，感覺真歡喜。厝邊頭尾講伊是一个誠有孝的囡仔，對細漢就共序大人鬥相共，將來一定有出脫，親情五十嘛攏呵咾甲會觸舌。

　　伊高工畢業，聽候做兵的時陣，四界做散工。二十歲彼年誠好運申請著『替代役』，佇警察學校受訓四個月，尾仔分發去臺北市交通大隊上班。頭一工誠緊張，十字路口車足濟，青紅燈變化緊，過車路的囡仔、老歲仔狀況袂少，不管時攏愛斟酌。佳哉進前幾若冬的社會經驗，膽頭在，較在穩，第二工就誠熟手，逐工穿警察制服徛佇臺北大街仔路指揮交通。

　　客人本成就有骨力、勤儉、惜福的個性，阿添這四冬做警察為民服務，培養出捌代誌、知輕重、跤手扭掠閣真有自信。退伍彼年，拄好桃園電信局招考員工，懸分錄取了後，分發去材料科，逐日接觸各單位的同事。猶未一個月，全局的人攏知影有一个十八般武藝攏精通閣親切熱心的緣投仔兄。局長聽講有這號員工，馬上面談而且指定伊兼任局長的司機。

　　五年後添仔綴局長調來臺北電信管理局，大都市世面開闊，業務多元，技術先進，伊嘛不斷求進步。佇這款環境，伊若海綿，逐項興趣、逐項肯學，因為反應緊閣熱心，自彼時陣開始，公司任何活動攏會看伊懸低佈置會場、音響控制、水電維護……。

　　阿添體會著「食一歲、學一歲」的道理，閣拄好公司嘛鼓勵員工愛讀冊，就按呢，每个假日對臺北去臺中讀二專，尾仔保送大學。四冬來，無論透風落雨攏無停睏，今年愈讀愈有成就，考牢企管系碩士在職專班狀元。伊定定講家己是一个散赤的庄跤囡仔，會當佇臺北成家、蓄厝、讀碩士，攏是拄著足濟貴人一路牽成，誠福氣，嘛真感恩！

(TOP)

 

 

 

　　 08 老母對囝兒的期待

　　黃美華

　　坐佇『阿羅哈』頂頭，我送你來到林口龜山。看社會經濟遮爾䆀，無薪假一直放。雖罔咱佇厝內已經參詳好勢，你嘛決定欲來遮讀冊。毋過規路你攏無講半句話，面上嘛無半點笑容。看你毋情毋願的眼神，我心肝內嘛誠艱苦。這是你第一擺離開厝內欲去外口蹛。逐日攏佇身軀邊，阿母阿母一直叫的細囝，這馬嘛欲離開厝矣！雖罔誠毋甘，我嘛毋敢表現出來。

　　行到警大的大門口，你共我講:「阿母，你會當轉去矣！」講了你越頭就行。看你遐爾仔無歡喜的眼神，我的心肝就親像針咧揻。這種情形，我嘛無法度按呢越頭就轉去。我恬恬綴佇你的後壁，等甲你共手續辦好，入去宿舍，我才去坐車。欲轉來進前，我交代你毋通簽刑事系。毋過佇欲轉來的車頂，就接著你敲來的電話，講你已經簽刑事系矣，你閣講做警察本成就是欲為民服務，若無做刑事，是欲做啥？

　　這工是家長會，我佮翁婿做伙參加。看你喙笑目笑，皮膚嘛加真好。你講佇警大生活真嚴格。早起六點就愛起床，暗時十一點就關電火。拜一到拜五攏袂當出去外口。你閣講，遮的規定攏是你上無法度忍受的。毋過遮的校規，顛倒是阮序大人上愛的。感謝學校予遮的囡仔正常的生活，共逐个學生攏訓練甲遮爾將才。

　　畢業了後，你佇北部服務，工課真濟，按早起九點做到半暝兩點。逐工攏真無閒，時常咧失眠。阿母雖罔人佇南部，毋過心就若像綴佇你的身軀邊仝款。逐暗若想著你遐暗猶咧無閒，我嘛定定目睭金金煩惱到天光。好佳哉！你佇六月統一調動的時，調轉來高雄。你嘛真歡喜，會當轉來這个美麗的故鄉服務。你今仔日就欲開始佇高雄上班矣！透早天才拍殕光，阿母就起來共你熨衫。看你穿甲遐爾撆紮，看你充滿自信的笑容，看你對未來充滿希望，我的心內嘛充滿感恩。感謝學校的栽培，感謝菩薩的保庇，阿母嘛深深祝福你。阿母無向望你大富大貴，干焦向望你一切平安順利。

(TOP)

 

 

　　 09 阿母的禮物

　　王秀容

　　五月有母親節，誠濟人會送禮物予阿母。我有一个學生囡仔阿慧，刁工揀母親節彼工結婚，共充滿愛佮幸福的日子，送予阿母做禮物。因為這段姻緣是阿母用性命換來的。

　　阿慧是我十六冬前的學生，從讀國中到今，𠢕讀冊、生做媠閣有人緣，這馬咧做珠寶設計師，氣質佮穿插是通人呵咾。阮逐冬歇熱攏會辦同窗會，逐擺問伊，攏講猶無對象，逐家就笑伊媠人無媠命，哪會無人奅、揣無a-ná-tah？我就想講，可能時代無仝，嫁娶對少年的來講，毋是必然的選項。

　　我佮阮這班的囡仔差十五歲，有人共我當做朋友、阿姊，毋過大部份的人是共我當做阿母，定會來揣我食飯講心事。一冬前的教師節，阿慧𤆬伊的查埔朋友來，算是正式宣佈這个瘦抽條直的查埔囡仔，是伊未來的翁婿。彼工同學若兄弟姊妹，就拚性命出題，欲檢驗伊敢有值得阿慧一世人佮伊做伙無?

　　借問一下，恁是按怎熟似的？阿慧笑笑，目屎煞隨輾落來。三冬前，阿母想講查某囡仔一个人坐車轉來，行路危險，就騎oo-tóo-bái欲去車頭載伊。啥知煞佇半路發生車禍，予一台thoo-lah-khuh軋佇輪仔底，當場就無效去矣。阿慧佇車頭𥍉𥍉看、金金相。後來敲電話轉去厝裡，拄好警方用車牌仔做線索通知阿爸緊去現場。阿慧聽著這个歹消息嘛隨趕去。啥人知影逐工黏相倚的阿母，煞像天頂的雲飛無去矣。

　　是這个少年警察陪阿慧處理大細項代誌，陪伊行出阿母無去的萬底深坑。伊用恬恬的陪伴行入阿慧的心肝底。阿慧講，失去阿母予伊一睏仔就愛轉大人，若斷臍的嬰仔，家己喘氣、吼出聲……。

　　阿慧佇母親節辦婚禮，伊講，三冬落來才了解這段姻緣是阿母的安排。上疼伊的阿母犧牲性命，送予上疼的查某囝一世人用會著的禮物，愛是內餡，幸福是包裝。無好的代誌無一定著無好代誌，三冬後才予伊了解性命的秘密。

(TOP)

 

 

　　 10 頭家佮辛勞

　　阿真

　　朋友啊，恁敢有錢拍無去的經驗？錢若拍無去敢閣揣會轉來？若是有人抾來還，是毋是會予你歡喜甲強欲流目屎咧？

　　阿信是蹛佇臺南的水電師傅。彼工伊領薪水，心情樂暢就走去夜市仔踅踅咧，順紲食暗頓。七踅八踅，一下失覺察，薪水袋仔煞拍交落去。當當阿信發覺的時，伊隨親像菁仔欉kho̍k-kho̍k傱，共踅過的擔仔位齊巡過，頭家攏講：「無咧！無抾著。」一擺閣一擺揣規暝，薪水已經毋知落對佗位去矣。

　　隔轉工早起，阿信頭殼犁犁、目睭he-he去到公司講欲請假。頭家娘看伊面色誠䆀，自來毋捌咧請假的人講欲請假閣目頭結結，頭家娘看毋是勢問一个真，阿信才姑不而將講出伊的薪水袋仔規包拍無去的代誌，閣安搭頭家娘講有去報案矣，請頭家娘免操煩。免操煩？頭家娘心內咧想，薪水拍無去，這個月就白做的矣，阿信是手面趁食的人，食穿攏靠這份薪水。頭家娘嘛足知伊的性，若閣發一擺薪水予伊，阿信一定毋啦。

　　頭家娘隨想著一步，請派出所的警察先生鬥搬戲。就通知阿信講有人抾著錢，請伊來領轉去。頭起先，阿信歡頭喜面叫是真的，三步做兩步走，來到派出所。阿信接過薪水袋仔一下看，心內就起憢疑矣，共錢抽出來算算咧，「三萬四」，開喙就講：「這毋是我的，這一定是頭家娘送來的，愛還頭家娘！」警察先生看阿信的反應，驚一趒，開喙就問：「你哪會知？」

　　阿信講：「原本彼包薪水袋仔伊有對拗，這包毋但無拗痕，連伊已經開去的三千箍嘛變倒轉來，天下間哪有遐好的代誌？用跤頭趺想嘛知，這定著是好心的頭家娘啦！」就堅持欲共錢還予頭家娘。

　　好事傳千里，電視台放送了後，逐家攏咧會，講這馬這个社會上欠缺這款的「頭家佮辛勞」啦！頭家真情照顧辛勞，辛勞誠心對待頭家，和諧溫暖的勞資關係真正予人感動甲強欲流目屎呢！雖罔彼包內底貯三萬一的薪水袋仔猶是無揣著，毋過這个故事予咱看著人性上媠的一面。

(TOP)

(轉去主目錄)