2013
07050802102 年閩南語朗讀文章-教師組
102 年閩南語朗讀文章-教師組 (原稿下載) (回102 年閩南語朗讀文章目錄)
1.大家新婦 林美麗
2.毋甘 韓滿
3.前世緣 胡璿蕙
4.烏龍海邊釣蟳仔 尤碧豔
5.望海 林晏如
6.懺悔 陳素經
7.鐵路宿舍的記持 李淑貞
8.宜蘭頭城搶孤 邱文錫
9.泅水百百種 邱文錫
10.人若食老 Kurt Tan
11.尿桶的出世 邱文錫
12.做工少年時 林淑期
=============================================
護士建議先倩二四點鐘的特別護士來共伊顧，因為病人猶無法度家己食物件，親像洗盪、揉身軀、掠龍、拍痰、換尿苴仔，攏是真專業的工課。
兩個月了後，俊生仔兩兄弟仔參詳過矣，看老母是欲送去安養院予專門的人來照顧，抑是欲予序大人輪伙鬮？
俊明仔干焦知影趁錢，伊掠準病人精神就是好矣，無去想著老母這馬是佇嚨喉切一个空喙，鬥『hòo-suh』管通入去肺管才有法度喘氣，無法度家己哺物件，到今愛閣用鼻胃管來飼牛奶。倩特別護士一日兩千，一個月愛六萬，哪有遐濟錢來倩？月英仔是誠𠢕拍算的人，既然罔腰仔出加護病房矣，會使家己顧就家己顧，橫直伊也無咧食頭路，看特別護士照顧大家嘛無啥物特別的工夫，毋甘閣開冤枉錢，就佮大伯參詳，先予伊顧一個月看覓。想袂到美桃仔翁仔某對醫生遐提著『巴氏量表』，就去揣仲介登記申請外勞；一個月到，欲過鬮的時，外勞仔就已經來到台灣矣。
一點仔都無共伊存一下，月英仔感覺家己若戇人咧，大的講：「老歲仔閣有誠濟錢，暫時毋免用著咱的私奇，咱閣有家庭、有囡仔欲飼，先共老歲仔的定期單解約，用伊的錢倩人來共伊顧，是合理的。啊咱嘛毋通因為老歲仔按呢，生活就來受影響。中風的病人，長誠長、短誠短，逐个人總是愛用平常心來過日子。」
這寡仔定期單，罔腰仔本底攏寄佇月英仔遐，聽大的按呢講，月英仔無第二句話攏提出來交予大伯。伊自細漢佇清白的家庭大漢，是一个袂痟貪的人，總是知影「欲食胡蠅家己欱」的道理。
暗頭仔，天頂規片攏是紅霞，月英仔徛佇涼台前，目尾捽對俊生仔翁仔某彼台當欲離開的烏頭仔車去。看這个範勢，自開始就無拍算欲家己顧的款，按呢我是咧做癮頭的喔？月英仔親像予人搧著喙䫌仝款。想著家己共人顧甲歡喜甲，結果去到高雄，所有的復健工課攏無咧做。原來大伯的孝心是咧做予人看的，早若知影，就規氣共老的送去安養院就好，哪著倩外勞？結果外口的人攏呵咾俊生仔有情有義，閣欣羨罔腰仔飼遮的囝，無共冊讀到尻脊骿去，誠值！ (TOP)
假使講人生親像舞台，我向望家己是一个笑詼劇的丑仔，會當共快樂帶予別人，嘛會當共歡喜囥佇心內；假使講人生是一本冊，我向望家己是一本內容精彩的故事冊，逐家看了會想欲閣看。
阮兜的囡仔真濟，阿爸干焦是一个小小的公務人員，逐個月的月俸無法度通飼遐濟支喙。阿爸下班了後，就去巷仔口排擔仔――削甘蔗、破西瓜，加減仔趁錢；阿母嘛佇厝跤邊飼雞仔、鴨仔佮豬仔；阿姊透早就去市場，抾菜葉仔轉來飼雞仔、鴨仔。雖然阮規家伙仔攏誠無閒，毋過嘛過甲誠快活。
阮兜出去就是嘉義上蓋有名的林森路，有一个杉仔行的頭家來阮兜行幾若擺，伊共阮爸母講：「恁兜囡仔傷濟，阿梅也誠有我的緣，若予我做囝，我會好好仔共伊栽培，後日仔定著會有出脫，恁兩个序大人嘛毋免做甲遐爾仔忝！」阮老爸應講：「囡仔欲來綴我食穿，我若有一喙水通啉，囡仔上無都有一碗番薯簽湯通啉。雖然無魚魚肉肉通食，毋過，絕對袂去予枵著、寒著。毋管我的囡仔有偌濟，我攏袂共囡仔分予別人做囝啦！」
阮細漢的時，阿爸為著阮這陣囡仔，逐工做甲活欲忝死，毋過，伊上大的娛樂就是聽『la-jí-ooh』、看布袋戲。彼陣我誠愛讀冊，所以阿爸上疼我。伊攏會𤆬阮去看布袋戲，史艷文、藏鏡人……遮的人，予阮囡仔時陣的日子過甲誠心適。逐暗規家伙仔攏去睏矣，阿爸就提『la-jí-ooh』去柴間仔聽。我會隨綴過去共阿爸司奶，佮阿爸做伙聽劉備三請孔明、孫臏1鬥龐涓2……攏是阿爸上愛聽的戲齣。
阮大漢的時，踏入社會食頭路囉！有一工落雨，一个幔雨幔的菁仔欉，青磅白磅走入來辦公室，阮誠受氣共伊講：「毋管你有啥物代誌，先出去共雨幔褪落來才閣講。」後來，這个人定定來阮公司，伊生做懸懸仔閣大箍大箍，毋但誠愛講笑，有當時仔嘛會挈物仔來予阮食。有一擺歇睏日，伊𤆬阮去山頂𨑨迌，閣紮阮上愛食的葡萄。伊毋但共葡萄洗甲誠清氣，閣共葡萄拭甲誠焦才予阮食，實在足感心的。到山頂的時，伊沿路行沿路呼噓仔，阮沿路行沿路抾楓仔葉，規路那講那笑，予阮規工攏誠快樂。 (TOP)
1孫臏(Sun Pīn)
2龐涓(Pâng Kuan)
前一站仔發生佇東石鄉，大家侵門踏戶走去新婦外家拍傷新婦的代誌，予我感受足深。較早大家虐待、苦毒新婦的代誌定定聽著。佇這馬二十一世紀，大家佮新婦的問題雖然有較少矣，毋過就親像熱天的蠓仔永遠都袂消失仝款。
阮阿媽佮阿母的關係一直無好。我定定聽阿媽講伊嫁來胡家有偌爾辛苦。逐工透早四、五點的時陣，伊就愛起來煮早頓予大家官食。這馬阿母會當睏甲六點，已經足好矣。毋過阿母煞認為較早每一个新婦攏是按呢，並毋是阿媽一个人按呢爾爾。這馬有真濟新婦睏到七、八點嘛無要緊，阿媽實在是「老古板」，綴袂著時代矣。阿媽愛揣人開講，但是阿母的個性較閉思，無愛講話，所以阿母定定共厝內款好就佇房間內做家己的代誌。因為按呢，阿媽認為阿母是討厭伊，刁工欲佮伊作對。阿母佮阿媽袂合，阮阿爸是足頭疼的。原本掠準講過一站仔的關係就會變好矣，毋過二十幾年過去，阿媽佮阿母猶是按呢。最後阮規家伙仔只好搬出去，共這兩个人分開，才是上好的辦法。毋過我個人猶是認為分開蹛，只是閃避問題，問題猶是無法度解決。
若講一个查某人這世人會當佮家己心愛的人結婚是前世人的緣分，大家新婦，無定著仝款是前世緣。既然按呢，我認為大家佮新婦應該愛會曉「將心比心」去體諒佮尊重對方。人佇咧講：「家和萬事興。」咱何必為著一寡小可仔代誌，觸來觸去，互相計較，抑是拆破面咧？逐家攏是一家伙仔，將來欲鬥陣的日子猶閣足長的，實在是無應該吵吵鬧鬧。因為阿媽佮阿母的關係，害阮一家伙仔煞強欲拆散去，我感覺真艱苦，嘛感覺實在是無彩天公伯仔送予遮爾好的緣份。
我捌佇報紙的副刊看著一篇文章，寫一个新婦拄拄仔嫁過去的時陣，大家掠準伊嫁入來是想欲搶伊的囝。這个新婦為著欲改變大家這款看法，受盡委屈。毋過伊定定關心大家，陪伊開講，共伊當做是家己的老母咧對待。落尾大家予伊感動，嘛真歡喜有一个遐爾仔有孝的新婦陪伴佇伊的身軀邊，這个大家嘛共新婦當做家己的查某囝仝款來疼惜。 (TOP)
頂禮拜日透早我就共細漢囝森博挖起來，對七點開始咻，咻到八點，伊才目睭盻1盻，毋情毋願，那洗喙那喃，講我是緊張大仙，九點欲集合，未曾未就嚓嚓趒，害伊睏無飽。總是䖳靠蝦做目，無伊駛車，我就無法度𨑨迌。
阮九點準時到烏龍國小，看著仲元兄佇咧食『sa̋n-tó-it-tsih)』，伊那食那和我答喙鼓，麗華佇邊仔笑咧笑咧。這个時陣春芬佮淑和同齊到位，春芬講話大嚨喉空兼比手畫刀，伊一下加入戰場，隨就鬧熱滾滾。過一下仔麗秀嘛來矣，伊規軀水紅仔色的衫，連鞋仔嘛水紅仔的，拍算想講穿較媠咧，會當唌較濟蟳仔？無的確有影，伊釣誠濟呢！
無偌久，理事長錦樹翁仔某嘛來到位矣。人會齊了後，阮一陣人就往鹽埔仔海邊出發。錦樹兄和阮後生去買「武器」――釣餌佮釣具「膏膏纏」，阮一寡查某人慢慢仔行去海邊。天誠清，海真闊，海湧一湧一湧，海風一陣一陣，一隻白翎鷥歇佇肉粽角頂頭，白頭鵠仔若咧開會，椰子樹搖來搖去，海的味搝海風的衫仔裾，偷偷仔軁入去阮的鼻空，啊！有夠幸福的啦！
「武器」變規晡才變好，阮共釣具幌入去海裡有湧的所在。蟳仔有夠饞食，連鞭遐咧吱，連鞭遮咧叫。逐家跤手猛掠，蟳仔一隻一隻入甕。當逐家笑甲喙仔裂獅獅的時陣，雄雄「啊！」厝蓋強欲夯去的慘叫聲，害阮掣一趒，原來春芬去予蟳仔鋏著指頭仔，鋏牢牢毋放。伊共蟳仔姑情：「蟳仔！蟳仔！你好心好行，共我放開，我共你放轉去海裡做海龍王。」拄講煞，彼隻蟳仔真正共放開，春芬照品照行，共伊擲入去海裡。彼隻蟳仔尾仔有做海龍王無，阮就毋知矣。
為著欲予蟳仔代代生湠，阮若釣著細隻的抑是抱卵的，就共擲倒轉去，閣共講：「蟳仔！蟳仔！你就較骨力仔生，予阮後擺來閣釣有。」
歡喜的時間過了真緊，一目𥍉仔，已經過三點鐘矣，我一个新娘面曝甲變阿婆仔面，豆腐曝甲變豆乾矣，逐家喝熱閣喝枵，就決定共蟳仔掠去好好仔「修理」。佇海產店內底，春芬為著欲報冤仇，食特別濟，毋過蟳仔嘛罰伊轉去跍兩點外鐘的便所。仲元兄興啉酒，『bih-luh』一罐紲一罐，面比蟳仔閣較紅，但是紅了後阮就有好歌通聽，我狗聲乞食喉毋驚見笑，嘛哀幾若條歌，逐家嘛輪流展歌喉，攏唱甲足歡喜的。 (TOP)
1盻(he)
阿婆的大官佇日本時代，予日本警察叫去造路，拄仔好總督巡查的時經過大路，雄雄有一尾毒蛇趖出來，險險仔咬著總督。阿婆的大官為著欲救總督大人，煞予毒蛇咬著，犧牲家己的性命。因為按呢，日本總督就收阿婆的翁婿做契囝。毋過「人無千日好，花無百日紅」，日本總督無偌久就夆調轉去日本。雖然有留一寡仔財物予阿婆翁仔某，毋過阿婆的翁婿破病，錢攏開了了，落尾也是無法度共伊寶貴的性命救倒轉來。阿婆無法度，只好共唯一的祖產—果子園提去賣，才有通埋葬翁。賣地的時，阿婆佮買主參詳予伊會當蹛踮果子園內底的厝，到死為止。
因為足散，阿婆常在捒奶母車仔，抾歹銅舊錫咧賣；嘛有收厝內有幼囡仔的尿苴仔轉去洗，洗好曝焦才閣提轉去佮主人算工錢，秀萍佮小弟阿義仔細漢的時尿苴仔就是阿婆洗的。阿婆生三个後生、一个查某囝，因為厝內散赤，三个後生攏予人招；唯一的查某囝八歲就分予人做新婦仔，啥人知影伊嫁毋著人，翁共伊放捒去愛別人，生一个查某孫仔閣𤆬轉來予阿婆飼。查某囝無面子閣蹛踮庄仔內，走去外地，一去就攏無消無息。
秀萍的老爸故事猶未講煞，秀萍的小弟阿義仔佮某心彤就轉來矣。轉來了後，秀萍就做伙去樓頂，共囡仔洗身軀、洗衫、款內底，阿婆的故事就另日仔才閣繼續聽落去。
秀萍徛佇二樓的磚台披衫，拄仔好會當看著阿婆的厝。伊的厝是杉仔枋釘的，看袂著厝內的情形，干焦知影內底一定真狹，兩坪大的跤兜。杉仔厝頭前有紅磚仔疊的灶，灶頂囥一个鼎，邊仔疊破好的柴。看起來阿婆毋捌用過瓦斯爐，攏是用柴咧煮飯燃燒水。杉仔厝的外口就是果子園，園內有種檨仔、弓蕉、蓮霧佮龍眼，秀萍自細漢就蹛庄跤，干焦遠遠看葉仔就知影園仔內有種啥物果子。今仔日聽老爸按呢講，伊才知影，原來園仔內種遐爾濟果子攏毋是阿婆的。猶閣有，樹仔跤飼的雞仔、鴨仔佮鵝仔嘛攏是別人的。果子園門口停的彼台車已經駛走矣。秀萍共衫披好無隨入去，徛佇磚台一直想老爸所講的故事。 (TOP)
我實在真毋願行上這條不歸路，翁猶緣投，囝猶細漢，爸母猶佇咧，這欲叫我按怎行會開跤？七爺八爺請你莫相趕，牛頭馬面你莫嚇驚，喔！耶穌你嘛來矣，我知影天國近矣！平常時我信你神愛世間人，猶毋過這時陣看著你，我是驚甲咇咇掣；我哪會舞甲這款地步咧？
人講第三查某囝食命，這敢有影？有啦！傳說中的水雞土仔某就是，心肝好、腹腸闊、袂計較，天公嘛來鬥相共，尾仔過著富裕的好日子；西方的三姊妹囡仔古嘛是，大姊嫁予共國王做『pháng』的師傅，二姊嫁予國王的總舖師，逐工食腥臊，第三的嫁予國王，生媠噹噹的囡仔，過快樂的日子。現實中阮大嫂嘛袂䆀，人巧、讀冊順利，考著師專，頭路便便，閣嫁著好翁，食好做輕可，好命inn-inn。做老師二十外冬，會使退休矣，閣去讀碩士，是上新的台文所，研究台語喔！伊實在是我的好模範。平平是第三查某囝，哪會天差咧地？這就愛怪我一步錯、步步錯啦！
彼年師專考無牢，袂曉計畫去補習一冬，堅持讀新娘學校――家專的幼兒保育系。雖然厝裡散赤，爸母疼我，予我開大錢，畢業揣頭路，才知代誌大條矣！固定的頭路歹揣，做囡仔頭王月給低，做國小代課老師雖然逐年愛考試，毋過放假固定，薪水袂䆀，自按呢做幾若年，這是我無煩無惱、無憂無愁的查某囡仔時代。啊！實在足懷念，足懷念的。唯一的致命傷是無在額，予人看輕。
「男大當婚，女大當嫁。」我去煞著同事紹介的「科技新貴」男朋友，我誠欣賞伊的電腦功力，誠佮意伊的緣投好看。除了遊山玩水、開講踅街以外，逐擺伊若來，阮攏關佇房間仔內，嗤舞嗤呲袂厭𤺪。爸母攏講：「按呢毋好啦！」「按呢傳出去足歹聽。」
愛著較慘死，親情朋友、兄弟姊妹並無贊同，干焦我目睭去予蜊仔肉糊著，堅持欲綴時行――自由戀愛。嫁了才知苦，大家真勥跤，先生是有孝，毋過我講話無人信篤，佇厝裡無地位。因為我無穩定的工課，結婚前的頭路，大家叫我辭辭咧，翁仔某同齊拍拚電腦事業。 (TOP)
除了大姊佮二姊佇彰化縣和美拍鐵山出世以外，阮賰的五个囡仔攏佇彰化市出世。印象中我蹛過『me-lí-á』枋厝佮鐵路宿舍，這兩間厝留予我誠濟記持，尤其是鐵路宿舍，是心中永遠的疼。
每一擺若是轉來我的故鄉彰化，攏會經過鐵路宿舍的天橋。
定定攏會經過這條往鐵路宿舍的彰美路天橋的入口。天橋正手爿是鐵路局工務段的辦公室，倒手爿就是一个小型社區──鐵路局工務段佮機務段的員工宿舍。大概差不多有兩百戶，分在額的佮臨時工。厝的坪數，當然佮階級有關係。
阿爸彼陣的職務是『看柵工』的臨時工，阮蹛的就是獨身仔的宿舍。
阮宿舍的位置是佇斡三條巷仔的巷仔口，一排四間透天厝的第二間。記持中這間才七坪的二樓透天厝，影響我的一生。這間厝有歡喜、有悲傷，因為過無偌久阮阿爸予車挵著過身。為著無愛予人看輕，阮勇敢面對未來，嘛比人較早體會社會的冷暖。
『看柵工』毋是阿爸第一份較固定的收入，雖然，臨時工薪水無濟，毋過是爸母維持家庭主要的經濟來源。記持中爸母定定共親情借錢，嘛真守信用，準時還錢，嘛予阮三頓食甲袂䆀，閣儉錢予阮讀冊，予阮讀甲毋讀為止。
我想：天下間的爸母攏仝款，一世人辛苦攏是為著囡仔，阿爸嘛是。
阿爸佇咧值夜班的時發生意外，毋過工務段認定阿爸是破病過身，無資格閣蹛宿舍。阮陳情無效，經過兩年，就予人趕出去。
後來阮買厝，買佇離鐵路宿舍五百公尺遠的辭修路的大路邊，就佇大裕食品公司的對面。這間厝的頭期款，是用阿爸的粟仔會佮撫卹1金納的，賰的分三十年貸款，逐個月納五百箍。到今阮總算有一間家己的厝矣，予外人感覺真意外，因為阮是三級貧民，哪有才調通買厝？感謝爸母佮大姊遮辛苦。
這間厝阮一直蹛到這陣，上蓋遺憾就是阿爸攏無蹛過。
離開鐵路宿舍已經三十六年矣，真想欲知影厝邊仔敢攏好勢好勢？對面的阿婆、猶有佇阮上困苦的時陣，幫助阮的李先生……這幾年攏無相揣。溫暖的厝，這馬毋知變甲按怎？是毋是猶有阮一家伙仔做伙拍拚的形影？猶有阮失去親人啼哭的聲音？ (TOP)
1卹(sut)
宜蘭頭城的搶孤，是佇每年咱舊曆的七月底，欲關鬼門的這暝舉辦，是真趣味、真鬧熱的宗教民俗活動。
搶孤的前幾工，著愛搭一座懸拄天的孤棚，棚跤是十二枝大柱，柱懸三十九尺，柱身嘛是成人尋的大杉，棚枋捅出大柱六尺外，這叫做「倒塌棚」，因為疊佇頂懸的棚枋比棚跤閣較闊。棚頂閣徛十三座孤棧1，掛鰇魚、鴨鯗、臘肉這類的焦料，孤棧懸十外丈，上頂頭插一枝順風旗，幾里外遠都看會著，人佮鬼攏看會著，人佮鬼攏會來搶孤。
鬼搶孤咱看袂著，無話通講起。人搶孤咱攏看現現，咱就來講這爿的齣頭。人搶孤的頭一步就是對棚跤𢯾大柱上棚頂，棚柱抹一沿閣一沿的牛油，滑溜咻2，會跋死狗蟻喔！搶孤的人是五人一隊，用人疊人閣縛大索的方式，共一个人沿棚柱托到棚枋下跤。這時這个好漢就愛雙手插入棚枋的空縫，雙跤吊半空中，慢慢仔吊到棚枋墘，展一下飛天掛角的工夫共人幌上棚頂，這步上蓋硬篤，毋是每一隊攏會當幌起去的。咱注意共看，每一隊會當幌上棚頂的攏是瘦閣結實的身材，這款身材咱講鐵骨仔生，聽說講廖添丁就是這款的身材。
有才調幌上棚頂的眾位廖添丁就胚命閣去孤棧，搶彼枝上懸、上颺的順風旗。緊張緊張緊張！刺激刺激刺激！這時冷風huh-huh吼，烏影四界走，眾好漢嘛跋甲捙畚斗，歸尾，猶是有一个上好跤手的好漢將旗仔搶入手，提著這枝順風旗，得著冠軍，嘛得著一筆大筆的獎金。
猶閣有，根據百外年來的講法，這枝旗仔有靈有聖，若共伊插佇船頂，就會招來魚蝦水卒，予魚蝦滿船載，船頭家笑咍咍，所以船頭家攏會出懸價來買這枝旗，予這隊好漢又閣得著另外一筆外路仔錢。
搶孤這个活動，咱毋但普渡陰間的好兄弟，嘛會將祭品留予陽間的人分來食，對遮會當看出咱的人善良、有同情心的好品行。 (TOP)
1孤棧(koo-tshián)
2滑溜咻(ku̍t-liù-siuh)
現代人受華語影響，攏共泅水講做游泳。其實，阮自細漢就耍水泅水，毋捌講過游泳。這馬就用我熟似的語言，講出台灣人泅水的種種泅法佮伊的種種名稱。
細漢的時陣，厝邊攏是溪溝、埤仔佮大圳，阮會佮較大漢的囡仔去溪溝掠蝦仔、摸蜊仔。來到較深的水窟仔就會蹽落去耍水，就是相戽水，學狗仔扒水，這款泅法阮講是拍滂泅，嘛有人共伊叫做游浴仔，就是耍水較濟過泅水的一種泅法，較泅嘛袂超過十米遠，逐家免學就會曉矣。
較大漢就學蛤仔泅，袂曉換氣的會當泅過十外米，會曉換氣的就出師矣，會當泅過溪，泅過埤。這種泅法佮蛤仔仝款，台灣各地就有蛤仔泅、田蛤仔泅、水雞泅種種無仝的名稱。
入學了後，學校會教一種速度較緊的泅法，就是華語的『自由式』，這是對英語free style翻譯過來的。佇台語內底，伊的名稱就真有意思囉！頭起先，伊的頭一直覆佇水底，換氣的時才共頭歪一爿浮出水面，氣換煞隨閣覆落去，所以叫做覆水泅。閣來，伊一枝手伸向正頭前，若一枝直直的竹篙，才換另外一枝手嘛伸向前，親像欲共頭前彼枝竹篙掠落來仝款，所以有人共伊叫做掠篙泅。上尾來看伊的跤，伊一雙跤一直佇水面搤水，會共身軀捒進前，所以自由式閣號做搤跤泅。
面覆水是一種泅法，面向天嘛是一種泅法，華語叫做『仰泳』，台語叫做死狗仔䖙；彼閣有一種較恐怖的名，就是死囡仔䖙。名稱蓋奇怪，毋過是一種真省氣力的泅法，看伊的手慢慢仔掰水，跤慢慢仔搤水，確實有成死囡仔䖙佇水面。
阮厝邊是桃園大圳，熱天時，有泅水高手會佇圳頭跳落圳，隨翻身徛佇水面。伊頂身若竹篙插佇水面，雙肢枝跤佇水底骨力蹔水，按呢就袂沉落去。看伊那佮圳邊的人開講，那予圳水流對水尾去，到圳尾才起來，這款泅法叫做徛泅、竹篙泅，是高手才會曉的泅法。
其實，水面會當泅水，水底嘛會當泅水，這號做藏沬。咱會曉禁氣就會曉藏沬，氣較長的泅較遠，氣較短的泅較近，這嘛免學。這種泅法嘛叫做tiàm沬，抑是藏水沬、藏頭沬、鑽水沬、鑽沬等等。
泅水有遮濟泅法，閣有遮濟名稱，看起來台灣人應該人人攏會曉泅水才著。華語講袂曉泅水的人是『旱鴨子』，這台語叫做山羊仔。台灣無山羊仔，因為台灣人上無嘛會曉拍滂泅、酒矸仔泅、秤錘沬這三種泅法。 (TOP)
1999年，踮新竹舉辦第一屆全國鄉土語言競賽的彼當陣，電視頂有一句真流傳的唸謠講「人若食老：哈唏流目屎，放尿厚尿滓，放屁兼滲屎」。阮幾个去遐做評審的人想講這句話若親像無蓋雅氣，就逐个做伙激頭腦，想出另外一句較好聽的，講：「人若食老，坐咧直哈唏，倒咧睏袂去，見講講過去，隨講隨袂記。」這句話真正有影較好聽，嘛誠實在，就代替原來彼句話，一直流行到今。
有人問講：「人生70才開始，啊是佇當時才變老？」，別人就應伊講：「人若講你猶閣少年咧，你就開始變老矣。」伊紲落來閣問講：「按呢喔！啊你看我，我按怎？」彼个人小想一下，閣掠伊看一下，就共伊應講：「你喔！袂啦、袂啦！你猶閣少年咧。」
有一个機會，捌去「中央研究院」參加每個月的「智識饗宴」，順紲聽專家演講。猶會記得彼暗的演講者是鄭泰安先生，伊是英國精神科的醫學博士閣兼科學博士，彼暗伊的講題是「媒體佮自殺」。會記得是講起有關『倪敏然』自殺的新聞報導，因為報傷濟、報傷詳細，真濟人會去模仿，煞引起自殺率的提懸。伊講這是毋著的媒體現象，加製造真濟的社會問題。其中有提起講：人會去自殺可能就是著著「憂鬱症」的症頭。有人問講：「啥貨是憂鬱症？」鄭博士特別用台語應講：「若是：袂食、袂睏、袂做，無記持閣無元氣，可能就是食老著著憂鬱症矣。」在座的袂少人，聽了就開始喙內一直唸，毋過我感覺真少人唸會齊全。可能佮年歲有關係的款。
嘛有人講食老的人有較厚話淡薄仔，喙一開就講袂煞，囝兒序細聽久嘛𤺪，有時會共伊應喙應舌；啊若是外人就歹勢按呢。所以若有機會通講話就講毋知通煞；想講至少嘛免像歐美國家的老人，著愛提錢倩人來聽伊講話。
有一位網友可能感覺講我也無偌少年矣，就『e』一个『戒老錄』予我，自頭到尾數十條，叫我每一工看兩遍，絕對有幫贊。看起來每一條攏誠有道理，毋過我想講有兩項若記會牢閣照按呢做，可能就加減有幫助：頭一項就是「毋通想講別人替你做，是應該的代誌，因為“老”並毋是就有權利要求別人“替你做代誌”」；第二項就是「毋通閒閒無代誌做，就欲管閒仔事，抑是論斷別人。」向望逐家品好勢，照品照行。 (TOP)
50年前，沖水馬桶猶無普遍，家家戶戶攏佇上揜貼的所在開便所。這个所在可能是市內人厝裡上遠上暗的尾間仔，抑是庄跤人厝外豬牢的所在，按呢暗時睏醒欲用就真無利便，所以會佇房間內囥尿桶。尿桶嘛是囥佇房間內揜貼的所在，親像門扇後，抑是八跤眠床的後壁，閣用布簾仔閘起來。
幾年前我買一座古早的八跤眠床，隨就想著尿桶，無尿桶就無古早味啊，就去揣看有便品無？今害矣，毋但無便品，連木匠店嘛揣無，這聲古早夢碎矣。有一工，我佇半庄跤的所在看著一間柴料行，是專門咧收松梧舊料的，我入去佮頭家開講，講起尿桶的代誌。這个頭家七十外歲，大概是興趣相仝，伊講會當提供松梧柴，閣揣老木匠來做一擔新的尿桶，毋過我愛攢尿桶鉤佮一跤舊尿桶做見本。按呢算來，一人貿兩項工課，大工事就捒會行。
有一工，我來到一間古董店，問看有舊尿桶無？頭家娘真意外，嘛真歡喜，因為這跤尿桶進貨二十年，無人相借問，現此時貴客入門，買賣隨就完成。有影是舊漚舊臭，閣有白白的尿滓，我鼻空捏咧，目睭激瞌瞌，共伊鑢清氣才載轉厝。
工課做一半囉，啊尿桶鉤呢？貴人佇佗位咧？尿桶鉤是大條藤做的，外形有成漢字「凡」字，是藤仔去彎去拗的，茫茫大海，我欲佗位去摸針咧？
閣有一工，我去宜蘭的金盈水沖𨑨迌，路邊有擔仔咧賣山藤做的柴頭仔，親像碎骨補，金狗毛的藥頭仔等等。我行倚去問頭家，這款山藤仔會使做尿桶鉤無？中年頭家連尿桶都毋捌聽過，會規晡猶是捎無寮仔門，伊才入去內面請出一位七十外歲的老先生來，老先生一聽，就應講：「你欲買桶鉤藤是無？」這聲換我開眼界，原來這款藤仔叫做桶鉤藤，聽名嘛知，伊就是做尿桶鉤的料啦。我應講：「我欲買尿桶鉤，毋知你會曉做無？」真是吉人自有天相扶，伊毋但會曉，古早伊就是做這途的。我歡喜甲親像天跋落月，隨就拜託伊做兩付。彎好，曝焦，形固定了後才寄來。工錢佮料錢我攏先付清，實在是歡喜過頭啦。
三個月後，我收著兩付新點點的尿桶鉤，趕緊共伊佮見本尿桶交予舊料頭家。過三個月，我就有一擔新點點，貴參參的尿桶，囥佇揜貼的尿桶角仔，頭前閣閘一塊門簾仔。每擺朋友來厝裡，我攏會神神祕祕𤆬來看這擔尿桶，順紲講出伊懷胎兩年才出世的經過。 (TOP)
若講起著做工，我就想起少年時彼段做臨時工的日子。細漢的時，厝裡誠散赤，為著欲趁家己的學費，毋管歇寒、歇熱，我攏愛認份，去做工鬥趁錢。毋過，1980年代的臨時工，毋是佇七𥴊仔店吹冷氣，嘛毋是佇十字路口分傳單，我是綴發財仔車大街小巷去賣麻糍，甚至閣去梨山做苦工、挽梨仔。做工少年時，有真濟鹹酸苦澀的滋味，嘛有誠濟甜蜜的記持，有當時仔做夢閣會來夢著。
「清水屋的麻糍來囉！好食的麻糍來囉！」我佮一个查某伴，坐佇發財仔車面頂，沿路包沿路賣。
「我欲二十箍塗豆的！」「我欲三十箍紅豆仔的！」阮兩个那捻麻糍、包餡、滒塗豆麩、烏麻仔粉，閣愛那收錢、找錢，兩雙手無一時閒。坐佇低低的椅頭仔，蹛狹狹的車頂屈規工，一直到麻糍賣煞，就會當領著現工的工資二仔五。這是我師專二年的歇熱，頭一个做工的經驗。
後來，聽講梨山工資懸，就孤一个人行李捾咧，對臺南坐火車到臺中，才閣對臺中盤客運到梨山。坐佇火車內，看著窗仔外赤焱焱的日頭光佇海面跳曼波，這是佇嘉南平原大漢的我，第一擺遮爾近看海。尤其是佇炎熱的八月天，一望無際閃閃爍爍的大海。離鄉的我毋敢有傷濟鄉愁，干焦向望會當加趁寡工錢，共厝裡相添。
佇梨山的日子，生活真簡單，天光就作穡，日頭落山才歇睏。查某工負責鉸梨仔較輕可的工課，查埔工就做擔梨仔較粗重的穡頭。鉸落來的梨仔照品種、大細分開包裝。若生傷懸鉸袂著，蒂頭掣無去的梨仔就hőng拍落來，予阮這陣佇山頂無四秀仔通享受的工人做啖糝。
因為一水一水的梨仔季無長，加上三十冬前生活普遍歹過，會記得彼陣所蹛的工寮真正是『五星級』的，所有的查某工𤲍一頂總舖，根本都無冗剩所在通翻身。工人濟，浴間干焦一間，姑不將一擺輪四个人入去。衫就袚佇索仔頂，一人徛一角，趕緊用冷水沖沖咧就準過。兩蕊目睭攏毋敢烏白相，到今想起來閣會歹勢呢！便所就搭佇外口的溝仔頂，凊彩用枋仔圍咧爾！暝時無議量，干焦會當攑手電仔炤暗眠摸的山路，行去山跤唯一的𥴊仔店外口，排隊敲唯一的公用電話報平安。
雖然做工少年時的沓沓滴滴，隨歲月的流轉已經漸漸遙遠，毋過彼種佇困境裡鍛鍊出來堅強的意志，煞成做我成長的養分，豐富我的人生。(TOP) (轉去主目錄)
沒有留言:
張貼留言