2013
07050641102 年閩南語朗讀文章-教大學生組
102 年閩南語朗讀文章-教大學生組 (原稿下載))(回102 年閩南語朗讀文章目錄)
1.彼年的熱天 蔡幸紋
2.日頭落山 陳韋豪
3.香燈跤 鄭家和
4.彩券 陳士彰
5.做囡仔的好肥底 蔡瑋琳
6.野生寵物 曹麗華
7.夢中的大瓦厝 莊桂英
8.山明水秀無憂愁 王秀容
9.烏膽石 王秀容
10.難忘的稻草芳 謝金色
============================================
暗時食飯，靜文的細粒子阿母攢甲一桌菜，腥臊甲，有炕肉滷豆乾、芹菜炒鯊魚皮、破布子炊南洋鮘仔、糋花枝丸、煎牛肉，閣有一大𥐵仔煠甲紅絳絳的蝦仔，參一大碗公筍仔魚丸湯。
「喔！攢甲遮豐沛，今仔日是有人客欲來咱兜[是無] 1?靜文用手拈一粒花枝丸窒入去喙空。
「緊共菜捀落去樓跤，叫恁阿爸好入來食飯矣！」款甲規桌頂的菜，阿母猶閣佇灶跤咧無閒。
靜文的阿爸上大的趣味就是屈佇公園，毋是佮人行棋就是佮人開講講政治，顧公園袂輸咧顧兜仝款，天暗矣猶毋知欲入來食飯，逐遍攏著愛靜文佇門跤口喝甲大細聲：「阿爸～食～飯～矣～！」喝甲規公園的人攏知影靜文兜欲食飯矣。
靜文看著規桌頂滇滿滿攏是伊愛食的菜，予伊想起四年前，伊欲讀大學，去臺北讀冊的前一暝，阿母嘛是炒甲規桌頂的菜，叫伊蝦仔佮魚仔愛加食寡，驚伊佇外口無機會食著海產。時間過了真緊，四冬一目𥍉就按呢過去矣。
靜文是厝裡的孤查某囝，所以自伊去臺北讀冊，阿爸、阿母加足孤單。靜文雖然有時放假會轉來高雄，毋過若是拄著學校代誌無閒、無拄好的時陣，成個月嘛無通轉來一逝。阿母若等無伊轉來，就會假無意敲電話予靜文，哩哩囉囉講一寡有的無的，上尾仔一定會問伊這禮拜敢會轉來?
大學畢業搬轉來故鄉的頭一暝，靜文倒佇眠床頂反來反去，想起大學四年的生活已經結束矣。做欲二十冬的學生，佇遮暫時到一个坎站，紲落來欲按怎，靜文猶是捎無。窗仔外落霎霎仔雨，一片茫茫霧霧，毋過翕熱的燒氣變甲淡薄仔清涼，猶算袂䆀。靜文若想著後禮拜欲去國校仔報到的代誌，目睭就開始沙微……
「欸！你猶閣咧睏喔！你今仔日透早毋是愛去學校報到？你這个囡仔哪會按呢無要無緊，頭一遍去人遐毋著愛較經心2咧，毋著較早起來準備，無，到時陣若袂赴，看是欲按怎？」
靜文予阿母喝一下，驚一趒。趕緊起來看時鐘，才六點，無毋著！透早六點！靜文欲去國校仔報到的時間是九點，對兜去到國校仔騎『oo-tóo-bái』只要兩分鐘，用行的極加五分鐘。靜文共棉被掩咧繼續睏！ (TOP)
1[是無] (hiooh/siooh)
2經心(king-sim)
可能真濟人捌跋落去水底，尤其對像我這種自細漢袂曉泅水的囡仔來講，每一擺落水就親像咧拚生死仝款。水底是另外一个世界，是一个無重量、無空氣、無時間的空間，所有的聲音佇水底若親像攏無存在，水底是一个真恬靜的世界。
雖然我自本就袂曉泅水，毋過我是真愛耍水。每一年的熱人，我攏會招朋友做伙去阮兜附近的公立游泳池浸水，幻想家己是佇宇宙間漂流。
2007年的熱人，大概是八月底啦！阮四个朋友相招去花蓮旅行，按算欲用五工的時間共花蓮、臺東行透透。阮行的路線真長，差不多共花蓮縣踅一輾。
佇花蓮市租車出發，第一工先去光復，暗時參加太巴塱2部落的豐年祭。這是阿美族上大的一个祭典，有真濟外地遊客來參加。當地的原住民太太非常熱心共阮紹介阿美族的舞蹈佮文化，原本掠準家己對台灣原住民的文化已經有一點仔了解，這个時陣才知影原來這攏是阮家己想的爾爾。
紲落來是去水尾、富里、池上、三仙台，閣走濱海公路轉去花蓮。
前一工阮蹛佇臺東三仙台邊仔的民宿，隔轉工是計畫欲去秀姑巒溪『泛舟』。想著欲『泛舟』雖然心肝內真歡喜，毋過嘛淡薄仔驚驚。較早捌聽過真濟『泛舟』的代誌，有人講安全，嘛有人講危險，家己總是有一種不安的感覺。毋過東部燒熱的天氣予人頭殼楞，阮已經予日頭曝三工矣，會當落水當然嘛袂閣想遐濟。
秀姑巒溪的出海口是長虹橋，離三仙台騎『oo-tóo-bái』愛兩點外鐘。阮愛佇透早七點半進前趕到位，會有專車佇遐接阮。所以這工透早天猶未光，差不多五點半的時陣，逐家綴慢慢仔浮起來的日頭做伙出發。西部的台灣人攏捌看過日頭落海的畫面，毋過真罕得看過日頭對海面浮出來，到欲暗仔，日頭才會真正「落山」。
我細漢的時陣定定感覺憢疑，想講明明是「日頭落海」，是按怎台灣話哪會講「日頭落山」？敢講這句話是對後山傳過去的？ (TOP)
1韋(uî)
2太巴塱(Ta-pá-lóng)
手攑鼓仔燈、香旗，一步一步綴媽祖婆出巡，就是香燈跤。佇較早交通無利便的時代，進香攏用行的，除了是體力的考驗，嘛是精神的磨練。佇進香客內底，有的是下願綴媽祖出巡踩街的；有的無求啥物，甘願綴媽祖婆行千里路的。今年拄仔好有機會來做大學生代表的香燈跤，是一款文化的體驗，嘛是一種無仝款的「轉大人」儀式。
自細漢，我就是媽祖婆的信徒，伊是我心靈的寄託，有真濟祕密伊攏知影，我知影伊袂過喙。較早神明一直是逐家的心理治療師。伊勸善教化人心，予咱有人生的方向，袂親像揣無燈塔的船隻，佇大海沐沐泅。伊慈祥的造型佮面容，可比是咱慈愛的母親，所以有真濟人共伊號做「媽祖婆」。咱台灣人，有海洋國家的民族性，信仰誠虔誠，毋管是南部沿海地區的送王儀式，抑是各地方鬧熱滾滾的大拜拜，攏表現咱台灣人對宗教信仰的熱情，一點仔都袂輸外國的嘉年華會。大甲媽起駕進前的幾點鐘，各地方的陣頭、曲館攏來鬥鬧熱佮拚場。親像內門的宋江陣、外埔的義虎團，閣有來送媽祖婆出大甲城，拍算欲行八工七暝的進香客，早早就往新港的方向行去矣。有的人拖菜籃仔，有的人騎跤踏車，看這一大陣人，愈行愈遠。我算是頭一擺參加，閣毋知影做一个香燈跤的鋩角，無經驗的阮，佇進香的路途中，一直想欲放棄，毋過「媽祖婆，疼戇人」，攏有好心的阿叔、阿姨共阮鬥加油佮鼓勵。
大甲媽起駕了後，攏是透暝趕路，所以有經驗的香燈跤，早就行到下一个鄉鎮去補眠矣！好佳哉我有勇壯的身體通倚靠，對大甲行到沙鹿，天色拍殕仔光，食著燒燙燙的『饅頭』、豆奶，精神規个好起來！天光，代表一工的開始，阮定定講：「今仔日閣愛看日出矣！」就是講「拚暝工」的意思。進香的時陣，阮也定定講：「今仔日閣愛看日出矣！」因為知影，今仔日又閣愛行到天光。一路阮攑香旗，沿路所經過的廟寺，攏會縛一張符仔佮頓廟的宮印。有的人行幾若冬，彼支香旗，就綴幾若擺，閣經過香煙的加持，舊舊、烏烏的旗仔，就變成上有價值的紀念品。 (TOP)
舊年的年底，我佇教育局服務的單位，著愛落去高雄參觀訪問。遊覽車沿路幌過來又閣幌過去，一粒頭是楞捙捙。到高雄了後，欲去訪問的學校，是一間紲接一間。除了欣賞逐間學校佇本土語言教學的成果，佮聽一大堆簡報以外，猶有寫袂了的資料佮報告。
對透早到下暗，上車、落車、目睭看、耳空聽、手又閣愛寫，三日落來，身軀的厭𤺪，實在是食袂焦。免講換眠床就咧歹睏矣，連食飯嘛攏無滋無味。
領隊的頭家陳校長(私底下阮攏稱呼伊頭家)，為著體貼阮的辛苦，佇落尾一日的下昏，特別安排去愛河邊一間餐廳，除了享受真腥臊的料理，猶閣會當欣賞規條愛河，充滿『羅曼蒂克』氣氛的夜景。耳空聽著優美的古典音樂，身軀承受微微仔涼風，予緊張束縛的精神，攏總輕鬆落來。
當阮所有的人，猶深深沉迷佇咧輕鬆氣氛的時，一位行動不便的『歐吉桑1』，坐佇電動輪椅頂頭，無聲無說就駛對阮坐的位來，予阮逐家雄雄掣一趒。老大人的車頂囥一疊彩券，來到阮中間，共彩券褫開像一支葵扇，佇眾人的面頭前擛一下擛一下：「頭家！拜託買一張！」彼種的「起毛」，完全拍歹拄才幽雅的情調。有兩、三位同事忍受袂牢，就行去愛河岸邊。
雖然無人欲插伊，彼位『歐吉桑』猶閣是袂死心，輪椅一直佇阮的四箍輾轉踅來踅去。伊來到我的面頭前，對我的面擛風：「頭家！一張才五十箍爾爾，拜託買一張啦！」
我共伊指對陳校長遐去：「頭家佇遐，你叫伊買。」逐家看我一擺創治兩个人，攏笑甲攬腹肚。
我從到今攏毋捌買過彩券，因為知影家己並無彼款運氣。親像過去，若是咧對發票，到今嘛無著甲半擺，連啥物叫做著兩百箍的滋味，攏毋捌鼻過。總是看一个行動不便的老大人，猶閣咧靠賣彩券來度生活，想起來嘛是真可憐。彼當時我也有淡薄軟心，就寬寬仔對褲袋仔撏五十箍出來：「我買一張！」其實我是向望伊趕緊離開，毋通共阮一直囉。 (TOP)
1歐吉桑(oo-jí-sáng)
教育的種子佇佗位？教育的種子是愛對細漢就開始培養，細漢就愛建立正確的價值觀。有一个充滿熱情的少年人，伊真疼惜囡仔，想欲做老師，來教育囡仔，予囡仔親像種子仝款，會當種佇好肥底的田園，種子吸收塗裡的營養，暴穎、發芽，健康大欉閣開花、結子。
好的老師就是好肥底的一部份。伊想欲做囡仔的好肥底，就決定去參加一个號做「教育營」的營隊。這个營隊的任務是愛去原住民部落輔導囡仔的功課，伊想講參加這个活動，會當充實家己的教學能力，是做老師的起步。
這个少年人頭一擺參加教育營，雖然有滿腹的熱情，毋過心肝頭嘛是有淡薄仔驚驚，因為頭一擺總是會生份。等伊看著囡仔純真的笑容，隨時就歡喜起來，敢若共落風的雞胿仔灌風仝款。
原住民的囡仔兄，逐个攏生做足相，袂輸一个模仔印出來的仝款。見著伊攏會笑笑仔問伊：「老師，你叫啥物名？」上袂慣勢的就是下課的時會共伊𢯾牢咧，毋甘放伊走。甚至有時仔囡仔轉去厝裡，會閣隨傱轉來欲佮伊耍。無時恬，一日到暗攏充滿活力。
伊知影，若是欲教智識佮道理，代先著愛佮盤撋。就按呢，伊做一件足偉大的代誌，就是決定欲撥時間來共好好仔栽培。伊利用食晝佮下課的時間佮囡仔鬥陣，建立感情，毋但會當教智識，也會當教禮貌佮規矩。紲落來一禮拜久，伊攏用真熱情的心來教，想欲教足濟智識，欲予一下仔就吸收真濟觀念。譬論講有一工早時上課，囡仔共早頓提來上課的所在食，食的竟然是泡麵佮「保力達B」，泡麵閣是用齧的。伊目睭褫甲大大蕊，袂輸看著啥物驚人的物仔。等到下課，伊就行倚去共囡仔講：「這是毋好的、無健康的。」因為彼个囡仔認為按呢食無啥物奇怪，是真四常的代誌，伊就共囡仔教一寡健康的觀念，向望會當改變的想法。 (TOP)
想起彼擺佮野生動物的意外相逢，這馬想起來嘛是感覺足難忘、足心適的。人講「一沙一世界，一花一天堂」，生活中若會當用心觀照，四界攏是驚喜佮趣味。這種巧合的代誌，可能是天公伯仔送予咱的禮物。
代誌是發生佇前年的熱人，厝邊兜陳老師講伊有一暗，佇厝邊的樹欉頂，看著五隻精牲仔，用手電仔一炤，五對目睭閃閃爍，鼻中央若有一條白線，無成野貓嘛毋是膨鼠，可能是某種暗時出現的動物。彼當時阮聽聽咧就袂記得矣，嘛無閣去張持。
一直到九月入秋的時陣，天氣開始反寒，雨傘樹的葉仔開始變紅，逐工透早出門上班的時陣，行過厝邊潘經理兜的雨傘樹欉跤，攏會看著塗跤有一寡仔予動物食過的樹子，逐家才開始懷憢疑是啥物動物變的把戲。
暗時仔開始有人徛佇樹仔跤，目睭金金相，想欲張看覓咧。皇天不負苦心人，經過規禮拜的等候，神祕的嬌客現身，逐家總算看著的廬山真面目。佇水土保持局做工課的蕭課長，認出伊是保育類的野生動物――白鼻心，研判可能是人飼佇籠仔底偷走出來的，也有可能是偷走出來了後生湠的後一代。伊古錐的模樣佮形體，大人囡仔攏足愛的。
風聲傳開了後，社區的大大細細，樓頂招樓跤、阿公招阿媽、阿母招阿爸，逐工下昏暗，攏會結結做伙，袂輸夜市仔遐爾鬧熱，見面的頭一句話就是：「來矣未？來矣未？」有人開始佇伊不時出現的所在囥一寡仔果子，想欲唌來食。白鼻心閣叫做果子猫，就佮伊的名仝款，對逐種果子，攏無揀食，尤其是木瓜佮弓蕉。有當時閣會兩、三隻同齊出現，野外的動物佮飼佇籠仔內的就是無仝，體格讚，毛草媠，目睭金爍爍，看起來足健康的。
的出現，煞變成社區的大代誌。有人來翕相、有人來畫圖、有人做記錄，若親像是逐家公家飼的精牲仔仝款。社區厝邊頭尾的感情嘛因為這幾隻動物的關係，愈來愈好，連親情朋友來相揣的時嘛相爭來看。
幾隻野生的果子猫，有法度帶來遮爾濟的快樂，蹛佇都市的人連眠夢都想袂到有這款代誌，毋過伊確實真真正正發生佇阮的身軀邊。 (TOP)
昨暝，我又閣轉去阮兜的大瓦厝。
門口彼欉榕仔足大欉，青色的樹葉仔發甲密密密。
榕仔的後壁，是兩間灶跤。只是用足低的牆仔圍咧，會當相通、相看。
灶跤的後壁，是浴間仔。浴間仔的外口是一个長株形的大水池，半暝的時陣，所有的新婦攏佇遮舀水洗衫兼開講，定定笑甲足歡喜的。
水池閣入去才是阮兜的大瓦厝，倒手爿有三間房間，正手爿嘛有三間房間。倒手爿上尾間是阿媽的灶跤，閣來是細漢阿姑的房間，頭前間是阮兜六个人的總鋪，爸爸排第四。
正手爿第一間是阿公阿媽的房間，閣過來是阿公共人看病開藥仔的所在，有一塊匾頂懸寫「文秀國術館」。阿公是一位功夫真厲害的師傅，會曉拍拳、點穴，伊的藥仔會當治療足濟歹醫的病。阿公過身了後，爸爸六个兄弟仔就是佇遮抽鬮仔分土地。逐家攏照抽的結果來行，無人有別款話。
阿公的手尾──國術館放予五叔仔，因為伊的身體上䆀，袂當出去揣頭路，所以逐家攏同意將國術館予伊，包括一粒講是無價之寶的夜明珠。
第三間是籠仔工場的工人蹛的房間。
中央的大埕是阿爸兄弟仔做伙煉膏藥的所在，也是練功夫拍拳頭的所在。佇阿公猶閣佇咧的時，姓莊的宋江陣就佇阮兜的門口埕練習。阿公過身了後，換五叔仔佇遐教徒弟。大埕是逐家公家的，天氣燒熱的時陣，就會當看著十幾个囡仔佇遐耍「過五關」、「蹌跤雞」、『一二三木頭人』，猶有五、六个新婦佇遐披衫、曝被單、曝棉襀被；過年前用竹篙曝肉乾、魚脯、煙腸，規个埕曝甲滿滿是。
年仔節仔，會佇大埕囥兩塊圓桌仔，每一个新婦會先佇家己的灶跤煮菜，尾仔才捀來囥踮埕裡的兩塊圓桌仔頂。無排椅仔，大人囡仔攏徛咧食，對這桌食到彼桌。我上愛食米粉炒，二姆仔的米粉炒真正足好食；阿母煮的瓜仔雞，芳絳絳，芳過幾若條街；三姆仔做的八寶丸比菜市仔賣的閣較好食。逐家食飯配話，連月娘有出來、無出來，都無人會發現；有放炮、無放炮，嘛無人會注意著。 (TOP)
山，予人堅強的印象，定定予人提來比做查埔人抑是擋佇面頭前的挑戰佮困難。山嘛予人感覺足威風不可冒犯；民間故事內底，定會講著山神咧受氣，規庄就會出代誌；若想欲得道成仙有靈氣，愛度過山裡的修煉。
水雖然伊嘛有發威起歹的時陣，像水崩山、痟狗湧；毋過佮山比起來，就親像溫柔的女性，溪水的印象是久久長長，會綴環境的變化揣生路；若是海就會有肚量𠢕吞忍。除了溫柔，水嘛有寬赦諒解去垃圾的心理。所以，爸母疼囝長流水，佇電影內底，若看著洗盪，代表對過去的化解佮心靈的提昇。
懸山低水，若像誠無對筒1，毋過，嘛有鬥峇和諧的時陣。
咱人的身軀，肢骨若像山，予咱會當徛予正得人疼；會當踏佇四方的土地頂懸，頭戴五彩的青天；會當予咱的身軀硬掙有元氣。咱的血脈就若水，佇咱的身軀底，有百分之七十的水份，所以，醫生定定叫咱愛加啉茶，通共咱身軀這塊土地的垃圾摒予清氣仔清氣，才會健康食百二。
媠媠的花園有山，有水池，媠媠的厝內，毋管是檫仔抑是雕刻，攏有山頂的飛鳥動物，嘛有水裡的蟲魚植物，唱出山水對大自然的樂曲。這是主人關佇深宮向望曠闊的世界，是建築師對大自然走揣和諧，是風水師調合乾坤陰陽，揣一个予人蹛起來會當出入平安，福氣連連的所在。
山的人，閣較了解山佮水的和諧。大車路上山落崎，攏是順溪水的彎斡來行；細條山路巡咧行，一定聽會著溪水聲，因為山明水秀才自然，才有圓滿的意義，才會予人心花開。
山，是水上好的伴。雖然天地是用陰陽對立來創造，火佮水、山佮海、悲歡、離合……講袂煞的相對頭，毋過，上重要的是，咱敢有學著山毋驚艱苦的勇氣？學著水會當包容寬諒的智慧？敢有將圓滿囥佇咱的心肝內？敢有用和諧過生活相對待？敢有用遊山玩水的好心情看世界？敢有感恩山明水秀無憂愁？ (TOP)
1對筒 (tuì-tâng)
無偌久以前，無偌遠的所在，台灣的東海岸，有誠濟囡仔歇熱嘛足無閒的。逐工除了浸佇海裡，黏佇海岸，就是野馬走山坪, 揣山頂好食好耍的物件。
日頭大大大，海風吹袂煞，公路邊兩爿的枇杷樹葉仔闊闊闊、密密密，草仔曝甲焦焦焦，鳥仔雞仔，透早起來叫一站仔，就熱甲吼袂出聲。空氣是鹹的，風是恬的，身軀是黏的。囡仔人就規氣莫穿衫，放身軀的排骨仔隊，頭殼的金光槌佮日頭相對，曝甲烏金仔烏金，袂輸這箍圍的海邊仔才有的烏膽石。除了喙齒白白，就賰彼兩粒目睭大大蕊，像太平洋的海面，光光爍爍，深深媠媠。
烏膽石的囡仔，誠實有一項烏膽石的工課。
「緊，緊，緊！利理1，來去趁讀冊錢喔！跤手慢鈍，會袂赴市喔！」同伴咧喝的聲就若像佇曠闊的大海霆水螺，較遠嘛聽有。
利理¹的名是阿爸號的。伊出世的時，阿爸聽著囡仔的吼聲，攑頭感謝天，頕頭感謝地，越頭看著壁角一桶伊自細漢抾的烏膽石，就共伊的寶貝仔囝，號做利理烏膽石，向望伊會當像烏膽石仝款，經過海湧的艱難，磨出特別的光焱，向望伊毋管行到佗，攏會想著故鄉海湧的聲。
秀姑巒溪口有大大粒若玉仔的石頭，太魯閣有出名的大理石，東海岸干焦這搭有烏膽石。講嘛奇，今年歇熱，有生理人，來庄頭講欲用錢收烏膽石。一陣囡仔，攏走去抾烏膽石賣，通鬥塌冊錢。抾甲差不多的時，囡仔人就開始耍囉！
「咱共烏膽石疊做尖塔，佇上尖的所在，囥一粒海螺仔殼，看啥物人搩著彼粒海螺仔殼，逐家就愛予伊一粒烏膽石。」
「袂當偷食步喔。」
五六个囡仔，十幾蕊目睭，斟酌咧相彼粒海螺仔殼。有人擲無著的時，邊仔的人就大聲拍噗仔。
日頭猶是大大大，烏膽石這擺佮耍煞，就會予人載去都市過生活。伊敢會想起故鄉日頭曝海岸，海風吹山坪？伊敢會聽著海湧的聲？ (TOP)
1利理，阿美族音lili，黑膽石。
這站仔若駛車經過田園邊，黃錦錦的油菜花、『波斯菊』、日頭花四界開，規大片的田園，變成花花的世界，庄跤景觀換新裝！這是做肥兼美觀，遮的花毋但改變塗質爾爾，也已經是庄跤文化的主角。過年前後，慢冬稻仔若收成，會掖一寡油菜花，軋軋做肥料，油菜花嘛會食得，阿母欲煮的時就會叫阮去挽，現挽現煮，食起來特別清甜。
『波斯菊』、日頭花會當帶予土地較濟的有機質，開始佇咧庄跤出現，加上農村旅遊風氣當咧時行，真濟鄉鎮公所攏鼓勵農民種日頭花、『波斯菊』，向望做當地的特色，建立無仝的農村景觀。沓沓仔日頭花毋若有做肥的角色，閣有吸引遊客的「觀光價值」。
作穡人真艱苦，定定佇咧天拍殕光的時就愛去田裡作穡，犁田、播田、薅草、挲草、巡田水，掘田岸、淹田、噴藥仔、趕鳥仔......。較早農村作穡攏是用人工，逐家相放伴割稻仔、播田、挲草等等，起冬落冬，一大陣人那做那開講，笑聲傳千里，也像是一場重要的嘉年華會。
無電動機械的時代，割稻仔攏是靠人工，粟仔桶是用人咧拖。頭前兩个拖，後壁一个捒。粟仔機是用跤踏的，逐个人動作攏真緊，半行半走，那破豆1那唱歌，嘻嘻嘩嘩，足鬧熱的。自農業進入工業社會了後，機械化無閣用人工矣！作穡人收入無法度飼一家口仔。
若是稻仔咧收成的時，我上期待的就是割稻仔飯，大部份割稻仔攏是相放伴，主人會予做工課的人食點心、正頓、茶水，攏會驚輸人，會予人講話。準講若是予人講：「啊！某某人兜食上䆀！」按呢面子會盡掃落地，所以慷慨的主人，攏會攢上好的來予人食。
我真數念過去庄跤的生活，伊帶予我真濟回憶佮快樂，大自然的交響曲，農村風情，已經攏消失去矣！捀一碗飯，坐佇田岸墘，目睭金金咧看天，看水雞、看田螺，稻草的芳味滿滿是，鳥仔來啄蟲、啄稻仔，新鮮的空氣，大自然土地的芳味，樸實的庄跤人！彼種情景，你若毋捌親身體會，是無法度瞭解的。佇庄跤稻仔收割的時，彼種稻草味真芳、真熟似，予人永遠難忘！ (TOP) (轉去主目錄)
1破豆(phò-tāu)
沒有留言:
張貼留言