2013
07050826102 年閩南語朗讀文章-社會組
102 年閩南語朗讀文章-社會組 (原稿下載))(回102 年閩南語朗讀文章目錄)
1.放送頭 張翠苓
2.阿桑的形影 陳昆龍
3.金山老街來𨑨迌 邱文錫
4.釘干樂—桃園大溪上出名 陳憲國
5.新埔紅柿若出頭 邱文錫
6.基隆的海邊仔風景媠 劉春蓮
7.庄跤漁港 薛玉麗
8.轉來故鄉買靈魂的人 林淑期
9.麵擔仔後 蔡淑芬
10.三角仔的留戀 蔡淑芬
11.我又閣夢著阿母矣 黃文俊
12.懷念番薯味 謝金色
是啥物因緣，會當佇歲月流轉三、四十年的時空，閣佇電台聽著放送頭周進升先生的聲音？
彼年，會記得是阮囡仔猶咧讀國校仔，我六點外起床，透早落來無人做伴的樓跤，拍開收音機陪伴我攢早頓。七點外送囡仔去學校，收音機到底咧放送啥嘛無要緊，總是有聲就有伴。
有一工，咧等欲載囡仔出門的時，紲手捘音響彼粒選台鈕仔，捘著一个電台，輕輕仔放送出來一條日本『iàn-kà』〈相逢有樂町〉1的音樂。這條輕柔的音樂，有我細漢時溫暖的記持。音樂放送無偌久，聽著主持人的聲音，我人煞愣佇遐。一開始彼條熟似的音樂，就予我聽甲已經茫去矣，閣聽著主持人的聲......，這敢是咧眠夢？敢是我聽毋著？敢是我家己咧幻想？伊的聲，明明是三、四十外年前，囡仔時佇庄跤聽著的。仝款的片頭音樂〈相逢有樂町〉、仝款的主持人，三、四十年時空的流轉，停止佇這个時陣，好親像踅轉去原來的所在，這是啥款的因緣！因為驚喜、因為感動、因為毋敢相信，規身軀毛管空攏徛起來，咧向這个佮舊時空奇妙的相逢行禮。
我綴阮阿爸聽『la-jí-ooh』的年歲，是佇猶未讀冊的囡仔時。阿爸佮阿母對田裡作穡轉來，阿母入去灶跤款中晝頓，阿爸準時十二點捘開『la-jí-ooh』。雖然經過幾若十冬，我猶原會記得，對『la-jí-ooh』放送出來的片頭音樂是日本『iàn-kà』〈相逢有樂町〉。好聽的旋律，主持人低低迷人的聲音，陪伴阿爸度過一个輕鬆的中晝時，阮嘛綴咧聽彼若捌若毋捌的廣播內容。想袂到彼个聲、彼个景，三、四十年後的這个時陣，又閣浮佇阮面頭前，佇我的耳空邊咧霆！
細漢的時，阮兜彼台『la-jí-ooh』是真空管2的，關掉的時，真空管的燈火真久才會化去。因為彼台『la-jí-ooh』捌歹去，表兄提去修理了後，腹內佮喇叭箱仔煞鬥袂好勢，只好分開囥，嘛才予我看會著內面慢慢仔化去的燈管。『la-jí-ooh』的外表無媠，伊的聲音煞予我的囡仔生活變甲足豐富的。會記得彼時節目的尾站，主持人總是用慢慢、低低真有磁性的聲音講：「歡迎下一次按時收聽！」怪奇咧，當頭白日的中晝時，是按怎伊逐擺攏叫人「暗時收聽」？ (TOP)
1有樂町(Iú-lo̍k-ting)
2真空管(tsin-khong-kuán)
「你清明有欲轉來無？」「彼工透早就欲培墓，傷趕啦！我無法度轉去。」「啊無你是當時欲轉來？前擺對過年轉來到今嘛遐久矣！」「歇熱啦，我會𤆬囡仔做伙轉去。」 「好啦，好啦，隨在你啦！較捷敲電話轉來……」
一冬兩擺轉去南部，看著的阿桑一擺佮一擺無仝。是猶會騎『oo-tóo-bái』四界踅，毋過看電視䖙落椅仔就開始盹龜；假喙齒攏提掉了後，就愛用兩排齒岸哺物件，定定會嫌我煮的菜無夠爛。較早的阿桑才毋是按呢咧，佇我囡仔囝的目睭裡，伊敢若是布袋戲內底高長1大漢、功夫厲害仙考都考袂倒的武林高手。
阮兜蹛庄跤，厝裡作穡種弓蕉。別的囡仔禮拜日、歇熱攏誠歡喜，我是煩惱著愛綴去弓蕉園割葉仔、顧水、薅草。其實厝裡我算上細漢的，攏揀輕可的代誌做，粗重的阿桑佮阿兄、阿姊早就做甲差不多矣。毋過我上驚薅草，跍甲腰脊骨是強欲斷去，看別逝的人愈薅愈遠，規氣坐佇弓蕉欉跤歇睏，一睏仔，阿桑就會越頭來共我鬥薅。
阮欲去弓蕉園愛行過一條闊莽莽的溪仔，彼陣無人咧撐渡，若欲騎『oo-tóo-bái』去園裡，對橋遐過就愛踅一大輾。佇阮庄仔頭，差不多逐間厝攏有一隻竹棑仔，縛佇溪仔邊，棑仔用竹篙撐咧撐咧就過溪矣。阮做囡仔的時定定划棑仔耍水，嘛定定予大人喝，走予逐。
逐家攏有家己的棑仔，遮的棑仔按怎來的呢？別人我是毋知，阮兜的是阿桑家己做的。佇清明，雨水開始欲濟進前，阿桑會先去買一寡比大腿較粗的竹仔，攢一坩火炭，看竹仔若有彎彎的所在，就用火沓沓仔烘，等竹仔小可仔變軟，才足細膩共雕予直。等甲攏雕好勢矣，才共竹仔鋸平長，排予齊，頂懸囥細枝竹仔拍橫的用鉛線縛予絚。
若講做到遮煞工，就無算真正範。阿桑閣會佇棑仔頭遐，那烘那雕，予伊規个翹起來，按呢撐棑仔的時陣，頭前的水才袂潑入來，這才是做棑仔的真功夫。功夫若無好，毋是竹仔烘甲臭火焦破空，就是雕甲必去。
規个棑仔做好就愛閣漆一沿點仔膠，會當擋較久袂漚去。上煞尾揀一枝較粗勇的竹仔，佇竹篙頭鬥一塊鐵仔，撐棑仔的時陣，竹篙才袂浮起來，歹出力。 (TOP)
1高長(ko-tshiâng)
你知影台灣上蓋好額的庄頭佇佗位無？土想嘛知，新北市的金山區啦！因為伊名叫金山，當然是金銀滿四山，家家戶戶攏嘛是金厝頭，銀厝角，黃金白銀淹跤目。
可惜伊有金名，無金命，歷史記載按呢講，金山原本是平埔庄，後來漢人入來徛家生活，就共伊叫做倚音的漢語名――「金包里」，這佮黃金白銀一點仔關係都無。日本人來了後，將伊改名做「金山」，自按呢伊就佮黃金牽做表親。毋過這真奇怪，金山是倚海的平洋，無金也無山，敢講彼時的日本人想金仔想甲起痟矣，號這个名來自我安慰？
金山雖然無出產黃金，毋過有出真濟名產，上出名的就是鴨肉。咱來到金山老街，鴨肉店有十外間，人講「濟戲濟人看」，人濟店就濟，有錢公家趁嘛！
唷！毋著呢！逐間的菜盤攏是對外口捀入來的，原來這十外間店攏是仝一个頭家，頭家生理好，閣稅十外間店面，攏是排椅桌食飯爾爾，鴨肉料理是中央廚房供應的。生理好甲這款，莫怪金山鴨肉是一名迵京城。人講攑竹篙蓋倒街，這位李老板是用鴨肉蓋倒街，因為規條街仔來來去去的，攏是伊的鴨肉客。
金山鴨肉猶有一項特色，就是人客家己點菜，家己去中央廚房捀菜，人客兼走桌，袂輸自助餐咧！無法度啦，生理太好，鴨肉太好食咧！
鴨肉料理食煞，趖來到街尾的廣安宮，這間廟有兩百外年的歷史，服侍開漳聖王。廟真媠、真闊，真氣派，是民國70年重翻新的。就是講廟殼是新的，內底的神尪仔佮神器是舊的。人講「先顧腹肚，才顧佛祖」，食飽囉，就入去廟內參拜，感謝伊兩百年來保庇本地平安，嘛感謝伊今仔日予咱有一頓腥臊通食。
顧腹肚佮顧佛祖了後，毋通袂記得，金山猶有一項好寶，就是溫泉。伊有鐵泉、硫磺泉、碳酸泉，佮台灣獨一無二的海底溫泉。這款泉有海水的鹹味佮苦味，在地人自日本時代就捌寶，就有人做浸溫泉的生理。來到溫泉區，咱會當揣一間佮意的浴間仔好好仔享受溫泉帶來的熱情佮健康。雖然講食飽肚重，毋過溫泉若浸煞，精神百倍，腹肚又閣枵起來矣，敢若會當閣來去食一盤鴨肉的款。(TOP)
桃園大溪出名豆乾是通人知的，毋過真濟人毋知影桃園大溪世界上出名的，是華語叫做『陀螺』的「干樂」。
咱台灣傳統的干樂大部份攏是用柴製造的，阮講做刣干樂。阮細漢的時陣有一首唸謠講：「一樟，二khīng，三埔姜，四苦楝」；就是咧講欲刣做干樂的柴，著愛揀彼款較𠕇的柴，愈𠕇的愈好。當然逐所在的情形攏無啥仝款，佇大溪這个所在，有人講龍眼、菝仔抑是檨仔柴閣較𠕇、閣較好。
普通刣干樂差不多一節兩三寸長的柴箍就有夠矣。俗語若講「一丈柴刣無一粒干樂」，就是咧講一个人技術誠低路，效率傷過頭差，造成浪費真濟材料；啊若是「無索仔拍干樂」，彼就親像飛行機飛上天──變無輪；若講「海沙埔拍干樂」，就是做生理的人上蓋驚的「歹轉踅」，也就是「週轉不靈」的意思啦。咱台語內底有一个謎猜講「一跤會走，無喙會吼」，就是咧講「拍干樂」；啊若是講一个人「鼓吹喙，干樂跤」，就是講這个人話較濟過沙螺仔殼，又閣坐攏袂牢，無一時得定。
「拍干樂」就是用一條索仔共一粒干樂纏真濟輾，用手共干樂擲出去，佇半途中將索仔雄雄掣倒轉來，干樂就會踮塗跤轉。拍干樂會使家己一个人拍，嘛會使兩个人以上，互相釘來釘去，比看啥人的干樂較勇，干樂若予人釘歹去，是品無賠的，這就是「釘干樂」。有人就共干樂的尻川底彼枝釘仔改做「一」字形的利刀，聽講較有贏面。
拍干樂世界上出名的是佇桃園的大溪。1968年，大溪遮有人組織一个「干樂王」公會，互相研究干樂的形式佮各種拍干樂的方法。干樂愈做愈大粒，對起初的5斤、10斤，到50斤重的「干樂王」。紲落來閣成立「俱樂部」大力咧推廣，干樂嘛閣愈做愈大圈。聽講目前世界的『金氏記錄』，是1985年由廖文樹先生所製造，號做「地靈之光」的干樂王，重量是155斤(大約93公斤)。啊若講到拍干樂的世界記錄是2005年，大溪的張泰源先生創造的，干樂重量超過100斤，會當轉39秒久，有影真無簡單。
拍干樂這陣已經變做是傳統民俗技藝，彼就是表示咧欲撈起來滴水矣，需要有人設法來傳承落去。(TOP)
「紅柿好食，對佗起蒂？」凡勢你毋捌聽過這句話，毋過你一定愛了解，「起蒂」諧音「起致」，就是代誌的原因、物件的源頭。紅柿當然是對柿仔樹欉來的，所以伊的意思是講咱人著愛「飲水思源頭，食果子拜樹頭」，著愛「飲水思源，知恩報本」。
按呢咱市面的紅柿，伊的源頭又閣佇佗位咧？這个源頭就是新竹縣的新埔鎮。這个所在是好地理，每年九月，紅柿採收的時陣，九降風會準時來報到，柿農共採收的柿仔披佇厝埕，予日頭曝，予九降風吹，予變做甜閣𩚨、特別好食的柿粿。的柿粿嘛名聲迵規台灣，錢水就趁袂完。新埔柿粿的行業已經有百外年矣，毋過現代的柿農毋但有現代的種作技術，閣有現代行銷的手法。將柿粿這个行業當做當地的文化來經營。佇每年的九月，紅柿大出的時陣，就舉辦柿粿的文化活動，鬧熱滾滾，袂輸咧迎媽祖咧，予市面繁榮，予柿農橐袋仔飽滇。會使講紅柿若出頭，新埔的錢水滿街流。
這予我想起另外一句流行通台灣的古早話：「紅柿若出頭，羅漢跤仔目屎流。」哪會差遐濟咧？原來古早時代，唐山羅漢跤仔來台灣揣生路，攏是做散工，做苦力，做毛管出汗的工課。到九月、十月，紅柿出頭的時陣，漸漸進入寒天的季節，市面較無工課，無工就趁無錢，腹肚會枵、身軀會寒，今年的寒天毋知度會過無？想到遮目屎就會暗暗仔流、暗暗仔流。
佳哉時代無仝矣，現代觀光客來到新埔，看著新埔的紅柿出頭，顛倒是喙瀾水一直流、一直流。
紅柿的外皮紅紅幼幼，袂輸紅嬰仔的喙䫌，幼麵麵閣軟膏膏，毋過伊較會摖傷遛皮，所以有人共伊貴氣的身命編做一條謎猜，伊按呢講：「紅雞籠，鐵雞蓋，借你摸，毋通共我挵破。」雞籠是講伊的外皮，雞蓋是伊𠕇硞硞的蒂頭。新埔柿農真巧，嘛有賣一種青皮無隱的青柿仔，伊另外一个名叫做水柿仔。這款柿仔真𠕇身，愛削皮才食會落去，有人佇街路裡，用竹攕攕咧，那行那食，享受人生的甘甜。 (TOP)
古早人有咧講：「毋捌食過豬肉，嘛捌看過豬行路。」佇咱基隆愛講：「毋捌坐過船，嘛捌看過大船放尿。」
基隆港邊，新點點的海岸廣場，予咱欲鼻海味袂費氣。伊的正頭前，有一間城隍廟，倒手爿是基隆火車頭，啊若正手爿，就是港務局，遮就是看大船咧放尿的所在。現代的大船，攏是利用機械捒振動的，所以講，船仔頂懸噴出來的水，是欲予振動的機械回冷，毋是無衛生閣毋捌字的不死鬼啦！定定踮遮載人客的郵輪――天秤星號，暗時仔，白色的船仔頂，五彩的聖誕電火球仔若點著，一層閣一層，敢若世界大的雞卵糕，真神祕；心肝底足想欲學狗蟻仝款，恬恬仔，起去船仔頂探看覓咧！
逐擺影著電視化妝品的廣告詞：「你會使閣較倚咧！」就會予我想著，漸漸燒熱的春天，愛闔家相招，去近在眼前的海岸――木山澳仔海沙埔耍水。雖然，春風閣涼涼，海水閣小可仔冷冷，阮已經慄慄掣，共褲跤撆起來，佇淺淺的海邊仔，笑咍咍，咧學水鴨仔拍滂泅囉！
往濱海公路駛去，會先到和平島，遐有濟甲算袂清的壺窟仔、豆腐角、蜂岫石空佮珠仔石的海岸，有夠媠！聽人講這款海岸，上無嘛愛成千年才變會出來，有福氣的人才看會著啦！閣有西班牙人捌佇遮起禮拜堂，荷蘭人捌佇一粒石山中央，挖番字洞，本地人共伊號做皇帝殿，有影媠甲通人呵咾！
八斗仔的東爿，有一座平浪橋，嘛叫做虹橋，就是潮境公園的入口。無講你毋知，遮爾仔媠的潮境公園，有青翠柔軟的草仔埔、國民車道、溜籠佮噴水池。遮本底是一个糞埽場，毋管伊三七二十一，逐家自在佇遮散步、看海、聽海湧聲佮放風吹，有一種簡單的幸福。
佇『lā-jī-ooh』內底，捌聽講一个讀甲博士的教授，有兩改想袂開，哪會按呢？予人想攏無！若準講，伊若逐禮拜的歇睏日，揣時間佮厝裡的人，同齊去四界行行看看咧，感覺自然的大，體會「一枝草，一點露」，知影「花無百日紅，人無千日好」，了解「死皇帝，毋值得活乞食」，心花一開，小可仔大代誌就無啥要緊啦！「時到時擔當，無米才煮番薯湯」嘛！ (TOP)
茄萣仔這个所在若無特別提起，知影的人應該無濟。遐，有一个漁港，叫做「新北港」。我是佇彼个所在出世、大漢的海口囡仔。講著我囡仔時代，彼站才光復無偌久，干焦知影序大人變食三頓，做甲搭籬搭壁。因為知影趁小錢愛拍拚，趁大錢才靠運命。毋過透早天未光就出門，暗暗才轉來，無閒規工貼貼嘛無一定趁有食。因為老爸是靠一隻竹棑仔咧討海，飼阮規十个囡仔，泔糜仔食無夠就食魚來鬥。阮阿媽定定講一句話：「有通食就好，毋通嫌無菜，蔭豉仔擘爿你就知。」
較早的「新北港」，講是港，其實無成港。因為主航道無拍通，毋成樣的港喙嘛無燈塔；白沙崙、頂茄萣、下茄萣，三个庄頭的大細隻漁船，若出海掠魚轉來，攏無法度直接入港來落貨。著愛離岸頂差不多100公尺以外的外海拋碇共船仔固定佇外海了後，船員才坐竹棑仔划上岸。若掠著較大注的，嘛仝款愛用竹棑仔，靠接駁的方式送上岸頂，才閣倩人擔去漁會喝賣。佇40外冬前，故前總統蔣經國，巡視來到遮，認為遮會興旺、發達；[就按呢]1改名叫做「興達港」。政府才編預算，拍通航道，興達港才成做一个漁港，會當靠規百隻的漁船。港裡有規劃拆船碼頭，嘛有新起的漁會大樓佮魚貨喝賣場，真四序，當地的漁民是呵咾甲會觸舌。
興達港，是佇高雄市茄萣區的上尾溜，台灣電力公司嘛佇遮建造火力發電廠。幾十年來海水一冬一冬漲懸，市政府就沿這條濱海公路，用『khōng-ku-lí』的方式，造一條20外尺懸的駁岸。駁岸內是港區，駁岸外是臺灣海峽，嘛閣嘛佇駁岸跤囥真濟紅毛塗做的「肉粽角」。華語講彼是『消波塊』。因為海湧拍佇駁岸跤的力量誠大，年久月深，海湧會共駁岸的基礎割崩缺隙；到時，若拄著風颱、抑是拄著海漲，海水有可能會淹入庄內，威脅徛家的性命安全。
這馬的「興達港」佮伊後壁面的「情人碼頭」，攏是一个誠好耍的觀光景點，逐家若有閒，會當來遮行行咧，搧一下仔鹹閣澀的海風。 (TOP)
1[就按呢](tsua̋n)
一樣米飼百樣人。真正有影，世間啥款人都有。有人買田園，有人蓄厝地，嘛有人開錢買名聲，你敢捌聽過有彼號戇仔講伊欲轉來故鄉買靈魂的？有！這个人無愛名利、無愛權勢，伊放棄美國的一切，轉來台灣的後山花蓮服務。伊講：「性命真正的意義毋是物質的享受。台灣是我的故鄉，我是轉來買靈魂的。」伊就是這馬『Mennonite（門諾）』病院的總執行長——黃勝雄醫師。
伊是美國腦神經外科的權威，佇腦神經外科這个領域，會使講是先生的先生。伊一冬愛服務五千外个病人，動三百六十幾个手術，一年收入百外萬的美金，徛家有四甲外地。遮好的待遇佮遐懸的聲望，是啥物因緣予伊決定欲轉來台灣咧？
1991年『Mennonite（門諾）』的前院長『Roland P. Brown』佇洛杉磯接受「台美基金會台灣奉獻獎」的時陣，伊講：「我共四十年的青春，奉獻予台灣，我向望台灣的醫生，嘛會當佮我仝款，服務花蓮遐的弱勢、需要人照顧的兄弟姊妹。毋過誠可惜！台灣的醫生好親像感覺花蓮真遠，美國較近，無人欲去花蓮，煞有真濟人走來美國。」
就是這段話，予黃勝雄醫師放棄一切，轉來故鄉。伊離開的時，美國的政界、醫界總共有四百外人來共伊歡送，真濟人攏毋甘伊走。伊共逐家講，佇花蓮，有真濟病人咧等伊。這是上帝交託伊愛去的所在，伊一定愛轉來。就按呢，1993年11月，伊共『Mennonite（門諾）』院長這个重擔接落來。伊的薪水無過去佇美國的十分之一，伊閣共三分之二捐轉去病院，家己蹛踮員工宿舍。
出門堅持家己駛車，就準講是入去山內斗底，伊猶是家己駛兩三點鐘久的『jì-puh』，上山落海去做巡迴醫療。董事會帶念伊的辛苦，幾若擺想欲共伊倩司機，伊攏拒絕。伊講：「病院閣需要社會的支持，若是咱買好車閣倩司機，就無需要別人捐錢矣。」伊用耐心佮愛心對待每一个病人，伊常在駛車三、四十分鐘久，去看一个病人。熟似人驚伊身體袂堪得，伊攏笑笑講：「袂啦！我猶閣真勇健咧！」
我想：一般人無法度有的，伊有矣；一般人放袂落心的，伊放落矣。伊講：「好車好厝，我攏有矣。我是轉來故鄉買靈魂的。」 (TOP)
「來喔！來坐喔！排骨飯、魯肉飯、貢丸湯，欲食麵嘛有喔！」逐年的正月開始，進香割火的人就開始濟起來，包車嘛一台紲一台來到這个小鄉鎮小所在。包車一來，街仔頭的路邊擔仔生理嘛綴咧好起來。郎仔就是按呢靠一个麵擔仔飼一家伙仔。
郎仔自老爸開始就是咧做油湯。彼時陣媽祖宮口有一撮做食的，郎仔老爸就是其中的一个。伊𠢕料理閣拚勢，佇宮口人攏叫伊「好炒手的」。便若伊的店門一開，毋管是在地的、外位仔的人客就溢入來，不管時一間店是實實實。
這間店若欲繼續做落去，是會使得世傳世，飼咧幾若代人的。毋過對二十外歲的郎仔來講，伊當少年、拄娶某，伊的人生欲哪會堪得一世人屈佇爐仔頭前，逐工五箍十箍咧趁這款小可仔錢咧！伊是大囝，總嘛愛做好𤆬頭，拚一番仔事業予小弟小妹看，抑是予小弟小妹過好日子。毋過序大人佇咧，無講按怎伊嘛毋敢講啥。想袂到，老爸四十六歲的時陣因為操勞過度，胃出血煞來過身去。處理老爸的後事以後，伊原本的想法就愈來愈強矣。因為做油湯好趁是好趁，嘛免硩本，毋過人客一來直直操、直直操，攏無通歇睏，實在無咧快活。規氣趁這个機會收收起來，宮口這間店褪予人，換做當興的紡織這途，紡紗仔、刺膨紗，自頭至尾一貫作業。
畢竟是手面趁食的古意人起身的，袂曉生理的手腕，袂曉應酬的鋩角，嘛一向真信任人，哪會知影生理上的奸險？做無幾冬楗袂落去就只好收收起來，郎仔才姑不而將閣轉來做伊的老本行。
「來喔！來坐喔！……」進香割火的人又閣開始濟起來矣，包車嘛一台紲一台閣來到這个小鄉鎮。正月初一過年時，所有的囡仔歡歡喜喜穿新衫，提紅包出去踅街的時，郎仔的囝無去𨑨迌，嘛愛來鬥洗碗、招呼人客。拄開始真歹勢，毋敢喝出聲。爸母就講：「毋免驚！做你大聲喝，人客才會知！」
是啦！就用佇學校做班長的時陣，咧喝彼寡仔臭查埔，叫愛聽話的彼種聲頭就著矣啦! 為著生活，共面底皮藏踮麵擔仔後，大聲喝出來就著矣啦! (TOP)
噗！噗！噗！六十年代的豐原客運規台車全柴油味，對『ia̋n-jín』、對車底、對車尾的煙筒管衝起來。對一个磕袂著就眩車、掠兔仔的查某囡仔疕來講，若毋是三角仔遮爾仔好耍，伊仙嘛無可能共鼻空捏咧，恬恬仔忍耐一點鐘久的車程，坐這款衝烏煙的墨賊仔車，就干焦為著欲來到數念的三角仔。
對沙鹿街上山，車到北勢頭，斡正爿，來到鎮南路的時陣，就表示伊按呢的忍耐就欲結束。紲落來，伊會當得著上好的回報，就是：來到這个好耍的所在，遮有闊闊闊的大埕；有齣頭上濟的囡仔頭王立仔表兄；有講袂完、料想袂到的趣味代誌會來發生。遮是三角仔。
昭子仔的三个囝誠愛綴伊轉來後頭厝，因為佇遮才有可能真正親像囡仔仝款爽暢過日子。
佇外媽兜，逐家𤲍𤲍咧做伙睏總鋪。總鋪下跤是塗空，若防空壕咧，會當覕相揣。毋過上好耍的毋是這，是愛踏出門，去山坪四界傱。
出去庄外，地頭較生疏。這時陣，立仔表兄就是上好的囡仔頭王。綴伊去竹林仔內，剉竹仔做炮仔管，擗鳥仔；綴伊去竹仔跤抾竹箬仔；去樹林仔內抾樹仔枝轉來燃火炕窯；綴伊去淺溪仔蹽水，提魚網仔去撈魚仔；有當時仔啥物目的嘛無，就真單純干焦佇山裡四界走標佮喝咻，按呢嘛毋知咧歡喜啥物！
欲暗仔的時，空氣中開始看著白煙、透濫著燃柴的芳味。厝裡的查某人咧攢暗頓佮燃燒水，準備欲予規家人食飯佮洗盪。這是三角仔的另外一種印記。食飽歇睏一時仔，天烏漉漉、暗眠摸，遠遠看著的李家莊，干焦幾葩仔對細細的窗仔縫發出來微微的電火泡仔光。攑火把一四界去冒險，沿庄仔的四箍輾轉踅幾若輾。雄雄火把的光化去矣，逐家那走那喝出恐怖的哀叫聲，走甲裂褲跤。彼種大氣喘袂離，走甲強欲溢刺酸的氣味，嘛是三角仔的印記。
到今，逐擺若想起來，鼻空內嘛會出現一款透濫的氣味，含臭尿薟、火薰味、火把的番仔油味，佮黃色的、二十燭的電火泡仔光，攪攪做一伙，佮著六十年代的古早味，佇頭殼內發酵。三角仔的留戀，酸甘甜仔酸甘甜！ (TOP)
「阿母！按呢有較快活無？」我沓沓仔對阿母腫甲若麵龜的跤頭趺挲到跤底，阿母煞完全無反應！斟酌共伊摸，身軀猶閣有拉圇仔燒，毋過阿母按怎攏無聲無說？「阿母！你哪攏毋講話？」當欲出力共阿母搖予精神，伊煞化做一陣香煙消失甲無影無跡。才知影：我又閣夢著阿母矣！
阮阿母伊一世人攏真細膩，事事項項攏無愛麻煩別人。甚至連伊的人生行到上尾站的時陣，伊嘛仝款無愛麻煩阮遮的序細。毋甘阮南北二路、奔波走傱來照顧伊，煞佇短短兩個月內佮阮來告別，予人愈想愈毋甘！
阿母出世佇日本人統治咱台灣的尾期。因為拄著戰爭、生活困難，自細漢就予人做養女。伊嘛真早就知影家己的身世，所以養成萬事吞忍、堅強拍拚的個性。阿母嫁予阮阿爸無偌久，翁婿就調去金門做兵，賰伊一个人愛照顧目睭青盲、欲九十歲的阿媽；閣愛侍候大家官、晟養序細。彼種艱苦，恐驚無幾个人會當了解！阿爸退伍了後，囡仔一个一个生、工課換過幾若十个。阮阿母嘛是目屎吞腹內，漸漸共囡仔晟予大漢。
後來，因為佇庄跤實在趁無食，阮規家伙仔搬去繁華的臺北，佇菜市仔邊排擔仔賣臭豆腐佮雞絲麵。阮爸母共路邊擔仔的小生理當做大事業咧做，材料攏愛真清氣相，臭豆腐愛洗予清氣、泡菜愛家己豉、雞絲麵愛買幼麵線來糋，連豆油膏嘛愛煮過、講按呢才袂死鹹！遮的工課有的會分予阮兄弟仔來做，毋過大部分是阿母一个人承擔落來。日時愛款材料，暗時閣愛鬥顧生理。半暝仔收擔，透早閣攢早頓予阮食。有時陣忝甲無法度煮，才提銀角仔予阮去外口買。這種長期無眠閣操勞的日子，早就共阿母的身體操甲規組害了了矣！
遮濟冬來，阮阿母常在講伊的身體就是一座藥櫥仔。古早人講：「藥仔食傷濟就是毒！」阮已經慣勢阿母不時咧破病。這擺伊咧喝艱苦，攏共當做是痠疼的老症頭咧醫，煞毋知歹物仔已經佇身軀底湠甲袂收煞矣。這攏是阮的不孝！
人講:「爸母疼囝長流水」，佇阿母病情愈來愈重的時，阮兄妹仔輪流轉來共伊顧。伊猶原咧踅踅唸：「…定定請假，敢會影響恁的工課？…駛車佇高速公路拋拋走，著愛注意安全！…我的乖孫，我袂赴看大漢，恁著愛好好仔共晟嘿！」每一句攏充滿著序大的關心。這馬，阿母已經離開阮矣，阮會好好仔做人，服侍老爸、晟養序細，向望伊無牽無掛、無煩無惱！ (TOP)
漢寶聽講較早是濁水溪下游，庄仔內的人攏叫做「溪底」。遐是「風頭水尾」，風誠透水誠欠，風飛沙鹹水煙誠大。佇芳苑鄉的上北爿，和福興鄉是隔壁親家。有誠特別的名產「風飛沙」。北風若起，沙仔予風吹佇半空中，連行路都有困難喔！沙園占大部分，地攏帶有淡薄仔鹽的成分，真歹種作。番薯是主要的農產品。阮是予番薯飼大漢的。老母捷捷咧唸，「食番薯食甲烏喙齒」！真正是「靠山食山，倚海食海」！
番薯是較臭賤，較好種的農作物，𠢕生湠閣粗俗，逐家攏有種嘛攏食會起。佇四五十年代，番薯毋知飼活偌濟人。規欉番薯人食、精牲仔也欲食。番薯、藤仔、葉仔攏會當食。生食、熟食、曝乾嘛會當食，規欉攏袂拍損去。番薯簽嘛會當食規年迵天！細漢的時阮兜上重要的食物是番薯。煮飯的時，一大鼎的番薯箍干焦會當摻一搣米。欲食白米飯，著愛等破病抑是年仔節仔。阮總是感覺，彼陣番薯飯特別甜特別好食。
番薯若收成，攏會囤甲規厝間佮規門口埕。阮著愛鬥礤番薯簽。若無礤簽曝乾，久會爛了了。礤番薯簽是用銅礤（菜礤）。銅礤是用銅鉼1做的，釘佇一塊長長的枋仔頂，用人工礤。除了會當礤番薯，金瓜、匏仔、紅菜頭，芋仔嘛攏會當礤。尾仔有人發明插電的緊閣省工。逐擺若是曝番薯簽，門口埕就披滇滇的番薯簽。若是對邊仔行過，就會鼻著番薯的芳味。這款樸實的芳味就是咱正港的台灣味。
阮序大人細漢番薯食甲驚，講看著番薯就會驚。莫怪！阿母攏會唸講「番薯救人無功勞」。我煞有一份真特別的感情，有細漢時仔的懷念、感恩。這馬煮飯的時，會共番薯囥佇米懸頂同齊煮，煮出來的飯甜閣好食，大大細細攏愛食。
番薯對這塊土地長期恬恬奉獻，伊對咱這塊土地，無功勞嘛有苦勞。早期予伊飼大漢的毋知有偌濟人，閣有偌濟人會記得？毋知對當時開始，番薯的身價已經全然無仝囉！有人專門咧賣烘番薯，一斤大約愛七十箍。佮較早比，身價實在加真懸。較早的番薯若知影有翻身的一工，一定會起來偷笑！ (TOP) (轉去主目錄)
1銅鉼 tâng-phiánn
(轉去主目錄)
沒有留言:
張貼留言