2011
06302226100年全國語文競賽閩南語朗讀社會組文章內容
100 年閩南語朗讀文章 (原稿下載)
01 鶯歌出碗盤，嘛有狗蟻怨(káu-hiā-uàn) 邱文錫(sik)
02 香燈跤 鄭家和
03 基隆港的查某囝 紀(Kí)春綢(tiû)
04 無天良的山採(suann-tshái) 春瑞
05 牽豬哥--的 鹿港仙
06 純樸的愛 邱富理
07 講著食 吳永行
08 基隆的海邊仔風景媠 劉春蓮
09 茉莉(ba̍k-nī)花 陳弘昌
10 灶 丁鳳珍
11 佮臺灣做伴喘氣 張宏榮
12 糖蔥佮枝仔冰 胡民祥 (轉去100 年閩南語朗讀文章目錄)
==============================================
01 鶯歌出碗盤，嘛有狗蟻怨(káu-hiā-uàn) 邱文錫(sik)
自囡仔時代，就聽過一句話，就是「鶯歌出碗盤」，學生時代，逐工對桃園坐火車到臺北，攏會看著彼粒鶯歌石，就想講有一工欲來鶯歌𨑨迌。啥人知「一晃(huánn)過三冬，三晃一世人」，頭一擺遊鶯歌已經是五十外外的歲頭--囉。
彼工毋是歇睏日，駛車來到鶯歌，真利便就佇『陶瓷博物館』的對面揣著停車位，照網路的介紹，先對博物館開始遊覽。這間博物館是公元２０００年才開館--的，建築(kiàn-tio̍k)真有特色，有得著當年的建築獎。伊的空間開闊，跤路嘛真好勢，看起來是有用心咧規劃。展示的內容有碗盤器具佮伊200年來燒瓷(huî)的歷史，我看館--裡介紹的影片，老師父講話攏用臺語，中年的介紹人攏用華語，對遮我又閣看著現此時臺語斷層的現象。
這予我想起這間博物館的名，伊的華語名叫做『陶瓷博物館』，這臺語欲按怎講--呢？陶(tô)佮逃走的逃仝音，瓷佮中國合淝(Ha̍p-huî)的淝仝音，毋過咱臺語將陶叫做粗瓷(huî)，瓷叫做幼瓷，所以應該叫做「瓷仔博物館」才有臺語味。另外猶有一句，自早以來，臺灣人攏是勤儉拑(khînn)家，出產的物件，好--的提去賣，䆀--的賣無價，抑是賣袂出--去，就家己留起來用，所以有一句話講「燒瓷--的食缺(khih)，織蓆(tshio̍h)--的睏椅」，鶯歌燒瓷的頭家應該就是按呢，𪜶賰的錢是儉賰--的，毋是用賰--的。
臺語閒話講煞，話頭閣牽轉來博物館，伊毋但館內有展覽，館外真後面的後埕尾，嘛有師父示範做瓷仔的技術。彼工做的是四十年前飼雞仔囝的水罐，水罐干焦佇腹肚的所在留一个細細空的入水空。因為空細，將罐浸入水底，水入滇(tīnn)差不多愛十分鐘，若將伊倒頭栽囥佇雞籠仔，水流完就愛一工的時間，所以彼陣飼雞仔囝一工換一擺水罐就會使--得。
這款水罐是古早物，即時予我想起我厝--裡的舊菜橱仔，欠四支菜橱仔跤。伊親像現此時的薰觳仔(hun-khok-á)，毋過中央會膨(phòng)一塊圓形平臺，佮盤墘(kînn)平懸，按呢平臺佮盤墘中間就有一條親像護城河的水溝，將菜橱仔的四支跤(tshāi)佇圓盤仔，閣將水溝灌水，按呢狗蟻就泅袂過護城河，莫怪華語將伊叫做『蟻除』，臺語雖然叫做菜橱仔跤，另外猶有一个真古錐的名，叫做狗蟻怨，因為狗蟻鼻有食無真怨嘆--啦！
我就佮師父參詳，拜託伊做四个狗蟻怨來賣我，價數在伊講，另日做好我才來提。毋過師父真條直，伊講示範區袂使做生理，我有錢無當買，心內真怨嘆。 (TOP)
古早的進香客，手攑鼓仔燈、攑香旗，一步一步綴媽祖婆行跤，𪜶，就是香燈跤。佇較早交通無利便的時代，進香攏是用行--的，除了是體力的考驗，閣是精神的磨練。進香客當中，有的人是下願(hē-guān)綴媽祖出巡踩街；有的人是無求啥物，甘願綴媽祖婆行千里路途。今年拄好有機會來做大學生代表的香燈跤，是一款文化的體驗，也是一種無仝款的「轉大人」的儀式。
自細漢，我就是媽祖婆的信徒，伊是我心靈的寄託(kià-thok)，有真濟祕密伊攏知影，因為我知影伊袂講--出去，閣會恬恬聽我講。佇較無注重人權、男女平等佮身份地位的時代，神明一直攏是逐家的心理治療中心。因為勸善教化的意義，予咱有人生的方向，袂親像揣無燈塔的船隻，佇大海沐(bo̍k)沐泅。伊慈祥的造型佮面容，可比是咱慈愛的母親，也因為按呢，咱臺灣人共伊號做「媽祖婆」。咱臺灣，有海洋國家的民族性，信仰(gióng)方式非常熱情，毋管是南部沿海地區的送王儀式，抑是各地方鬧熱滾滾的大拜拜，攏展(tián)現咱臺灣人有腹腸、熱情，一點仔都袂輸外國的嘉年華(ka-liân-huâ)。大甲媽起駕進前的幾點鐘仔開始，各地方的陣頭、曲館攏來拜廟，挨挨陣陣(e-e-tīn-tīn)的廟埕，各種陣頭攏來遮拚場面。親像內門的宋江陣、外埔的義虎團，也有來送媽祖婆出大甲城。拍算欲行八工七暝的進香客，早早就往新港的方向行--去矣。有的人拖菜籃仔，有的人騎跤踏車，看𪜶的尻脊後，愈行愈遠。我算是頭一擺參加，閣毋知做一个香燈跤的鋩(mê)角，無經驗的阮，進香的路途當中，一直想欲放棄，毋過「媽祖婆，疼戇人」，攏有好心的阿叔、阿姨共阮鬥相共，一路行--過來，感恩的心，感謝有恁的幫忙。
大甲媽起駕了後，攏是連夜趕路，所以有經驗的香燈跤，早就行到下一个鄉鎮去補眠--矣！好佳哉有青春的身體予阮倚靠，對大甲行到沙鹿(Sua-lak)，天色拍殕(phú)光，食著燒燙燙的饅頭(bán-thô)、豆奶，精神規个好--起來！天光，代表一工的開始，阮定定講：「今仔日閣愛看日出--矣！」就是講「拚暝工」的意思。進香的時陣，阮也定定講：「今仔日閣愛看日出--矣！」因為知影，今仔日又閣是行到天光。一路阮攑香旗，沿路所經過的廟寺，攏會縛一張符仔佮頓(tǹg)廟的宮印。有的人行幾若冬，彼支香旗，就綴幾若擺，閣經過香煙(hiunn-ian)的加持，舊舊、烏烏的旗仔，變成上價值的紀念品。 (TOP)
基隆港行過百外冬，迒(hānn)過一世紀--矣。咱毋通嫌伊老，毋通嫌伊面皮皺(jiâu)。基隆港猶原佮過去仝款，繼續做一个堅強偉大的老母。海水像阿母的奶水(ling-tsuí)，晟養一代一代的基隆囡仔。予咱娶某、嫁翁、生囝，代代生湠。嘛晟養我――基隆港的查某囝。
人講「基隆無城，食飽就行」，這句話對基隆人來講，一點仔都無合。像阮老爸一个靠基隆港趁毛管(mn̂g-kńg)空流汗錢的碼頭苦力(ku-lí)，做工課的時間無定著，有時佇雞未啼、狗未吠、天未光就出門。寒天的時，佇逐家睏當落眠冷吱吱(ki)的三更暝半，伊毋敢延延(iân-tshiân)，戽(hòo)起跤就緊起床，用步輦(lián)--的，三步做兩步那行那走，走到基隆碼頭，撆(pih)手䘼勒(li̍k)褲跤。不管時拚甲大粒汗細粒汗，趁錢來維持一家伙仔的生活。基隆港是晟養我大漢的所在，若有人問我是佗位的人，我會大聲共伊講：「我毋但是基隆人，閣是基隆港的查某囝」。
基隆港是一个天然的良港，誠少有大風大湧。港岸邊有足大隻的橋式機(kiô-sik-ki)，貨櫃一跤一跤吊袂煞。咱毋通嫌伊鑿目(tsha̍k-ba̍k)，伊是基隆的金雞母，替咱生誠濟誠濟的金雞卵。嘛有各行各業的人，無閒tshih-tshih佇充滿活力(hua̍t-li̍k)的這塊土地拍拚。
目睭看--過去，佇遠遠的所在，有青藍分明的地平線。海面有幾若隻鴟鴞(bā-hio̍h/lāi-hio̍h)佮叫袂出名的海鳥，展(thián)開雙翼佇紋紋的海面，飛懸飛低(kē)、飛這爿飛彼爿。頭起先掠準佇咧跳水頂芭蕾(pa-lê)，斟酌一下看，毋著！毋著！原來是佇咧食鮮沢(tshinn-tshioh)鮮沢的『sa-sih-mih』──也就是活魚。食飽翼仔擛(ia̍t)--咧就飛，歇佇船的甲板(kah-pán)頂拍拉涼，佇遐曲(khiau)跤撚(lián)喙鬚，實在有夠逍遙。我若是遮的鳥仔，毋知有偌好--咧。
佇咧星光月現的暗時，我若感覺心內鬱卒，上愛一个人行到基隆港仔墘(kînn)，選一个無人行跤到的所在，恬恬徛踮遐。我毋是佇咧觀星望斗(kuan-tshinn bāng-táu)，嘛毋是佇咧犀(sai)牛望月，我咧走揣一个熟似講袂出喙的……無風無搖的天氣，毋知徛偌久，我雄雄感覺一陣微微仔海風吹--來，有淡薄仔鹹鹹的氣味，勻勻仔振動海面的水痕，敢若對我笑甲喙仔裂獅獅，問我有啥物代誌，何乜(mí)苦按呢憂頭結面操心擘(peh)腹--咧。人講「一(it)理通，萬里徹(thiat)」，一時陣我心肝頭的結感覺隨敨(tháu)開--去矣！ (TOP)
共樹仔的形體縮予伊細，囥入去花盆內底予伊繼續生長，這就是盆景(phûn-kíng)，「縮予伊細」是種盆景的重點，欲縮到偌細的程度是整個(kô)外觀、比例的問題；種盆栽的人攏知影這款道理，所以𪜶有共同認定的標準；譬論講：頭愛大、葉愛細、身軀會皺(jiâu)、會起稜(līng)…種種，是上基本的條件，啊若有浮塗面的根盤、身軀彎彎斡斡兼捘(tsūn)來捘去的形體，當然是上蓋讚的盆栽。
一欉樹仔欲對暴穎(pok-ínn)開始，種落去盆仔，用人為的方法硬去共變到像咱頂仔所講的彼種「媠(suí)款」，上無愛三、四十冬，才有可能遐爾媠；咱攏知影，育(io)囝無法度像雞胿(kui)仔按呢，用灌風的佇十秒內就歕(pûn)好勢，種盆栽嘛是這款道理。
講倒轉來，樹仔若種落塗跤兜莫(mài)種入去盆仔，比飼囝較簡單，上加是落塗的第一工沃予伊澹(tâm)，閣紲--落去，發一葉、生一條根，愈鑽愈深葉愈旺，身軀愈粗愈大欉，攏免人去管顧就勇健健、媠噹噹--矣。啊若搬徙(suá)來種落塗盆仔，用盆仔內彼點仔塗，欲向(ǹg)樹仔會大、會媠，用跤盤來想嘛知影是無可能的代誌；原因是出佇：彼跤塗盆仔袂輸古早查某人的纏跤布，逐工縛絚絚(pa̍k-ân-ân)，連睏嘛無敨(tháu)，當然跤就袂大；仝款的道理，樹仔根旋(suan)無路、揣無塗通吸收營養份，定著僫(oh)大、袂健(kiānn)欉。若欲種到身軀有夠粗、頭有夠大，無三、四十年的時間，是無可能的代誌，內行人攏知影這項道理；問題是，人的一生有幾个「三、四十年」去種盆栽--咧？嘛無人有這種身命去舞、去等；命若較短的，凡勢(huān-sè)等無。
山頭崙(lūn)khok尾頂野生的樹仔，若講發佇石頭縫、吊佇石崁(khàm)尾、生佇食風的所在，抑是𢯾mooh)佇無塗的石盤頂，經過幾十冬猶活跳跳的樹欉，身軀、樹根一定會曲(khiau)、會斡(uat)，起稜兼起皺，拄好是掘來做盆栽上讚、上媠的形體，彼陣就害了了--啦。
就是傷媠，才有人會去採，小可仔成樣的樹頭，無論大、細，規山一直抄，相爭去挖、去掘，無一欉逃會過手；對臺灣頭到臺灣尾，咱想會著的樹仔：雞油、杜鵑(tōo-kuan)、西施花、羅漢松、烏松、五葉松、黃楊(iông)、青楓(png)仔、三角楓、狀元紅(臺東火刺木)、七里香(月橘)、荑梧(gî-ngôo)…攏有人咧挖，實在誠(tsiânn)夭壽。 (TOP)
牽豬哥是五、六十冬前臺員(Tâi-uân)農業社會真需要--的行業，𪜶的工課路仔，目的是欲替飼豬的農村，生湠(thuànn)𪜶的豬仔種。有一條臺語的謎猜咧予人臆(ioh)，題目按呢寫：身穿烏袈裟(ka-se)，盤山過嶺去揣妻，囝孫幾若个，無欲認我做老爸。意思是講「牽豬哥--的」著愛照約束，牽伊彼隻「烏豬哥」，去到飼豬的𪜶兜，共人拍豬種。有時陣飼豬的人蹛(tuà)較窵遠(tiàu-uán)，牽豬哥的嘛愛盤山過嶺，來趁這條錢。蹛閣較遠的，嘛著量早一工出門，有時仔半暝仔趕到地(tè)，飼豬--的嘛著攢(tshuân)予人食佮蹛。為著欲予豬種會當順序生--落來、𠢕gâu)大、通好趁食，逐个攏嘛照起工共伊好禮仔款待。
前當時農業社會，食穿無遐(hiah)快活(khuìnn/khuànn-ua̍h)，款待這「牽豬哥」兄有當時仔著愛委屈家己，像講跔(ku)燒的房間，明明都賰無幾領破蓆、破被、厝--裡都無夠--矣，嘛著忍(lún)予牽豬哥仔兄蓋(kah)，家己煞睏稻草的眠床，彼陣若無蠓罩(báng-tà)通遮，干焦佮遐兇惡的蠓仔軍著戰咧甲規暝--咧！像按呢克虧家己，有當時仔，拄著一半个仔較狡怪(káu-kuài)的牽豬哥兄，袂當諒情，猶閣咧怨東怨西，凊彩(tshìn-tshái)牽來拍拍--咧。有一條歌謠按呢寫--的：牽豬哥，兩條索，食檳榔、紅喙箍。欲去佗揣，去揣大嬸婆，大嬸婆，散食婆，烏眠床，蠓罩破糊糊。噯唷喂--啊！叮一下，血珠仔硞硞（kho̍k-kho̍k）gô。這嘛是咧講彼時艱難的環境。
一般的(ti̍k)，牽豬哥--的攏是頭戴葵笠(kuê-le̍h)，手攑(gia̍h)竹箠(tshuê/tshê)，肩胛(king-kah)擔一跤細跤拔(pua̍h)桶，褲跤撆(pih)甲跤肚仁懸，喙--裡檳榔那哺那哼歌仔調，像歌詩咧唸--的按呢食檳榔，紅喙箍。彼枝竹箠是欲來趕豬哥--的。啊若彼跤拔桶，聽講有兩款路用。一款是豬哥行遠路，行甲喘怦怦(phīnn-phēnn)、燒烘烘(hōng-hōng)、四肢(sù-ki)痠軟，牽豬哥--的才用跤桶水共舀幾觳仔淋淋(lâm)--咧，小歇涼--一下才閣繼續趕路。另外一款講法，說(sueh)講佇豬哥佮豬母拍種了後，牽豬哥會舀一觳水，潑對豬的身軀頂，喙唸講：「淋一觳冷水，予恁生十二个媠媠。」講遮的好話，討一寡好彩頭。主人聽了嘛心涼脾土(pî-thóo)開，隨共攢一包大大的予紅。 (TOP)
阮頭--的退休了後，為著欲過清靜的生活，就搬來庄跤蹛(tuà)。規日飼魚種花，抑是寫字、拍球。若無特別的代誌，伊就無出去高雄。若我是因為猶有一寡仔俗事，一禮拜猶有幾日仔愛去高雄。阮頭--的是真愛載我出門，毋過兩人的時間袂拄好的時，就家己坐車去，坐客運--的嘛真方便。佇車內看著純樸的草地人佮滿腹愛心的司機，互相關懷、感恩的情形，予我真感動。雖然一逝(tsuā)路需要四、五十分的時間，我猶是較愛坐客運--的，一點仔都袂感覺麻煩，抑是延(tshiân)時間。
佇我蹛的所在，去高雄的車是真濟，其中我上愛坐的一幫(pang)，是早時對高雄往復林園的一○三車幫。因為坐這幫車的人差不多攏彼幾个，坐甲攏面熟面熟，上車的時，就會加減佮司機『a̋i-sat-tsuh』--一半句仔。司機大部分攏知影佗一站有啥人會上車，甚至啥人愛落車，伊嘛會注意。有時人客睏--去，毋知影通落車，伊閣會共人叫，像這款的司機，佇這个時代是真稀罕，真僫(oh)揣--矣。
有一擺，有一个人客衝衝碰碰(tshóng-tshóng pōng-pōng)走去司機的邊--仔，講欲落車，閣一面咧揣車票。司機就講：「睏去--矣hōnn？」、「慢慢仔揣，敢(kám)會落佇椅仔跤，去揣看--咧！」、「無要緊，轉去閣反(píng)橐(lak)袋仔看覓--咧，明仔載愛會記得提來還。」你看，伊真客氣，毋是彼款歹聲嗽、歹面腔(tshiunn)的人。見若遇著年歲較大的老大人，伊也真有耐心，會等𪜶慢慢仔上車，才駛起行，𪜶欲落車的時，也會叮嚀一句講：「細膩--喔！注意『oo-tóo-bái』--喔！」
因為這个司機的好禮佮細膩，人客三不五時仔攏會提一寡仔家己種--的果子，抑是家己包--的粽來予伊食，這陣就鬧熱--矣，司機佮人客之間，大聲推辭和說多謝的聲，一句來一句去，一點仔都袂予我感覺吵，顛倒是感覺一陣一陣溫暖、燒烙(sio-lō)的氣氛充滿規車底。
臺灣是一个有人情味的所在。雖然有一點仔亂、有一點仔驚人(kiann-lâng)，毋過遮是咱永遠的厝。敢若(kánn-ná)親像家家戶戶攏有一位仔較無愛予人看--著的所在；毋過，閣較亂嘛是咱家己的厝，是咱掛(khuà)心掛意的所在。 (TOP)
「有毛--的食甲棕蓑，無毛--的食甲秤錘，兩跤--的食甲樓梯，四跤--的食甲桌櫃，有肉--的食甲肉燥，無肉--的食甲糞埽(pùn-sò)。」講甲咱臺灣人實在有夠愛食，無毋著，「民以食為天」，「會食才是福」。歷史共咱講，每一个朝代的滅亡攏因為是民不聊生，百姓毋是食袂飽，就是無通食，才會攑(gia̍h)旗造反。因為「千辛萬苦攏是為著腹肚」，為著食和神明嘛共撥一邊，無哪會講：「先顧腹肚，才顧佛祖」。為著食和親朋好友嘛愛請去邊仔徛(khiā)，因為荒(hong)年饑荒(hng)的時，「人無親，食上親」。甚至「欲刣、欲割也著食一頓飽」，莫怪有人講「管人生、管人死、管人食無天理」。
食的滋味是「一人興一味」，有人興燒酒配鰇(jiû/liû)魚，有人興大腸炒薑絲，有人興三層肉炒筍絲，嘛有人興芹菜炒花枝。「有人興甜，有人興鹹，有人愛山珍，有人愛海味」。會使講是「一人一雙箸，欲夾無仝味」。食落腹肚底是「隨人落箸，在人滋味」。病囝的人講愛食彼號(lō)鳳梨炒筍絲，啊阮阿母上特別，講我佇伊腹肚內的時上愛哺(pōo)冰角、食魩仔魚。就是按呢--喔！我這馬才會遐爾仔愛食礤冰(tshuah-ping)佮煎魚。
食的物件嘛有分好䆀，若海產類的是「一鯧(tshiunn)、二𩵱(ngóo)、三嘉鱲(ka-la̍h)」，「七--月的蠘(tshi̍h)仔，八月蟳(tsîm)」，「冬節烏是較贏豬跤箍」。菜蔬類的是「塗豆食仁，蕹(ìng)菜食藤(tîn)」，山頂番薯鬆閣甜，懸山的高麗菜是人人愛。抑若果子本土的弓蕉上蓋好，「十二--月的甘蔗是雙頭甜」，「枝頂菝(pua̍t/pa̍t)、葉下檨(suāinn)」，「王梨頭、西瓜尾」，好食愛會曉揣。秫米荔枝，烏珍珠的蓮霧，愈食是愈紲喙，這馬進口的果子是滿滿是，榴槤好食，冷凍--的閣較好滋味。富士蘋果，美國櫻桃，紐西蘭的猴頭果(奇異果)，應有盡有，只驚你無錢通買，毋驚你買甲食袂去。
外國人來臺灣上愛踅夜市，因為咱的夜市仔小食有真奇巧的口味。看是欲筒仔米糕、肉羹、抑是臭豆腐。棺柴枋、扁食、抑是擔仔麵。閣有食袂枵的芋粿曲，食甲飽的米粉炒，尤其是烏魚炒米粉，食著是金光沖沖滾，看你偌歹喙斗，只要夜市踅一輾，無食你敢會過癮(giàn)。
較早的人較散，「查埔欲食愛望人請，查某欲食愛望生囝」。這馬的人生活普遍攏會得過，顛倒各種慢性病一大堆。啥叫恁食好閣做輕可，貧惰運動閣愛享受，定定「一塊才落肚，一塊喙內哺，一塊佇半路，一塊盤仔底顧」。「甘願做飽鬼，嘛毋願做枵鬼」。較細膩--咧！毋通因為好食、愛食、貪食，耽誤家已的健康。 (TOP)
古早人有咧講：「毋捌食過豬肉，嘛捌看過豬行路。」佇咱基隆愛講：「毋捌坐過船，嘛捌看過大船放尿。」
基隆港邊，新點點的海岸廣場，予咱欲鼻海味，袂費氣。伊的正頭前，有一間城隍廟，倒手爿(pîng)是基隆火車頭，啊若正手爿，就是港務局，「規欉好好──無錯。」遮，就是會當看著大船咧放尿的所在。因為現代的大船，攏是利用機械(ki-hâi)捒振動(tín-tāng)--的，所以講，船仔頂懸噴--出來的水，是欲予振動的機械回冷，毋是無衛生閣毋捌字的不死鬼(put-sú-kuí)--啦！定定踮遮載船客的郵輪，天秤(thian-pîng)星號；暗時仔，白色的船仔頂，點著五彩的聖誕電火球仔，一層閣一層，敢若世界大的雞卵糕，真神祕；心肝底足想欲學狗蟻仝款，恬恬仔，(peh)起去船仔頂探看覓--咧！
逐擺影著電視，化妝品的廣告詞：「你會使閣較倚--咧！」就會予我想著，漸漸燒熱的春天，愛合家(ha̍p-ka)相招，去近在眼前的海岸──木山澳仔海沙埔耍水。雖然，春風閣涼涼，海水閣小可仔冷冷，阮已經搦搦掣(la̍k-la̍k-tshuah)，共褲跤撆(pih)--起來，佇淺淺的海邊仔，笑咍咍，咧學水鴨仔拍滂泅(phah-phōng-siû)--囉！
往濱海公路駛--去，會先到和平島，遐有濟甲算袂清的壺窟仔、豆腐角、蜂岫石空(phang-siū-tsio̍h-khang)佮珠仔石的海岸，有夠媠！聽人講這款海岸，上無嘛愛成千年才變會出來，有福氣的人才看會著--啦！加上西班牙人捌佇島上起教堂，荷蘭人捌佇一粒石山中央，挖番字洞，本地人共伊號做皇帝殿，有影媠甲通人呵咾！
八斗仔的東爿，有一座平浪橋，嘛叫做虹(khīng)橋，就是潮境公園的入口。無講你毋知，遮爾仔媠的潮境公園，有青翠柔軟的草仔埔、國民車道、溜籠(liu-lông)佮噴水池，本底是一个糞埽場，毋管伊三七二十一，逐家自在佇遮散步、看海、聽海湧聲佮放風吹，有一種簡單的幸福。
佇『lā-jī-ooh』內底，捌聽著一个讀甲博士的教授，有兩改想袂開，哪會按呢？予人想攏無！若準講，伊逐禮拜的歇睏日，攏會揣時間，佮厝--裡的人，同齊去四界行行看看--咧，感覺自然的大，體會著「一枝草，一點露」，知影「花無百日紅，人無千日好」，了解「死皇帝，毋值得活乞食」，心花開，小可仔大代誌攏無啥要緊--啦！就有才調「時到時擔當，無米才煮蕃薯湯」。閣再講，今(tann)交通遮爾仔利便，做恁來阮遮，媠甲會觸舌的基隆耍，包恁「有食，閣有掠」。 (TOP)
種佇露臺頂的軟枝茉莉，已經三冬--矣。
上頭仔，花栽拄買轉(tńg)--來，用草仔包牢(tiâu)牢，細kâinn欉--仔，我共伊種佇一个大花坩(khann)內，囥(khǹg)佇門跤口的車庫邊。過無兩日，葉仔直直落，規欉花無攬無拈(bô-lám-bô-ne)，若像強欲轉--去的範勢(pān-sè)。看袂做--得，緊去冊店買一本有關栽培花的冊，才知影茉莉驚寒、愛水、愛肥料閣愛有日頭曝(pha̍k)。
為著欲予伊閣活--起來，我就佇二樓露臺的花園，揣一个所在共伊徙--過去。凡勢是看我遮(tsiah)用心，無幾工爾(niâ)，葉仔就茂(ām/ōm)phànn-phànn、青piàng-piàng；一下有新鮮的空氣佮予和風吹，煞膨膨大，親像四個外月當肨(hàng)奶的囡仔，有夠古錐，有夠媠(suí)，逐(ta̍k)工都大甲有看--見，葉仔愈來愈青翠，樹椏(ue)愈來愈粗。過無偌久，就一枝一枝相招旋(suan)對閘(tsa̍h)雨棚的頂面去--矣。毋過，攏毋捌看伊開過一蕊花，可能是趕緊欲大欉，煞袂記得愛開花。
今仔日透早，我去露臺想欲欶(suh)一寡新鮮的空氣，真意外，欶--入來的煞是一陣一陣的花芳，斟酌共看，原來是茉莉咧拍莓(phah-m̂)--矣，逐枝攏有三、五蕊花，開--出來的花蕊有兩層(tsàn)，外層有六瓣(bān)，內層有五瓣，遐(hiah)細蕊的花，煞有遐精密的構(kòo)造。
我叫阮牽手來看，伊講：「枉費彼樹仔欉生甲遐大欉，毋知影水佮肥料食對佗位去。」我共伊講：「彼花細蕊是細蕊，毋過，真芳--啊。」話那(ná)講，煞予我想起三十冬前的代誌。
阮阿媽真愛芳花，伊無愛艷麗的圓仔花、玫瑰佮菊仔，伊講：「花無百日紅，看花開、花蔫(lian)，特別是上媠的花雄雄蔫--去、焦--去、落--落去，會[予人](hőng)真感慨。傷艷麗的花袂芳，芳的花攏毋是有色--的。我較愛芳的花，較無愛有色的花，像玫瑰佇日頭跤開甲媠媠媠，唌(siânn)蝴蝶來伊遐飛來飛去，毋過伊無芳味--啊！」阿媽栽的花，攏是會芳無紅的花，像桂花、含笑(hâm-tshiàu)、樹蘭、茉莉……彼款會芳的花。其中，阿媽上佮意--的是茉莉。 (TOP)
毋知對當(tang)時開始，故鄉離我的記持(tî)愈來愈遠，甚至是徛(khiā)佇故鄉土地上的爸母的厝，每轉(tńg)去一擺，熟似的物件就消失一件。鬱卒的青春、少女的憂愁、無聊的囡仔時代的記持，攏無先講bye-bye就來離開，完全無考慮我的心情。「啥人叫你久久才轉來一遍！連一通電話也無。」Aih ！離家出外是我的毋著(tio̍h)。
譬論講暗時洗身軀的時，忽然間煞毋免閣燃(hiânn)燒水，因為裝熱水爐--矣。我一个人恬恬徛踮(tiàm)灶跤，燃燒水的大鼎蓋頂一隻蜘蛛當咧牽絲，毋知伊會孤單--袂？想起過去用柴烌(hu)仔燃燒水的艱苦日子，定定一个人跔(ku)佇灶前，不時愛添柴烌仔，熱天時規身汗，寒天時規个人勼(kiu)佇灶前的柴堆邊，煩惱一鼎的燒水無夠一家伙八个人洗。上驚--的是拖『Lî-á-khah』佮Aû（阿母）去柴工場抔(put)鋸屑烌，會弄(lāng)甲規面規頭毛攏是黃色的鋸屑烌，䆀(bái)閣艱苦，毋過我攏毋捌聽Aû喝忝(thiám)，伊干焦一直安慰阮閣忍耐--一下，講袂當予阮去𨑨迌真歹勢。這馬想--起來，我彼時定定一个面臭臭，真正是不孝--呢。一直真欣羨厝邊有熱水爐，尤其後--來阮這群囡仔攏出外，Aû只好家己煮飯兼燃燒水，實在是真辛苦。佇我讀大學以後，阿爸總算買熱水爐--囉，我佮Aû做陣去抔鋸屑烌的艱苦日子永遠袂閣再來--矣。
阮兜的灶有兩个灶空，炒菜彼个的工課予gas爐搶--去；燃水彼个的工課予熱水爐佔--去。只賰(tshun)過年過節的時陣才有用來炊粿、煠(sa̍h)精牲仔，平常的日子就愈來愈感覺灶跤真狹。遐(hiah)爾大的灶，煞忽然間消失佇眼前。佇我對臺南轉--來的暗瞑，一堆磚仔亂糟糟倒佇厝邊的弓蕉跤，已經看袂出當初的模樣，塗跤的磚仔敢猶會認得我？敢會記得細漢時佇灶空內炰(pû)番薯的枵(iau)鬼囡仔？會記得彼兩个做紅龜粿做甲想欲哭的查某囡仔──只是因為Aû挨傷濟粿，害𪜶做規暗的粿做袂煞，腰痠背疼，所以一直唸𪜶Aû講：「後擺莫閣做粿--啦！別人兜攏已經用買的--囉，也無偌濟錢，嘛無人愛食--囉！」啊！歪歪敧敧(khi-khi)倒佇塗跤的磚仔角。你敢會當了解我失落的心情？ (TOP)
頂禮拜日，對竹崎騎『ia̋n-jín』(機車)轉來嘉義，沿臺三線省公路行，軁(nǹg)過幾若沿(iân)的花芳，心情誠輕鬆。春一到，四界全鳥仔聲，白頭鵠(khok)仔、望冬tiuh仔、厝鳥仔，若(ná)親像也知影春天的跤步欲徙--過矣，真要緊咧啼叫，望早一工揣著伴，通緊生湠(thuànn)後代；烏鶖──平地上猛的戰士，穿一軀烏禮服，若紳士tiau西裝彼款，徛佇電火線頂懸，有時也展(thián)開翼(si̍t)股，飄撇勻勻仔踅(se̍h)--一輾。
出番路鄉，斡(uat)阿里山公路，路邊無樹無遮(jia)，來來去去的車，拚足雄，袂輸無愛挃(ti̍h)命，sù-sù叫拚咧lōng；足想欲閘一臺落--來，問駛車--的敢(kám)是棺柴起價，趕欲去訂一具(khū)「福壽」赴市。兩爿的田園，袂少春耕有--一站(tsām)久矣，青piàng-piàng，看著真爽快，毋過，也有寡無人作，放咧拋荒(pha-hng)，雜草亂發，刺莧(hīng)仔人外懸。臺灣農村的經濟好抑䆀(bái)，對這就看會出--來，話講倒轉--來，看著天人菊開甲滿滿是，心情猶是不止仔輕鬆。
『ia̋n-jín』行到二二八紀念碑，心肝頭的快樂攏無--去，越(ua̍t)頭看著彌陀寺，心內憢疑(giâu-gî)，遐的食菜人敢有了解二二八紀念碑是啥物？若準𪜶知影，敢食菜閣食會落--去？那騎那想，到福州仔公墓，落車，坐踮大塚仔(thióng-á)邊的樹仔跤，想講大自然的生物敢有墓，較想都想袂曉，幾年前我就交代後生，死了免共我造墓，燒燒予酥，塗跤掖(iā)掖--咧就好；死人哪著閣佮活人爭土地，人對土地來--的，死了總是愛閣轉去塗--裡。
六年前，開始看鳥仔，用嘉義市做中心，掠『ia̋n-jín』來回一點鐘路程做看鳥仔的範圍。總--仔共--仔，看過規百種鳥，同時也發現佇嘉義市過界這箍圍仔，干焦賰(tshun)一條溝有魚仔。為欲沿路看鳥仔、樹仔，看水溝、河川遮(tsia)的溪流，對五年前起，我若欲轉去林仔邊，攏盡量騎『ia̋n-jín』。對省公路、沿海公路，愈看愈傷心；臺灣這塊養飼--我的土地，哪著愛受這款的酷刑？溪焦，水臭，糞埽規四界。執政的人，毋知良心佇[佗位](tueh)？
欲兩年前，共最近幾年所讀--過有關臺灣的冊攏捐--出來，佮朋友成立臺灣圖書室，看會通予少年人緊認捌(bat)這塊土地。 (TOP)
今仔日拜六，又閣是落雨的早起時。
今年春天雨水特別濟，熱天嘛是厚(kāu)雨，看--來秋天嘛會厚雨水。
記持中，我的故鄉嘉南平原的熱天是雨(ú)期，雨濟，魚濟，水雞仔濟，火金蛄嘛真濟。
我的囡仔時代，猶原是農業社會的臺灣，民風純樸。佇南臺灣，熱天雨期有兩款真予我懷念的消遣，彼就是：抽糖蔥佮食枝仔冰。
抽糖蔥是大人囡仔攏愛的活動，袂輸冬尾時仔起窯炕番薯。大人燃(hiânn)糖水，共糖水熬(gô)甲變做洘洘(khó-khó)的糖膏，用手會使提--起來；糖膏洘洘若像哺--過的樹奶糖，會當抽長。趁燒共糖膏抽甲長長，才閣對拗(áu)；閣抽予長長，才閣對半拗。抽、拗，閣抽、拗，相連紲重覆--落去。抽佮拗的過程中，共空氣包入去糖膏內。糖膏漸漸冷--去，失去彈(tuânn)性。所以著愛佇變冷進前，共糖膏抽做一條長長長，若像大頭拇遐(hiah)粗的糖條。用菜刀鏨(tsām)做差不多一寸長、若像青蔥仔頭，白鑠鑠(siak)。糖蔥比青蔥，白蔥蔥；糖蔥甜甜，青蔥薟薟(hiam)；大人囡仔愛糖蔥，大人嘛愛青蔥摻魚丸仔湯。
抽糖蔥的時，愛準備一張厚紙，紙頂糝(sám)一重(tîng)番薯粉、太白粉抑是麵粉。糖蔥會黏手，所以愛隨時滒(kō)粉，才袂黏手。
大人抽糖蔥，囡仔邊仔看。糖蔥鏨--出來，人人有份，大大細細歡歡喜喜。抽糖蔥的高手抽--出來的糖蔥脆脆，秘訣是包空氣。糖蔥有的是家己抽，市面嘛有咧賣。臺灣經濟起飛了後，商業糖仔百百款，這馬大概無用手抽的糖蔥--矣。其實抽糖蔥是一款手藝，有值得保留。若落雨天攏會想起熱天雨期中的臺灣三、四十年前抽糖蔥的日子。
雨期的熱天，無雨的空縫，有一款行業，就是騎跤踏車的枝仔冰販仔。枝仔冰販仔一个庄頭騎過一个庄頭，賣枝仔冰。囡仔的耳空特別利(lāi)，枝仔冰販仔猶未到，猶原佇真遠的所在，猴囡仔已經聽著枝仔冰的叫賣聲。
庄跤囡仔無銀角仔，欲按怎去買枝仔冰？喙瀾流袂止，自然就有辦法。冰枝販仔有兩个箱仔，一个囥(khǹg)冰枝，一个囥番薯。(TOP) (轉去主目錄)
賴老師您好
很用心都舖上網
我應該好好學習上網
讓自己的部落格更豐富
希望你的blog會當愈來愈精彩.