2020
0826092701-109年全國語文競賽閩南語朗讀(國小組)0813修改
(轉去109年全國語文競賽閩南語朗讀文章篇目)
(轉去主目錄)
01烏豆乾 王朝源
02心適的𨑨迌物仔 田美瑜
03另外一个阿媽 薛玉麗
04攢縛粽 蔡連眞
05便當 許美莉 (Khóo Bí-lī)
06牽牛食草 邱素綢
07我佮阿公 陳春美
08寶貝再會 陳宜伶(lîng)
=========================
01烏豆乾 王朝源
市面咧賣的抑是家己做的喙食物仔有萬百款，做法無論是糋的、烘的抑是豉的；氣味毋管是甜的、鹹的、酸的、薟的攏總有。有人興燒酒，有人興豆腐；有人愛釣魚，有人愛行棋。逐个人佮意的喙食物仔攏無相仝，啊若我上佮意的，就是大溪的烏豆乾。特別是形狀大大塊，四四角角厚tut-tut，表面色水烏趖趖彼款我上佮意。這款豆乾外形雖然烏、粗閣大箍，毋過千萬毋通看貓的無點，保證食一擺就牢喙，若無食著是會怨嘆一世人。
烏豆乾哺著佮喙閣實櫼，愈哺愈芳。芳味先對鼻空衝起來，了後鑽入去頭殼內，予我規身軀攏爽快起來。上予人呵咾甲會觸舌的，就是耐哺佮伊的韌𩚨度，會使講是好食甲連喙齒都會綴咧唱歌。
除了頭前所講著的𩚨、芳合我的口味，食著會紲喙以外，就是伊的生產過程攏有身分證會使看甲明明明。水質好、用料實在、無摻人工色素佮防腐劑，糖、鹽嚴格控制，摻甲拄拄好袂超磅，對身體絕對無敗害。
是按怎烏豆乾會是我上佮意的喙食物仔咧？其實，其中閣有一段非常有意義，嘛真值得紀念的愛情故事。
聽阮阿母講伊猶未嫁阿爸進前，是佇大溪一間豆乾工場的門市咧顧店。彼陣阮阿爸咧做憲兵，訓練中心結訓了後落部隊，分發去慈湖徛衛兵。有一个歇睏日，阮阿爸和伊的兵仔伴相招去踅大溪的舊街，踅啊踅煞踅入去店內共阮阿母交關。
阿母講伊佮阿爸就是按呢熟似的，尾仔就戀愛、結婚。較早工場佮阿兵哥的月給攏無濟，約會的時陣為著欲省所費，阿母就對工場買烏豆乾去和阿爸那開講那啖糝。所致阿母這馬不時攏會滾耍笑講，會當做阿爸的牽手上愛感謝的就是大溪烏豆乾這个大媒人婆仔。
逐冬初二若綴阿母自外家轉來，嘛是攏買烏豆乾予祧仔內的囡仔做等路，逐家攏食甲笑咍咍、哺甲咂咂叫。早前我一直想攏袂曉，定定會問家己，喙食物仔遮爾濟項，我哪會上佮意烏豆乾咧？敢講是佇阮阿母腹肚內食慣勢的關係？(TOP)
講著𨑨迌物仔，你會想著啥物咧？這馬佇運動埕上時行的，是改良過的軟式飛盤。有一站仔，囡仔佇教室誠愛耍指頭仔干樂。這站仔上愛耍的，是一種對外國時行過來的物件，叫做『slime』的𨑨迌物仔，因為黏黏閣軟軟，有人共伊號做「鼻屎蟲」。
其實，鼻屎蟲這種𨑨迌物仔，原本佇兩年前就捌時行過。彼陣囡仔攏是去𥴊仔店買，一罐細細罐就愛七、八十箍，實在是貴參參。有當時材料無蓋好，閣會牢佇課本抑是鉛筆盒仔面頂，實在真癩。
想袂到這改鼻屎蟲閣開始時行矣，不而過，這擺是囡仔家己做鼻屎蟲。材料真簡單，是厝裡就有的物件，親像水膠、白膠、洗髮精抑是齒膏，攏會使成做鼻屎蟲的材料。頂工看囡仔提一罐白膠摒一寡佇盒仔內，閣準備一點點仔水，開始用尺佇遐抐抐咧。一觸久仔，鼻屎蟲就做好矣。
有人會較工夫，希望鼻起來有芳味，按呢著愛閣濫一寡洗髮精抑是齒膏入去。啊若是愛色緻較好看，有人嘛會摻水彩落去，嘛有人會摻指甲花抑是掖一寡金粉落去。所以有人的鼻屎蟲是紺色的，有的是粉紅仔色，有的金金，嘛有的殕殕，隨在囡仔按怎做攏會使，閣會使予囡仔加添一寡想像力，莫怪這馬閣時行起來。
看囡仔遐爾愛耍，我嘛真好玄，共借一个來耍看覓。鼻屎蟲摸起來水水，不而過用無仝材料，成品摸起來的手感就無啥仝款。雖然做鼻屎蟲的大部份攏是查某囡仔，毋過有的查埔囡仔嘛會綴做伙耍。
有一擺，我共鼻屎蟲phoo佇我的面冊，面友攏感覺真心適，嘛引起真濟討論。有一个面友的囡仔咧讀國小，面友講伊閣會佮囡仔做伙做，這嘛是一種陪伴囡仔的方法喔。伊嘛共伊做的鼻屎蟲相片phoo出來，伊做的色水誠媠。逐家攏真好玄，伊是用啥物材料去做的？因為逐家做出來的鼻屎蟲，有的像樹奶糖仝款軟荍荍，有的就較𠕇。逐家一句來一句去，認真的態度袂輸囡仔。朋友嘛成做逐家的顧問，實在是有夠趣味的啦！(TOP)
03另外一个阿媽 薛玉麗
阮阿媽已經有歲矣，慣勢蹛庄跤。因為庄跤有草地味、有鄉土情，生活自由自在。毋過阿爸掛意伊佇庄跤家己煮食，跤手閣袂猛掠，就共接來市內和阮做伙蹛。寢頭仔伊感覺規工閒仙仙毋知欲創啥？無聊甲掠蝨母相咬，嘛一直吵欲轉去。
有一改禮拜的下晡時，阿爸就𤆬阮去附近的公園行行踅踅咧。公園內底有人咧行棋，有人咧拍太極拳。這攏是阿媽上愛的。就按呢，阿媽有所在通行矣，就袂閣吵欲轉去庄跤矣！
「阿華仔，和阿媽來去公園！」逐禮拜的早起，阿媽攏會招我去。伊去和人運動、看人行棋抑是佮人破豆；我耍我的幌韆鞦、跙流籠，有時嘛和囡仔伴走相逐。規个公園鬧熱滾滾，足心適。無偌久，阿媽招我褪赤跤去行細粒白石仔鋪的「健康步道」。我就共褲跤撆起來，布鞋褪落來捾佇手裡，阿媽煞講：「鞋仔囥咧較好行路，當頭白日，無人會偷提啦！」毋過這雙鞋仔是新買的呢，若準拍毋見，我會足毋甘。所以我就共鞋帶仔縛做伙，揹踮肩胛頭。
我才踏落「健康步道」隨疼甲哀哀叫，毋過阿媽攏無hìnn-hainn著。我足好奇共看，伊煞講：「這哪有啥物奇怪？庄跤人跤皮本底就較厚，無像恁攏幼秀跤。」阿媽陪我一步一步勻勻仔行，都行無偌久，雄雄一个無相捌的阿婆行倚來，共我的布鞋搶咧就走。我拄想欲逐去，阿媽煞共我搝咧講：「袂使逐，你若逐，彼个阿婆會跋倒。」我誠憢疑，嘛感覺無道理。一觸久仔，有一个阿叔半行半走，綴佇阿婆的後壁，喝講：「阿母，沓沓仔行，毋通走!」等彼个阿婆停落來，行來阮的面頭前講：「失禮啦！阮阿母的精神無偌好，有一點仔失智。孫去泅水無轉來，伊掠準彼雙鞋仔是伊的，毋才無講無呾就搶咧走，歹勢啦！」
看彼个阿媽目睭無神無神，一時仔掠我看咧看咧，一時仔閣對我笑咧笑咧。我煞誠同情彼个阿媽，向望伊的病情會當較緊好起來。
04攢縛粽 蔡連眞
真濟人若來咱臺灣𨑨迌，攏會呵咾講：「臺灣是一个上有人情味的所在。」有影是規欉好好——無錯。尤其是若到每一个大節日，攏有相對應的典故佮好食的物件，親像中秋的月餅、冬節的圓仔、清明的潤餅，攏是家家戶戶會食著的物件。當然啦，五日節的粽，更加是較濟人會家己攢的節日食品。
會記得頂工歇睏的時，透早阿母環保袋仔捾咧，講欲去菜市仔款貨，通利用假日來縛粽。伊問我講：「你欲綴我來去無？」我心內想講:「平常時仔阿母攏會叫我踮厝裡寫功課，這擺哪會主動欲招我去菜市仔買菜咧？」原來就是五日節欲到矣，伊欲家己縛粽。縛粽需要的物件有較濟，愛有人鬥捾。另外，阿母嘛想欲順紲予我有一个學習的機會，知影欲按怎款貨佮選擇鮮沢的食材，才袂定定去予人笑講是「食米毋知米價，食飯坩仔中央」的人。
若夜市仔，阿爸有閒的時陣，定會𤆬規家伙仔去踅踅咧。啊若菜市仔，我就真正較少去矣。三不五時阿母若咧煮食欠東欠西的時，攏會叫阮就近去超市買買咧，想欲買啥，時間上較無受限制。若早起時的傳統菜市仔，就一定愛中晝進前去才買有物件。所以這擺我無論按怎，我嘛欲綴阿母去買料通轉來縛粽。沿路行就想著阿公定咧哼的彼條〈安童哥買菜〉歌詞內的情景，我嘛菜籃仔捾咧，tshiàng-tshiàng行、tshiàng-tshiàng去，心肝內是歡喜甲袂輸考試考著第一名的咧。
母仔囝入來到菜市，真正人山人海𤲍甲滿滿是，逐个人攏這也買、彼也買，買甲苦無跤手來鬥捾。閣看著生理人的擔仔無論肉粽、菜粽、鹼粽、粿粽逐項有，看著實在足好食款的，喙瀾強欲津落來。我共阿母問講：「咱敢有欲逐種口味攏來縛寡？」阿母應講：「拄才入來菜市你就險險仔予人櫼無去，若是欲逐項粽攏總縛，我看著愛先拜託警察先生來揣人。」聽阿母應按呢，兩母仔囝煞袂記得買菜款貨的辛苦，兩个人笑甲喙仔裂獅獅。(TOP)
05便當 許美莉 (Khóo Bí-lī)
想起讀國小、國中的時陣，別人攏是對厝裡紮便當來學校炊，干焦我著愛透中晝傱去大門口，等阮阿母送便當予我。
遠遠聽著阿母的oo-tóo-bái聲，聲音愈來愈倚、愈來愈大聲，我的腹肚就會愈來愈枵。看著阿母騎伊彼台佇彼時陣足風神閣顯目的白色「ui̋-sū-pà」出現的時，我的目睭隨金起來。歡歡喜喜對阿母的手裡共彼粒燒唿唿的便當接過來，閣共阿母說多謝了後，我就趕緊倒轉去教室，準備欲來食阿母攢的便當囉！
才拄共便當囥桌頂，蓋都猶未掀開，同學逐个就開始臆，欲看我的便當有啥物好料的？定定臆毋著，因為阿母攢的便當，袂輸萬花鏡仝款，千變萬化，有魚有肉嘛有菜佮。蹛佇海墘仔，常在攏有現流仔的海產通食，尤其是細隻魚船仔用釣竿仔釣的，逐工攏無仝款，我的便當嘛綴咧變來變去。阿母閣會攢著時的果子予我食，貼心閣頂真的阿母，攏會加攢一份，欲予阮彼个對臺北來庄跤教冊的導師。阿母的愛心便當予我滿滿的營養，閣有阿母對阮的向望佮滿腹的愛。阿母的愛心便當，嘛予我體會著做人上基本的道理，日後毋管做啥物，著愛用心斟酌準備，嘛愛堅持閣有耐心，代誌才會成功。
這馬換我做人的老母，逐工天拍殕仔光就精神，趕欲共阮查某囝攢便當。逐工攏咧想講欲煮啥物伊較愛食的菜，天氣若傷熱，就愛較清的菜，毋通傷鹹；天氣若較寒，就愛共攢燒罐予伊紮湯。逐工雖然睏無飽眠閣無閒𩑾𩑾，愛款東款西，灶跤嘛愛拭來拭去。毋過看著阮查某囝逐工攏真歡喜咧問講：「阿母，明仔載你欲煮啥物好料的予我紮便當咧？」定定聽伊講，有同學逐工攏會來巡看伊的便當有啥物好料的，甚至有的人三不五時閣會來夾一塊仔肉、夾寡菜，講甲伊喙笑目笑，歡頭喜面真得意。聽伊按呢講，我心內嘛誠歡喜伊有佮意我逐工共伊攢的便當。
攢便當的過程當中，我沓沓仔體會著阿母彼當陣的心情，我閣較感謝阿母對阮的疼惜佮照顧，我嘛會永遠共阿母堅持拍拚的愛傳落去。(TOP)
06牽牛食草 邱素綢
逐擺出去散步，看著空地仔旺phà-phà的野草，我就那感覺遺憾那講：「若牽牛來遮食草，牛一定足歡喜的！」
我自國小五年仔到國中一年仔這个階段，下晡時攏愛牽牛出去食草。彼時陣因為飼牛的人較濟，我定定煩惱會揣無草通予牛食。
牽牛出去食草毋是簡單的工課，尤其是一个查某囡仔疕，牽一隻大水牛，連牛都看你無夠重。講是牽牛，其實是出去的時，予牛拖咧lōng。因為牛放出去食草，伊攏足歡喜的，毋才攏會行足緊，細細漢仔的我就綴伊尻川後半行半走。等到天暗，欲轉來就換我拖牛，因為牛猶未食飽就毋轉來。若較晏出去，附近路邊的野草攏予別隻牛食了了矣，就愛行去較遠的所在。所以細漢飼牛的彼段日子，揣無草通飼牛是我上大的惡夢！
牽牛食草猶有一項真驚惶的代誌，就是拄著另外一个囡仔牽牛，兩隻牛拄著會相觸，兩个囡仔牛喝袂聽、搝袂開，干焦會當驚甲佇邊仔哭。
牽牛出去食草，我欲創啥咧？草仔埔有足濟蟲豸，我會欱蝶仔、拈田嬰、掠草蜢仔，毋過攏掠袂著。尾仔我就紮尪仔冊，抑是翻譯的故事冊去看。
讀六年仔的時，有一工因為月考欲到矣，我換紮課本去。一手牽牛、一手提冊，讀啊讀，頭攑起來……害矣！阮老師騎鐵馬已經來到我的面頭前矣！伊掠我金金看，我無地覕，只好共伊行禮。
隔轉工上課，老師先講一个故事。講古早有一个人誠認真讀冊，共冊掛佇牛角，那飼牛那讀冊，後來做大將軍，這就是隋朝李密「牛角掛冊」的故事。老師講到遮，我就知影伊紲落來欲講我囉！老師講：「古早有李密，這馬咱這班嘛有一个和李密仝款認真的人。」老師就講起昨昏拄著我的代誌，最後閣叫同學共我拍噗仔。我實在足歹勢，嘛受當袂起，因為才第一擺紮課本去讀，就予老師拄著，閣按呢共我呵咾。
這馬作穡攏用機器，真少人飼牛矣。路邊的野草發甲真旺，嘛無牛通來食矣，我心內煞有淡薄仔稀微。(TOP)
07我佮阿公 陳春美
「米仔！你緊來共阿公看覓咧！唸予我聽。」喔！閣來矣！我拄放學才行到門口埕，冊揹仔都猶未囥落來，阿公就閣共伊的公文批㧣倚來。「阿公！我干焦會曉唸國語，賰的我袂曉唸啦！」「無效啦！予你去學仔讀冊，連字都毋捌，是咧讀啥冊啦！」阿公氣怫怫，喙脣頂的喙鬚袂輸咧跳舞趒一下趒一下。「哎喲！阿公！老師無教阮彼字欲按怎用咱的話唸啦！」謼！我真正是啞口硩死囝，有話無地講。便若看著阿公的公文批，我頭殼就𢯾咧燒。佇學校講母語就愛罰錢，我哪敢閣問老師彼批是欲按怎唸？心內干焦想講，阿公無代無誌是做里長欲創啥啦！
「米仔！你緊去放送，農藥佮蝒蟲藥仔來矣。」喔！啊若這缺對我來講，就像桌頂拈柑，簡單啦！Mài-khuh攑咧：「各位鄉親序大，農藥佮蝒蟲藥仔來矣，請恁趕緊來里長伯仔遮領喔！」
「米仔！看這个範勢，風颱就欲來矣。趕緊家私攢攢咧，緊來去共枋仔橋釘予較牢咧！」又閣是我，逐項攏叫我，真正是大工一下指，小工做半死。今彼枋仔橋都袂輸像擤鼻糊的，釘幾百枝釘仔嘛是無彩工。三兩下手就予風颱搧甲歪膏揤斜、離離落落，是有啥路用啦！毋過這條橋是阮庄裡對外唯一的聯外交通，阿公講毋管有效無效嘛是愛盡力。毋但按呢，連大路的牛屎嘛愛阿公處理。有時陣我攏會想講，這馬我會遮爾家婆，毋知是毋是去種著阿公。
阮阿公在生的時，連紲做九任的里長，毋捌趁過半仙錢，干焦有逐工一份三張的報紙，予阮提來包便當。伊的里長生涯一直到有一工，伊閣去大路黜牛屎轉來的時陣，頭殼去挵著牛牢的楹仔，挵甲流血流滴，阿母姑情伊莫閣做，伊才停睏無閣做里長。
阮阿公食甲九十六歲才離開世間，除了耳空較重，毋捌去看過先生。這馬共想起來，凡勢這嘛會當算是天公伯仔予伊遮濟年來為村民拍拚的月給。
我常在咧想，時間若是會當重來，我一定會用足有耐心的氣口，替阿公唸公文批，嘛袂閣怨嘆伊逐項攏欲叫我做矣。(TOP)
08寶貝再會 陳宜伶(lîng)
我佇臺北出世，種田對我來講是足艱難的代誌。毋過我足愛佇田邊𨑨迌，因為阮祖公仔攏是作田顧三頓的人。想著細漢歇熱的時，逐擺綴阿舅去田裡，一下仔挖塗、一下仔挽花，一下仔掠雞仔囝，有時陣閣會挖著一尾佮大頭拇仝款，肥肥閣長長的杜蚓仔；有時陣閣褪赤跤踏佇軟軟的爛塗裡，足驚會陷落去。
我定定會共過去佇庄跤的故事講予學生囡仔聽，的眼神攏是欣羨，聽著趣味的代誌閣會笑咍咍。有一擺，我講著佇田裡飼鴨仔會鬥種田真環保，共天然的物件囥做伙鬥陣生活，是一種順應自然的概念，學生囡仔攏感覺真稀奇。
魚趁鮮，人趁茈。舊年十一月，我𤆬規班種菜，有芫荽、菜頭佮番麥，逐家細膩仔共栽仔佮菜子勻勻仔掖佇塗裡。逐工下課，除了拍球佮耍覕相揣以外，攏會走去沃菜，講一寡呵咾菜的話。遐的菜敢若聽有，生甲緊閣媠。歇寒進前的一禮拜，菜頭葉仔的頂頭，生一尾青青的蟲，學生仔足驚菜會予彼尾蟲食了了，趕緊掠入來教室予我看。我講：「免驚，這是白蝶仔的幼嬰仔，好好仔共照顧，到春天伊就會變做蝴蝶。」三四个查某囡仔提葉仔共蟲包起來，當做寶貝仝款，囥佇鉛筆盒仔裡，準備提轉去飼。放假前一工，囡仔那吼那問我講：「老師，彼尾蟲袂振動矣，有一个膜包牢咧，敢若欲死矣呢？」我隨共安搭講：「免驚！伊欲變蝴蝶矣！莫共摸，予伊恬恬仔佇遐。」
歇寒轉來，囡仔共彼盒寶貝囥佇教室予逐家觀察，毋過無人插，我煞顛倒歡喜。袂記得去摸，才袂共蟲拍著驚。等清明過，盒仔內的蝴蝶破殼出來，恬恬仔佇箸頂懸等翼焦。我細聲仔共囡仔講：「紋白蝶出來囉！逐家今仔日就恬恬仔欣賞，等放學的時才放伊飛。」
平常時仔囡仔放學攏會大聲喝講：「老師再會！」彼工，煞溫柔仔溫柔共的寶貝講：「蝴蝶再會！」了後，若有蝴蝶飛入來教室，阮攏誠歡喜看伊飛來飛去，耐心仔等伊飛出去，嘛會細聲仔共講再會！(TOP)
沒有留言:
張貼留言