03-109年全國語文競賽閩南語朗讀(高中組)0813修改

 2020

0826120603-109年全國語文競賽閩南語朗讀(高中組)0813修改

1650整理篇

(轉去109年全國語文競賽閩南語朗讀文章篇目)
(轉去主目錄)

 

01鹹酸甜　　游淑靜

02我佮阿母的心靈約會簿　　葉品謙

03學駛車　　郭聿恩

04人急無智　　顏銘志

05龍眼乾煎卵　　陳明芳

06難忘的麵粉酥　　陳雅菁

07阿母的愛心　　李燕樵

08囡仔時代　　辜玲瑩

09我咧揣我拍毋見的物仔　　簡惠英

10泅過日月潭　　蔡天享

 

01鹹酸甜　　游淑靜

　　人攏叫阮阿爸「鹹酸甜的」，因為伊較早捌佇商展咧賣鹹酸甜。

　　阿爸是彰化人，細漢厝裡散赤，無通予伊去讀冊，所以大漢干焦會當做一寡粗重的工課。閣因為袂曉好好仔照顧家己，七少年、八少年就帶痚呴。結婚了後，就搬去較燒熱的屏東，阿母後頭厝遐蹛。

　　阿爸為著某囝，人生閣加一味心酸的味。來到屏東，阿爸逐工去外口四界踅，那踅那看有啥物生理通做。伊頭殼誠好，落尾共阿母講：「無，來賣咱彰化八卦山出名的鹹酸甜好矣！」拄開始干焦暗時去排商展爾爾，等兩个小弟出世，閣想欲買一間家己的厝。伊就拚勢做，透早擔擔佇菜市仔喝賣，中晝轉來食飯。歇一睏仔，下晡就閣割果子咧賣，欲暗仔轉來暗頓食煞，隨閣拚去商展賣鹹酸甜。按呢傱來傱去，毋捌聽伊咧喝忝。若商展拄好排到阮庄，我會綴去共鬥賣。歇寒、歇熱的時，就逐工綴伊去別庄。因為有去鬥賣，閣較了解伊心內的酸佮苦。

　　阿爸頂真閣實在，貨攏愛親身去看過才會放心，所以年節時仔，伊攏騎oo-tóo-bái轉去彰化，順紲去看貨，才拜託頭家共貨寄落來。阿爸講生理愛做信用的，因為按呢，人客足濟，嘛才有法度共阮這陣囡仔對一蕊紅紅晟甲大人。阿爸的愛，若像共伊性命的鹹味、酸味，變做甜味，傳予囝兒序細。

　　毋過嘛因為日也做、暝也操，原本虛荏的身體就愈害矣。會記得我國中的時，佇房間讀冊，定定會聽著阿爸倒佇隔壁間的眠床頂哼哼喘，彼陣我心肝頭規个綴咧酸，喙嘛定定無細膩去舐著目屎的鹹味。

　　好佳哉，天公疼戇人，後來人共報講，運動對身體真好，伊就開始逐工足骨力運動。親像行路、山佮練氣功，閣會去阮遐的涼山水沖泅水閣沖身軀。就按呢，伊的身體就沓沓仔好起來矣！這馬伊已經七十外仔外矣，猶是逐工佮阿母去山頂行路。阿爸講會當度過痚呴，會當陪阮大漢，看著囝孫成人，就是一種福氣。以前的鹹味、酸味算啥物，早就成做人生正港的甜味囉。(TOP)

 

02我佮阿母的心靈約會簿　　葉品謙

　　會記得做囡仔的時，我上愛聽阿母講古。毋是我咧膨風，阮阿母足𠢕講笑詼的。早產厚毛病的我，歹睏癖閣愛吼，症頭一大堆。阮阿母為著欲予我較好睏咧，逐暝攏會那講笑詼、那激五仁ánn我睏，定定害我笑甲吐。伊就佇眠床邊囥一跤面桶，予我那笑那吐。講嘛怪奇，吐了後我就一暝睏到天光矣！這毋知是毋是人咧講的囡仔癖？

　　阮兜有一本簿仔，專門咧記阮母仔囝的譀古話。親像國小一年仔，我問阿母：「人死了後，敢一定愛啉孟婆湯？」阿母講：「是啊，啉了後，會袂記得這世人的代誌，才會當去投胎。」我隨應講：「按呢咱攏莫啉，咱就會當永遠做母仔囝矣！」

　　閣親像有一改，阮母仔囝牽手去散步，阿母看著一个失神失神的老大人予外籍移工牽咧行。伊雄雄司奶問我講：「後擺你若有女朋友，就袂閣想欲牽我的手矣！」我應講：「你安啦！我會一世人共你牽牢牢。」這个若囡仔的查某人就喙翹翹挐講：「啊我若活甲一千歲咧？」 我隨應講：「正手共你牽五百年，倒手嘛共你牽五百年。」「毋過，母仔！你是千年老妖精喔？」講煞，看伊的五筋膎欲khia̍k落來，我就緊走予伊逐。

　　兩年前阿母開刀蹛院，看著伊虛荏的模樣，我真毋甘問伊：「會疼袂？」伊用梢聲的聲嗽講：「你袂記得我是千年老妖精喔！」出院了後，阿母決定欲捐大體，愛我簽名背書。「喔！你起痟喔！我無愛簽啦！」佇應聲裡，我越頭無愛予伊看著我強欲流落來的目屎。

　　落尾我去美國讀冊，彼一冬阮干焦用『Line』聯絡，毋過思念阿母的心情，就親像喘氣遐爾仔自然。轉來臺灣，伊閣講起捐大體的代誌，愛我簽名。伊講：「我這世人做老師，死了後做老師就親像桌頂拈柑遐爾簡單，安啦！」看伊堅定的眼神，我知影毋管是啥物人攏無法度改變伊的決定，就按呢我做伊的見證人，完成伊的心願。

　　彼暗我閣掀開彼本簿仔，恬恬寫落這句話：「阿母！毋通袂記得咱的約束，後世人咱欲閣繼續紲攤做母仔囝。」(TOP)

 

03學駛車　　郭聿恩

　　細漢的時，若是有人問我：「你大漢想欲做啥？」我一定會應講：「駛車!」因為從細漢我就聽阿母不時咧哼講：「早知阮喙齒根咬咧嘛愛學駛車。」若拄著透風落雨或者是欲走遠途，阿母攏愛三姑情、四拜託，叫阿爸共載，予我佇邊仔攏感覺會曉駛車的人，誠實足奢颺的，所以我才將駛車當做大漢了後第一項想欲做的代誌。

　　舊年大學拄考煞，逐日佇厝閒仙仙，阿爸看我遐爾懶屍，就替我報名去學駛車。第一工去駕駛訓練中心坐踮教練的邊仔，我一手扞ha̋n-tóo-luh，另外一手等欲拍速。教練看著我這个範勢，就問講：「你敢第一見駛車？」我誠臭屁共應講：「當然毋是！逐暝做眠夢，我早就毋知駛過幾擺去矣！」教練叫是我咧和伊練痟話，隨激一个面腔予我食膨餅，我喙緊窒咧，恬恬仔認真學駛車，毋敢閣假痟。

　　會記得第一擺去道路駕駛的時，我緊張甲雙手汗一直趖出來，規身軀咇咇掣。教練佇邊仔共我安搭講：「驚驚袂著等！有我佇咧做你安啦！」頭起先我猶誠細膩，油門毋敢催傷雄，拄著青紅燈閣會注意四箍輾轉駛來的車。後來愈駛膽愈在，速度就愈來愈緊。想袂到雄雄有一隻狗仔對路邊傱出來，險險仔就予我的車軋著。好佳哉！教練即時共擋仔踏牢咧，彼條無辜的性命才無去予我買去。教練事後對我講：「駛車無撇步，凡事愛細膩。細膩無蝕本，安全排第一。」

　　欲考駕照進前，阿爸逐工載我去較無人行踏的停車場練駛車，順紲教我考試愛注意的鋩角。因為有阿爸的加持，我一改就考過矣，順利提著駕駛執照。自從我有駕照了後，逐日載阿母出門就變做我的工課。阿母拄開始坐我的車閣會膽膽，雙手一定會共門邊的手扞仔扲牢牢。後來慣勢了後，連我駛佇高速公路伊嘛有法度盹龜。

　　阿母定定講：「阮後生大漢矣！會曉疼阿母矣！」阿爸若聽著阿母按呢講，就會吐大氣兼幌頭講：「船過水無痕，看起來恁老母已經袂記得早前攏是啥人咧疼伊囉？」(TOP)

 

04人急無智　　顏銘志

　　禮拜日透早，我佮媠某物件款好勢欲去山，想袂到拄出門無偌久就落雨矣！姑不而將只好翻頭，乖乖仔轉來厝裡。若甲落雨袂當山，就想講共房間小可摒掃咧。佇咧整理屜仔的時，看著一張阮𤆬兩个後生做陣去山的舊相片，十幾年前的景象隨浮現佇腦海中。

　　會記得頭一擺𤆬兩个後生去山是今仔讀幼兒園的時陣，閣誠細漢，毋知山是啥款，干焦知影會當出去耍就興𩑾𩑾應好。規路綴佇阮身邊，雖然行甲誠忝，毋過嘛行到頂懸，達成目標。第二擺，兩个嘛猶閣乖乖做陣出門。等到第三擺欲閣𤆬去山的時，猶未出門，兩个兄弟仔就同齊喝講：「阿爸，山足無聊的，敢會使莫去？」我歹聲嗽講：「袂使，一定愛去！」兩个只好面憂面結、毋情毋願綴阮出門。因為按呢，兄弟仔就按呢沿路行沿路哼，一下仔講足熱，一下仔講足忝，想欲歇一下。我袂堪得哼哼叫又閣想講：「芥菜無剝毋成欉，囡仔無教毋成人。」就不時共教示一下，爸仔囝面腔攏真歹看。阮某看這个範勢，恐驚歹收尾就出喙講：「食緊會挵破碗啦！橫直時間閣真冗，這逝路嘛無危險，咱就予兩个那行那耍，落尾會綴來就好！」我躊躇一下仔，想講按呢嘛好，就據在行，較免得佇遐氣身惱命！

　　想袂到無插了後，兩个兄弟仔連鞭逐蝶仔、連鞭跍佇草仔邊金金相，看著路邊焦涸涸的樹椏，兩人就做伙出力扛佇肩胛頭，那行那喝：「heh-siooh！heh-siooh！」其他的山友看彼款古錐的模樣，逐家攏微微仔笑講：「喔！囡仔兄，真𠢕！咧欲到矣，加油！」聽著遐濟人共呵咾，兩个袂輸著獎仝款，規路歡頭喜面行到頂懸歇睏的所在。

　　轉來到厝，阮某略仔滾耍笑共我詼，講我平常時教囡仔都攏誠理性，袂烏白發性地，是按怎今仔日煞走精去？我歹勢歹勢，吐大氣講：「我嘛毋知，可能就親像人講的，水清無魚，人急無智。後擺我會較細膩咧，三思而後行，袂遐爾急性，較免得食緊挵破碗！」(TOP)

 

05龍眼乾煎卵　　陳明芳

　　寒人透早拄欲六點，天毋甘願光，我嘛猶毋甘願醒，干焦冷風上骨力，對我的毛管空鑽入去，規身軀走透透，連棉襀被本成的燒烙嘛予伊吸了了。仝款的季節、仝款的早起，無仝款的是，我已經真久毋捌食過阿媽彼碗龍眼乾煎卵矣。

　　我讀國中的時，逐工攏著騎鐵馬，拚一段四公里的路途，踅過幾若个庄頭，盤過埔鹽去到福興的學校。雖罔這是一逝直溜溜的路途，毋免彎來斡去，毋過若是拄著透風落雨，抑是大寒的時陣，我就感覺家己親像是欲去西天取經，毋知佗一工才會到位？好佳哉，我腹肚內彼碗龍眼乾煎卵法力無邊，有食有行氣，予我會使擋到學校，毋驚霜風的凌治。

　　阮阿媽毋是一个真𠢕煮食的婦人人，毋過伊攢食的攏誠有心。寒人透早，佇我面漚面臭趕欲出門的時，伊攏會好聲好說共我吩咐彼碗龍眼乾煎卵是用烏麻油煎的，閣有濫米酒，姑情我絕對愛食落去較袂驚寒。我看彼碗煎卵毋但色水殕殕，閣有淡薄仔臭火焦，實在是袂開脾。毋過阿媽七早八早就佇灶跤無閒𩑾𩑾，用伊頇顢煮食的跤手，拚時間趕佇我出門進前，兇兇狂狂彼碗煎卵捀咧，傱對我遮來，袂輸查某𡢃咧侍候小姐仝款。我煞遐爾仔惡質，對伊歹衝衝，實在不應該。想到遮，我就連鞭共彼碗煎卵接過來，兩喙做一喙共哺哺吞落去。想袂到彼碗外表真無贏面的龍眼乾煎卵，食起來煞有一種連山珍海味都無法度比並的滋味。龍眼乾的芳甜勻勻仔佇喙空湠開，溫馴的特性予人食了袂飫；米酒的熱情細膩仔跟綴薑母的老步定，寬寬仔安搭規身軀受寒的每一跡。尾仔是烏麻油佇喙內疊甲滇滿滿的喉韻，是一種無論經過偌久，攏會一直數念的癮。

　　阿媽的龍眼乾煎卵，伴我度過國中綿爛讀冊彼三年的寒人早起。讀高中了後，我就離開厝。一直到讀大學、出社會，我佮故鄉煞愈來愈疏遠。如今阿媽的形影我已經無機會通閣看著矣，毋過彼碗龍眼乾煎卵的滋味，佇逐年的寒人早起，攏會溫暖我的記持。(TOP)

 

06難忘的麵粉酥　　陳雅菁

　　做囡仔的時，阮兜的巷仔頭到有一間糕仔餅店，見擺若經過遐，我攏會予伊芳kòng-kòng的芳味唌牢咧。伊的做法真心適，有人徛佇大鼎頭前無閒咧糋麵粉，嘛有人佇鼎邊用麥芽糖摻小可仔油水，沓沓仔煡成麥芽膏。講到遮，你敢有臆著這項物件是啥物？無毋著，就是佇臺灣南部才看會著的「麵粉酥」。

　　趁麥芽膏燒滾滾的時，加入糋好的麵粉，紲落來就愛佮時間拚輸贏。佇滒糖蜜的麵粉猶未冷去進前，愛緊共捏做一隻龜的模樣，若等到麵粉無夠燒才來做，就會規个𠕇硞硞，按呢就害囉！

　　會記得阮這陣囡仔攏會徛踮門跤口，看頭家咧表演鐵砂掌。衝煙的麵粉酥佇伊的手頭敢若黏塗仝款，一觸久仔就變做一隻足大隻的龜。我佮厝邊的囡仔伴攏徛踮壁邊，對今仔做好的龜金金相，精差喙瀾無津落來爾爾。頭家佇店內無閒𩑾𩑾，舞甲大粒汗、細粒汗，毋過若看著阮這陣枵饞的囡仔，就會提一塊仔予阮鼻芳，較好運的就會提著規大塊的。逐家你一喙、我一喙，做伙享受這味數想足久的好滋味。這馬想起來，特別懷念彼當時樸實的生活，厝邊隔壁的感情好甲剝袂離。

　　大漢了後才知影，原來麵粉酥干焦佇有人嫁娶抑是廟裡大拜拜的時才會出現，莫怪細漢的時陣，想欲食一喙麵粉酥，就愛看時看日。早期臺灣社會誠注重廟寺的文化，佇元宵節彼跤兜會有「乞龜」的儀式。佇廟埕看著大大細細的麵粉酥龜，是足四常的代誌。信眾會跋桮向神明請示，若有象桮才會當共龜請轉去。毋過時代的變化真緊，做麵粉酥的老功夫聊聊仔失傳，這馬真僫得看著矣。

　　頂擺轉去臺南，經過一間有歷史的糕仔餅店，目睭無意中影著麵粉酥做的素三牲，彼種厝邊頭尾燒唿唿閣甜粅粅的懷念隨對心肝頭濆出來，歡頭喜面趕緊共買來食。口味猶原酥酥脆脆、甜甜芳芳，是我的記持內底彼種古早味無毋著！

　　向頭看著囥佇桌仔頂零零星星的麵粉酥，我的心肝穎仔煞有一種講袂出來的悲傷。(TOP)

 

07阿母的愛心　　李燕樵

　　出外已經三十外冬囉，自我做查某囡仔到今，已經是五十捅歲的人矣。毋管我幾歲，阿母變甲有偌老，每一擺轉去厝裡，伊攏會輕聲細說問我講：「我來煎卵予你食好無？」

　　阿母對我這个國中拄出業，猶未完全轉大人的囡仔就家己一个人，孤鳥插人群去臺北食頭路，趁錢閣兼讀冊，心肝底一直感覺毋甘，對我有虧欠，總是欲想辦法彌補。

　　彼是生活較艱苦的年代，查某人生囝做月內才有通食著的料理。對一个做老母的人來講，就是疼惜查某囝上好的禮物。

　　先共鴨卵一粒一粒敲落去鼎底煎，紲落去囥幾塊仔桔餅抑是補血的龍眼乾肉，閣摻一屑仔糖，淋淡薄仔米酒小滾一下。起鼎進前才閣囥一寡仔九層塔佮味，就成做一路芳氣十足，好食閣好看的營養食食。

　　因為每一擺轉去攏無固定時間，阿母無法度共九層塔先攢便聽候，逐擺攏是佇阿母欲開始煎卵的時，我才行去隔壁阿嬸的圍牆仔跤，揣濫佇雜草內底，彼欉細細欉仔閣毋成樣的九層塔。佇伊的身軀頂，捻幾葉仔新穎，翻頭趕緊洗洗咧就對鼎底掖落去，阿母彼出好食閣芳氣十足的愛心料理就完成矣！

　　頂一擺佇阿嬸兜的牆仔跤，仙揣嘛揣無九層塔的影跡。雙手空空倒轉來，我共阿母唸講：「唉！挽無真無彩，好滋味就欠九層塔這一味。」阿母聽我按呢講就共我安慰講，食九層塔拍呃會有䆀味，無摻嘛無要緊。

　　有一擺風颱過了後，我轉去巡巡看看咧，阿母又閣起鼎開始欲煎卵矣。伊叫我去灶跤後壁彼坵菜園仔挽九層塔，規欉發甲旺旺旺、青ling-ling。阿母講，街仔阿姆兜的花坩內底生幾若欉，想講你愛食九層塔，就共伊伻一欉轉來種，想袂到這馬會發甲遮好。

　　做風颱的時，透大風、做大水，菜園仔內一股一股的菜蔬毋是蔫脯脯，欲死盪幌，就是賰無半項。干焦賰彼欉九層塔，伊骨頭真硬插閣徛騰騰佇邊仔角，一點仔都無礙著。

　　阮阿母的愛心，較強過風颱、硬過大水，一心一意養飼伊心愛的囝兒啊！(TOP)

 

08囡仔時代　　辜玲瑩

　　阿樹伯仔對菜園仔挽一寡青菜佮菜瓜轉來，夯椅頭仔坐落來那揀菜那想起往過細漢的時。才四年的爾爾，阿樹仔兜離學校四、五公里遠，逐工中晝欲食晝的時，因為彼時陣學校無營養午餐嘛無便當通食，逐个囡仔攏愛轉去厝裡食飽才閣去學校上課。

　　中晝欲轉去愛行過打馬膠路、石頭仔路佮塗沙仔路。彼當陣佇庄跤逐家攏誠散赤，無鞋通穿。熱天時，毋管行佇佗一種路，阿樹仔無穿鞋的跤底，予曝甲燒燙燙的塗跤燙甲𧿳𧿳跳。歹運的時閣會予刺仔抑是尖尖的石頭仔鑿著，喙齒根咬咧，嘛著那哀那跳倒轉去；寒天時，穿兩領薄薄的長䘼，規身軀寒甲gi̍h-gi̍h顫，跤予霜風凍甲全全是必痕和破空。褪赤跤行佇冰冷、砧砧的石頭仔路，彼是疼入骨髓。

　　逐擺阿樹仔轉到厝，面對冷冷清清的厝，阿爸、阿母攏出外去作穡，到暗才會轉來。阿公腦充血，倒佇眠床幾若冬囉。阿樹仔趕緊用細口灶起火，共凊飯熥熥咧，凊彩炒一盤菜。貯一碗飯菜，捀去飼阿公。阿公食飯較僫、吞著誠慢，阿樹仔急甲一直叫阿公較緊咧。一碗飯飼好，阿樹仔也家己凊彩扒一碗，起跤就走，趕欲轉去上課。

　　去到學校當然嘛是袂赴矣。照規矩，上課的時間傷慢入教室的，就會予老師罰「夯椅仔枷」。逐擺阿樹仔兇兇狂狂走入去教室，就自動恬恬仔共椅仔夯咧，行去教室後面跪落。有一工老師叫伊免跪，轉去坐咧上課，原來老師已經知影伊袂赴上課的原因矣。自彼擺開始就無閣予老師罰「夯椅仔枷」囉。

　　阿樹伯仔感覺往過是農業社會，家己食過遐濟苦就是冊讀無濟、條件無好所致。這馬時代進步，逐家學歷提高，毋過時機煞愈來愈䆀，想欲順利、平安佇社會上徛起並無簡單。這馬的少年囡仔誠好命，食好做輕可閣𠢕比並，敢是好命過頭矣？佳哉孫阿強仔猶教會行，伊想欲栽培囡仔有智識閣𠢕做工課，粗的、幼的齊會曉，就免煩惱後日仔路是彎的抑是直的矣。(TOP)

 

09我咧揣我拍毋見的物仔　　簡惠英

　　阿母嫌我做代誌無攬無拈、拖拖沙沙，規工四界遨。「阿英！狗仔、貓仔拍毋見，會當揣倒轉來，毋過你拍毋見的是永遠都揣袂轉來的。」阿母咧講啥？我聽攏無。「你透早出門，放學轉到厝，就蝹佇眠床頂耍手機仔，耍到三更半暝。功課無照起工，老師看著你就幌頭。你講看覓，對天光到暗時，你有啥物代誌予人呵咾著？」我頭犁犁，毋敢應話。

　　四箍輾轉恬喌喌，壁頂的時鐘「tah、tah、tah」的聲予我掣一趒。「阿母！我知影矣，我拍毋見的是時間。」時間無聲無說，一伐一伐行，永遠袂翻頭。伊講逐工予我二四點鐘，袂較加嘛袂較減。二四點鐘隨在我用，伊攏袂管我。我那食飯那耍手機仔，伊就對手機仔迒過去；我覆佇桌頂睏甲鼾鼾叫，伊就對我的目睭皮軁過去；我咧𨑨迌，伊袂像阮阿母纏牢牢、踅踅唸，功課凊彩撇撇咧嘛無要緊。我暢甲一直耍、一直耍，我是孫悟空，日子過甲逍遙自在。

　　今仔日分成績單，我連紲三擺規張紅記記。阿母共我叫去伊面頭前，伊講出名的企業家嚴長壽先生，少年的時捌佇一間公司送文件。伊逐工冗早一點鐘去公司，共所有的物件斟酌分類，閣共送件的路線撨好勢，按呢予伊真緊就共工課做煞。英國的莎士比亞，十二歲的時佇戲園做服務生，伊共人客佮人客騎的馬安搭好勢了後，就對門縫學戲齣。你想袂到乎？伊是對遮開始，成做一个世界出名的戲劇家。

　　少年袂曉想，食老毋成樣。對這馬開始，我欲綴的跤步行。頭一步，我逐工愛寫一張行程表，做了的用筆刣掉，無做的愛補甲到。紲落來，頭一暝就愛共隔轉工欲用的物件、愛交的作業攏攢好勢。上落尾我愛共冊揹仔窮予清氣，物件隨項仔隨項疊好勢，袂使烏白抨、烏白櫼。

　　時間恬恬仔共我教示，伊親像弓仔，會當搝長長，嘛會當勼短短。伊毋捌覕起來，伊一直徛佇遐，是我家己共伊放捒。伊教我講逐工共細項代誌做予好，就是成功的人。(TOP)

 

10泅過日月潭　　蔡天享

　　有人講咱蹛佇臺灣，有三項一定愛做的代誌：玉山、騎鐵馬踅臺灣佮泅過日月潭。我平常時有佇游泳池咧泅水，就興𩑾𩑾報名欲去泅日月潭，尾仔才知影這毋但身體愛勇健，閣愛有勇氣佮堅持。

　　會記得彼時倚中秋，天拄拍殕仔光就起床，外口涼冷仔涼冷。沿路有看見成十歲的細漢囡仔，嘛有七八十歲的老阿伯，隨人攏歡頭喜面，誠好鬥陣，互相喝講：「催落去！」紲落來兩萬人佇水墘排列，一逝仔一逝順序tőm、tőm跳落水。人人頭戴水紅仔色的泅水帽仔，佇水裡浮咧沉咧，誠成冬節的時，阮母仔佇大鼎內底咧烰的紅圓仔。

　　我靠勢有練泅規冬矣，聽好「年頭飼雞栽，年尾做月內」，一聲就跳落水。雄雄想著跤底的潭水，有六層樓仔遐爾深，一時煞跤麻手軟，踢無水嘛掰無路。我親像是薛丁山去予樊梨花的捆仙索縛牢咧仝款，袂振袂動，身軀一直沉落去，強欲予海龍王招去做囝婿。尾仔規氣心情放輕鬆，毋管是田蛤仔泅，抑是死囡仔䖙，雙手扶佇咧浮枋，用跤沓沓仔踢，沿水路欣賞日月潭的風景佮四箍輾轉的人。

　　來泅水的有朋友鬥陣，抑是規家伙仔相招來的，嘛有公司行號頭家招辛勞來的。上特殊的是一个二十外歲，欠跤缺手的查某囡仔。聽講伊細漢的時發燒引起敗血症，為著欲活命，醫生共伊跤佮手的頭前橛切斷。今都無跤捗、手捗，是欲按怎掰水咧？伊毋願放棄，堅持講好好人會當做的代誌，伊嘛欲做甲到。伊用各樣的跤手，勻聊仔共家己的身軀捒進前，毋但證明伊有才調，嘛鼓勵像我這款半上路下的人，愛有頭有尾。

　　這改有一百六十六个人泅無了，有的是半中途頭眩艱苦，抑是予水蟲咬著傷，嘛有的是氣力無夠煞放棄，換坐救生船離開。我泅甲糾筋兼牚腿，佇茫茫的水湧頂懸，強欲泅袂透這三公里的水路。毋過倚靠平常時操練的耐力和堅持到底的勇氣，煞尾有提著泅過日月潭的證書。我毋但是泅過日月潭，閣是泅有過的人！(TOP)