台灣閩南語的文讀音、白話音的辨別序

 2010

04131940台灣閩南語的文讀音、白話音的辨別序

493心路篇

序

已經袂記得這个檔案是當時做的，為著佗一場的演講來寫的稿矣。

今仔日，咧看較早的檔案，去看著這个檔案的名，就共開起來看覓咧。看電腦的記錄，是佇2000.01.21開始做的。最後存檔的時間是2002.07.21。一般這个時間一定是我交演講稿的講義的時間。

看情形，應該是佇我寫〈來講文讀音〉的文章了後，為著演講稿的主題才加入白話音的部分，然後，就共扮仙的部分搬去後壁。

講實在的，我嘛是會當按呢去臆耳耳_{[今作爾爾]}，因為真正攏無印象矣。

既然，今仔日去看著這个檔案。又閣會曉共內容送來blog，就順紲共伊送起來blog。

好佳哉，經過這兩禮拜耍超連結，對超連結嘛加足熟手矣。所以，經過兩點鐘左右的時間就共這个小冊的超連結做好矣。

這个目錄是維持著講義的原來目錄，後半段〈來講文讀音〉的部分就連結到原本已經送上網的〈來講文讀音〉的內容。所以，會發現著文章和目錄的順序有淡薄仔無仝款。

其實，對母語使用者來講，文白音是自動轉換的，根本就毋知影家己講的音佗一字是文音，佗一字是白話音。只不過是三不五時仔，會去拄著人問我講文白音欲按怎分。為著簡單，我干焦會講：「你若感覺佗一个音較倚華語的音就是文讀音。」當然，這个講法是簡化足濟的。有一寡音用這條規則來看，就會毋著。

無論按怎，文白音的分辨攏是對台語有淡薄仔研究的人才會想欲知的代誌，一般的人，根本就連想就毋捌去想過。

就按呢，隨意寫幾句也。做這个小冊的序。

(2010.04.13)(TOP)

(繼續看落去)(轉去心路篇目錄) (轉去主目錄)