2012
05162021有拜有保庇
有拜有保庇
甲：（電音三太子）「（唱：保庇）保庇、保庇、保庇、保庇、保庇、保庇、保庇噢！保庇、保庇、保庇、保庇、保庇、保庇啊！啊！」
乙：三太子呢！人講：「有食補有行氣，有燒香就有保庇」，我最近無啥順序，緊來拜拜，求神明共我保庇！
（緊偎過去三太子的身軀邊）
乙：三太子也，我「有燒香」，你就「有保庇」，保庇我平安無代誌！
甲：（唱：你是我的兄弟）「愛情不如意就愛看予開，事業袂 順序重頭起，什麼問題--請汝講出喙，需要的時，我會幫助汝」！
乙：我最近代誌一攤過一攤，工課做攏袂煞，疲勞厭僐頭殼疼，緊張操煩心驚驚。
甲：看你遮爾有誠意，神明一定有保庇，燒金跋桮攏免費，抽一下仔靈籤看天公的指示！
乙：（對觀眾講）今仔有三太子幫我加持，降旨賜我免費的籤詩，連鞭閣欲共我開示，我哪會遮爾有福氣！
甲：「（唱：保庇）求籤詩，抽籤詩，有拜才會出頭天」！（請乙抽籤）
乙：（抽籤詩了後小看一下，才講予觀眾聽）這第一張籤詩講：「(自編)花開嘛無百日紅，命好嘛無一世人，隨時準備上穩當，拄著困難則輕鬆」！
甲：這張籤詩的意思是咧講：咱人的運勢是「三年一閏，好歹照輪」，「花無百日紅，人無千日好」！【「（唱）世間無永遠的富貴，嘛無永遠紅的花蕊」！】
乙：若按呢，阮是欲按怎才好？
甲：俗語講：「好天著存雨來糧」，拄著問題免煩憂，冗早準備就袂緊張，逐工嘛「翹跤捻喙鬚」！
乙：著啦！著啦！舊年的答喙鼓比賽，我就是無冗早準備，才會緊張徦半小死，今年欲比賽，我早就款起來「食凊飯，當等伊」。
甲：（閣提籤筒出來）來—你閣抽第二張籤詩！
乙：（抽籤詩了後小看一下，才講予觀眾聽）第二張籤詩講：「(自編)人生運命咱安排，扑拚奮鬥為將來，年尾若欲做月內，年頭就先飼雞栽」。
甲：哦！天公伯也的意思是咧講：「（唱：保庇）人的運途初步是注定，凡事就來詳細照步行，相信運命愛靠自己拚，會予咱成功。」
乙：你的意思敢是咧講：「運命是（唱）三分天註定，七分靠扑拚，愛拚才會贏」。？
甲：無毋著！咱做代誌就愛「一步一跤印」，只有「先苦後甜」，才會當「富貴萬年」。
乙：你是講：「有艱苦頭才有快活尾」，「年頭就愛飼雞栽，年尾才有通做月內」！這--我聽有啦！
甲：來—你猶閣有第三張籤詩咧！
乙：（抽籤詩了後小看一下，才講予觀眾聽）第三張籤詩是寫講：「(自編)掖種落栽為百年，養兵千日用一時，平常若有先準備，時時逍遙無代誌」。
甲：天公伯也的意思是咧講：「養兵千日，用在一時」，平日若是有準備，時時就快樂笑微微。
乙：你的意思是「（唱：保庇）想予利，想予利，做落才有好時機」！
甲：袂禾黑 哦，我「講話頭」，你就「知話尾」！
乙：原來是按哦！莫怪阮老師講：欲參加答喙鼓比賽袂漏氣，平時就愛扑拚練習、用心準備，若無，等徦上台的時恐驚就會漏氣。
甲&乙：著！著！著！所以講：「誒！（扑竹板）燒香拜拜有保庇，籤詩加持看智慧，萬事扑拚先準備，解破運命靠家己啊靠-家-己。」
(轉去主目錄)
沒有留言:
張貼留言