2010
12051958離職記----極短篇小說: 原作 師安; 夢生 譯
姿娟也(--a7)來到公司，卡拍煞拄好九點。攏嘛是因為佇半路，雅文也堅持斡倒轉去蹛的所在提隱形目鏡，毋才會舞甲匆匆碰碰，閣差一塊仔就傷晏(uann3)到矣。
佇電梯裡，伊有淡薄仔怨慼(tsheh)咧共雅文也講：「好佳哉！」
一入去辦公室，看著伊，逐家人的面攏無表情。上奇怪的是玉琪竟然坐佇伊的位，辦起業務來矣。伊行去邊仔，面仔笑笑講：「玉琪也……」伊心肝頭想講玉琪也應該是知影意思矣!?
啥知對方干焦共頭敧(khi)一下，共伊看一下，攏無應話，繼續做手頭的工課。
「起來!!我欲整理物件。」姿娟也規氣佮伊講明的。
「我敢無共你的物件攏囥佇遐矣？」玉琪也指(ki2)對桌仔邊的紙箱仔去，話講甲歹衝衝(tshing3)。
「這是我的位。」姿娟也擋袂牢矣。
「都攏最後一工矣，敢講你是欲共我講你猶有業務猶未做完？」
自這个查某囡仔入這間公司以來，姿娟也就特別照顧伊，同事嘛攏以師徒共in稱呼。平常時乖乖仔巧巧仔，想袂到今仔日會遮爾仔聳(tshang3)鬚。「你……」姿娟也氣甲手指(ki2)玉琪也，煞講無話。
攑頭看一下仔經理。經理雙手褫(thi2)開，做出無奈的表情。
「來，來，來……」漢祥也對雜貨仔間攑(giah8)出來一條(liau5)塑膠椅仔，囥(khng3)佇桌仔邊共伊講：「你就委屈一下仔！坐遮整理嘛仝款。」這應該是到今為止，姿娟也所拄著的，上有人情味的待遇矣。
「著啦，橫直是最後一工矣。」閣有人出聲矣。
經理嘛開喙矣：「你今仔日橫直都無啥代誌，哪著計較遐濟咧？那个位玉琪也共我講幾若遍矣，你就念佇師徒的情份小讓伊一下。」
看著玉琪也彼款態度，閣看逐个同事攏咧開始無閒家己的工課，嘛無人欲閣插(tshap)伊矣。
姿娟也目屎忍(lun2)咧，凊彩共伊的物件貯(te2)入去紙箱仔底，了後氣掣掣(tshuah)走來茶水間。
雅文也趕緊綴去……
誠無簡單，下班矣。兩个人轉來到蹛的所在，姿娟也面漚(au3)面臭坐佇膨椅頂。
「猶咧受氣？」雅文也捀(phang5)予伊一杯水。安慰伊講：「煞煞去矣啦，橫直閣來也(a7)見袂著面矣啦。毋過，遮的人嘛傷過份矣啦，你普通時仔佮逐个攏鬥陣了袂bai2，欲走矣，逐个煞連一點仔表示都無，有夠無人情味的。」停幾若秒鐘了後閣紲(sua3)落去講：「小整理一下，咱來去食飯。雖然以後猶會『同居』，抑是請你食一頓仔飯咧，當做相辭，嘛慶祝你揣著較好的頭路。」
「你去，我食袂落去。」看會出來姿娟也的氣猶未消。
「哎喲，哪著想袂開咧？飯猶是愛食啊。」看姿娟也攏無應話，雅文也就閣紲咧講：「你哪會使揣我出水？哪著創這款歹面腔(tshiunn)予我這个無辜的人看？行啦，行啦……」雅文也半強迫咧共伊搝(giu2)起來……
服務生共in tshua7來到一間包廂。門一開開，辦公室的人齊(tsiau5)齊到位，攏坐佇位裡等in。看in入來，就是一陣熱烈的拍噗仔聲。壁頂閣掛大大大的「你共我記咧」五字。
「你，恁……」姿娟也有淡薄仔控制袂牢。
玉琪也做頭一个徛(khia7)起來共伊攬咧：「阿娟姐也，我毋甘你走。」
姿娟仔輕輕仔搭(tah)伊的尻脊骿共伊安慰講：「我嘛毋甘恁啊。」
這擺，伊的目屎真正是擋袂牢矣。(字數1134)原作品欣賞
2010-12-06 10:14:17劉志祥老師 email給劉志祥老師 前往劉志祥老師的日誌
