2010
03312108後記的後記
168上網心得篇
今仔日上網，看幾篇仔我家己較早寫的物件，心內有一寡感慨，就順紲佇文章的後壁寫回應。
寫一篇了後，想著回應一般看袂著，愛特別去點入去看才看會著，所以就共伊改做文章的後記。
結果，我發現著blog顯示的時間毋是上新的時間，是分類的時間，所以毋知影文章送起來的時間和更新的時間是佇當時。
我的慣勢攏會佇文章的後面拍上寫作的日期。 普通時仔，我攏罕得閣還頭看我家己寫的物件，劇加是開檔案，使用文件引導模式的時會去看著文章的標題。
就因為寫後記，才會發現系統的時間有淡薄仔會予人誤會。因為我是今仔日才寫後記的，系統無顯示文章更新的時間，若看我的後記的時間，一定會叫是我去拍了毋著時間去，塔有可能後記的時間是寫佇文章送起來的後壁。
無毋著, 無毋著, 後記的時間是正確的。
我的文章大部分已經攏是十幾冬前寫的，咱有一句話講：「話是風，筆是踪。」若無遮的文章和日期，經過遮久的時間，其實，我完全對遮的文章無偌濟印象矣。甚至完全想袂起來我捌寫過的內容。有當時仔，無啥敢相信，遮的物件是我家己寫的。
自從無啥寫文章了後，這六、七冬來的生活，佇腦海中就親像空白的仝款，會記得的代誌無幾項。希望這个部落格的物件袂足緊無去。因為，我以後賰的物件可能就是遮的文章通仔做回憶耳耳。
2010.03.31
沒有留言:
張貼留言