2010
03291947進步矣
昨昏耍超連結耍一工
原本袂曉插圖
意外順利完成
所以
共原本無法度插圖的文章
共造字和母音圖安插好勢
雖然
我足反對造字
毋過
文章內底有講著
為著正確顯示所舉的例
攏總一字一字去用起去
佳哉
這馬網路足方便
有一寡會使用教育部現成的造字圖
了後
發現註解無夠理想
原來
是超連結出問題
發現問題了後
開始研究佮試驗
一遍、兩遍、三遍
一遍過一遍試驗佮改進
結果
臺灣閩南語書寫文字講解與寫作這篇文章
做了十外點鐘的時間
雖然猶未到100%的滿意
目錄的連結猶有缺點
至少
我已經完全會曉用超連結的方式
會當予讀者方便來回看註解和文章的內容
因為有目錄
嘛會使隨意跳欲看的內容
最後
我想我會共文章補一寡序
用來紀錄十幾冬前寫遮的物件的想法
畢竟
遮的物件是我過去的心血
唯一會當證明我捌做過遮的代誌
其實
日子一工過一工
若無遮的物件
真正完全袂記得我捌寫過遮的用字
我想
當初時的熱忱是200%
這馬我的熱忱賰無30%
校對
是永遠做袂完的
較早認為無錯字
這馬嘛是加減會去看著
親像講話拍成講會, 啥麼拍成啥嘛
用字
佇過去台語文的論戰時代
一人寫一款
當然
我嘛有我的想法
我的想法變成我的用字風格
這馬
教育部已經有網路的常用詞辭典通用
因為
我的文章是寫佇部定用字進前
用字的出入是我原本的風格
自歷史的觀點
我用字比教育部早
猶有教育部用字早期和這馬其實無仝款
佇我的文章內顛倒有保留著教育部的早期用字
問我的立場
我是母語使用者更加是文字的使用者
較早
我會反對用語感無法度接受的字
毋過
自從讀文字學和說文解字了後
就像我彼篇愛著甲骨文所寫的
每一个朝代用字攏無仝
形變音變意變
語感就會綴咧變
所以
這馬的我
不管教育部的用字
是毋是有一寡字是我完全無法度接受的
我攏完全採用
按呢
變成
我有袂少字愛重新學習
學習、學習閣再學習
我毋是咧扶教育部
只不過希望
逐个人寫台語文的用字
會當早日統一
莫去排斥部定的用字
問題是
造字的部分足麻煩
電腦無字閣拍袂出來
用拼音字上好解決
假使
有完全反對用拼音字的人
按呢
就愛會曉家己掠造字圖
了工了時去好好仔處理就好矣
橫直
這馬的電腦和網路足方便
隨身碟毋驚你的檔案有偌大
一切攏有佇咧進步
嘛希望逐家攏是一直咧進步
您真的很有研究精神，感覺是東方不敗，任何事情都難不倒您ㄝ!
祝您假日愉快喔!
我袂曉的代誌足濟, 會袂的物件嘛是有夠家己用爾爾, 多謝你的呵咾. 有閒我會閣去你遐看看咧:)