2010
12112152挽----極短篇小說: 原作 帥安; 夢生 譯
暗時，余先生去買一寡phang2，準備欲做規家伙仔的早頓。行到暗暝摸的巷仔的時，邊仔雄雄閃出來一个少年家仔，共伊喝(huah)講：「毋……莫(mai3)振動，共錢提……提出來！」手裡的水果刀予月光炤(tshio7)著，有淡薄仔咧爍(sih)冷吱吱的光。
少年人攑(giah8)刀仔的手咧咇咇掣(phih8-phih8-tshuah)，余先生寬寬仔共伊講：「你聽我講，第一，你走袂去。若準我大聲喝(huah)救命，你想，敢袂有人來逐你？攑刀仔搶劫是會食重罪的喔，到時陣，就算講干焦(kan-na7)共你關一工，這个烏點攏會共你綴(tue3)一世人。第二，就準講予你走會去，按呢愈害，這款做歹代誌的陰影嘛會共你綴一世人，你嘛有可能自按呢愈做愈大條，仙救嘛救袂轉來。」
少年人的刀仔沓沓仔(tauh8-tauh8-a2)放落來矣。
「來，共刀仔予我。」余先生伸一肢手出來共刀仔接過來，另外一手共規袋仔的phang2送到少年人的面頭前，共伊問講：「腹肚枵(iau)矣乎(honnh)？」
少年人略仔張持一下共一塊phang2提出來，足緊就食完矣。余先生有淡薄仔問伊的意思講：「閣來一塊？」
等少年人共第二塊phang2食完了後，余先生就問伊講：「頭一擺？」
少年人頕(tam3)一下仔頭。過一下仔，用足細聲的話講：「阮阿母破病矣，我……」
「按呢嘛袂(be7)使犯法啊，你愛知影，困難早慢會度kuei3(過去)的。毋過，若是行毋著路去，欲回頭就較僫(oh)矣。」余先生共伊的話拍斷去，用足嚴厲的話共伊教示。
少年人又閣頕頭，表示有虛心受教(ka3)。余先生講：「你應該猶閣咧讀冊的款？」
「嗯……」
余先生又閣恢復溫馴(sun5)的目色，輕輕仔搭少年人的肩胛頭講：「你專心仔讀冊！錢的代誌，我才來想辦法，看會當共你鬥相共袂？」
「你真正願意共我鬥相共？」少年人的目睭咧閃爍出希望佮感激透濫(lam7)做伙的光。
余先生文文仔笑講：「實際上，我一直攏佇咧共你鬥相共。」看少年人的面腔(tshiunn)掛一个大問號，伊紲(sua3)luei9(落去)講：「我是市警局一粒一(it-liap8-it)的教官，專長是擒拿術(khim5-na2-sut8)佮空手奪刀！」(字數724)原作品欣賞
回應
但願真實的世界...有這款仁心的人佮肯受教的少年家