2010
06231952點歌
原來欲點歌予人嘛愛費袂少的心神。
這禮拜，囡仔欲畢業矣，想講我也無啥貨通仔送予in。拄好，最近學會曉Youtube揣歌的方式。
講著學會曉揣歌是無張無持去人的網頁發現的。耍一睏仔了後就會足熟的矣。
一開始，知影歌名的較好辦。揣一下仔就有矣。毋過，若是資料足濟的就歹講矣。甚至揣一暝就揣無佮意的。
點歌，干焦一个人一个影片，無其他的選擇，一時仔就解決矣。
歌名仝的，無仝人唱的，感覺就無仝，所以，每一條攏愛去聽。聽咱佮意的來揀。
有當時仔，仝人唱的，影片無仝，嘛是愛事先看影片的內容，對內底揀咱看上(siong7)上目的(tsiunn7-bak8--e5)。
有時陣，影片看有上目，毋過，字幕的字傷霧抑是傷細字，只好放棄，重揀另外一片。
點英語歌上麻煩，大部分的影片攏無字幕，就閣愛另外揣歌詞過來。
上恐怖的是英語歌El Condor Pasa(覓鴞的歌)，竟然有34250个，想欲揣有歌詞的影片，實在足僫揣的。無簡單去揣著一个有字幕的，毋過，感覺影片無適合囡仔來看，只好放棄。揣一暝了後的結果猶是維持上原本揣的彼个影片。了後，想著網友有做一个無仝風格的覓鴞的歌。最後有揣著，毋過，發現伊揀的片我攏有看過矣。三萬外的片，看三、四百片了後就放棄矣。
歌選好了後，閣來就是網頁的編排問題。想欲予看的人順手好用，就閣做來來回回的超連結指令。調整所有影片的大細等等。
做好矣了後，愛閣試所有的超連結有正常無。走毋著位去的就愛修改過來。總講一句，就是愛予所有的一切攏足正常的。至少愛先予家己看了有滿意才會當算做好矣。
按呢，做一个檔案，十幾條歌爾爾，就愛用超過兩工的時間。莫怪，去網友遐，一般攏是連結一條歌爾爾。因為，為著欲連結彼條歌，網友毋知佇背後用偌濟苦心是咱毋知的。嘛莫怪，聽網友點的歌和看影片攏會感覺是一款的享受。無定著，彼條歌佮影片是伊對百外的甚至是千外的影片佮音樂內底揀出來的。
點歌背後的心血是咱看袂著的，後遍去人遐干焦看著一條歌抑是一个影片的時，愛感謝網頁主人的用心，是伊替咱先共無愛的物件先聽過、先看過才共上好的囥佇伊的網頁，予咱來共同欣賞音樂的媠佮影片的精彩。
2010-06-29 22:34:39樂泊黛 email給樂泊黛 前往樂泊黛的日誌
