2010
07242035中999的心情
耍blog的人加減攏會佇別人的blog看著中著999的處理方式。家己毋捌拄著就毋知影啥物是999。
第一遍看著999的訊息是佇一个叫做星夜天空的blog看著的，彼時陣，我拄開始耍blog，佇伊的首頁有一个訊息講伊若足久無共網友回應消息就是去中著999。我根本就毋知影999是啥物！
了後，嘛去看著人問888。我問網友講888是啥物？伊講佮999差不多是仝款的物件。
了後，去囡仔的blog留話，煞送未出去，一直出現一个訊息，代號是888，我彼時陣根本就無看著代號888。連紲幾若工送話，情形攏仝款。去別人的blog看著888的解法，才想起送話的時有影著代號是888。唉！只好放棄留話予囡仔。
頂禮拜，發現台灣A水共我講伊的blog中著999，攏袂使振動。我感覺奇怪，我明明拄留話予伊爾，一切攏正常，是按怎換伊用就攏袂振袂動。
這禮拜拜四暗時teh欲八點的時，換我去中著999。偏偏就佇我欲做上尾一遍送修改我家己的網頁目錄連結內底健康帖仔後壁加四字(有92帖)。共發表文章揤(tshih8)落去。先閃過一下畫面，了後講無法度處理我的要求，試足濟遍攏仝款。送到尾仔去看著閃過的畫面有999，我才知影，原來逐个咧講的999就是這款情形。
我就隨去網路揣破解的方法，步數嘛照做矣。攏無效，換另外一台電腦嘛無效。害我啥物代誌攏袂使閣做矣。只好乖乖仔等六點鐘過以後的自動解除。
經過這幾個月的經驗，我知影矣。有888的所在，佇留話的時袂當用任何有網址的資料，干焦會當純文字的形式來留話。欲預防999就袂使佇短時間內底做傷濟檔案，我進前做的檔案數可能拄好攏佇999的限制範圍內，若閣加做兩个檔案就會著著999。因為拜四彼工我干焦修改我家己原本有的網頁，攏無新增網頁，就是攏無發表新文章。因為做超連結相連紲開足濟最近兩禮拜新發表的文章來修改。拄好佇做最後一个的時去啟動999。唉~~！速度傷過猛嘛袂使。其實，999的目的是欲阻止咱佇短時間內去足濟所在留話佮做回應，抑是去人遐四界khok文章轉來發表。
中著999了後，害我昨佮今仔日做教育部電子報的《臺灣閩南語我嘛會》的時攏會足驚又閣去著著999。
我看，有一工，我欲來做實驗，仝一篇文章佇連續快速修改到第幾遍的時會去啟動999。若無用清楚一定會閣去中999。就像阿吉仔留話講的仝款，999足捷去揣伊。
哇就是再把96個情人花束更改發文~~~~ㄚ9999999