2010
11131104啥較厲害
223心路篇
仝一項代誌，綴時間的無仝，看法嘛會有改變。
彼是發生佇我高一的時陣的代誌。
就佮普通時仔放學的時陣仝款。一下課，我佮阮表小弟兩个人就若拍火隊仝款，速度趕足緊行來到車站等車。普通時仔，阮會看時間來決定阮欲等的車站是吳鳯北路站、噴水站抑是總站。
噴水站就佇公明路的開基古廟頭前。面向公明路，佇車站倒手爿有一條小條巷仔，巷仔狹(eh8)，普通時仔有oo-to2-bai2出出入入趡(nng3)巷仔。
彼工，當咧等車。巷仔口一台oo-to2-bai2騎出來，另外一台欲騎入去，兩台相閃車。這个時陣，雄雄有一个少年兄，凶煞煞，按噴水(在地人叫桃仔尾)的方向騎過來，硬死欲趡縫(phang7)衝過來，害彼兩台相閃車的姊姊趕緊擋車，少年兄峇(ba7)拄峇騎 S 形平安騎過。彼時陣的我，看甲楞(gang7)去，足佩服少年兄的騎車技術(ki7-sut8)實在有夠厲害，竟然有法度趡過遐細縫平安騎過。
彼一幕，我到今(tann)猶會記得。
代誌經過遮爾濟冬，我猶會記得兩个姊姊緊急共車擋起來的時陣，同齊共少年兄睛(tshinn)的目神。足明顯的，in兩个人攏去予伊驚著。
這馬想想咧，是彼兩个姊姊較厲害。因為in緊急的反應予in逢凶化吉。彼个時間點是用0.1秒來計算的，小遲宕(tong7)著，欲入巷仔的姊姊就會挵(long3)著少年的後輪(lian2)；欲出巷仔的姊姊就會挵著少年的前輪。
所以，總講一句，少年兄是共家己置身佇險境，根本就是莽夫(bong2-hu)一个，伊會當平安趡過車縫，毋是伊騎oo-to2-bai2的技術(ki7-sut8)gau5，是彼兩个姊姊會曉知影逢凶化吉，講起來是in兩个較厲害才著。恁逐个講看覓咧，敢毋是按呢？(580字,開52分鐘)
回應
2010-11-15 11:08:09LOVE email給LOVE 前往LOVE的日誌
