2011
04302211逐家攏是模範生
逐家攏是模範生
伶俐：四月初四兒童節
聰明：彼工算咱上飄撇
伶俐：毋免抹粉點胭脂
聰明：嘴笑目笑就古錐
伶俐：文武全才好名聲
聰明：阮是快樂的囡仔囝
聰明、伶俐上台行禮
伶俐：我講「彼个伊啊」！
聰明：是欲「奕啥」？
伶俐：我是咧叫你。
聰明：歹勢！佇這個場面愛叫我的名！
伶俐： 唅？叫你的名？
聰明：是啊！我是頂港有名聲、下港有出名的--。
伶俐：北港六呎四！
聰明：你才咧「鐵牛運功散」！
伶俐：敨中氣、通筋脈。
聰明：服務信箱請寄：流目油、流目油、流目油、電鍋、電火、電冰箱
伶俐：喂！電著啊啦！較定著咧！
聰明：喔！我是大名頂頂，通台灣攏捌的-「小明」。
伶俐：大名頂頂？我看你是頭殼tīng-ting！
聰明：你共我這粒烏珍珠當做鳥鼠屎。
伶俐：嗯！一垺蓋大垺！
聰明：你共我看殕殕！相當我佇學校原若是「模-範-生」
伶俐： 唅？？
聰明：--的-候-選-人。
伶俐：我講嘛！「三下咬、無見餡」，若有可能？
聰明：啥物！
伶俐：一粒包子咬三喙，猶無看到內底的餡，咧講你--無內才啦。
聰明：你這馬是咧「欺負爛塗無刺」喔！
伶俐：我足驚！好啦！親情五十、朋友六十，莫計較啦！
聰明：好啦！朋友欲做伙，著愛佮人誠懇鬥陣！
伶俐： 唅？欲做朋友著愛「先睏鬥陣」喔！
聰明：喔！「誠懇鬥陣」，是佮人鬥陣，態度愛誠懇、莫計較。
伶俐：喔！失禮失禮！是講--聽起來差不多。
聰明：若是差不多，「醬料」嘛會當做「醫科」。
伶俐： 嗯--你的學問誠「粗飽」。
聰明： 唅？若欲「粗飽」免學問，攑一支箠仔就誠有賰。
伶俐：多謝指教！是講我嘛想欲做模-範-生。
聰明：「有心拍石石會揻」「無心擔土袂做堆」。好啦！阿明師的撇步傳予你。
伶俐：是講-你就選無牢，啊你的撇步敢有效？
聰明：時機袂到，毋是師父無gâu。
伶俐：按呢講來做參考。
聰明：一緣、二賢、三媠、四「siáu-liàn」（笑臉-台灣華語腔）
伶俐： 啊？這馬是欲相親喔！
聰明：啥物相親！你看！「一緣」，遐的模範生是毋是攏誠有人緣，佮我平古錐。
伶俐：嗯--毋捌看過遐古錐的鳥鼠屎！
聰明：你是來亂的喔！按若講著「賢」--
伶俐：是毋是愛有「許世賢」的「賢」？
聰明：免啦！人，無百面gâu，荏荏馬若有一步踢，按呢就講會過啦！
伶俐：按呢我知，「衫媠」就是講-衫愛穿予媠媠媠。
聰明：我聽你咧放—
伶俐：風吹！。
聰明：三媠！是愛有好喙媠，捌禮數、會招呼，毋是穿媠杉啦。
伶俐：衫媠變喙媠，算你gâu翻話！
聰明：「gâu 番話」？明明我就講台語，若會變作--
伶俐：囡仔人有耳無喙，定定較袂出代誌。
聰明：你若阮兜的阿媽！
伶俐： 「阿-媽」？人講「食老無路用」，所以模範生著愛揀少年耶！
聰明：「老的老步定」，你敢講老的無路用，較亭仔著愛吃恁阿公的柺頭餔！
伶俐：啊你不是說愛「少年」？
聰明：歹勢！我是說對人毋通像「春天」。
伶俐：「春天」？我知！「春天後母面」，連鞭燒滾滾、連鞭交懍恂
聰明：嗯！有讀冊的喔！
伶俐：你毋是講荏荏馬嘛愛有一步踢！
聰明： Hennh！踢了袂bái！
伶俐：你有影共我當做馬喔。
聰明：莫受氣！欲做模範生是愛有「siáu-liàn」喔！
伶俐：原來毋是「少年」是「siáu-liàn」。
聰明：食飽講笑談，心情輕鬆拍拉涼。
伶俐：聽起來，欲做模範生蓋簡單。
聰明：一屑仔都無困難。總講一句：戲棚下企久—你的
伶俐：若準拄到「歹戲拖棚」，是欲等到佇當時！
聰明：莫緊張！只要咱--
伶俐：禮貌周到好品行
聰明：熱心服務受歡迎
伶俐：上課專心坐予牢
聰明：對人毋通歹聲嗽
伶俐： 逐項行為做有夠
聰明：若按呢--
合.逐家攏是模範生
合.逐家攏是模範生
聰明、伶俐落台行禮
(轉去主目錄)
2011-05-23 16:10:47台語聞香 email給台語聞香 前往台語聞香的日誌
