2011
04302215有食有行氣，有燒香有保庇
有食有行氣，有燒香有保庇
甲：月考欲到啊，別人是十二月屎桶～盡拼，我看你那會涼勢啊涼勢
乙：我才無親像 干但會曉讀死冊，頭殼攏勿會曉轉踅，無親像我有撇步
甲：啥物撇步？你敢會使共我教
乙：當然嘛無問題！啥叫你是我的死忠兼換帖的。俗語講：「有食有行氣，有燒香有保庇」。阮兜見擺若有人欲考試，阮阿公攏會去善化的慶安宮拜文昌帝君。
甲：恁真正是近廟欺神呢。文昌廟都佇咱這跤兜爾，啊都走遐遠
乙：你真正毋是蹛佇巷仔內的，普通的文昌廟是服侍梓潼、關聖、孚佑、魁星佮朱衣攏總五文昌，慶安宮有六文昌閣加一仙公喔！
甲：我知我知；少年若無一擺戇，路邊若有有應公。是有求必應的有應公著無？
乙：有應公是一寡唐山過台灣的羅漢跤仔佮一寡無某無猴的人過身了後地方的人士共 起祠服伺，含文昌帝君有啥底代？
甲：啊無是佗一仙公？
乙：是咱台灣的孔子公叫做沈～
甲：啥物？原來孔子是姓沈毋是姓孔喔！
乙：你今仔日是耳空歇禮拜諾？連話都聽勿會清，是台灣的孔子公～沈光文
甲：台灣的孔子公姓沈？哦！我知我知一定是孔子的後嗣予姓沈的招，伊是沈皮孔骨著無？
乙：你莫豬舌咧搭馬鼻烏白亂臆，沈光文是佇鄭經的時代，佇目加溜教百姓漢學仔，毋才有人呵咾伊是台灣的孔子公
甲：目加溜？目加溜是佇艋舺諾？（甲佮乙舉香形）雖然毋是仝年仝月仝日生，向望會當仝年仝月仝日死
乙：你是電影看傷濟諾？毋是佇艋舺是台南的善化
甲：是講你上轎才欲縛跤，時到才欲抱佛跤敢有效？
乙：古早人咧講“未喙焦著先開井”阮阿媽佇我紅嬰仔的時著抱我去拜石頭公，保庇我頭殼 khong-khong、講話
勿會漏風、讀冊閣會精光
甲：咱台灣的神明公閣不止阿濟，我問你除了石頭公閣有啥物公上濟人拜？
乙：我想看覓咧…啊！阿公！逐口灶攏有阿公
甲：無彩你讀冊讀kah一菜籠，讀kah挐氅氅，我問你阿公敢是神明？是生理人初一、十五攏有咧拜的神
乙：hioh8！是田頭田尾土地公啦！（甲佮乙做伙唸）土地公，白目眉，無人請，家己來。好！換我考你
甲：做你考，我予你仙考都考未倒
乙：咱在地有佗一間廟咧拜狗仔？
甲：你莫毋擔輸贏凊彩講講咧，狗仔也有人咧拜hioh8？
乙：哼！我叫是你有外博，是十九公廟
甲：十九公廟？彼毋是咧拜十九个義民？
乙：佇清朝林爽文攻打諸羅城，十八个顧城門的兵仔佮一隻狗仔，拼死抵抗叛民，尾仔煞攏戰死，落尾才起祠共 服伺，安怎？知影我的利害啊乎？
甲：你是青盲貓去咬著死鳥鼠，我閣再問你啥物神跋輸筊是當龜？
乙：這毋較簡單是正跤踏蛇、倒跤踏龜的上帝公啊！
甲：下路頭迄間上帝公廟，佇4月18欲舉辦幌公鞦比賽，有食閣有掠，你敢有想欲去？
乙：好啊！毋閣愛等考試考煞。啊！我勿會當閣參你拉咧啊，我愛緊去拜拜保庇我考試考第一名
甲：你日時走拋拋，暗時點燈蠟是袂用得，阮阿母定講也著神也著人，咱抑是跤踏實地較實在
乙：你講了誠有理，無，等我拜拜了後著隨轉去讀冊
(轉去主目錄)
沒有留言:
張貼留言