2010
03092149傀儡尪仔--源流及造型 (譯自 蘇文雄 文)
傀儡戲佇中國文獻上真早就出現a，大約佇西漢便已經存在；傀儡，又稱「加禮」，上早叫做「窟礧」或「魁礧」，唐杜佑通典記載：「窟礧子，亦日魁礧子，作偶人以戲，善歌舞，本喪家之樂也，漢末始用之嘉會，今閭市盛行焉。」
tui這段文內底咱會當看出，佇漢代就有傀儡尪仔ｅ表演，本來是用來做喪事中ｅ儀式，到西漢末年嘛互人用佇喜事ｅ嘉會上表演，魏晉南北朝亦有傀儡ｅ發展，這個時期ｅ傀儡猶停佇表演雜耍或替主人勸賓客欴酒ｅ動作，一直到隋煬帝時，才將傀儡尪仔變成大規模ｅ戲玩。
傀儡戲佇台灣無像布袋戲赫呢受重視，主要是因為伊ｅ禁忌卡濟，親像講：未當用手去指戲尪仔，有身ｅ人及囝仔攏無適合觀賞，僅單佇新廟落成ｅ時愛請傀儡尪仔之鍾旭(圖一)來「開廟門出煞」，主要是將起廟時期侵入廟內賴咧毋走ｅ妖邪趕走，所以伊發展ｅ動力完全是來自宗教信仰，並無法度成為大眾娛樂ｅ劇齣，所以，形成了足大ｅ阻力。
台灣ｅ傀儡戲和布袋戲仝款嘛分為漳州和泉州兩大系統，目前佇宜蘭有「福龍軒」、「協福軒」及「新福軒」三個戲班，全部攏屬漳州系統。另外，泉州系統ｅ戲團攏集中佇南部，有「錦飛鳳」、「新錦福」、「萬福興」、「圍仔內大戲館」、「集福軒」等，其它佇台中、南投、雲林猶有真濟「職餘」性質ｅ傀儡戲班，攏是專門做宗教儀式「出煞」ｅ演出。
無外久以前，「大陸泉州傀儡戲團」到台灣來表演，因為怹表演ｅ性質完全是娛樂大眾ｅ劇情式演出，所以深受觀眾ｅ中意，劇團中ｅ大師--黃奕缺 先生毋單操作技術已經到了出神入化ｅ境界，而且本身戲尪仔嘛做了誠好，其作品親像圖二、三，是一位全才型ｅ藝人。
傀儡尪仔主要分為頭、手、腳三部分，是用柴頭雕刻成ｅ；身軀是用竹蔑仔編成；臂、腿用布紩(thinn7，縫)ｅ；用一塊長形柴板作肩甲頭，將其它部分按順序紩起哩，外面才閣套上華麗ｅ戲服，戴上冠冕，全部完成了後，身長大約一尺七寸，每一尊傀儡有九條甚至到二十條尪仔線，anan縛佇操縱器頂頭，表演ｅ人看劇情ｅ需要，牽動尪仔線，會當互伊動作，假若活人，演來非常逼真，傀儡尪仔與布袋戲尪仔頭部不同ｅ所在，就是傀儡尪仔是利用插入式ｅ方式，所以頷頸仔無孔，卡細(圖四)；布袋戲尪仔是利用指頭仔操控頷頸仔，所以頷頸仔內底有扑孔，卡闊(圖五)。但是伊ｅ造型上ｅ面譜(圖七)和布袋戲差不多，另外猶有一款鐵線傀儡(圖六)，上早佇廣東ｅ陸豐、海豐、潮州、汕頭一帶發展，操作卡方便。
懸絲傀儡戲，操作無外簡單，佇學習上真歹普及，僅單佇本文作簡單ｅ介紹，希望讀者會當對傀儡戲加一分認知及欣賞怹ｅ造型ｅ美（圖八、九、十、十一)。
【註】
圖一、四、六彰化彰藝坊提供。
圖五筆者作品。
圖七徐柄垣作品。
圖八、九、十、十一 鄧相揚 先生提供。
1996.04.01
【註】本文非常感謝蘇文雄 先生ｅ允準來翻譯成台語文ｅ文章。蘇文雄 先生是1965年生，嘉義人，目前是台中大明中學廣告設計科教師。另外，伊猶有佇台中大里市開一間寰宇木尪仔開發製作公司。
沒有留言:
張貼留言