2010
03092145淺談布袋戲 --源流及造型 (譯自 蘇文雄 原文)
「一人談笑千古事，十指弄出萬千兵。」講出了布袋戲演出ｅ奧妙，佇台灣所在ｅ戲曲中，布袋戲會使算講是老人囝仔大細攏知。咱會對布袋戲特別中意，主要是因為除了演師ｅ技巧生動趣味以外，而且布袋戲尪仔本身嘛兼有雕刻、彩繪、刺紬(繡)ｅ水，hoo咱愛不釋手。
關係布袋戲ｅ來源，民間有一個傳說是按呢：「大約是佇三百年前，福建泉州有一個書生梁炳麟，考試仙考嘛未著(tiau5)。有一日，和朋友到九鯉仙公廟卜夢，仙公提伊ｅ手，寫講：『功名歸掌上。』夢醒了後，叫是這回考試一定穩著ｅ，真歡喜去赴考。一直到放榜了後，又是名落孫山，心情鬱卒轉去。無張持去看著厝邊ｅ人操縱傀儡尪仔，心裏淡薄仔有一屑仔感觸，家己就刻柴頭尪仔，用手代替絲線來弄，煞比原來ｅ傀儡尪仔卡靈活。就借著民間流傳ｅ歷史故事，編造戲文，佇鄉里來演出，用按呢來thau伊心內ｅ鬱悶。想未到，因為按呢驚動萬教，頂港有名聲，下港有出名，逐所在攏咧相爭聘請伊去演布袋戲。後來將這來當做頭路，就按呢變成好額人，這時陣才悟著仙公托夢ｅ靈聖。」
昑仔所存ｅ布袋戲尪仔，大概會使分做傳統ｅ戲尪仔和改良過ｅ戲尪仔。改良過ｅ尪仔又閣有金光戲尪仔和電視戲尪仔兩款。
布袋戲尪仔ｅ製作，愛經過幾仔個手續：代先用柴頭(用樟木或是梧桐木卡好)刻出頭形，才閣用粗紙逗逗仔磨光，然後補土，續落來上漆，上漆是一項大學問，就算講尪仔頭刻kah外傳神，一旦上漆失敗，規個尪仔就失去了生命。
戲尪仔代先愛漆肉色，閣來噴腮紅、目影，畫嘴巴、目睭，才閣噴透明ｅ保護漆。比較卡功夫ｅ戲尪仔，猶閣會噴削光漆，上漆了後，裝頭毛、飾品，閣再配衫褲才算是完成，布袋戲衫會將戲尪仔ｅ尊貴及(kah)卑賤表現出來，更加會用哩強調人物ｅ特性。
一般人對布袋戲ｅ印象，攏是ui電視和早期ｅ野台金光戲。電視ｅ戲尪仔ｅ衫褲及造形和電影武俠劇人物卡接近；a金光戲尪仔現在已經卡無流行，一般劇團已經向大規模演出ｅ電視化階段邁進。一寡卡細ｅ劇團已經變成半退休ｅ狀態。
除了這種戲尪以外，另外布袋戲ｅ正統源流，應該是來自傳統ｅ戲尪仔。目前猶有卡接演出ｅ有「亦宛然」及「小西園」，怹ｅ戲尪仔造型和北京戲人物卡接近。
續落來咱就自各種戲尪仔ｅ造型做紹介。
圖(一)這是傳統戲尪仔ｅ戰袍，手工紬製而成，來自大陸泉州。
圖(二)漳州戲尪仔，頭飾甚為講究，但服飾並無親像泉州戲尪仔講究。
圖(三)泉州戲尪仔，頭部是大陸泉州花園派ｅ作品，服飾為台灣演出傳統戲尪上接使用ｅ服飾，以電紬為主。
圖(四)電視使用ｅ戲尪仔，目睭和嘴攏會使活動，是大型ｅ戲尪仔（大約60公分)，一定愛用兩手才有法度靈活操作，造價卡貴，這仙尪仔是筆者ｅ老師徐炎ｅ作品。
圖(五)是民國五十年代ｅ野台戲尪仔。這時期ｅ戲尪仔加大，但是頭型和上漆猶原是保存傳統戲尪仔ｅ特色。
圖(六)這時期ｅ戲尪仔，佇造型上，已和傳統ｅ戲尪仔完全脫離關係，以誇張，怪異來突顯怹ｅ個性，而且是武功蓋世ｅ高手，逐個攏是金光閃閃、瑞氣千條。
圖(七)是筆者融合傳統及金光戲尪仔所製作ｅ作品，並且用來演出。
圖(八)是筆者試用紙黏土仿製傳統戲尪仔，希望布袋戲會當閣卡容易推展。
圖(九)逐個真熟悉ｅ戲尪仔--藏鏡人。身材比例已經脫離早期ｅ金光戲，卡有現代感，由黃俊雄 先生首先使用佇電視演出，是目前電視戲尪仔ｅ主要寸尺。
筆者自細漢就熱愛布袋戲，識佇大學時陣組團演出，閣有從事戲尪仔收藏及製作，佇收藏和出布袋戲十年之中，布袋戲會當講是日新月異，已經和傳統戲出入真大。但是佇民國五十九年三月一日 ，若毋是黃俊雄 先生佇電視演出雲洲大儒俠--史艷文，連演五百八十三集，布袋戲就未變成昑仔遮呢a普遍ｅ本土文化。
若是欲追溯歷史閣做學術研究，咱一定著愛ui傳統戲尪仔開始。因為一仙手掌大細ｅ戲尪仔蘊藏了無數ｅ傳統民俗ｅ水，並且伊嘛是為咱台灣及大陸民俗文化ｅ演變做了見證，希望布袋戲永遠受人喜愛，並歷久彌新。
【註】
圖(一)：黑甲--宜蘭文化中心收藏。
圖(二)：漳州戲尪仔--宜蘭文化中心收藏。
圖(三)：泉州戲尪仔--紅大花(筆者收藏)。
圖(四)：電視戲尪仔--小生(筆者收藏)。
圖(五)：50年代金光戲尪仔(筆者收藏)。
圖(六)：60年代金光戲尪仔(筆者收藏)。
圖(七)：筆者作品之一--唐三藏及孫悟空。
圖(八)：筆者作品之一--唐三藏。
圖(九)：筆者和用佇演出ｅ戲尪仔--藏鏡人。
圖(十)：關公及張飛。
圖(十一)：傳統戲尪仔演出ｅ情形。
1996.03.24
【註】本文非常感謝蘇文雄 先生ｅ允準來翻譯成台語文ｅ文章。蘇文雄 先生是1965年生，嘉義人，目前是台中大明中學廣告設計科教師。另外猶有佇台中大里市開一間寰宇布袋戲尪仔開發工作室。
沒有留言:
張貼留言