2010
09012259拍拍知音凡例
1. 本表格是模仿古冊《拍掌知音》的體例配合現代電腦操作方式去編成的。目的是欲予母語學習者借用橫讀直唸的方式，那拍拍那唸的方式，學著台語的所有的音，嘛共所有的音的聲韻調全部拍予伊穩。甚至會使共毋著的發音撨予正，像42巾(-in)佮24經(-ing)的對照練習。對這陣的囡仔來講，42巾的音是所有的韻上困難改過來的音。像「規陣(tin7)」變成「規定(ting7)。」「神(sin5)明」變成「成(sing5)名。」撨予正了後，會使進一步「知音捌字」，想欲捌拼音、漢字攏會使。
2. 例字是用教育部的《閩南語常用詞辭典》內的用字去添的。
3. 網底色緻是佇製造過程發現替用字傷過濟，無明白表示出音讀別會定定誤會是表格出差別，加上色緻予咱清楚例字的音讀別。色緻的採用觀念用青紅燈的象徵來做，所以青色的，較淺的表示文讀音，較深的是白話音，是一般人熟悉的音。黃色是愛注意的所在，攏是替用字，另外佇拼音的時愛去注意有改變傳統觀念的音，像年(ni5)，若用傳統觀念落去拼就是linn5，佇拼音的時l-愛改成n-，同時共nn去掉。柳聲、門聲、語聲這三个攏是按呢。紅色的觀念佇青紅燈是危險的意思，佇囡仔學習的過程嘛會使講是重點的所在，所以我就用粉紅仔色來代表俗讀的音，紅色佇數字頂頭就是基礎練習重點的所在。結果賰姓用無著，就選虹(khing7)的最後一色來用。
4. 古早的《彙集雅俗通十五音》(1818)有「字母」50字，這馬叫「韻母」，佇《韻鑑》叫「切母」，到《彙音寶鑑》(1954)的時字母因為音變的合併關係煞變成45字。古早的字母，用現代的觀念就是韻母。本表格的45的韻母就是完全遵照《彙音寶鑑》的順序落去編號的。因為有45韻，所以分做45張的表格，每一張表格佇《韻鑑》叫做「轉」。
5. 編號：照45的韻母的卷號佮位置順序落去編號了後，共囥佇韻母頭前，就變成11君 12堅 13金 14規 15嘉……95關。提15嘉來講，因為伊是佇卷一第5个，所以就是15。賰的類推，按呢最後一个第九卷第5个就是95關。聲母的順序完全是《彙集雅俗通十五音》的順序去編號，所以才會得著1柳 2邊 3求 4去……15喜。聲調的順序自《韻鑑》(1201)就開始按呢唸矣，按順序1代表上平聲 2代表上去聲……8代表下去聲。聲韻調的編號只是純粹的位置的表示。共in對照現代的拼音聲韻調的順序，像拍(phah4)照編號去講就變成6634，對完全看毋捌漢字的老阿伯佮老阿姆，按呢會當予in較清楚位置。因為每一張攏有編號佇邊仔，無形中共台語的音節完全予in有固定的編號。記憶好的人只要共45个韻母的順序佮15个聲母的順序背起來就會使寫別人看無的密碼，欲解開密碼就愛仝款有背過這款順序的人，抑是看對照表才解會出來。當然，若有人觀念足極端欲全面去漢化去羅馬字化，全部欲用數字來寫這款形的台語文嘛是寫會出來。其實，音節有編碼的方式早就佇《彙音妙悟》的「新數念法」出現過，伊進一步共伊變成簡筆畫的方式(有可能彼个年代的人猶未曉寫咱這馬的數字1,2,3,4,5,6,7,8,9,10)：「一從主 二半口 三点水 四殘月 五一角 六鈎耳 七倒戈 八左戾 九草斤 十歸滾。」可惜伊這个方法自伊編出來了後就失傳去，看抄寫出來的內容錯誤一堆就清楚矣。因為抄的人無了解，致使毋著的所在足濟。伊的方法若是有傳落來，無定著，咱這馬所寫的台語文，除了用著九草斤的音節以外，就會變成上濟五畫的文字。
6. 八音念法：咱若按照表格橫咧唸，《韻鑑》叫「橫呼」，就是按照台語的八調的順序去唸，以11君1柳橫咧唸就會得著「圇 忍 蠕 黜 倫 忍 崙 律」這八个調，其中第六个佮第二个是仝調的，佇《韻鑑》(1201)就講這款現象叫做「(清濁上聲)相犯」，可見咱的八音念法至少已經有800年以上的歷史。這款按照聲調排佇表格內底固定位置的做法佇《韻鑑》共叫做「定位」。
7. 十五音念法：「十五音」就是咱講的「聲母」，佇《韻鑑》叫做「助紐」(有23个)。咱若是按照表格直咧唸，《韻鑑》叫做「橫轉」(因為in的排版是橫咧讀的)，就是按照台語的十五音的順序去唸，佇《拍掌知音》叫做「呼韻法」；《彙集雅俗通十五音》叫「呼十五音法」。佇《彙音妙悟》(1800)就有記載：「柳黁、邊盆、求君、氣昆、地敦；普奔、他吞、爭尊、入朐、時孫；英溫、文[昏頁]、語[禾豈]、出春、喜分。」「柳獜、邊彬、求巾、氣[仌欠]、地珍；普[信甹]、他[犭申]、爭真、入仁、時新；英因、文閔、語銀、出親、喜欣。」其實這款唸法愛共第一字的韻字囥起去做伙唸，因為無囥起去唸，結果致使著逐个人唸十五音呼韻法的時干焦了解一半爾，毋知伊是按怎欲按呢唸。其實，這款唸法只不過是傳統的反法採用連環呼法。請看下面的圖解(以11君第2調「滾」字韻十五音為例; 另一例「喜」字是知音捌字用的)：
.jpg)
.jpg)
(例一) 滾kun2 柳liu2 忍lun2 邊pian1 本pun2 求kiu5 蚓kun2 去khi3 捆khun2 地te7 囤tun2 頗pho2 翸phun2 他thann1 𧿬thun2 曾tsing1准tsun2 入jip8 ○jun2 時si5 恂sun2 英ing1 尹un2 門bun5 吻bun2 語gu2 ○gun2 出tshut4 忖tshun2 喜hun2 忿hun2
(例二) 喜hi2 柳liu2 理li2 邊pian1 比pi2 求kiu5 己ki2 去khi3 起khi2 地te7 底ti2 頗pho2 鄙phi2 他thann1 恥thi2 曾tsing1 止tsi2 入jip8 耳ji2 時si5 始si2 英ing1 以i2 門bun5 美bi2 語gu2 禦gi2 出tshut4 取tshi2 喜hi2 喜hi2
8. 置空圈：古早共音分做五款，(1) 有音有字；(2) 有音無字；(3) 有聲無字；(4)有聲多字；(5)勾破。(1)有音有字就是咱講的文讀音；(2) 有音無字就是咱講的白話音、俗讀、訓讀、替用字等等，共字添入去內底古早叫土音抑是俗解。(3) 有聲無字就是咱根據橫讀直唸唸出來的音若是完全無任何意思，就佇格仔內底囥這个「○」的符號，這叫做置空圈。佇《韻鑑》共「○」叫做「圍」。(4) 有聲多字就是咱講的仝音字。(5) 勾破就是咱講的破音字，其實應該愛講仝形字；因為遮的字意思無仝，音嘛無仝。
9. 按字求音：表格內底有足濟替用字佮白話音，往往是無法度看字就知影伊讀啥物音，所以借著橫讀直唸的方式就會使知影伊的發音。當然若看捌拼音字的人直接照所附的拼音落去讀就會使矣。
10. 索引別：拜電腦超連結的方便所賜，仝一份資料會使用無仝款的方式來使用，做索引別是起源電腦排序的操作。每一个人有每一个人的慣勢，雖然資料是按傳統的45字母音落起編的。毋過，無讀過45字母音的人總是希望資料的順序會使照家己的意思去排。因為我袂曉設計電腦程式，佇網頁頂懸無法度自由變換資料，閣無想欲佔傷過大的空間，所以用「索引別」來代替。有超連結的關係，每一个索引別就變成一个無仝款的資料排序方式。以我個人上愛用的是IPA的排序方式，嘛因為使用IPA去做索引，所以45音母音的順序我才背袂起來。配合著使用者的習慣我做四款無仝款的排序 (1) 45字母音排序 (2) 拼音排序 (3) 配合注音排序 (4) 有字音節數排序。
(1) 45字母音排序：這是表格的原始編號順序，嘛是本資料的原型。予對傳統45字母字足熟的人使用的。當然若欲耍代碼的人就愛對這个物件足熟似的才會使。
(2) 拼音排序：有的人對字母的拼音順序足內行的，用這个順序會較熟手，只要按字母的拼音順序去揣欲練習的韻，點超連結就會使矣。
(3) 配合注音排序：這个順序是特別配合華語教育的注音符號的順序去排的，適合袂曉拼音的人來用。無附注音符號是欲予in直接學台羅字的拼音法。
(4) 有字音節數排序：這是為著初學者來排的順序，用來教囡仔上好的參考排序，無論是做八音練習抑是十五音練習攏足好用，甚至叫囡仔開始學創作押韻詩嘛是誠好用的物件。
11. 文字區(45字母音排序)：文字區是表格的原始文字資料的純文字的形式。若有需要看清楚表格內的文字就會使來遮。另外，保留文字區是予電腦用來搜揣用的。因為《拍拍知音》的目的是練聲韻調來用的，文字毋是重點，所以圖形字攏無囥起去
(TOP)
(轉去主目錄)
奇怪, 你這个比另外一个較早回應, 顛倒較晏收著通知, 足足晏點半鐘才收著.
感謝你留話回應.