2011
02061241張古老剉大樟仔樹
423民間故事
張古老
佇傳說內底，月娘面頂自古早就有蹛一个叫做張古老的人。伊逐工攏會紮伊的便當，拚命咧剉佇月娘面頂的一欉大樟仔樹。抑毋過，無論伊閣較按怎拚勢(si3)剉，彼欉大樟仔樹較剉就剉袂倒。
thah(哪)會按呢？thiann9(聽見)講，張古老咧剉大樟仔樹的時陣，逐斗攏會來一隻狗，共伊囥佇樹仔邊的便當，趁張古老剉樹仔的時陣無注意kai7(共伊)偷咬咧走。
等伊發現便當去予狗咬走去，就去逐彼隻狗，狗走誠緊，誠僫逐。最後雖然有逐著閣共便當提轉來，轉來到剉樹仔的所在，可惜，天頂遮爾短(te2)的時間，其實是咱人的幾若百冬矣，張古老較早剉一半的樹仔，到伊共便當捾轉來的時陣，毋但看無較早剉過的痕跡，彼欉樹仔嘛比進前閣較大欉足濟的。
抑毋過，這个骨力的老大人，就算講彼隻狗會定定來偷便當，彼剉過的樹仔逐改攏會復原，嘛會閣較大欉，按呢就足無彩工，毋過，伊攏袂失志，所以，自古早到今，伊猶咧一直規心剉樹仔。咱嘛毋知影到啥物時陣伊才會達成伊的目的，共彼欉永遠剉袂倒的樹仔剉予伊倒去。
咱看覓咧，到舊曆十五暝，月娘面頂會當看著烏影，thiann9講，彼就是彼欉大樟仔樹。閣thiann9人講，就是彼欉樟仔樹無去予張古老剉剉掉，咱這个世界才無去發生天災地變。(字數475字)
參考資料來源：吳瀛濤《臺灣民俗》臺北市：眾文圖書，1992。
回應
意思張古老己經共大樟仔樹剉倒囉...所以即馬......
照按呢看來...若毋是張古老...有志者事終成
毋著是彼隻大黑狗便當食飫矣....