2017
06180658106年全國語文競賽閩南語朗讀文章六、社會組
六、社會組
01 阿母
侯信男
阿母出世佇一个散食的家庭，序大人無錢通予伊讀冊。五歲就開始煮飯洗衫、牽牛飼豬，厝裡的穡頭無一項做無著，袂輸是出世欲來還債的。十九歲的時，去好額人兜予人倩煮飯。頭家娘講阿母有孝、乖巧閣捌代誌，若毋是青盲牛，早就共伊娶入門矣。後來，外公共阿母嫁予阿爸了後，阿母才知影嫁著一个散鬼。
阿母毋但細漢認命，做人的家後嘛誠認份，好女德閣𠢕扞家。逐工天未光、狗未吠，為著這个家庭，阿母早早就起床，對透早無閒甲半暝，共阿爸佮阮三个囡仔顧甲誠好勢。我永遠會記得，阿母上班攏會閬縫𤆬阮兄弟仔去逐廢塗車，放阮兩个去抾生仔 、紅銅佮鐵枝。阿母下班了後，才用跤踏車載，共一堆歹銅舊錫載轉去。阮母仔囝三个人那牽那行，著行欲點外鐘才會到厝。阿母驚阮會枵著，見擺攏佇半路買葱仔餅，予阮兄弟仔公家食。彼段日子是阮兜上散，煞是阮規家伙仔感情上好、過了上歡喜的時陣。時間，敢袂當永遠停佇遐？予阮永遠永遠攏莫大漢！
爸母疼囝長流水，序大人為著囝兒，用心計較是無所不至的。阿母毋捌字，煩惱阮暗時讀冊會盹龜，就佮厝邊踮樓跤開講，用聲音陪阮讀冊，閣四界窮錢攢參仔茶共阮侹身體，向望阮將來會當出頭天，毋通像按呢艱苦過日。哎！有是惱，無是苦。細漢煩惱囝袂大，大漢煩惱囝未娶。驚伊做學生讀無冊，驚伊食頭路趁無錢。阿母這兩字，敢是對犧牲、奉獻的另外一種稱呼？阿母佇彼款日子，予阮三个囡仔讀冊，一个一个晟甲遐順序，肩胛的擔頭到底有偌重？到這馬，等阮手抱孩兒才知爸母時。
現此時，阿母已經七十外歲矣，生活上無啥物要求佮享受，唯一的願望．就是有一工，等九十幾歲的外媽若予佛祖叫轉去，會當綴外媽的跤步，往西方極樂世界，做菩薩陪伴佇外媽的身軀邊。弓蕉吐囝為囝死。阿母，你是阮這世人的佛祖，阮永遠的菩薩。阿母，我愛你！
(TOP)
02 無奈的世代
老猴
咻～一下，日子過了閣真緊，目一𥍉，阮講也佮人咧流行領彼勞保退休的老人年金矣。
阮生佇加工世代這沿的人，頂仔有序大人愛有孝、做孝子，十幾歲仔就愛出外鬥趁錢相添厝內的開銷，序大人若辛苦病疼閣愛工課放咧來共照顧；下仔嘛有序細仔愛疼惜，做現代的「孝子」，驚穿袂燒、食袂飽，驚綴人袂著，佮人袂比並得咧無面子。啊家己煞毋甘得食穿，儉腸凹肚咧枵腹肚，儉欲予食好做輕可，逐工無煩無惱。
臺灣早期靠加工出口趁外匯，勤勤儉儉才有今仔日通好過佮人親像的生活，這攏是靠逐家無暝無日認真拍拚出來的。啊這馬少年的毋知影，閣攏激怐怐。
這沿的人全全都國校仔畢業爾，十幾歲仔就愛出外去工場，做學師仔工，抑是去做女工，不時做甲無暝無日。若有通讀到國校仔畢業的就算是萬幸矣，甚至猶有人讀猶未畢業，就愛去做囡仔工，抑是愛佇厝裡鬥𤆬小弟小妹，予序大人專心去趁錢。是講就算講干焦讀到國校仔畢業爾，毋過若佮厝裡的序大人比起來，彼就加好足濟囉，因為有的是毋捌字，有的袂曉講華語。
十幾歲仔就出外做工，趁著的錢閣毋甘開，寄轉去予厝裡的序大人，相添厝裡的開銷。有的是欲納會仔錢，有的是愛還人欠數，有的是欲晟養較細漢的小弟小妹，予去讀高中、考大學。
人講「爸母無嫌囝䆀，囝無嫌爸母散。」誠實佇阮這个世代看著的，毋但認真做工趁錢予序大人，閣袂嫌序大人散，袂嫌序大人毋捌字，袂嫌序大人無智識、無水準綴人袂著。
艱苦拍拚規世人，來到這馬有歲數的時，煞講這馬是啥物『E』世代，買命喔！講彼『3C』的產品是一大堆，無認真學是摸袂通。電視的『遙控器』，無代無誌哪會變甲遐複雜？手機仔講用『3G』、『4G』的，我管伊是幾『G』，橫直我就是無半枝啦。
閒仔話講甲一大拖，是講講規講，講一下仔敨氣的爾爾，日子嘛是愛過，明仔載日頭嘛是仝款會對東爿出來。
(TOP)
03 有量就有福
陳昭蓉
鳳仔老母八十外外來過身，雖然真毋甘，毋過想想咧嘛無啥遺憾，會當共一个行動不便、規身軀痛疼的老母，照顧甲勇khiat-khiat、笑bi-bi佇眠夢中往生。
鳳仔交翁是高中的同學，兩人相意愛，早早就結婚。大家官經營銀紙店、雜貨仔店，生理真好。嫁入門了後，毋但愛加減看頭看尾，嘛愛款一家大細的食穿，甚至小叔、小姑的衫褲、便當，伊嘛攏款甲齊著。大嫂的角色，伊是做了真有起。莫怪大家官疼伊，小叔小姑共伊當做是序大，伊的翁婿嘛共惜命命，講伊是娶著好某較好得著好田園。
鳳仔是厝裡的細漢查某囝，兄弟姊妹成家立業了後，各人有各人的家庭，為著趁食只好離鄉背里。老爸過身了後，後頭就賰老母家己一个咧生活。鳳仔徛家雖然離後頭無蓋遠，毋過駛車嘛愛一、二十分鐘，想欲逐日攏陪佇老母的身軀邊嘛是真僫，何況一家一業，伊嘛是無閒tshih-tshih。毋過，總比已經佇臺灣咧生湠的大兄大姊，伊是較觀會著，所以這个重擔伊就真歡喜共擔起來。
老母佇六十外歲的時，無拄好跋倒，煞袂起床。兄弟姊妹參詳，想欲共老母送去療養院。為著這件代誌鳳仔是操心擘腹。翁婿毋甘伊規日憂頭結面，就招序大人參詳，共丈姆接來厝裡奉待。翁婿的體貼、大家官的諒解，予鳳仔感激甲目屎掛目墘。
本來就盡心咧照顧一家大細的鳳仔，這聲猶閣較拍拚。小叔、小姑雖然有家己的家庭，毋過三頓的食食攏是伊咧發落。尤其是暗頓，下班的、放學的，一家二十外人呼倚來踮兩塊大桌那講那食，食甲喙笑目笑，講甲喙角全波，上歡喜的當然是大家官。
鳳仔逐日透早攏愛走菜市，款甲大包細包、捾甲怦怦喘。飯是用大箍瓦斯鍋煮，菜是用大鼎炒。鳳仔骨格真幼秀，舞遮大鼎大灶是汗流汗滴，毋過看著逐家食甲削削叫、笑甲喙仔離sai-sai，較忝伊嘛是心肝情願。
(TOP)
04 釋迦
後山人
俗語講：「好䆀菜一步燒，好䆀查某一步笑。」燒烙燒烙的菜，滋味上好；笑bi-bi的面上媠。啊！對果子的要求是啥？當然是甜度！買果子的人攏會問講：「有甜無？」紹介一味包甜的果子──釋迦。若講著釋迦，一定會想著臺東，若食過釋迦的人就知影啥物叫做甜！釋迦有偌甜？夭壽甜，所以英語名規氣號做『sugar apple』。釋迦毋但是好食爾爾，有美國專家講，釋迦是抗癌效果上好的果子。毋但臺灣四界攏有咧賣，真濟來遊覽的中國遊客食了攏真佮意，所以這馬嘛有外銷去趁人民幣。
阮是佇釋迦園大漢的，逐年寒人看釋迦欉「剃光頭」。剃光頭就是共葉仔甪掉，細枝椏剪予斷，大枝椏鋸予較短，傷過長的椏愛用索仔縛石頭共搝拗曲，上尾變做一枝雨傘形的骨架。每一枝老椏頂懸是一搭一搭親像重重疊疊的臭焦疕，揣無一跡金滑的所在，看著親像無性命的死人骨頭。毋過春天若到，新穎就會對空喙的接縫發出來，紲落來生葉、開花、結果。俗語講：「芥菜無剝毋成欉，囡仔無教毋成人。」釋迦按呢予人共刑、予人共雕，有影生出上蓋甜的滋味。
釋迦佇後山的山坪、溪埔、石頭仔地徛起，毋驚瘦塗、毋驚洘旱，逐年勇敢重生，予人豐收的向望，伊的一生攏是奉獻。寒人的時，樹仔跤蔭影的所在會發出幼麵麵的烏甜仔菜。死去的釋迦欉嘛袂挖掉，當做棚仔種菜瓜、醃瓜，替厝裡三頓加菜。釋迦牟尼佛講：「樹是無限慈悲體的化身。」樹仔對人類的幫助真正有夠濟，釋迦欉應該是其中上蓋慈悲的。要求少，回報濟。臺東真好運，真濟作穡人靠伊食穿。
較早人講：「毋捌食過豬肉嘛捌看過豬行路」，明明就興食甲欲死閣毋甘食。種釋迦的人就無仝矣，若是拄著透燒風，原本會當採收的釋迦果一下就軟去，當然無法度寄行口；若是雄雄摔大雨，大粒的釋迦就代先必了了。燒瓷的食缺，袂當趁錢就趁食，心肝頭淡薄仔苦楚，嘛只好靠喙裡甜粅粅的釋迦來安慰！
(TOP)
05 緣份
張月惠
阿母無生後生，有一个對阮姊仔遐抽豬母稅的孫。舊年底孫一娶某煞，就隨搬轉去佮阿母伊做伙蹛。我佮阮姊仔是沿若歡喜沿若煩惱起來等。
照佛教的講法，會使熟似、做朋友、厝邊、親人攏是一種緣份，是五百年修來的因緣。毋過真濟有緣的人，逐工咧做伙，煞顛倒袂記得人佮人做伙是一門誠深的學問。做伙著愛互相信任，互相吞忍、包容、尊重。仝爸母教出來的兄弟姐妹都會相觸、冤家量債矣，莫講無仝家庭教出來的孫新婦。
佇我的認捌當中，我知影大部份的人出發點攏是好意。當然袂當講好意就一定著，好意袂當保證袂造成傷害。親像阮阿母和孫、孫新婦拄蹛做伙無偌久，阿母就共我講少年的可能無佮意佮伊做伙蹛；講孫新婦煮食的時陣，菜攏愛貯做兩盤，一盤予伊食，一盤翁仔某家己食。拄聽著我嘛感覺足奇怪，就去問孫新婦講哪著遐麻煩。伊講阿媽有歲矣，喙齒哺𠕇的哺袂爛，毋過少年的無愛食傷爛的菜，才會攏先貯一寡仔起來，一寡仔繼續煮予較爛淡薄仔，應該較合阿媽食。聽到遮我心肝嚓一下，嘛真感慨。好佳哉有開喙問，若無毋但去觸 著人的意，閣共誤解。就按呢我共阮阿母講，感覺毋好，就講出來，有當時仔是咱想傷濟。無論按怎，人佮人做伙就親像做生理仝款，愛用體諒的心來經營。
嘛有真濟有緣的人，因為慣勢對方的存在佮付出，就感覺別人的付出攏是應該的，袂曉珍惜，閣愛嫌東嫌西。定定等到失去這份緣份，才來咧感慨、後悔，按呢就袂赴矣，實在有夠無彩。
其實付出是一種疼，接受也是另外一種疼，付出和接受攏考驗咱的智慧。若是雙方面攏全心付出，全意接受，是一種緣份的圓滿。佇茫茫人海當中，會拄著啥人，若毋是頂世人相欠債，這世人哪會相拄？會使熟似、做伙、做親人，攏是真難得的緣份，咱逐家攏愛珍惜。總是，鬥陣愛包容，誤解愛講清楚，冤家愛相讓，受氣愛冷靜，歡喜愛分享，人生才會圓滿。
(TOP)
06 豬仔產婆
林淑期
聽著產婆，逐家一定隨想著幫助產婦順利生產的「抾囝母」，啊若「豬仔產婆」咧，當然就是共豬母鬥相共，予豬仔囝會得平安出世的人囉！
聽阿母講，以早庄跤所在歹趁食，為著欲晟養六个囡仔大漢，紡織工場若有標頭通車，就罔窮罔趁。因為車一領的工資干焦一角銀，一工總趁嘛無幾箍，所以愛兼作穡，閣佇厝跤種菜、飼豬做副業。
會記得細漢的時陣，阮攏感覺阿爸大細心，疼豬比疼囝較濟。是按怎阮會窮分咧？因為見若放學，阿爸就差阮遮的囡仔，有的飼精牲仔，有的鏨番薯葉仔，有的燃燒水，做東做西無一時閒。燒水燃好，猶未赴洗跤手，就隨紲落去煠豬菜，講啥物欲做豬仔隔轉工的早頓。阮共鏨好的番薯葉仔佮曝焦的番薯簽，囥佇大生鍋裡，閣𣁳幾觳仔米糠摻水落去煠，毋但無通𨑨迌，閣愛添柴顧火。啊若歇假，就叫阮去割牧草予豬食。閣三叮嚀四交代，叫阮愛共臭konn-konn的豬屎黜去漚菜肥，閣愛提hòo-suh管共豬牢濺予清氣，講環境四序，豬母才會𠢕生。後來，阮才知影阿爸哪會遮疼豬。原來斯當時，豬仔囝真好價，阮的註冊錢，攏是靠致蔭。
就是這个緣故，所以便若拄著豬母生產，阿爸就顧緊緊。若看著豬母生傷慢抑是佇遐瞪袂出來，就緊叫我這个囡仔疕跍低，身軀敧一爿，共正手囊入去豬母的產道，看會使鬥共豬仔囝撏出來無？若無，予翕死去，彼就了濟囉！紅紅幼幼的豬仔囝隨撏出來，阮就緊提舊衫仔褲，共鼻空佮喙的衣拭掉，通予順利喘氣。尾手，才好禮仔共抱過牽一葩電火泡仔、舒一沿一沿稻草，軟㽎㽎的稻草眠床保溫。原來，細漢予人叫「瘦猴仔」、好差教的我，跤躼手躼，若柴仔枝咧，生成有做「豬仔產婆」的才調呢！
這馬見若轉去故鄉，我猶是會想起做囡仔的時，規岫豬仔囝相爭欶奶，奶頭含咧，倒佇豬母溫暖的腹肚邊，彼種幸福、滿足的模樣。「豬仔產婆」這段難忘的記持，嘛予我永遠感念爸母辛苦的歲月佮天大的恩情。
(TOP)
07 紅豆情
洪媛麗
人攏講紅豆的故鄉是萬丹，彼是因為伊有一項真出名的名產——「紅豆餅」，伊的名聲才會遐響，毋過真少人知影，隔一條下淡水溪佮萬丹遠遠相對看的「大寮」嘛出產真濟紅豆。
大寮是我的後頭厝，會記得細漢的時，每一冬舊曆九月就是阿爸種紅豆的時陣。紅豆成長的過程愛三個外月，也就是倚新曆過年的前後就會當看著一片黃錦錦的紅豆園。
以早阮彼个年代種紅豆猶未機器化，事事項項攏是用人工的。若欲種紅豆阮規家大細攏愛齊出動，逐个人腰裡愛揹一跤袋仔貯紅豆子，手攑一支黜仔，順原先割起來的稻仔頭墊紅豆子。人愛跍咧，一步一步沓沓仔徙，聽候規區的紅豆子墊煞，腰是跔甲徛袂直，兩肢跤是痠甲徛袂在，彼種的辛苦到今我猶閣會記得。毋但按呢，上艱苦是佇收成的時，共一欉一欉的紅豆對塗裡薅起來，愛共根頭的塗敲掉囥做一堆。等一禮拜紅豆欉曝焦了後，才閣利用中晝日頭當炎的時陣，用布篷佮兩支竹篙做的軟轎，一人拎一頭，共紅豆欉疊做堆，等候挔落去機器内底絞。這个過程是又閣熱又閣趕，彼當陣阮才囡仔疕爾，對阮來講，彼是一件真食力的代誌，工課若做煞，逐家攏是兩肢手膨疱兼遛皮，忝甲會呼雞袂歕火。
後來，紅豆的採收已經改做機器化，紅豆的收成嘛變做一件真簡單的代誌，毋過煞變無自然矣。
嫁來屏東已經二十冬矣，逐擺轉去後頭厝若拄著紅豆採收的節期，沿路已經看無黃錦錦的紅豆園，看著的是一欉一欉蔫蔫無精神的紅豆恬恬咧等候收成，我的心肝頭有一種講袂出喙的悲哀。雖然較早種作佮採收紅豆是真辛苦，毋過彼款辛苦的過程予阮學會曉惜福。看著一粒一粒對機器內底輾出來的紅寶石，心肝內攏是滇滇的感動，因為彼是一點一滴的汗水所換來的。我數念古早時的單純、古早人的樸實閣有對土地敬愛的心，這是咱這代為著省時省工，欲趁大錢所失去的寶貝，以後咱敢閣揣會轉來？
(TOP)
08 大船落水，展希望
李盈萱
佇我細漢時仔的記持內底，阿公真罕得轉來厝裡，定定一兩個月才會轉來一擺。大人講阿公佇旗津咧做船仔，因為有足濟穡頭愛做，所以無通定定轉來，愛蹛佇工廠，等若另日船仔欲落水，才叫阿爸𤆬恁去揣阿公，順紲抾麻糍。
通常做一隻掠旗魚抑是串仔的魚船，需要半年的時間，來訂做船仔的人就號做「船頭家」。因為船仔若是停佇造船廠的架仔頂，著愛付予船公司袂輸停車費仝款的停船仔費，所以等到船仔欲完工的時，船頭家就會開始揀一个離完工上倚的好日子，舉辦鬧熱的落水典禮，通好祈求未來船仔作業平安、萬項順序、掠著大魚趁大錢。
船仔落水這工，落水典禮的現場，有印船公司名稱兼船號的旗仔，就親像萬國旗仝款，牽甲滿四界。今仔日的主角──欲落水的船隻就停佇有輪仔的棧枋頂，一粒閣一粒紅絳絳的彩球兼一大捾的炮仔結佇船仔邊，工人親像蜂仔佇現場無閒tshih-tshih，每一項細節攏袂使落勾去。船頂早就共船頭家用心準備的一箱閣一箱的麻糍攢好勢，好時一到，船頭家先佇船頂拜拜，祈求神明保庇大豐收，工廠內的大隻天車開始振動，共連接船仔的樓梯吊離開，紲落來船仔開始準備欲落水，船跤的民眾逐家已經共大大細細的塑膠橐仔攢便便咧張等，準備欲來大豐收。炮仔一點落，船頂的工人就開始共一包閣一包的麻糍擲落船跤，若拄著好年冬，有時閣會摻一兩包有橐錢的紅包，船跤民眾就親像腹肚枵的魚仔欲食餌，綴物件抌落來的所在四界傱，目睭若無擘予金，毋但物件一目𥍉仔就無去，跤也會予熱情的民眾踏甲腫uainn-uainn。
原本用大索固定牢的船仔，綴放冗去的索仔，順棧枋跤的鐵枝路沓沓仔趨落海。一觸久仔有的人就已經大包細包，滿面春風，無抾著的人也免傷心，通常抾較濟麻糍的人，也會分一寡仔送予遐的跤手較慢的。對遮，咱通看著臺灣人可愛閣善良的一面，祝福船仔大豐收的落水典禮到遮來，就算是圓滿收煞矣。
(TOP)
09 囥咧鎮地，擲掉討債
張逸嫻
摒掃對我來講是大工事，今年倚年特別烏寒閣直直落雨，操煩毋知敢會烏龜湳，湳到二九暗？想著愛沐冷吱吱的水有夠畏。我本成就無蓋骨力，腰脊骨真荏，整理物件閣真頇顢，就按呢拖拖沙沙，想講「時到時擔當，無米才來煮番薯湯。」時間一工一工過，時到日到矣，唉！無掖種就無收成，姑不將手䘼撆起來就共摒落去。
衫仔櫥門關袂峇、冊櫃強欲爆炸、鞋箱仔的鞋櫼甲飽飽飽、桌頂的筆記佮文具掖甲挐ká-ká，欲挃物件攏無地捎，四界看起來是腌哩腌臢。咱生活中li-li-khok-khok的物件一大堆，攏想講日後無定著會用著，毋甘共擲掉。有的物件是有特別紀念性的意義，有的是人誠心送予我的，若凊彩就共擲掉敢袂傷無情？
較早若講一个人抾拾，是呵咾的話；這馬聽人講抾拾，應該是供體人的意思較濟。專家講每一口灶加減攏有一寡物件，若經過一段時間攏無用著，就愛共抨掉。毋過艱苦年代出身，愛物惜物的觀念，予我抨袂落手。高中同窗佮我真峇的朋友，可能看阮兜亂甲無天理，就送日本人寫的「斷、捨、離」這本冊予我，看我是毋是會當恢復理智？
啥物是斷、捨、離？冊內底寫「斷」是斷絕無需要的物件，欲買物件進前愛想予清楚，用袂著的物件毋通提轉來，買物件干焦買需要的；「捨」是整理無路用的廢物，看是欲共賣掉抑是送人；「離」是脫離對物質的追求。
當然囉，擲物件講起來簡單，做起來真為難，欲共開錢買的，猶好liu-liu的物件擲掉，心肝頭攏會疼tiuh-tiuh。若按呢咱會使對有時效性的物件先擲，親像過期的食品、保養品等等，擲起來較袂有罪惡感。紲落來，若毋甘做一擺共物件擲甲離離離，就分做兩、三擺來處理。有的物件囥咧嫌鎮地，擲掉閣傷討債，就暫時囥踮邊仔，等一段時間了後，才閣來處理。佇這段時間會當探聽敢有人欲挃，若拄好冇粟收落好米籮，行著卯字運，予伊揣著新主人，這就有影功德圓滿囉。
(TOP)
10 練習離別
林淑美
禮拜的暗頭仔，自家用的駛到車頭。翁婿共行李捾落來，查某囝關心問講藥仔有紮無？我頭那頕、嚨喉管那滇，應講：「車頭歹停車，冗早轉去啦！」緊共爸仔囝趕離開。看軁入去車內，翁婿勻勻仔共ha̋n-tóo-luh紡咧行，查某囝閣共車窗絞落來，比手勢愛我共外套的挩鍊仔搝起來才袂寒著。紲落去，車就消失佇鬧熱的圓環。目屎煞擋袂牢，徛佇亭仔跤偷偷仔拭拭咧！這逝算算咧，已經兩個月矣，練習遮久，愛哭的症頭，親像無較改善呢！
車幫到位，上車揣著家己的位，司機大兄開始放送「七點往新竹的車幫欲出發囉！」是啦！阮嘛綴人時行做「假日夫妻」，我佇新竹教冊，翁婿、囡仔佇臺南食頭路、讀冊。為著把握真僫才考牢的老師資格；為著實現家己教育的理想，放翁放囝，到生份的都市教我熟似的母語。現實和夢想咧搝大索，這个人生的課題，每擺我總是佇車頂頭殼𢯾咧燒。親情、思念、想厝的情緒，干焦會當佇車頂目屎輾輾咧，共家己講：「到風城做一个予囡仔快樂學閩南語的老師。」
對逐工無閒發落一家的食穿，到一个一人飽規家飽的所在，生活除了寂寞就是孤單。風城風真透，尤其寒人若拄著落雨天，冷閣，冷風鑽入去骨頭縫，三不五時都咧傱醫生館。雨鞋、圍巾、膨紗帽，佇下港透世人都用袂著，來到風城逐項都愛蓄。
來到風城，校長四界鬥走傱稅厝；主任交代氣候無好，身體愛注意；同事吩咐外套愛買防水的才袂予沃澹，連工友阿蘭姊仔嘛好意招呼叫咱去斟薑母茶哈一下！貼心的提醒，溫暖的關懷，我這个外位仔人予滿滿的愛包牢咧，心肝內總是燒烙燒烙！想厝的程度，一點一滴慢慢仔囥落！
因為慣勢，對風城的依賴愈來愈重；因為習慣，對府城離別的感覺愈放愈輕鬆，離別這層代誌我練習一冬。我煩惱有一工，欲轉去府城的時，剝袂開對風城的數念，因為風城的人，予我思思念念！按呢，我毋知閣愛用偌濟時間，才會慣勢離開風城的日子！
(TOP)
11 阿嬸
駱寶雲
頂站仔，去揣蹛佇山頂的朋友，予請食晝。桌頂的料理攏是野菜，有山苳蒿炒薑絲、蔭豉仔煮烏甜仔菜、曝焦的倒吊蓮花煮赤肉湯，攏是誠久無食著的山珍野味。閣有海產喔！是朋友阿爸，去海墘咾咕石坪托的「疕仔」，嘛有人講做「淺笊」 猶閣有「珠螺」佮「海參」等等。
食著遮濟足久無食著的野味，雄雄煞來想起足數念的一个人，一个親像阿母仝款遐爾仔照顧我、疼惜我的厝邊阿嬸，猶閣有伊的燜飯配豆乳。
我讀國校仔彼段期間，阮爸母因為工課的關係，定定無佇厝，就央厝邊的阿嬸照顧我的三頓。逐工散學了後，功課若寫好，就浸佇阿嬸兜，替伊顧𥴊仔店順紲等食飯，上讚的是會當食我愛食的四秀仔。
阿嬸翁做炭空，拄著「落陷」走未赴，自按呢就無閣轉來。阿嬸真儼硬，擔起扶養三个查某囝的重擔。伊兩肢手無一時閒，兩肢跤敢若北鼓箸 咧。趁錢的工課，無一項考伊會倒，毋管是上山去遏劍竹仔筍揹去市仔賣，抑是落湳田去割鹹草。工課若有閬縫就去山頂薅茅仔草根佮藥草交予青草仔店，若有錢通趁，阿嬸攏袂嫌艱苦。露水未焦就出門，日頭落山共伊的人影牽甲長長長，伊才會入門。人若苦勸伊身體著較保重咧，阿嬸總是笑笑仔講：「少年著愛操，食老才有好尾梢。」阿嬸若入山做穡，一定順紲紮一堆野菜轉來，庄裡的人攏愛笑伊是王寶釧苦守寒窯，專門咧食野菜，我感覺野菜嘛袂歹食啊！
阿嬸閣有兩項好手藝，就是煮燜飯佮做豆乳。這馬的燜飯料著下誠濟，有豆乾角、香菇、肉絲，配料在人佮意，啊若阮阿嬸的燜飯就干焦三味：白米摻糙米，頂面囥番薯箍。透早起床就用大灶起火，煮一大鼎的燜飯，這鼎飯是阿嬸佮伊三个查某囝和我五个人一工的三頓。燜飯是汫的，愛配阿嬸家己做的豆乳，無會無鹹無纖。一角豆乳聽好配三碗燜飯，啊若暗頓就閣有野菜通配。遮爾簡單的粗飯菜，配豆乳摻著阿嬸條直骨力的精神佮對我的疼惜，煞予我數念伊規世人。
(TOP)
12 設使運命相替換
楊允言
是按怎咱是這馬的咱？這是歷史的必然，抑是意外所造成 的？咧討論台灣運命的時，心情定著誠複雜。
明治維新了後，一个想欲脫亞入歐，佮列強國家平坐徛的新興帝國，伊欲學列強向外發展，擴大國防圈佮經濟圈。佇這款的勢面，臺灣成做伊的目標。對臺灣來講，當然誠不幸，毋過日本欲治理臺灣，嘛無通遮爾好食睏，因為伊閣愛面對原住民的抗爭，這比佮清國戰爭閣較食力。
成做帝國的領土了後，臺灣總督府用誠濟精神來鋪鐵路、做調查、起官廳、辦教育、做農業改良、規劃國家公園……，一切看起來攏誠圓滿。
無疑悟，後來日本佮美國對換帖的變做冤仇人，開始相戰，臺灣就按呢絞入去戰爭。雖然拄開始日本較占贏面，衝甲掠袂牢，總是資源少就無擋頭，局勢一下變，兵敗若水崩山。這時，美國欲來拍，咧考慮欲占臺灣抑是琉球？
海軍拄開始想欲拍臺灣，1944年6月，擬定堤道計畫，欲對南臺台灣上陸，一路拍去北部。這个計畫終其尾按下，改做拍琉球，總是對美麗島猶無死心，十二月閣訂新計畫，欲掔毒氣彈共北臺灣掔予糜糜卯卯，後來毋知啥原因，毒氣彈計畫嘛無執行。
1945年4月的琉球戰役，是太平洋戰爭傷亡人數上濟的，日本兵死超過十萬，內底包括袂少臺灣人，琉球的百姓死三份一。了後，琉球予美國軍政府管欲三十冬才還日本，這馬琉球獨立的聲音嘛出來矣。
咱無法度知影，設使當初美軍決定欲拍臺灣，臺灣的運命會變做按怎，你我敢猶閣有機會通活佇世間，咱敢會親像琉球人遐爾慼美國？戰後的臺灣，盟軍指派中華民國來接收，致使後來發生二二八、清鄉、白色恐怖，閣有世界上久的戒嚴軍事統治。1950年韓戰爆發，閣影響著聯合國對臺灣問題的處理，臺灣地位到今猶是公案。按呢講起來，這敢算是圓滿的結局？
當然，歷史無通重頭來，總是，咱若對家己的歷史有較深入的了解，未來選擇的時，無定著會當做出較好的決定。
(TOP)
(轉去主目錄)
請問一下這些文章有音檔?
歹勢, 你愛去揣出版社的網站看有無.