2015
07021125104 年度全國語文競賽-閩南語朗讀文章 (教大學生組)
01 予我上數念的彼个人 許沛¹琳
02 永遠的陳溝溪 林義和
03 我佮阮阿爸 蔡幸紋
04 做囡仔的好肥底 蔡瑋琳
05 少年戇膽——記林田山林場的高山鐵路 陳憲國
06 姑疼孫，仝字姓 陳素年
07 難忘庄跤的稻草芳 謝金色
08 我歇涼的好所在 江澄樹
09 阿媽的老私奇 蔡連真
10 偷食 林桂鄉
=================================
昨昏暝我又閣夢著你矣……。
佇咧夢中，你猶原是真莊嚴，佮你在生的時陣仝款，一點仔都無變……。自從你過身了後，這是我第二擺夢著你……。
我永遠都會記得頭一擺夢著你，是你過身無偌久。去嘉義共你送上山頭了後，我的心情就親像是拄著大風的海湧，無法度平靜。彼暝，我真數念你，倒佇眠床頂，反來反去，睏袂落眠。頭殼內，干焦想講你去到天頂了後，敢會共我放袂記得？後擺我若是想你，有話想欲共你講，按呢我欲按怎？我一个人覕佇棉襀被內底，那看你的相片人那吼，吼甲睏去。講起來，嘛是真聖，彼暝，我就夢著你矣。
佇咧夢中，是下課時間，你坐佇教室頭前，同學攏咧做家己的代誌。予你罵慣勢的我，目睭根本都毋敢相對你彼爿去。啥人知影，你雄雄共我叫去，講：「是按怎交查埔朋友無共老師講？」我聽了煞驚一趒，就睏袂去。精神了後，才知影原來這是一場夢。嘛因為看著你真安心，所以我真緊就閣睏去矣。
最近，我為著學業的代誌咧操煩，毋知影到底欲去考研究所抑是欲去實習做老師？我就想著佇我高中的時陣，你三不五時攏會講，畢業了後的學姊定定攏嘛會轉來揣你講心事，無論是學業抑是愛情。彼時陣，阮攏毋相信，心內想講：「老師遮爾歹，到底有[啥人]²會閣轉來揣你討論？家己褒較袂臭臊啦。」啊毋過，到這馬我才知影，老師你講的攏是事實。高中三年，逐工攏佮你生活做伙，讀冊做伙、食飯做伙食、耍嘛耍鬥陣，我敢講：「你是全學校上認真、負責的導師，嘛是全校上關心學生的老師！」
咱學校，是一間私立中學，升學的壓力已經真大矣，而且你佮恁翁閣攏是𤆬資優班的，閣再加上你的身體本來就無好，欲𤆬阮三冬，真正是一件真食力的工課。佇咧阮高三的時陣，有幾若擺，你攏因為身體袂堪得，煞來請假。有當時仔，課上到一半，你就會雄雄頭楞，無法度講課，叫阮家己看冊。自阮一年仔到三年仔，你講課自來就毋捌用『mài-khuh』。毋過彼站仔，你攏愛靠伊才有法度上課，阮逐家攏真煩惱。
¹沛(phài)
²[啥人](siáng／siâng)
(TOP)
咱若駛車行鹿港迵南投這條台76號東西向快速道路，來到埔鹽段，佇南北兩爿大路的中央，有一條成百米的大溝，在地人共伊叫做「陳溝溪」。
若問講陳溝溪佇佗位，相信大部分的人攏毋知，就算講提上新的地圖來反，嘛揣無。陳溝溪對外埠頭的人來講，是一个真生份的名。毋過，若佇彰化縣的東福興佮秀水鄉南爿，對這箍圍仔成十个庄頭的人來講，陳溝溪就親像是的爸母仝款。
論真講起來陳溝溪毋是真長，伊只不過是引八堡圳的水流落來的一條溝。水頭過埔鹽埤就是員林大排，水尾行到鹿港就是福鹿溪，總長無夠一舖路。溝底離駁岸袂超過三米。早前農業社會在地人無水道水，所有的生活用水，毋管是田欲用的，抑是人欲食的，攏愛靠陳溝溪。連熱天時仔，風颱大水嘛愛靠陳溝溪來消敨。會使講陳溝溪毋但是附近這幾个庄頭上重要的水源，嘛是袂當欠缺的排水溝。
本底彰化縣農田水利會佇陳溝溪的中段――陳溝庄，有設一个抽水站，號做「台灣溝抽水站」。這个抽水站佇1949年12月22開工，隔轉年5月30完成。自本有四台五十馬柴油『ia̋n-jín』的抽水機，1987年3月才閣全部換新。佇抽水站猶未運轉進前，遮附近的田佮人攏是靠天咧過日。無雨水的時陣，田底必痕，無法度種作。鼓井斷滴，無水通食，著愛等到雨水期，田才有水通用，鼓井嘛才有水通食。彼當時的生活，絕對毋是這馬的少年人有法度體會的。一直到抽水站起好了後，在地人才毋免過彼種看天生活的日子。干焦予這个抽水站致蔭的這成十个庄頭，面積就超過七百甲。這箍圍仔的農產品，包括米、番薯佮荷蘭豆攏是全國上主要的生產地。
佇臺灣溝抽水站，除了有四台主要的抽水機以外，猶閣有一棟機房佮一棟宿舍。外口有一窟水池仔，四箍輾轉有種真濟樹仔佮花，光景實在真媠。溪水清清清，魚、蝦、蜊仔有夠濟閣看現現。雙爿的草仔、樹仔青翠青翠。抽水站前有一个閘水壩，平常時仔壩底水沖跤，上深的所在才兩、三尺爾爾，是囡仔上愛落去耍的好所在。
(TOP)
自從看著杜正勝先生彼篇〈佮阿爸講上久的一遍話〉，心肝內一直咧滾絞，深深受著感動。阿爸有真濟所在佮阮阿爸真相。凡勢全世界的阿爸攏生做這款，所以嘛想欲為家己的阿爸來寫一篇文章。我無想欲佮杜部長仝款，佇「彼種場合」才來佮阿爸講話，就算偌感心的話伊嘛聽袂著矣！
阮阿爸，屏東東港人。細漢無愛讀冊，來高雄綴人學師仔。出師了後就佮阮阿母結婚，家己出來開公司拚事業，所以自細漢我就看阿爸佇外口咧走傱，佮人客盤撋。阿爸是生理人，個性閣樂暢，所以伊的朋友迵四海。
阿爸是一个通人呵咾的人，朋友有困難就算無開喙，伊若有才調絕對會鬥相共。阿母定定講伊家婆性，明明佮伊無底代，伊就是會家己倚過去。阮兜頭前有一个小公園仔，逐家攏佇遐歇睏開講，厝邊頭尾逐家感情攏真好。啊若有啥代誌阮阿爸一定傱代先。像有人兜著賊偷，無人敢入去，干焦阮阿爸頭一个提『bat-tah』衝入去；有人兜火燒厝，伊是比消防隊躘閣較頭前去牽水管的人；公園若有老人無拄好咧冤家，伊嘛一定會去做公親。阿爸就是遮爾古錐閣家婆的人，別人的代誌定定比伊家己的代誌閣較要緊。嘛因為按呢，予阮遮的做伊查某囝的真煩惱，驚伊干焦顧別人，煞袂記得顧家己的安全。
人攏講我佮阮阿爸生做真相仝，我咧想若是種著阮阿母，無的確我會加較媠。偏偏仔我毋但面模仔種著阮阿爸，連個性嘛佮伊足相仝，阮攏是樂暢閣無心機的人。阮阿爸真愛練痟話，我講話會遮爾趣味，有一半是對阿爸遐學來的。我嘛是一个真家婆性的人，代誌無共人鬥做，心肝就會礙虐礙虐。無法度！這攏是阿爸的影響啦。有一遍，佮阿爸咧開講，才發現阮對待朋友的態度真相仝：阮攏會破心肝對待朋友；人若對阮三分好，阮絕對會還人十分；欠人的趕緊還人，顛倒別人欠咱的，家己煞歹勢共人討。我感覺佮人鬥陣就是愛用心肝，若是閣愛用頭殼來互相計較，傷忝啦！所以有啥物話就講啥物，朋友之間，會合就鬥陣，袂合就煞煞去，我相信阮阿爸嘛是佮我仝款。
(TOP)
教育的種子佇佗位？教育的種子是愛對細漢就開始培養，細漢就愛建立正確的價值觀。有一个充滿熱情的少年人，伊真疼惜囡仔，想欲做老師來教育囡仔，予囡仔親像種子仝款，會當種佇好肥底的田園，吸收塗裡的營養，暴穎、發芽，健康大欉閣開花結子。
好的老師就是好肥底的一部份。伊想欲做囡仔的好肥底，就決定去參加一个號做「教育營」的營隊。這个營隊的任務是愛去原住民部落輔導學生囡仔的功課。伊想講參加這个活動，會當充實家己的教學能力，是做老師的起步。
這个少年人頭一擺參加教育營，雖然有滿腹的熱情，毋過心肝頭嘛是有淡薄仔驚驚，因為頭一擺總是會生份。等伊看著囡仔純真的笑容，隨時就歡喜起來，敢若共漏風的雞胿仔灌風仝款。
原住民的囡仔兄，逐个攏生做足相，袂輸一个模仔印出來的仝款。見著伊攏會笑笑仔問伊：「老師，你叫啥物名？」上袂慣勢的就是下課的時會共伊𢯾牢咧，毋甘放伊走。甚至有時仔囡仔轉去厝裡，會閣隨傱轉來欲佮伊耍。無一時恬，一日到暗攏充滿活力。
伊知影，若是欲教智識佮道理，代先著愛佮盤撋。就按呢，伊做一件足偉大的代誌，就是決定欲撥時間來共好好仔栽培。伊利用食晝佮下課的時間佮囡仔鬥陣，建立感情。毋但會當教智識，也會當教禮貌佮規矩。紲落來一禮拜久，伊攏用真熱情的心來教，想欲教足濟智識，欲予一下仔就吸收真濟觀念。譬論講有一工早起時上課，囡仔共早頓提來上課的所在食。食的竟然是泡麵佮「保力達B」，泡麵閣是用齧的。伊目睭褫甲大大蕊，袂輸看著啥物奇怪的物仔。等到下課，伊就行倚去共囡仔講：「這是毋好的、無健康的。」因為彼个囡仔認為按呢食無啥物奇怪，是真四常的代誌，伊就共囡仔教一寡健康的觀念，向望會當改變的想法。
(TOP)
真濟人攏知影咱臺灣阿里山的鐵路是世界三大出名的懸山鐵路之一，毋過可能無啥人知影，佇臺灣東部的花蓮縣鳳林鎮的山頂，以早嘛有一條懸山鐵路，彼就是林田山林場的運材鐵路。
1964年，彼當陣我當少年。大學出業做兵退伍，佇臺南佳里的一間農校教一冬冊了後，想講家己讀的是林科，猶閣毋捌體驗山場的工課，想欲親身去體驗一站仔，才閣倒轉來教冊。就請教授介紹，家己一个人，走去後山的林田山林場食頭路。
當時的林場，已經改屬佇臺灣省政府的中興紙業公司。阮的工課就是監督山場的剉柴、集柴佮運柴的作業。工作場所是佇咧海拔差不多兩千六百公尺的懸山面頂。山頂剉落來的柴，經過裁剪佮集中了後，利用鐵路佮流籠的設備，共木材運落來山跤的looh-bah¹。彼陣的流籠有五段，每一段攏是直的，差不多攏會超過1,000公尺長，懸度精差一、兩百公尺。山頂的鐵枝路有三段，順山勢彎來斡去。總長度欲倚60公里。
山頂所運落來的柴差不多攏有兩、三噸重。流籠的運柴攏是靠柴本身的重量，對hat-sóo-tián²縋到tsiok-kuh-tián³，仝時陣共下面的空台車抑是坐人的車廂運起去流籠頭。安全的問題全愛靠面頂控制室的bu-lé-kih⁴佮uái仔索⁵。萬一若有意外，就會規組害了了。有一擺佇咧過年前，佇池南木瓜山的流籠就捌因為uái仔索斷去，規台柴車佮坐佇頂懸的17个人，挵甲碎糊糊，全部攏報銷去。
若講著鐵枝路的運材，上崎著愛靠蹦蹦仔車⁶來拖空車佮坐人的台車；落崎拖柴車的時，是靠柴車的重量佮車擋仔的控制。工作人員落山的時，會使坐一款有椅仔通坐的台車，坐的人家己控制速度莫行傷緊，著愛靠有經驗的老鳥來操作。若是車擋仔故障、抑是速度失控，就會跋落崁仔跤，無死嘛賰無半條命。上驚的是落大雨抑是地動了後，鐵枝路的地基有時會走精去，抑是巡邏人員巡無齊著，按呢代誌就大條矣。這款意外的代誌，定定攏會發生。
彼當陣，一個月至少攏會上、落山一擺，一年二十幾擺，五年就有規百擺。這當陣佇懸山剉柴已經全部禁止矣，生態環境袂閣受破壞矣，當時彼款的危險嘛無矣。毋過想起彼當時，家已少年戇膽，毋知通驚。這陣想起來，有影心頭猶閣膽膽。
¹looh-bah，木材集散地。 ⁴bu-lé-kih ，剎車。
²hat-sóo-tián ，發送點。 ⁵uái仔索，纜繩。
³tsiok-kuh-tián ，著地點。 ⁶蹦蹦仔(pōng-pōng-á)車。
(TOP)
古早人講:「姑疼孫，是骨頭親；姨疼孫，親像母親。」這句話的頂半段是講阿姑佮姪仔仝姓，因為血脈相連的緣故，致使大部分做人阿姑的，為著欲答謝爸母恩，攏會惜花連盆，閣較疼惜兄哥抑是小弟的囝兒。對外家的關心，絕對袂因為家己已經嫁出去就來減少。也就是按呢，姑疼孫，彼是對仝一款血脈延續落來的親情。
阮同事秀秀，外家佇彰化縣芬園鄉，佇學校，我和伊是一粒一的好朋友。秀秀是一位傳統保守、性情溫純的古意人。雖然爸母捌共伊講過：「後生得田園，查某囝得嫁粧，你後擺毋通轉來佮兄弟分…」遮的話，秀秀毋但無見怪，伊嘛無怨嘆。自從結婚了後，便若和伊講著後頭厝的事事項項，伊猶原會浮現出一份幸福佮歡喜的表情。
阿仁是伊後頭厝的大孫。為著欲提升這个姪仔的智識，秀秀佇伊讀國小五年的時陣，對庄跤共轉來北部伊服務的學校。伊用心栽培阿仁，共阿仁注入活水，予伊揣著自信。佇心肝底，伊是偌爾期待這个姪仔未來的人生會當是彩色的。伊共看顧後頭厝彼份深深的感情，換做對阿仁的疼惜佮關懷。
日子咧過誠緊，阿仁今年愛做兵矣。落部隊的時，真拄仔好，伊抽籤分發佇基隆。便若放假，阿仁就會轉來阿姑兜，因為阿姑煮的飯菜，予伊揣著厝裡的彼份感覺。阿姑的疼惜，會當穩定伊少年不安的情緒。收假的暗暝，秀秀攏會陪阿仁到車牌仔跤等車。這个時陣，伊一定會用溫暖的笑容問伊：「仁仔，你猶有所費無？」阿姑周至的心思，親切的聲調，予伊的內心浮起一陣一陣深深的感動！
車來矣，阿仁徛踮車內，阿姑親像慈母的形影，予伊的心肝頭燒烙燒烙。伊慢慢仔向窗仔外的阿姑擛手，阿姑毋甘的眼神，親像咧共伊講：「有歇睏愛閣轉來喔！」車牌仔跤的秀秀那擛手那頕頭。心肝底，伊向望外家這條割袂斷的血脈，會當代代生湠，一代一代傳承落去。
(TOP)
這站仔若駛車經過田園邊，黃錦錦的油菜花、『波斯菊』佮日頭花開甲滿四界。規大片的田園，變成五花十色花花的世界，庄跤景觀若像咧換新裝！這是會當做肥兼美觀，遮的花毋但會改變塗質爾爾，也已經是庄跤文化的主角。過年前後，慢冬稻仔若收成了，會掖一寡油菜花子，等待大欉開花，才軋軋做肥料。油菜花嘛會食得，阿母欲煮的時就會叫阮去挽，現挽現煮，食起來特別清甜。
『波斯菊』、日頭花會當帶予土地較濟的有機質，開始佇咧庄跤出現。加上農村旅遊風氣當咧時行，真濟鄉鎮公所攏鼓勵農民種日頭花、『波斯菊』，向望做當地的特色，建立無仝的農村景觀。沓沓仔日頭花毋但若有做肥的角色，閣有吸引遊客的「觀光價值」。
作穡人真艱苦，定定佇咧天拍殕光的時就愛去田裡作穡，犁田、佈田、薅草、挲草、巡田水、掘田岸、淹田、噴藥仔、趕鳥仔......。較早農村作穡攏是用人工，逐家相放伴割稻仔、佈田、挲草、割稻仔等等。起冬落冬，一大陣人那做那開講，笑聲傳千里，嘛若像是一場鬧熱的嘉年華會。
無電動機械的時代，割稻仔攏是靠人工。粟仔桶是用人咧拖：頭前兩个拖，後壁一个捒。粟仔機是用跤踏的。逐个人動作攏真緊，半行半走，那破豆¹那唱歌，嘻嘻嘩嘩，足鬧熱的。自農業進入工業社會了後，機械化無閣用人工矣，作穡人收入無法度飼一家口仔。
若是稻仔咧收成的時，我上期待的就是食割稻仔飯。大部份割稻仔攏是相放伴，主人會予做工課的人食點心、正頓、茶水。攏會驚輸人，會予人講話。準講若是予人講：「啊！某某人兜食上䆀！」按呢面子會盡掃落地。所以慷慨的主人，攏會攢上好的來予人食。
我真數念過去庄跤的生活，伊帶予我真濟回憶佮快樂。大自然的交響曲，農村的風情，已經攏消失去矣！捀一碗飯，坐佇田岸墘，目睭金金咧看天，看水雞、看田螺。稻草的芳味滿滿是，鳥仔來啄蟲、啄稻仔。新鮮的空氣，大自然土地的芳味，樸實的庄跤人。彼種情景，你若毋捌親身體會，是無法度了解的。佇庄跤稻仔收割的時，彼種稻草味真芳、真熟似，予人永遠難忘！
¹破豆(phò-tāu)
(TOP)
大概是受地球暖化的影響，不管時都會聽著世界各地天氣無正常，無應該落雪的顛倒落袂煞；規年迵天袂溶冰的所在，冰嘛開始咧溶，害北極熊強欲無地通討食。真正合著人講的：｢人若無照天理，天就無照甲子。」
講著咱臺灣，嘛仝款若像去掃著風颱尾咧。這幾年的熱天愈來愈熱，有當時仔予人熱甲擋袂牢，直直想欲去山頂歇涼渡假。可惜，若無長假通歇，干焦會使小可放輕鬆爾爾。若按呢，就愛好好仔計畫拍算一下，才會當歇會安心，耍會夠氣。
熱天作穡真艱苦，磕袂著就規身軀汗。毋過作穡不管時嘛咧流汗，袂感覺無爽快。若是拄著歇睏日，閣著規身軀汗，彼就真齷齪，予人心情袂輕鬆、身軀袂爽快，一定愛揣一个會當予我心涼脾土開的好所在小覕一下。這个時陣，我上愛去的就是「大雪山」，遐是離阮兜上近的懸山，真合去遐歇涼，消敨平常時仔的鬱悶，共心肝頭的坱埃洗予清氣清氣，心肝自然開闊，繼續迎接閣來的挑戰。
對阮厝到東勢15公里彼跤兜，離開大甲溪邊的大通路，斡倒爿駛對山裡去。遮是東勢往大雪山的路，入山15公里開始，沿路就有森林步道通行踏。規條路佮路邊的步道，有密喌喌的樹仔，沿路嘛有溪仔佮水沖，閣有臺灣種類上濟的鳥隻通好欣賞，真正是清涼的好所在。
東勢往大雪山的路裡，大約對17、8公里開始，路邊就有真濟遊客佇遐歇睏。有的泡茶，有的紮物件去遐食，嘛有人佇遐野餐煮好料的。有人用塑膠布苴咧，坐佇頂面那食物件那開講，也有人紮䖙椅來坐咧歇涼。閣較譀的，有人連thiàn-tooh都紮來遮睏中晝，五花十色，無奇不有。
大雪山是我熱人歇睏日上愛去的所在。車駛咧，成點鐘的時間就會當享受懸山的涼爽。另外一个原因，是去遐的消費上省，毋免入去到大雪山森林遊樂區內底，因為沿路就是一座天然的森林，哪著閣開錢買門票。飯丸紮一粒、水紮一罐，就會當歡歡喜喜消磨一工的時間，真正會和。
(TOP)
講著私奇，毋管是物件抑是錢，相信真濟人攏會真好玄。有人講，藏私奇是真正常的代誌，嘛有人認為，毋通掩掩揜揜，尤其對厝裡的人是欲藏啥私奇？總是，逐家攏有無仝的看法。
阿媽的老私奇是公開的，伊咧用的時，阮攏會佯毋知，想講阿媽歡喜就好，嘛袂去計較伊錢是開去佗位。阿爸講做序大人的，總是𠢕照顧囝兒序細抑是孫仔輩，阿媽按怎用攏有伊的道理。
阿公過身了後，漁保佮農會領的錢攏予阿媽做私奇，伊嘛閣有老人年金通領。毋過，阿爸兄弟姊妹嘛是攏會提錢予阿媽做所費。看伊欲食、欲用抑是欲四界佮人去遊覽，甚至做公益賑災濟貧，攏隨在伊去做。阿媽今年已經八十外矣，猶是逐工透早天未光、狗未吠，就起來拍外丹功。阿爸講：「規庄仔內的老歲仔，若是有咧做外丹功的，會使講一半以上攏是阿媽的學生。」雖然的姿勢無蓋標準，招式的名嘛才聽有。親像「雙手合十安神功」，講是咧搬布袋戲；「小仙鶴步」，講是機器人。毋過，總是有咧振動，對身體健康有幫助，會減少真濟辛苦病疼。
逐擺若看著阿媽，伊攏會問講：「乖孫的啊，你有愛食啥物無？冊愛好好仔讀，毋通佮人冤家喔！所費有夠通用無？來！阿媽遮的予你。你就去市仔口，揣看有啥好料的，通買一寡仔轉來予逐家食。」錢佇伊的橐袋仔底，親像袋袂牢仝款。
聽阿母講，阿媽是一个真精光的人。身軀邊雖然有淡薄仔私奇，但是攏用佇該用的所在。親像序細欲蓄財產、做生理，抑是孫仔輩欲讀冊、嫁娶，甚至親情朋友的人情世事，阿媽攏認為伊是大家長，愛來發落遮沓沓滴滴的代誌。為著無欲增加逐家的負擔，攏用伊的老私奇來處理遮的大細項工課。
所以講，阿媽的老私奇嘛是愛定定共添水佮加油。若無，有一工你若想著欲食啥物好料的，阿媽干焦會當牽你去街仔路看人買、看人食喔！講到遮，阮母仔囝是笑甲喙仔裂獅獅……。
(TOP)
以早逐家生活較艱苦，三頓食會飽就真好矣，無彼號冗剩錢通買糖仔餅，囡仔人當然嘛無所費通領。一直到讀國中的時嘛無家己的四秀仔錢。毋但我無，阮彼箍圍仔的囡仔伴逐家嘛攏橐袋仔袋磅子。
囡仔人上大的享受就是食四秀仔，閒閒罔啖糝偌好你敢知？無錢通買就想空想縫。厝裡煮食的烏糖、糖霜、配飯的菜脯、阿媽豉的梅仔，逐項攏通提來窒喙空。大人毋准囡仔食，囡仔只好偷食。有一日麗玲揣著寶：「阮阿母舊年豉一甕梅仔，藏佇眠床跤。昨昏我爬入去揣珠仔，去予我看著。今仔日我請恁來去食。」
聽著是梅仔，喙裡親像水泉溢滇滇，枵鬼瀾㴙㴙滴，一秒鐘都袂等得。三步走、兩步跳，去到麗玲兜。甕仔蓋拄拍開，逐家就相爭欲伸手入去撏。麗玲捀一塊碗公、一枝湯匙仔趕緊擋咧講：「袂使用手啦！規甕生菇我就害！垃圾手攏共我閃開！用湯匙𣁳啦！」
「足芳的呢！加𣁳寡啦！」
「𣁳五下有夠矣！小等阮阿母若知，袂予我遐好食睏！」
「遮大甕，看袂出來啦！」
「謼！恁咧偷食梅仔乎？我欲共阿母講！」
啥人知去予麗玲小弟阿源佮阮小弟阿坤掠包！驚做報馬仔，我趕緊共安搭：「逐家攏有通食，莫烏白講啦！小等咧阮欲去土地公廟遐放風吹，恁欲去無？』
「好！好！好！阿姊你愛做一隻風吹予我喔！」這兩个抓耙仔，愛哭閣愛綴路，今仔日算好運。去到土地公廟的榕仔樹跤，逐家那食梅仔那做風吹。「喔！麗玲恁阿母豉的梅仔加真好食呢！無像阮阿母豉的遐鹹！」逐家一粒閣一粒，愈食愈紲喙。喙無閒，手嘛無停咧削竹片、鉸紙、縛索仔。
阿坤講：「阿姐！我的風吹愛有長長長的尾溜喔！」
阿源雄雄大聲喝：「恁攏食遐濟！遮的梅仔湯愛予阮兩个食。」阿源佮阿坤碗公捀咧就走入去土地公廟內底。等風吹拄做好，我聽著麗玲大聲咧喝：「這兩个吵班的哪會睏去啦！閣規面紅絳絳呢！」原來彼甕是梅仔酒，兩个啉甲酒醉去矣！免講，阮遮做人兄姊的，轉去就有一頓粗飽矣。
(TOP)
(轉去主目錄)
無錄音檔通用.