2015
07021017104 年全國語文競賽-閩南語朗讀文章（高中職組）
104 年全國語文競賽-閩南語朗讀文章（高中職組）
01 油桐花，開矣未 陳文和
02 彼年的熱天 蔡幸紋
03 日頭落山 陳韋豪
04 香燈跤 鄭家和
05 彩券 陳士彰
06 夢中的大瓦厝 莊桂英
07 烏膽石 王秀容
08 佮咱臺灣囡仔講母語 丁鳳珍
09 阿母的相機 蔡連真
10 錢筒仔 林桂鄉
=======================================
01 油桐花，開矣未 陳文和
一蕊油桐花親像咧創治仝款飄落來，先是摸著伊的肩胛頭，閣來作孽落落來，拄拄好落佇伊對褲袋仔撏出來準備欲聽的手機仔頂面。嘛毋知是因為手機的震動，抑是民興仔掀蓋的動作，白鑠鑠、當豔的油桐花，就按呢落落來，好親像咧和微微仔風跳完最後一條哀歌仝款，倒轉去伊原本的眠床──大地。
看來，油桐嘛知，這毋是五月山林的婚禮，煞是最後的嘛是上媠的告別式，親像無偌久進前才落土的阿爸，親像咧思念阿爸佮伊較早的年代……。
阿母一直佇伊的身軀邊，無聲無說、戇神戇神，恬恬仔綴民興仔行。
手機仔接著了後，民興親像行轉去『時光隧道』，伊仙想都想袂到敲來的人，竟然是二十幾年無聯絡的尤老師，伊又閣驚惶又閣歡喜……。
「油桐花，開矣未？」
阿爸的後事無閒煞了後，民興定定一个人坐佇山坡頂，一下坐就是規下晡；目睭內干焦有滿山的油桐，頭殼內是一片空白，心肝頭就算講有挐氅氅的煩惱，總是按怎都捎無摠。
阿母知影伊心煩，就無去攪吵伊，嘛一个人坐佇伊尻川後的大埕邊，一欉大欉樟仔樹跤，遠遠共伊看。
一對母仔囝就按呢犀牛照角，相對相，恬恬無講話。
有時陣，民興的牽手昭枝仔會出來招呼一下，捀一杯茶予啉。兩个才起來行行咧，看一下，互相笑一下，問幾句仔閒仔話，閣再坐倒轉去。
毋過，嘛是著面對現實，該來的總是閃袂開，問題毋是放咧就會自動消失。就佇民興準備欲轉去臺北上班的下晡，阿母煞尾猶是先開喙矣。
「阿興，你放心轉去上班，厝裡的代誌你免操煩。」
阿母雖然共話講甲足輕鬆，毋過民興按怎會當無管，按怎會當放心。總是伊喙內的「厝」，對阿爸走了後，就賰伊孤孤單單一个人爾爾。
民興越頭走揣阿母的聲，干焦看著伊的頭毛攏白蔥蔥矣，親像油桐花，又閣全無彼款青春的模樣。手底咧弄一粒油桐果，焦焦扁扁，親像阿母的面，規个勼做一丸，直的、橫的皺痕，是歲月雕刻出來的。皺痕愈深，風霜愈厚；皺痕愈濟，滄桑愈濟。
(TOP)
02 彼年的熱天 蔡幸紋
暗時食飯，靜文的細粒子阿母攢甲規桌頂的菜，腥臊甲，有炕肉滷豆乾、芹菜炒鯊魚皮、破布子炊南洋鮘仔、糋花枝丸、煎牛肉，閣有一大𥐵仔煠甲紅絳絳的蝦仔，參一大碗公筍仔魚丸湯。
「喔！攢甲遮豐沛，今仔日是有人客欲來咱兜[ ] ¹?靜文用手拈一粒花枝丸窒入去喙空。
「緊共菜捀落去樓跤，叫恁阿爸好入來食飯矣！」款甲規桌頂的菜，阿母猶閣佇灶跤咧無閒。
靜文的阿爸上大的趣味就是屈佇公園，毋是佮人行棋就是佮人開講講政治，顧公園袂輸咧顧兜仝款，天暗矣猶毋知欲入來食飯，逐遍攏著愛靜文佇門跤口喝甲大細聲：「阿爸～食～飯～矣～！」喝甲規公園的人攏知影靜文兜欲食飯矣。
靜文看著規桌頂滇滿滿攏是伊愛食的菜，予伊想起四年前，伊欲讀大學，去臺北讀冊的前一暝，阿母嘛是炒甲規桌頂的菜，叫伊蝦仔佮魚仔愛加食寡，驚伊佇外口無機會通食著海產。時間過了真緊，四冬一目𥍉就按呢過去矣。
靜文是厝裡的孤查某囝，所以自伊去臺北讀冊，阿爸、阿母加足孤單。靜文雖然有時放假會轉來高雄，毋過若是拄著學校代誌無閒、無拄好的時陣，成個月嘛無通轉來一逝。阿母若等無伊轉來，就會假無意敲電話予靜文， 哩哩囉囉講一寡有的無的，上尾仔一定會問伊這禮拜敢會轉來?
大學畢業搬轉來故鄉的頭一暝，靜文倒佇眠床頂反來反去，想起大學四年的生活已經結束矣。做欲二十冬的學生，佇遮暫時到一个坎站，紲落來欲按怎，靜文猶是捎無摠。窗仔外落霎霎仔雨，一片茫茫霧霧，毋過翕熱的燒氣變甲淡薄仔清涼，猶算袂䆀。靜文若想著後禮拜欲去國校仔報到的代誌，目睭就開始沙微……
「欸！你猶閣咧睏喔！你今仔日透早毋是愛去學校報到？你這个囡仔哪會按呢無要無緊，頭一遍去人遐毋著愛較謹慎咧，毋著較早起來準備，無，到時陣若袂赴，看是欲按怎？」
靜文予阿母喝一下，驚一趒。趕緊起來看時鐘，才六點，無毋著！透早六點！靜文欲去國校仔報到的時間是九點，對兜去到國校仔騎『oo-tóo-bái』只要兩分鐘，怙行的極加五分鐘。靜文用棉被掩咧繼續睏！
¹[ ] (hiooh/siooh)
(TOP)
03 日頭落山 陳韋¹豪
可能真濟人捌跋落去水底，尤其對像我這種自細漢袂曉泅水的囡仔來講，每一擺落水就親像咧拚生死仝款。水底是另外一个世界，是一个無重量、無空氣、無時間的空間，所有的聲音佇水底若親像攏無存在，水底是一个真恬靜的世界。
雖然我自本就袂曉泅水，毋過我是真愛耍水。每一年的熱人，我攏會招朋友做伙去阮兜附近的公立游泳池浸水，幻想家己是佇宇宙間漂流。
2007年的熱人，大概是八月底啦！阮四个朋友相招去花蓮旅行，按算欲用五工的時間共花蓮、臺東行透透。阮行的路線真長，差不多共花蓮縣踅一輾。
佇花蓮市租車出發，第一工先去光復，暗時參加太巴塱²部落的豐年祭。這是阿美族上大的一个祭典，有真濟外地遊客來參加。當地原住民的婦人人非常熱心共阮紹介阿美族的舞蹈佮文化，原本掠準家己對臺灣原住民的文化已經有一點仔了解，這个時陣才知影原來這攏是阮家己想的爾爾。
紲落來是去水尾、富里、池上、三仙台，閣走濱海公路踅轉去花蓮。
前一工阮蹛佇臺東三仙台邊仔的民宿，隔轉工是計畫欲去秀姑巒溪『泛舟』。想著欲『泛舟』雖然心肝內真歡喜，毋過嘛淡薄仔驚驚。較早捌聽過真濟『泛舟』的代誌，有人講安全，嘛有人講危險，家己總是有一種不安的感覺。毋過東部燒熱的天氣予人頭殼楞，阮已經予日頭曝三工矣，會當落水當然嘛袂閣想遐濟。
秀姑巒溪的出海口是長虹橋，離三仙台騎『oo-tóo-bái』愛兩點外鐘。阮愛佇透早七點半進前趕到位，會有專車佇遐接阮。所以這工透早天猶未光，差不多五點半的時陣，逐家綴慢慢仔浮起來的日頭做伙出發。西部的臺灣人攏捌看過日頭落海的畫面，毋過真罕得看過日頭對海面浮出來，到欲暗仔，日頭才會真正「落山」。
我細漢的時陣定定感覺憢疑，想講明明是「日頭落海」，是按怎臺灣話哪會講「日頭落山」？敢講這句話是對後山傳過去的？
¹韋(uî)
²太巴塱(Ta-pá-lóng)
(TOP)
04 香燈跤 鄭家和
手攑鼓仔燈、香旗，一步一步綴媽祖婆出巡，就是香燈跤。佇較早交通無利便的時代，進香攏用行的，除了是體力的考驗，嘛是精神的磨練。佇進香客內底，有的是下願綴媽祖出巡踩街的；有的無求啥物，甘願綴媽祖婆行千里路的。今年拄仔好有機會來做大學生代表的香燈跤，是一款文化的體驗，嘛是一種無仝款的「轉大人」儀式。
自細漢，我就是媽祖婆的信徒，伊是我心靈的寄託，有真濟祕密伊攏知影，我知影伊袂過喙。較早神明一直是逐家的心理治療師。伊勸善教化人心，予咱有人生的方向，袂親像揣無燈塔的船隻，佇大海沐沐泅。伊慈祥的造型佮面容，可比是咱慈愛的母親，所以有真濟人共伊號做「媽祖婆」。咱臺灣人，有海洋國家的民族性，信仰誠虔誠，毋管是南部沿海地區的送王儀式，抑是各地方鬧熱滾滾的大拜拜，攏表現咱臺灣人對宗教信仰的熱情，一點仔都袂輸外國的嘉年華會。大甲媽起駕進前的幾點鐘，各地方的陣頭、曲館攏來鬥鬧熱佮拚場。親像內門的宋江陣、外埔的義虎團，閣有來送媽祖婆出大甲城，拍算欲行八工七暝的進香客，早早就往新港的方向行去矣。有的人拖菜籃仔，有的人騎跤踏車，看這一大陣人，愈行愈遠。我算是頭一擺參加，閣毋知影做一个香燈跤的鋩角，阮攏毋捌經驗過，佇進香的路途中，一直想欲放棄，毋過「媽祖婆，疼戇人」，攏有好心的阿叔、阿姨共阮鬥加油佮鼓勵。
大甲媽起駕了後，攏是透暝趕路，有經驗的香燈跤，早就行到下一个鄉鎮去補眠矣！好佳哉我有勇壯的身體通倚靠，對大甲行到沙鹿，天拄拍殕仔光，食著燒燙燙的饅頭、豆奶，精神規个好起來！天光，代表一工的開始，阮定定講：「今仔日閣愛看日出矣！」就是講「拚暝工」的意思。進香的時陣，阮也定定講：「今仔日閣愛看日出矣！」因為知影，今仔日又閣愛行到天光。一路阮攑香旗，沿路所經過的廟寺，攏會縛一張符仔佮頓廟的宮印。有的人行幾若冬，彼支香旗，就綴幾若擺，閣經過香煙的加持，舊舊、烏烏的旗仔，就變成上有價值的紀念品。
(TOP)
05 彩券 陳士彰
舊年的年底，我佇教育局服務的單位，著愛落去高雄參觀訪問。遊覽車沿路幌過來又閣幌過去，一粒頭是楞捙捙。到高雄了後，欲去訪問的學校，是一間紲接一間。除了欣賞逐間學校佇本土語言教學的成果，佮聽一大堆簡報以外，猶有寫袂了的資料佮報告。
對透早到下暗，上車、落車、目睭看、耳空聽、手又閣愛寫，三日落來，身軀的厭𤺪，實在是食袂焦。免講換眠床就咧歹睏矣，連食飯嘛攏無滋無味。
領隊的陳校長(尻脊後阮攏叫伊頭家)，為著體貼阮的辛苦，佇落尾一日的下昏，特別安排去愛河邊一間餐廳，除了享受真腥臊的料理，猶閣會當欣賞規條愛河，充滿『羅曼蒂克』氣氛的夜景。耳空聽著優美的古典音樂，身軀承受微微仔吹的涼風，予緊張束縛的精神，攏總輕鬆落來。
佇阮所有的人，猶深深沉迷佇咧輕鬆氣氛的時，一位行動不便的『歐吉桑¹』，坐佇電動輪椅頂頭，無聲無說就駛對阮坐的位來，予阮逐家雄雄掣一趒。老大人的車頂囥一疊彩券，來到阮中間，共彩券褫開像一支葵扇，佇眾人的面頭前擛一下擛一下：「頭家！拜託買一張！」彼種的「起毛」，完全拍歹拄才幽雅的情調。有兩、三位同事忍受袂牢，就行去愛河岸邊。
雖然無人欲插伊，彼位『歐吉桑』猶閣是袂死心，輪椅一直佇阮的四箍輾轉踅來踅去。伊來到我的面頭前，對我的面擛風：「頭家！一張才五十箍爾爾，拜託買一張啦！」
我共伊指對陳校長遐去：「頭家佇遐，你叫伊買。」逐家看我一擺創治兩个人，攏笑甲攬腹肚。
我從到今攏毋捌買過彩券，因為知影家己並無彼款運氣。親像過去，若是咧對發票，到今嘛無著甲半擺，連啥物叫做著兩百箍的滋味，都毋捌鼻過。總是看一个行動不便的老大人，猶閣咧靠賣彩券來度生活，想起來嘛是真可憐。彼當時我也有淡薄軟心，就寬寬仔對褲袋仔撏五十箍出來：「我買一張！」其實我是向望伊趕緊離開，毋通共阮一直囉。
¹歐吉桑(oo-jí-sáng)
(TOP)
06 夢中的大瓦厝 莊桂英
昨暝，我又閣轉去阮兜的大瓦厝。
門口彼欉榕仔足大欉，青色的樹葉仔發甲密密密。
榕仔的後壁，是兩間灶跤干焦用足低的牆仔圍咧，會當相通、相看。
灶跤的後壁是浴間仔。浴間仔的外口是一个長株形的大水池，半暝的時陣，所有的新婦攏佇遮舀水洗衫兼開講，定定聽著足歡喜的笑聲。
水池閣入去才是阮兜的大瓦厝，倒手爿有三間房間，正手爿嘛有三間房間。倒手爿上尾間是阿媽的灶跤，閣來是細漢阿姑的房間，頭前間是阮兜六个人的總鋪，爸爸排第四。
正手爿第一間是阿公阿媽的房間，閣過來是阿公共人看病開藥仔的所在，有一塊匾頂懸寫「文秀國術館」。阿公是一位功夫真厲害的師傅，會曉拍拳、點穴，伊的藥仔會當治療足濟歹醫的病。阿公過身了後，爸爸六个兄弟仔就是佇遮抽鬮仔分土地。逐家攏照抽的來行，無人有別款話。
阿公的手尾──國術館放予五叔仔，因為伊的身體上䆀，袂當出去揣頭路，所以逐家攏同意將國術館予伊，閣佮一粒聽講是無價之寶的夜明珠。
第三間是籠仔工場的工人蹛的房間。
中央的大埕是阿爸兄弟仔做伙煉膏藥的所在，也是練功夫拍拳頭的所在。佇阿公猶閣佇咧的時，姓莊的宋江陣就佇阮兜的門口埕練習。阿公過身了後，換五叔仔佇遐教徒弟。大埕是逐家公家的，若較燒熱的時陣，就會當看著十幾个囡仔佇遐耍「過五關」、「蹌跤雞」、『一二三木頭人』，猶有五、六个新婦佇遐披衫、曝被單、曝棉襀被；過年前用竹篙曝肉乾、魚脯、煙腸，規个埕曝甲滿滿是。
年仔節仔，會佇大埕囥兩塊圓桌仔，每一个新婦會先佇家己的灶跤煮菜，尾仔才捀來囥踮埕裡的兩塊圓桌仔頂。無排椅仔，大人囡仔攏徛咧食，對這桌食到彼桌。我上愛食米粉炒，二姆仔的米粉炒真正足好食；阿母煮的瓜仔雞芳kòng-kòng，芳過幾若條街；三姆仔做的八寶丸比菜市仔賣的閣較好食。逐家食飯配話，連月娘有出來無，都無人會發現；有放炮無放炮，嘛無人會注意著。
(TOP)
07 烏膽石 王秀容
無偌久以前，無偌遠的所在，臺灣的東海岸，有誠濟囡仔歇熱嘛足無閒的。逐工除了浸佇海裡，黏佇海岸，就親像是野馬走山坪，揣山頂好食好耍的物件。
日頭大大大，海風吹袂煞，公路邊兩爿的枇杷樹葉仔闊闊闊、密密密，草仔曝甲焦焦焦，雞仔鳥仔，透早起來叫一站仔，就熱甲吼袂出聲。空氣是鹹的，風是恬的，身軀是黏的。囡仔人就規氣莫穿衫，放身軀的排骨仔隊，頭殼的金光槌佮日頭相對，曝甲烏金仔烏金，袂輸這箍圍的海邊仔才有的烏膽石。除了喙齒白白，就賰彼兩粒目睭大大蕊，像太平洋的海面，光光爍爍，深深媠媠。
烏膽石的囡仔，誠實有一項烏膽石的工課。
「緊，緊，緊！利理¹，來去趁讀冊錢喔！跤手慢鈍，會袂赴市喔！」同伴咧喝的聲就若像佇曠闊的大海霆水螺，較遠嘛聽有。
利理¹的名是阿爸號的。伊出世的時，阿爸聽著囡仔的吼聲，攑頭感謝天，頕頭感謝地，越頭看著壁角一桶伊自細漢抾的烏膽石，就共伊的寶貝仔囝，號做利理烏膽石，向望伊會當像烏膽石仝款，經過海湧的艱難，磨出特別的光焱，向望伊毋管行到佗，攏會想著故鄉海湧的聲。
秀姑巒溪口有大大粒若玉仔的石頭，太魯閣有出名的大理石，東海岸干焦這搭有烏膽石。講嘛奇，今年歇熱，有生理人，來庄頭講欲用錢收烏膽石。一陣囡仔，攏走去抾烏膽石來賣，通鬥塌冊錢。抾甲差不多的時，囡仔人就開始耍囉！
「咱共烏膽石疊做尖塔，佇上尖的所在，囥一粒海螺仔殼，看啥物人搩著彼粒海螺仔殼，逐家就愛予伊一粒烏膽石。」
「袂當偷食步喔。」
五六个囡仔，十幾蕊目睭，斟酌咧相彼粒海螺仔殼。有人擲無著的時，邊仔的人就大聲拍噗仔。
日頭猶是大大大，烏膽石這擺佮耍煞，就會予人載去都市過生活。伊敢會想起故鄉日頭曝海岸，海風吹山坪？伊敢會聽著海湧的聲？
¹利理，阿美族音lili，黑膽石。
(TOP)
08 佮咱臺灣囡仔講母語 丁鳳珍
「喔！我聽恁兩个囡仔臺語講甲遮爾好，實在誠歡喜。」阮朋友喙笑目笑，按呢共我講。彼當陣阮查某囝佮阮後生當咧用臺語開講。
因為阮囝攏用臺語咧開講，所以阮並無感覺特別。毋過，其他的臺灣人若是聽著，定定攏會感覺蓋心適抑是真好玄。
親像有一擺，阮去買衫，店員聽著兩个囡仔用臺語咧討論欲買佗一領衫，竟然歡喜甲傱去共同事講：「你緊來聽！的臺語講甲誠好呢！」阮囝袂輸是外星人，不sám時攏會予臺灣人當做是真稀罕的生物咧欣賞抑是討論。
講遐爾濟，逐家無的確叫是我這个做人老母的咧展寶。事實是，我煞感覺真悲哀，因為，咱的母語已經無幾个臺灣囡仔咧講矣。等到阮孫彼代，咱的母語毋知會落魄到啥物款的地步咧？
當初時，咱的爸母真簡單就共母語傳予咱。所以，若是欲問：阮兜是按怎會當予囡仔講臺語講甲遮爾自然？其實嘛無啥物撇步，就是開喙佮囡仔講臺語，鼓勵囡仔用臺語講話爾爾。
若講有較特別的，凡勢是阮囝會曉讀寫臺語羅馬字這層代誌。自國小一年仔開始，我就教阮查某囝認捌臺語羅馬字，所以伊有才調用羅馬字寫臺語文，嘛負責教小弟羅馬字。
佇國小攏捌參加學校的客語社團，嘛有代表學校去參加臺中市語文比賽的客語朗讀抑是演講，因為的客語老師誠𠢕教，所以敢開喙講客語。後來，阮母仔囝閣去參加客委會主辦的客家語言能力認證，這馬已經通過中級矣。
因為會曉羅馬字，毋但予阮囝學客語加真利便，也幫贊學英語，佇國小的時攏捌代表學校，去參加「亞卓市」(A-toh-tshī)全國英語拼字比賽，攏有著等。
咱大人定定驚這驚彼，欲學新的物件就加真困難；囡仔真單純，學習能力閣強，若予自然的母語學習環境，就會當講甲足好。
咱臺灣囡仔若是會曉母語，的世界就會閣較開闊、閣較心適、閣較溫柔。遮爾好的代誌，咱就愛手牽手，鬥陣來拍拚才著啊！
(TOP)
09 阿母的相機 蔡連真
「看遮、看遮，笑一个五仙喔！」講著這陣的社會，毋管手機仔、平板電腦抑是相機，無論大人抑是囡仔，攏提佇手裡。若想欲翕相，行到遐、翕到遐，袂輸咧食雞肉飯遐簡單。講著翕相，莫講是專家才會曉，相信這馬無人袂曉翕相的。毋過，世間的代誌真歹料想，莫保證有較好，較袂予人掠包。凡勢別人毋知，阮阿兄佮阿姊就先共我落氣矣。
阮阿母彼台傳統式的翕相機，是猶未結婚進前去日本𨑨迌買轉來的紀念物。因為是過鹹水的，所以特別珍惜。毋但毋甘用，甚至欲用嘛袂記得欲按怎用。講到遮逐家就知影阮阿母彼台翕相機，囥到這馬應該是會當算古董級的傳家寶矣。
毋管別人看阿母是媠抑是䆀，我攏感覺阿母生做真好看。雖然無真懸大，毋過，體型瘦抽仔瘦抽袂大箍，捌伊的人攏真呵咾，講伊溫柔體貼，欣羨阮阿爸是前世燒好香，才會當娶著這个媠某。講到遮相信恁攏佮我仝款，掠準是阿母一定真愛翕相，會四界去翕，留真濟相片來做紀念。若按呢，絕對毋是恁的想法毋著，是阮阿母傷古板啦！
本底，買彼台相機嘛知影伊袂曉翕相，但是嘛抱著真大的希望，毋但欲留做嫁妝，嘛向望會當嫁一个真𠢕翕相閣真愛翕相的翁婿，會當隨時為伊留真濟有紀念性的相片落來。哪會知揀啊揀，揀著一个賣龍眼的，阮阿爸對相機仝款真外行。就按呢，一晃過三冬，三晃就一世人，彼台相機煞真正囥踮壁櫥做古董矣。
講阿母袂曉翕相，毋是咧共落氣，實在是阮兜閒閒咧開講的一个話題。阿兄大學畢業典禮佮同學做伙欲翕相，提新型的相機拜託阿母翕，阿母毋知影愛看面板煞對鏡頭一直相，相規晡一直喝講啥物都無看著欲按怎翕？予規陣的大學生笑甲險徛袂在，阿母一个面是紅紅紅，袂輸關公咧。
到今，若閣看著壁櫥內彼台過鹹水的相機，毋知阿母心肝內有啥款的感想？總是，人攏是愛綴時行的，這馬阿母雖然無咧用伊彼台老嫁妝的相機，毋過，已經會曉用手機仔翕相矣，這嘛是一種活到老、學到老的精神，敢毋是咧？
(TOP)
10 錢筒仔 林桂鄉
人講：「勤儉較有底，浪費不成家。」阮從細漢爸母就不時按呢教示阮。佇往擺的農村，作穡人跤手攏真欠缺，差不多入小學開始，阮就有機會通做囡仔工，會當趁錢做所費。祧仔內有大伯、二伯佮阿爸。過祧的有大叔、二叔佮三叔。前後兩棟正身護龍，仝款三兄弟、仝款攏作穡。大人會派工課予阮做，囡仔人有伴就歡喜，閣有錢通趁，逐家嘛攏興tshih-tshih。無論薅草、擘甘蔗箬、洗蔥、挽菊花，托洛神花，攏做甲真骨力。囡仔人有錢通趁，序大人就用心計較，愛囡仔共錢儉起來。
儉錢就袂當無錢筒仔。阿玲的錢筒仔是一隻透明的塑膠豬公，腹肚內有偌濟財產清清楚楚，逐擺遠遠聽著賣pā-pu的聲，伊就擋袂牢。豬公𢯾咧，提一枝箸拚性命挖。阿芬的錢筒仔是瓷仔做的『大同寶寶』，跤底會落財，所以永遠就食袂飽。阿美的錢筒仔是阿母，錢儉入去就領袂出來，見擺逐家買四秀仔，伊干焦會當吞喙瀾，定定怨嘆阿母親像欶血的牛螕。我的錢筒仔是阿爸去鋸的竹管，頂節留兩寸長，鑽空掛佇壁頂，竹管頂鋸一逝縫橐錢。我真拍拚做工、趁來的一仙五厘攏儉起來，三五月日就共一管錢筒仔貯甲滇滿滿。
阿爸夯柴刀將錢筒仔破做爿，所有的銀角仔親像放出籠的鳥仔，行東往西硞硞輾。我十个十个那疊那算，親像有金山銀山的好額人遐爾歡喜，一遍閣一遍仙算嘛袂𤺪。抾幾箍銀起來買四秀仔慰勞家己，賰的攏提予阿母去農會寄。新的錢筒仔又閣開始陪我招財進寶。
阿爸上愛四界展風神講：「阮阿如上愛讀冊，學費攏伊家己趁的，伊儉錢欲讀甲博士博。」逐个阿叔、阿伯嘛攏贊聲掛保證：「三歲牢皮、五歲牢骨，咱阿如毋但𠢕讀冊，做工課嘛是削削叫，後擺一定是狀元才。」就按呢我誠拚勢，儉錢、讀冊攏欲搶第一。錢筒仔貯滿一个閣一个，獎狀領過一張閣一張。佇我的記持內底，嘛儉著序大予我濟濟的牽教佮肯定，彼是我上蓋價值的私奇，予我感覺家己的人生是遮爾仔好額。
(TOP)
沒有留言:
張貼留言