2013
07031112102 年閩南語朗讀文章-國小學生組
102 年閩南語朗讀文章-國小學生組 (原稿下載)[真平聲音檔下載](回102 年閩南語朗讀文章目錄)
1.予阿母的一張批 劉育君
2.行出紗窗的少年烏貓兄 王薈雯
3.批 吳嘉芬
4.阮兜這隻可愛的戇狗 黃惠玉
5.阿公的竹椅仔 蘇毓涵
6.阿母讀冊記 李月瑛
7.阿爸，請你愛緊好起來 鄭昱蘋1
8.放學了後 游蒼林
==============================================
阿母：
這是我頭一擺會想欲主動寫批予你。舊年，是我食遮爾大漢頭一擺離開厝到外地讀冊，無法度逐工陪伴佇你身軀邊。也因為離開厝，久久才轉去一擺，我才會當開始體會著你對我的關愛。每一擺若轉去厝，你攏會煮我上愛食的菜、準備我上愛食的物件。你嘛會定定注意我需要啥、欠啥，無嫌艱苦抑是麻煩，攏會𤆬我去買。
像咱這種傳統的家庭，互相表達關懷是遐爾頇顢，干焦會曉用責備的口氣來表示家己的關心。逐擺聽你的口氣，攏予我感覺心情無好，親像無受著關心，但是我攏會共家己講：「這是阿母關心我的方式爾爾。」親像頂學期尾，明明都感冒矣，閣硬欲拖到一禮拜後，病甲足嚴重，轉去厝才予醫生看。你足受氣，罵我講毋知影代誌的嚴重性。彼擺我就恬恬仔予你罵，因為你會遮爾受氣，就是表示你對我袂曉好好仔照顧家己，是偌爾煩惱。其實，我對你的關心嘛是按呢，攏袂表現出家己內心真正的想法。會記得以早你開刀蹛院的時陣，我心內足煩惱的，毋過我毋敢表現出來，抑是講出來。便若有人欲去看你，我逐逝攏綴去，去遐嘛無創啥，干焦佇你的邊仔踅來踅去。雖然按呢，毋過，我知影咱其實攏足愛對方，只是歹勢表達出來爾爾。
咱兜本底無咧過母親節，但是，今年總是感覺應該愛轉去，上無，嘛愛送一个物件、抑是寄一張批予你。但是等我有這款想法的時，母親節已經欲過矣，等我寄到厝嘛袂赴矣。彼工接著厝裡的電話，敲來的是阿爸，毋是「母親」，我仝款感覺足心酸的，雄雄感覺無轉去厝誠不應該，這是我到今頭一擺因為無轉去，煞想欲流目屎的經驗。
離開厝來遮生活，予我真正看著你對我的愛，我嘛才知影其實咱互相對待的方式對以早到這馬有沓沓仔改變，上無講話的口氣有較平順、溫柔，但是仝款袂直接講出「愛」。我相信咱攏一直佇咧改變家己，我有明顯看著、感受著。無要緊，時間慢慢仔會共咱改變。佇遮因為看袂著你，我會當毋驚歹勢，勇敢、大聲共你講：「阿母，我愛你！」
(TOP)
2.行出紗窗的少年烏貓兄 王薈雯
十八歲的熱天，我轉去彼个有柚仔芳的所在，透天厝覕佇柴仔店彼條巷仔內，講袂輾轉的柚仔話。我裂破番仔契，過我的都市庄跤生活。
一个人蹛佇誠闊的透天厝，我倒佇客廳冰冰的『thài-lù』頂面。半暝，想起細漢就離開的柚仔城，已經十年無閣轉來。都市人的腹肚敢會堪得枵甲天光？我穿對高雄紮來的淺拖，順柴仔店口的巷仔一直行，才看著若像熟似的街仔頂青青紅紅的『看板1』，鬧熱的情形予我發現都市的生活，佇我無佇咧的時陣，已經改變柚仔城。
我𤆬來的「緣投的」坐佇二樓窗仔口咧看門口遐的阿婆開講。毋是「緣投的」耳仔好、目睭金，是柴仔巷內底貓味傷重，予這隻烏貓一下入柴仔巷，就數想欲出去熟似新的貓仔伴。
「緣投的」佇我的紗窗挖一个空，逐工自由出入二樓的窗仔，干焦腹肚枵才欲轉來食暗。透早出去，到半暝才轉來。中秋彼工的暗瞑睏袂去，看「緣投的」佇鐵棟2頂行來行去，按怎叫都叫袂轉來。轉來柚仔城的孤單閣加一項：予貓仔放捒。
隔轉工聽著「緣投的」的叫聲，喓！喓！我傱去二樓，拍開向西的鋁窗。敢是「緣投的」𨑨迌了忝，轉來咧討食？
「走！走！走！」我傱過對面紅色鐵門的厝，大聲共遐的野貓趕走。「緣投的」予圍佇中央，勇仔佇邊仔講低低的貓話，差不多七、八隻𨑨迌仔貓替勇仔咧包圍「緣投的」。我趕緊走過去替「緣投的」解圍，驚伊予遮个貓仔鱸鰻欺負。勇仔是柴仔店巷的貓仔王，算是上大尾的鱸鰻，莫講貓仔驚伊，連『oo-tóo-bái』都愛閃伊。伊嘛毋是啥物緣投少年兄，年歲敢也半老老3矣，毋過漢草真勇，色水大範，佮虎仝款花。伊的邊仔定定綴五、六隻細隻鱸鰻貓公，規陣佇遮咧欺負別人。
毋過「緣投的」嘛毋是簡單的人物，莫講貓範將才，翹上天的烏尾，瘦瘦的體格，鳥仔看著伊嘛會挵著電火柱。而且「緣投的」是少年烏貓兄，跤手真猛，會當算台灣第一勇的烏貓兄，都市來的烏貓，開始佇柴仔店巷咧爭地盤、拚事業。
1看板(kha̋ng-páng)
2鐵棟(tàng)
3半老老(puànn-ló-lāu)
(TOP)
下班轉來，拄欲入門，看著門頂的「信箱」櫼甲滇滇滇，伸手共提出來。開門了後，巡看這堆是啥物？有水錢、電火錢的收據、兩間大賣場的廣告單、百貨公司週年慶1限時大拍賣、新開幕的自助餐大優待宣傳單……揣無一張是應該囥佇「信箱」內底的批。共這堆五花十色的紙，先擲桌頂，暗時仔食魚仔吮魚刺通用。若無，食西瓜呸子嘛好。
「信箱」內底無半張批，這个情形，毋知經過幾冬囉！
你有偌久毋捌攑筆寫批矣？寫予你思思念念的伊、寄予你遠遠的親情朋友。我若是共身軀邊的人問這个問題，總是予人笑講：「你是食飽傷閒咧換枵喔！這馬啥物時代矣，若有代誌，電話、手機仔一敲，隨就撨好勢；較重要的文件、資料抑是相片，電腦一開，「電子信箱」傳過去，一枝指頭仔就好勢矣；想欲聽著聲閣看著人，「即時通」隨應付你，寫批欲哪會赴市咧！」
毋知佮我仝款捌靠寫批解鄉愁、寄相思的你，彼當時敢想會著有一工，寄批毋免用批囊、貼郵票？如今，資訊發達的『e』世代，彼當陣的「筆友」早就無時行矣，這當陣流行的是「網友」。攑筆寫批對現代人來講，敢毋是閒甲掠蝨母相咬的人，才會做的戇代誌咧？
想著我頭一擺寫批，是替阿母寫予外媽。彼陣，我才欲讀小學二年，字捌無幾个，有的用注音寫，有的阿母教。阮阿母冊讀無濟，伊欲共外媽講的心內話，就一句一句唸予我聽，我一字一字勻勻仔寫。寫規半晡，一張批總算寫好勢，對臺東深山林內寄到嘉義的山頂尾溜，一來一去愛成個月是真正常的代誌。阮的批雖罔有貼郵票、寫住址，毋過，送批的會共仝庄頭的批，做伙囥佇街仔口𥴊仔店的「大信箱」，家己愛出去巡，共批提轉來，定定收著批，好歹代誌早就過去矣！知影嘛無路用。所以，真要緊的代誌就愛拍電報，往往聽著的，攏是親人過身的歹消息。
拄開始學寫批，也捌共寄批佮收批的住址寫顛倒反。隔幾日仔，閣收著家己寫欲寄予外媽的批，批囊予人頓「退回」，毋但了兩箍的郵票錢，閣險仔予阿母罵死。
1週年慶(tsiu-nî-khìng)
(TOP)
人講「貓來富，狗來起大厝」，毋過阮毋捌想過欲飼狗、飼貓，飼這隻狗是機緣。彼時陣阮小弟去予一个查某囡仔駛傷緊的車挵著，需要蹛院開刀。本底是有倩看護咧共伊顧，阮家己家婆想講：隔轉工是拜六佮禮拜有歇睏，就共看護講彼兩瞑阮家己來顧。真拄好，可能賊仔早就咧觀察阮兜矣！所以彼一暝阮厝就著賊偷矣。拜五暝轉去阿媽兜蹛的後生，透早轉來看著厝內挐氅氅，驚一趒，較緊敲電話予阮。就按呢，舞規半工，才處理好。包括報警、做筆錄、算損失、整理挐氅氅的內面。
就佇著賊偷的代誌發生無偌久，阮翁電廠的同事講欲送伊一隻『哈士奇』的狗。若佇較早，阮是絕對反對飼狗的，這隻狗好親像來了真拄好，厝裡的人攏想講：飼狗防賊仔，所以就共伊答應落來！
人是真奇怪的動物，佇阮細漢的時，阮嘛會記得講真愛飼狗，不時就要求阿母予阮飼，毋過阿母攏毋答應，吵幾擺了後，阮只好死心。等阮做人的阿母，阮囝也捌共阮吵講欲飼狗，毋過想著伊較早做的工課定定著愛阮替伊拭尻川佮飼狗的麻煩，阮就毋敢答應。所以阮囝嘛死心矣！若毋是這擺著賊偷，阮兜是無可能會飼狗的。
頭一擺看著這隻狗，阮是真佮意，因為伊實在有夠媠。毛――膨膨膨，身軀――圓圓圓；大部份毛跤是白色的，毛尾仔有插烏色；尻脊骿的毛烏殕金、烏殕金，除了有一條烏殕色的線框過以外，腹肚是全殕白的；膨獅獅的尾溜真大葩，伊不時共尾溜翹懸懸，有一種高貴大方的範勢；四肢跤若大柱。講著伊的面，喙䫌是白色的，對目睭跤周圍以上攏是殕烏色、殕烏色的框，看起來親像掛目鏡，真有智慧的款。目睭面頂有一个白點，看起來真歹。伊佮本土狗上無仝款的所在是：伊的目睭仁是淺藍色的，真罕見！阮一入門，伊就起來阮身軀共阮司奶，看著伊彼種無辜閣媠的面，阮就想欲共好好仔惜惜咧！
(TOP)
頂個月，阮轉去舊厝看阿媽，無意中煞來發現一條退色、頂懸全坱埃佮必巡，又閣斷一枝跤的竹椅仔，若像一个虛荏的老歲仔，恬恬倚佇壁邊。啊！彼是阿公猶閣佇咧的時，上佮意的竹椅仔！
會記得我細漢的時陣，看阿公三不五時會坐佇竹椅仔歇睏。伊就親像隱居佇山林內的雅士，遐爾仔清閒。阿公定定穿紗仔衫，目睭微微、文文仔笑，坐佇竹椅仔，手那擛檳榔扇那聽收音機，邊仔的嚷鬧攏袂共伊攪吵著，敢若是道行真深的高人遐爾清閒佮得定1。
每一擺我若去吵伊的時，伊攏嘛笑咪咪，毋捌受氣，閣會提幾个十箍的銀角仔予我，講是欲予我買冬瓜茶佮小妹做伙享受。我聽著真歡喜，隨提銀角仔，那跳那走去共小妹講這个好消息。姊妹仔三人就真樂暢，傱去𥴊仔店，阮ka̍h-ka̍h叫的笑聲強欲共厝瓦反過去，厝內的大人袂堪得吵，連鞭共阮阻擋。毋過阿公伊無受阮影響，又閣坐轉去伊的竹椅仔，享受伊予人拍斷的清閒。有當時仔阿公會共我抱起去坐佇伊的跤腿頂懸，共我講起較早的故事；有的我聽甲真心適，想欲知影閣較濟的故事，阿公嘛袂感覺煩，沓沓仔共我講古；有的故事我猶細漢，毋知伊的意思，攏聽無，無張持煞睏去，就算是按呢，阿公嘛袂受氣。閣有一擺，我無細膩跋倒，坐佇塗跤哭，哭甲流鼻流滴，哭甲規个面花巴哩貓嘛無愛起來，蝹佇塗跤一直躽，別人攏無我法。這个時陣，阿公就慢慢仔對椅仔起來，老神在在，寬寬仔、一步一步向我行來，伸出伊彼雙予人感覺安心的手，共我抱起來竹椅仔面頂，輕輕仔共我搭尻脊骿，一直到我無閣哭才停，閣提糖仔安搭我的心情。佇我的記持中，阿公一直是遐爾溫柔又閣閒仙仙，坐佇竹椅仔面頂。
有一工，我煞無看著平常時攏會坐佇竹椅仔面頂的阿公。我厝內厝外走傱，誠生狂咧四界揣阿公。厝裡的大人看我強欲哭出來的款，就趕緊共我講阿公破病，需要蹛病院，真緊就會轉來。毋過，對彼个時陣開始，我就毋捌閣看著阿公轉來矣。彼个疼孫的阿公已經離開我，只賰囥佇相片頭前的菊花，閣有彼條無人坐的竹椅仔。
1得定(tik-tiānn)
(TOP)
阿母自細漢就無讀冊，阿爸攏笑伊是「青盲牛」。阿母嘛定定講：「遮的囡仔讀冊的時，我若會曉綴讀，這馬毋知會加捌偌濟字咧！」阮讀冊的時，其實是阿母上無閒的時陣。規家伙仔遮爾濟人，阿母無閒這、無閒彼，哪有時間綴阮讀冊捌字？
阮兄弟姊妹畢業了後，結婚生囝，阿母就鬥𤆬孫；十外个孫，阿母濟少攏照顧有著。
後來阿爸破病以後，攏是阿母咧照顧，阮兄弟姊妹歇睏才轉去看阿爸和阿母。阿母定定講：「我若共老的照顧予好勢，遮的囡仔就免煩惱，才會當安心去拍拚。」
阿爸過身了後，阿母嘛蹛院兩禮拜，復健誠久才漸漸康健起來。這个期間，阿母搬厝，搬轉去外家彼个庄頭蹛，有幾个阿姨嘛蹛佇附近，互相照顧攏真方便。
舊年阿母看對面的小學又閣咧辦成人教育班，毋捌字的阿母想欲去讀冊又閣躊躇，驚講會讀無冊。後來因為阮逐家的鼓勵才報名，一班十外人，只有伊和另外兩位『oo-bá-sáng』是老人，賰的攏是外籍新娘。
逐擺我轉外家，食過中晝，阿母攏袂顧得去歇睏一下，趕緊搝我共伊鬥看功課，字有寫毋著無？課文有唸毋著無？阿母寫字真慢，總是一劃一劃沓沓仔寫。伊的字寫甲足整齊，我呵咾伊真正是一个好學生，頂擺轉去刁工包一包紅包予伊做獎學金。阿母雖然講毋免啦，捒規半晡，落尾猶是歡歡喜喜共收起來！
大伯前一站仔問我阿母敢好？我共伊講，阮阿母除了運動、參加庄頭的活動、定定和兩三个阿姨同齊煮手路菜鬥陣食，閣去讀冊呢！而且是「負責」得全勤獎獎狀的喔！大伯笑講：「按呢會閣較少年！」
我轉外家學予阿母聽，順紲鼓勵伊愛繼續讀落去。阿母真歡喜，講：「我當然愛繼續讀冊，人數有夠才有法度開班，我讀有讀無無要緊，我是去做伴的，予遐的外籍新娘會當繼續讀冊較重要啦！」
原來阿母逐項攏咧替別人想，莫怪伊的生活當中無埋怨佮不滿，只有感恩佮惜福；對序細無囉嗦佮要求，干焦關懷佮珍惜。從到今毋捌怨嘆過，自然就袂憂頭結面。阿母真正是我人生學的老師！
(TOP)
從到今毋捌想過欲對阿爸寫啥物。但是現此時，我煞是坐佇病床邊，看阿爸咧吊大筒、毋知人閣無氣色的面容，我的目屎含牢咧，驚無細膩滴落來會予別人看著。
阿爸少年學會曉修理錶仔，所以外公將阿母嫁予伊，想講做生理的錢水較活。我出世的時，已經佇南投的街仔租一間店面，七坪大的店頭養飼阮七个查某囡仔佮一个小弟，另外兩个小妹送予別人飼。街裡的人攏笑阮兜是七仙女、八美圖。聽講生小弟的時，閣請人客咧。這件代誌，會使講是彼當時鎮裡誠轟動的笑談啦!
生遮濟查某囝，阿爸伊上惜我。因為我纏伊上牢，捌一擺伊出門無𤆬我去，我就並佇門口，吼甲伊轉來。所以，後來便若暗時無閒煞，阿爸想欲去跋一下散筊仔就愛𤆬我出門才會準算。
細漢猶有一个真深的印象。一擺綴阿母、阿姨佮一陣姊仔去彰化的二姨兜食拜拜，轉來的時一陣人落車矣，煞放我一个囡仔疕佇車頂予客運載走。等我精神的時，看阿爸佮人咧講話。伊抱我坐佇『oo-tóo-bái』頂，我將阿爸攬牢牢，覆佇阿爸的尻脊骿，烏烏暗暗的天邊，一點一點的光，是星光、燈火抑是火金蛄？毋知驚的我，永遠會記得彼工暗時阿爸的尻脊骿。
阿爸，你愛緊好起來。會記得我共你講過，等我退休，我欲𤆬你去環遊世界。你若歡喜佮我所講的約束，著愛趕緊好起來，因為這个約束愛閣幾若冬咧！
讀國小的時做值日生，中晝袂使轉去厝裡食飯，阿母講會捾便當來予我食。有一擺，等甲時間過，猶無人捾便當來，看人咧食飯我無飯通食，感覺真歹勢，就走去運動埕遐覕，恬恬咧吼，無偌久，看著阿爸提便當咧揣我，我歡喜甲緊傱過去。
六年的時愛媠欲買懸搭仔，佇店裡一直咧挐阿爸。阿爸真受氣共我罵，我煞喙仔翹翹。阿爸上氣人翹喙，伊就氣甲共我捻喙䫌。過都無一分鐘，伊共我講：行啦，去佗買啦？目屎含咧，我面仔笑笑𤆬阿爸去鞋仔店。原來阿爸是惜我的。彼下喙䫌阿爸伊一定捻甲真毋甘。
阿爸你若毋甘我佇咧艱苦，你著愛緊好起來。醫生拄才來，講你無啥要緊啦！真緊你就會當轉去厝裡矣。阿爸，知無？真緊你就會使出院矣啦！
1昱蘋(Io̍k-pîn)
(TOP)
哇，上尾一節課總算下課矣，欲紮轉去的物件趕緊收收咧。作業簿仔、聯絡簿仔，一定愛會記得紮，轉到厝才袂予人罵甲臭頭。便當盒仔嘛愛提轉來去洗，啊若無，明仔載就愛洗臭酸的便當盒仔，嘛會予老師罵。
阮兜離學校無偌遠，用行的十分鐘就到矣，毋過，我毋免行遐緊，沓沓仔行就會用哩，因為，今仔日早起欲出門的時陣，阮阿母有共我交代，放學愛較緊轉來鬥抾葉仔。我才無想欲遐早就行到厝咧。著啦，先踅入來去店仔買一寡四秀仔才閣講，啊若無，等咧，我一定會枵甲咇咇掣。
「阿母仔，我轉來矣。I’m home!」猶未踏入戶橂我就大聲叫阮阿母。我定定落一寡英語予阿母聽。阿母雖然有時陣敢若虎豹母咧，啊毋過，我嘛是真愛伊。莫怪阿姊笑我有淡薄仔『戀母情結』，毋過阿母嘛講：「恁姊仔細漢的時嘛是一工到暗共阿母綴牢牢，真正是龜笑鱉無尾，鱉笑龜頭短短。哈哈！」
「冊包囥咧就緊來抾葉仔hânn？」阮阿母又閣咧催矣。「好啦好啦，連鞭就來啦！」阮兜是種田的，阿爸講播田無利純，只好改種荖葉仔。種荖葉仔是足厚工的，大人去種葉仔，挽葉仔，阮囡仔人若有閒，就愛鬥疊葉仔。抾葉仔就是共對園裡挽轉來的倒佇大水桶內底用水洗洗咧，才閣一葉一葉抾做伙，疊予好勢，上煞尾才一沿一沿囥佇籠仔底裝予好勢，才交予販仔賣出去。
抾葉仔真簡單，毋過規工攏做仝款的動作，實在有夠無聊的，而且，工錢嘛足少的，放學了後若做2點鐘上濟才會當趁八九十箍爾爾。熱天，天較慢暗，啊若寒天時仔，著愛做甲暗眠摸才會當歇睏。別人兜的囡仔放學了後，若毋是看電視就是拍電動、耍電腦，我實在足欣羨的。毋過，阿母定定講：「艱苦頭，快活尾。細漢食過苦的人，大漢較有出脫的機會。」看阮阿爸阿母逐工攏無暝無日咧趁錢飼阮一家口仔，實在是誠辛苦，咱做序細的會當鬥做一寡工課嘛是應該的。錢少無要緊，阮兜一家，會當平安幸福，我就足滿足矣！
請問我想下載語音檔為何無法進入網頁,
你好, 我試無問題. 你若無法度用, 共連結的網址copy落來, 直接貼佇網址頁. 按呢應該就會使得矣.