2012
06282003101 年閩南語朗讀文章--教育校院組
101 年閩南語朗讀文章--教育校院組[
01 香燈跤 鄭家和
02 部落記事――【田厝寮(千秋寮)――姨婆】 吳正任
03 菜瓜棚仔跤 王朝源
04 阿爸，請你愛緊好起來 鄭昱蘋(Io̍k-pîn)
05 台灣歌謠．台語情 張詩瑄
06 行出紗窗的少年烏貓兄 王薈(huē)雯
07 囡仔的好肥底 蔡瑋琳
08 阿桑的形影 陳昆龍
09 竹仔開花 陳憲國
10 爸母心 薛玉麗
古早的進香客，手攑鼓仔燈、攑香旗，一步一步綴媽祖婆行跤，就是香燈跤。佇較早交通無利便的時代，進香攏是用行的，除了是體力的考驗，閣是精神的磨練。進香客當中，有的人是下願(hē-guān)綴媽祖出巡踩街；有的人是無求啥物，甘願綴媽祖婆行千里路途。今年拄好有機會來做大學生代表的香燈跤，是一款文化的體驗，也是一種無仝款的「轉大人」的儀式。
自細漢，我就是媽祖婆的信徒，伊是我心靈的寄託(kià-thok)，有真濟祕密伊攏知影，我知影伊袂過喙。佇較無注重人權、男女平等佮身份地位的時代，神明一直攏是逐家的心理治療中心。因為勸善教化的意義，予咱有人生的方向，袂親像揣無燈塔的船隻，佇大海沐(bo̍k)沐泅。伊慈祥的造型佮面容，可比是咱慈愛的母親，也因為按呢，咱台灣人共伊號做「媽祖婆」。咱台灣，有海洋國家的民族性，信仰(gióng)方式非常熱情，毋管是南部沿海地區的送王儀式，抑是各地方鬧熱滾滾的大拜拜，攏展(tián)現咱台灣人的腹腸佮熱情，一點仔都袂輸外國的嘉年華(ka-liân-huâ)。大甲媽起駕進前的幾點鐘，各地方的陣頭、曲館攏來鬥鬧熱，來拚場。親像內門的宋江陣、外埔的義虎團，閣有來送媽祖婆出大甲城，拍算欲行八工七暝的進香客，早早就往新港的方向行去矣。有的人拖菜籃仔，有的人騎跤踏車，看的尻脊後，愈行愈遠。我算是頭一擺參加，閣毋知做一个香燈跤的鋩(mê)角，無經驗的阮，進香的路途當中，一直想欲放棄，毋過「媽祖婆，疼戇人」，攏有好心的阿叔、阿姨共阮鬥相共。
大甲媽起駕了後，攏是連夜趕路，所以有經驗的香燈跤，早就行到下一个鄉鎮去補眠矣！好佳哉有青春的身體予阮倚靠，對大甲行到沙鹿(Sua-lak)，天色拍殕(phú)光，食著燒燙燙的饅頭(bán-thô)、豆奶，精神規个好起來！天光，代表一工的開始，阮定定講：「今仔日閣愛看日出矣！」就是講「拚暝工」的意思。進香的時陣，阮也定定講：「今仔日閣愛看日出矣！」因為知影，今仔日又閣是行到天光。一路阮攑香旗，沿路所經過的廟寺，攏會縛一張符仔佮頓(tǹg)廟的宮印。有的人行幾若冬，彼支香旗，就綴幾若擺，閣經過香煙(hiunn-ian)的加持，舊舊、烏烏的旗仔，變成上有價值的紀念品。(TOP)
「田厝寮」佇外烏山的半山，離滾水沫(phue̍h/phe̍h)仔無偌遠。古早作穡人割茅(hm̂)仔草，佇園邊搭草厝予佃農徛(khiā)，號做「田厝寮」。後來，音走精去，煞轉(tńg)做「千秋寮」。
我細漢的時，捌佮阿母去田厝寮予姨婆請。姨婆兜的私佛仔生日鬧熱，刣豬倒羊以外，紅龜粿炊咧幾若床(sn̂g)：鹹的、甜的、塗豆餡、竹筍仔餡、扁豆仔餡、菜脯仔餡，隨在你揀。腥臊食煞，姨婆閣切一塊大封，予親情(tsiânn)朋友做伴手紮轉去；真正是有食閣有掠。聽阿母講，當初時姨婆兜，山坪(phiânn)幾若十甲，逐冬果子仔收著會驚人。往陣有人三頓煠(sa̍h)番薯簽配豆醬，姨婆兜定定有白米飯配豬肉通食。冬尾神明生鬧熱欲請人客，年初就掠豬仔囝轉來弓，時到一隻一隻攏變大豬豚(thûn)。姨婆徛佇深山林內，遐無幾戶厝，閣離疏(se)疏仔，毋過親情朋友嘛攏會相揣。大漢了後，我才知影「富(hù)在深山有遠親(uán-tshin)」這句話的道理。
聽講後來姨婆佮後生搬徙去燕巢(Iàn-tsâu)徛。阿母講，姨婆從(tsîng)細漢就足疼伊，阿母知影姨婆猶閣佇咧，定唸欲去看姨婆，親像藏佇心肝底數十冬的心願。年初，我駛車載阿母去燕巢，四界探聽，問真久才予阮揣著，我捾一寡仔果子仔去看姨婆。姨婆已經九十外歲矣，人看起來像猶精光，毋過記持已經失矣。伊坐佇藤椅，面模仔我猶閣認會出。我細漢去田厝寮，伊才四十外歲，雙爿耳珠肉用細節(tsat)茅仔桿(kuáinn)揬(tu̍h)過耳空；閬(làng)幾若十冬了後，今(tann)伊已經失去記持，據在阿母倚去伊的耳空邊，大聲喝：「我玉英仔啦！水雞潭再憔(tsiâu)某啦！」姨婆兩蕊目睭霧霧，一直相(siòng)阿母，就是無反應，一身(sian)人愣(gāng)愣，坐佇藤椅，看起來都好好咧，毋知致啥物症頭，按怎叫伊，攏是神～神～神。
當初姨婆對平地嫁去山頂，逐工透早到暗作穡。查某人韭菜命，嫁雞綴雞飛，嫁狗綴狗走，日子一久，就燒烙(lō)矣！毋過捌聽人講，頭起先伊嘛有一屑仔怨嘆序大人，共伊嫁去遐作穡、食苦。有一擺，阿母拄著小姑仔，小姑學予阿母聽，講阿嫂嫁去「田厝寮」頭幾冬，家己編一塊「褒歌」咧唱：
番麥開花吐紅纓(iann)，是阮爸母無探聽；
共我嫁來烏山坪(phiânn)，抾柴擔水我上驚。(TOP)
阿爸上愛褪腹裼(theh)，佇翕熱甲予人強欲擋袂牢的六月天。
菜瓜棚仔跤，囥一條竹仔做的䖙(the/thenn)椅，泡一鈷茶米茶，喙裡咧食薰，收音機倚佇咧耳空邊，聽阿爸上佮意的歌仔戲，那聽那綴咧唱。
阿爸有歲矣，田裡粗重的穡頭都做無法矣，這幾冬來的熱人，逐个熱翕翕的下晡，差不多攏是按呢過的。
工廠的工課若無誠趕，我定定會提細塊椅頭仔，坐踮阿爸的身軀邊，看伊欶(suh)空氣、吐(thóo)白煙，聽伊講少年的時，奢颺(tshia-iānn)的過去。
自我捌代誌了後，阿爸予我的感覺，是一个『a-sá-lih』、講義氣的條直人。
佇庄仔內，阿爸毋但是上老輩的村長，閣是重大糾(kiù)紛的中間者。聽阿爸家己咧講，較早若是伊欲出來選村長，規庄仔內的人，無人敢和伊拚，會使講是百面贏的。
一直到六冬外前，身體袂堪得，阿爸才無閣佮人佇選舉場拚輸贏；毋過庄仔內，若有拄著啥物撨摵(tshiâu- tshi̍k)袂好勢的大代誌，嘛是攏著愛請阿爸出面來撨。逐家攏呵咾阿爸，是古早的魯仲連(Lóo Tiōng-liân)，「頂港有名聲，下港有出名」。
予我感受上濟的，是阿爸一世人，上值得囂俳的一層代誌。
阿爸講伊十三歲就綴阿公學作田，十五歲就佮庄仔內的播田、割稻仔班，四界去共人播田、割稻仔。
當當(tng-tong)下港的稻仔，黃甲會當收成的時，庄仔內就會組一班割稻仔班，落下港割稻仔趁錢。落下港一逝(tsuā)，上無嘛愛個外月，才有法度閣踏入門。十四、五歲的半大人囡仔，欲參大人做仝款的工課，毋但愛綴人會著陣，穡頭閣袂使做比別人較䆀。阿爸講，彼當時，若毋是靠「輸人毋輸陣，輸陣歹看面」的志氣，參(tsham)「天拍天成(tshiânn)」、勇甲若牛的體格，欲哪堪會去。
天飼人肥泏泏(tsut-tsut)，人飼人一支骨。
阿爸一世人攏咧躽(nuà)田塗，伊對土地誠敬重，伊定定會提田裡種作的過程，和其中所蘊涵(ùn-hâm)的哲理(tiat-lí)來教示我。阿爸雖然無讀偌濟冊，毋過參伊講話，會予我學著誠濟冊內底學袂著的智識。(TOP)
從到今(tann)毋捌想過欲對阿爸寫啥物。但是現此時，我卻是坐佇病床邊，看阿爸吊大筒(tâng)、毋知人去、無氣色的面容，我的目屎含牢咧，驚無細膩滴落來會予別人看著。
阿爸少年學會曉修理錶仔，所以外公將阿母嫁予伊，想講做生理的錢水較活。我出世的時，已經佇南投的街仔租一間店面，七坪大的店頭養飼阮七个查某囡仔，另外兩个小妹送予別人飼。街仔人攏笑阮兜是七仙女、八美圖。聽講生小弟的時，閣請人客咧。這件代誌，會使講是彼當時鎮裡誠轟動的笑談(tshiàu-tâm)啦!
生遮濟查某囝，阿爸伊上惜我。因為我纏伊上牢，捌一擺伊出門無𤆬(tshuā)我去，我就並(phīng)佇門口，吼甲伊轉來。所以，後來便若暗時無閒煞，阿爸想欲去跋一下散筊仔(sàn-kiáu-á)就愛𤆬我出門才會準算。
細漢猶有一个真深的印象。一擺綴阿母、阿姨佮一陣姊仔去彰化的二姨兜食拜拜，轉來的時一陣人落車去矣，煞放我一个佇車頂予客運載走。等我精神的時，看著阿爸佮人咧講話。伊抱我坐佇『oo-tóo-bái』頂，我將阿爸攬牢牢，覆(phak)佇阿爸的尻脊骿，烏烏暗暗的天邊，一點一點的光，是星光、燈火抑是火金蛄？毋知驚的我，永遠會記得彼工暗時，阿爸的尻脊骿。
阿爸，你愛緊好起來。會記得我共你講過，等我退休，我欲𤆬你去環遊世界。你若歡喜我所講的約束，就愛趕緊好起來，因為這个約束愛閣幾若冬咧！
讀國小的時做值日生(ti̍t-ji̍t-sing)，中晝袂使轉去厝裡食飯，阿母講會捾便當來予我食。有一擺，等甲時間過，猶無人捾便當來，看人咧食飯的時我無飯通食，感覺真歹勢，就走去運動埕遐覕，恬恬咧吼，無偌久，看著阿爸提便當咧揣我，我歡喜甲緊傱(tsông)過去。
六年的時愛媠欲買懸搭(tah)，佇店裡一直咧挐阿爸。阿爸真受氣共我罵，我煞喙仔翹翹。阿爸上氣人翹喙，伊就氣甲共我捻喙䫌(phué)。過都無一分鐘，伊共我講：行啦，去佗買啦？目屎含咧，我面仔笑笑𤆬阿爸去鞋仔店。原來阿爸是惜我的。彼下喙䫌阿爸伊一定捻甲真毋甘。
阿爸你若毋甘我佇咧艱苦，你就愛緊好起來。醫生拄才來，講你無啥要緊啦！真緊你就會當轉去厝裡矣。阿爸，知毋？真緊你就會使出院矣啦！(TOP)
桌仔頂的喇叭響起「異鄉的我，一个人起畏寒......」歌詞配合旋律(suân-lu̍t)，歌曲內底的世界不知不覺浮現佇我的面頭前，慢慢仔𤆬(tshuā)我行入時間的旅行，看見台灣歌謠生湠(thuànn)的故事。
遮的佇吟唱時代上時行的旋律，一个音符、一葩歌詞，攏咧表達生活佇這塊土地頂懸每一个人的情感佮生活。烏狗兄的熱情，烏貓姊的妖嬌，彼當陣上時行的打扮佮流行歌曲，陪伴足濟人度過青春少年時。
這馬的『CD』佮過去的舊曲盤真無仝款，彼種對留聲機流出來的歌聲，雖然我聽無幾擺，毋過彼種聲音聽起來有五○年代特殊(ti̍k-sû)的感情佮氣味；就是彼當時上流行、上有名的代表，像〈孤女的願望〉、〈人生〉、〈港都戀歌〉等等，真濟歌到這陣(tsit-tsūn)猶予人會數(siàu)念。這馬閣放出來聽一擺，感覺真熟似，敢若捌聽過的款呢！好聽的歌謠會永遠流傳落去，爸母少年時代的歌，有彼个時代的特色，陪伴行過快樂、行過傷心；總是歌謠的時代意義真大，嘛影響足濟人！
離鄉背井來到臺中讀大學，一條〈落雨聲〉引起我思鄉的情緒。親像命運的交響曲，一个音、一个音彈奏出來，敢若是為我寫的曲，予我感動，閣一擺記錄我佮這个時代的故事。
台仔頂老師認真咧講台灣歌謠發展的故事，一條一條對喇叭放送出來的歌，無論是描寫女主角予人放捒(pàng-sak)、寂寞心情的〈青春悲喜曲〉；抑是〈鑼聲若響〉歌詞內面，彼種船未到就咧等待，船走了後閣毋甘的心情，我攏會那聽歌那想歌詞內底的故事，予我感覺有一點仔稀微。台灣歌謠千千條，無法度逐條攏有共伊斟酌聽。
老師有講，台灣每一个時代攏有代表彼个時代的故事佮歌曲，予我印象上深的是〈安平追想曲〉。有一擺，佇人𤲍(kheh)人的夜市仔聽過這條歌，我感覺真熟似。後來上課的時閣再聽，對照老師分予阮的歌詞，解說歌曲的故事佮伊過去時代的特色，就有真無仝款的感覺。這條歌是陳達儒作詞，許石作曲，發表佇1951年，佇台灣流行歌謠史占真重要的地位，江蕙、洪榮宏佮張清芳等等，真濟出名的歌手攏捌唱過。(TOP)
十八歲的熱天，我轉去彼个有柚仔芳的所在，透天厝覕佇柴仔店彼條巷仔內，講袂輾踅的柚仔話。我裂(liah)破番仔契，過我的都市庄跤生活。
一个人蹛傷闊的透天厝，我倒佇客廳冰冰的『thài-lù』頂面。半暝，想起細漢就離開的柚仔城，已經十年無閣轉來。都市人的腹肚敢會堪得枵甲天光？我穿高雄來的淺拖，順柴仔店口的巷仔一直行，才看著若像熟似的街仔頂青青紅紅的看板(kha̋ng-páng)，鬧熱的情形予我發現都市的生活，佇我無佇咧的時陣，已經改變柚仔城。
我𤆬來的『小咪』坐佇二樓窗仔口咧看門口遐的阿婆開講。毋是『小咪』耳仔好、目睭金，是柴仔巷內底貓味傷重，予這隻烏貓一下入柴仔巷就數想欲出去熟似新的貓仔伴。
『小咪』佇我的紗窗挖一空，逐工自由出入二樓的窗仔，干焦腹肚枵才欲轉來食暗。透早出去，到半暝才轉來。中秋彼工的暗瞑睏袂去，看『小咪』佇鐵棟(tàng)頂行來行去，按怎叫都叫袂轉來。轉來柚仔城的孤單閣加一項：予貓仔放捒。
隔轉工聽著『小咪』的叫聲，喓(iaunn) ！喓！我傱(tsông)去二樓，拍開向西的鋁窗。敢是『小咪』𨑨迌了忝(thiám)，轉來咧討食？
「走！走！走！」我傱過對面紅色鐵門的厝，大聲趕遐的野貓走。『小咪』予圍佇中央，勇仔佇邊仔講低低的貓話，差不多七、八隻𨑨迌仔貓替勇仔咧包圍『小咪』。我趕緊走過去替『小咪』解圍，驚伊予遮个貓仔鱸鰻欺負。勇仔是柴店巷的貓仔王，算是上大尾的鱸鰻，莫講貓仔驚伊，連『oo-tóo-bái』都愛閃伊。勇仔嘛毋是啥物緣投少年兄，年歲敢也半老老(puànn-ló-lāu)矣，毋過漢草真勇，色水大範，佮虎仝款花。伊的邊仔定定綴五、六隻細隻鱸鰻貓公，規群佇柴仔巷咧欺負別人。
毋過『小咪』嘛毋是簡單的人物，莫講貓範(pān)將才，翹上天的烏尾，瘦瘦的體格，鳥仔看著嘛會挵著電火柱。而且『小咪』是少年烏貓兄，跤手真猛(mé)，會當算台灣第一勇的烏貓兄，都市來的烏貓，開始佇柴仔店巷咧爭地盤、拚事業。(TOP)
教育的種子佇佗位？教育的種子是愛對細漢就開始培養的，細漢就愛建立正確的價值觀。有一个充滿熱情的少年人，伊真佮意囡仔，想欲做老師，來教育囡仔，予囡仔親像種子仝款，會當種佇好肥底的田園，種子吸收塗裡的營養，發穎(puh-ínn)、發芽(huat-gê)，健康大欉，閣開花、結子。
好的老師就是好肥底的一部份。伊就是想欲做囡仔的好肥底，決定去參加一个營隊，號做「教育營」。這个活動是去原住民部落輔導囡仔的功課，伊想講參加這个活動，會當充實家己的教學能力，是做老師的起步。
這个少年人頭一擺參加教育營，雖然有滿腹的熱情，心肝頭嘛有淡薄仔驚驚，因為第一擺總是會生份。毋過看囡仔純真的笑容，隨時就歡喜起來，敢若共落(làu)風的雞胿(kui)仔灌風仝款。
原住民的小朋友，逐个攏生做足相siāng/siâng)，袂輸一个模仔印出來的。見著伊攏會笑笑仔問伊：「老師，你叫啥物名？」上袂慣勢的是下課的時會共伊𢯾(mooh)牢咧，毋甘放伊走。甚至有時仔囡仔轉去厝裡，會閣隨傱(tsông)轉來欲佮伊耍。無時恬(tiām)一日到暗都充滿活力(hua̍t-li̍k)。
伊知影，若是欲教智識佮道理，代先著愛佮盤撋(puânn-nuá)感情。就按呢，伊做一件足偉大的代誌，就是決定欲撥時間來雕琢(tiau-tok)遮的璞石(phok-tsio̍h)。伊利用食晝佮下課的時間佮囡仔鬥陣，建立感情，毋但會當教智識，也會當教禮貌佮規矩。紲落來一禮拜久，伊攏用真熱烈(jia̍t-lia̍t)的心來教，想欲教足濟智識，欲予一下仔就吸收真濟觀念。譬論講有一工早時(tsái-sî)上課，囡仔共早頓提來上課的所在食，咧食的竟然是泡麵佮「保力達P」，泡麵閣是用齧(khè)的。伊目睭褫(thí)甲大大蕊，袂輸看著啥物驚人的物仔。等到下課的時，伊就行過去共囡仔講：「這是毋好的、無健康的。」因為彼个囡仔認為按呢食無啥物奇怪，是真四(sù)常的代誌，伊就共囡仔講教一寡健康的觀念，向望會當改變的想法。(TOP)
「你清明有欲轉來無？」「彼工透早就欲培墓，傷趕啦！我無法度轉去。」「ah無你是當時欲轉來？前擺對過年轉來到今(tann)嘛遐久矣！」「歇熱啦，我會𤆬(tshuā)囡仔做伙轉去。」 「好啦，好啦，隨在你啦！較捷(tsia̍p)敲(khà)電話轉來......」
一冬兩擺轉去南部，看著的阿桑一擺佮一擺無仝。是猶會騎『oo-tóo-bái』四界踅，毋過看電視䖙(the)落椅仔就開始盹(tuh)龜；假喙齒攏提掉了後，就愛用兩排齒岸哺物件，定定會嫌我煮的菜無夠爛。較早的阿桑才毋是按呢咧，佇我囡仔囝的目睭裡，伊是敢若親像布袋戲內底高長(ko-tshiâng)大漢、功夫厲害、任考不倒的武林高手。
阮兜蹛庄跤，厝裡作穡種弓蕉。別的囡仔禮拜日、歇熱攏誠歡喜，我是煩惱著愛綴去弓蕉園割葉仔、顧水、薅(khau)草。其實厝裡我算上細漢，攏揀輕可的代誌做，粗重的阿桑佮阿兄、阿姊早就做甲差不多。毋過我上驚薅草，跍(khû)甲腰脊骨是強欲斷去，看別逝(tsuā)的人愈薅愈遠，規氣坐佇弓蕉跤歇睏，一站仔，阿桑就會越頭來共我鬥薅。
阮欲去弓蕉園愛過一條闊莽(bóng)莽的溪仔，彼陣無人咧撐(the/thenn)渡，若欲騎『oo-tóo-bái』去園裡，對橋過就愛踅一大輾。佇阮庄仔頭，差不多逐間厝攏有一隻竹棑仔(pâi-á)，縛佇溪仔邊，棑仔用竹篙撐咧撐咧就過溪矣。阮做囡仔的時定定划(kò)棑仔耍水，嘛定定予大人喝，走予逐(jiok)。
逐家攏有家己的棑仔，遮的棑仔按怎來呢？別人我是毋知，阮兜的是阿桑家己做的。佇清明，雨水開始欲濟進前，阿桑會先去買一寡比大腿較粗的竹仔，攢(tshuân)一坩(khann)火炭，看竹仔若有彎彎的所在，就用火慢慢仔烘(hang)，等竹仔小可仔變軟，才細膩仔雕予直。等甲攏雕好勢，才共竹仔鋸平長，排予齊，頂懸囥細枝竹仔拍橫的用鉛線縛予絚(ân)。
若講做到遮煞工，就無算真正範(tsiànn-pān)。阿桑閣會佇棑仔頭遐，那烘那雕，予規个翹起來，按呢撐棑仔的時陣，頭前的水才袂潑入來，這才是做棑仔的真功夫。功夫若無好，毋是竹仔烘甲臭火焦破空，就是雕甲必(pit)去。
規个棑仔做好就愛閣漆一沿點仔膠，會當擋較久袂漚(àu)去。上煞尾揀一枝較粗勇的竹仔，佇竹篙頭鬥一塊鐵仔，撐棑仔的時陣，竹篙才袂浮起來，歹出力。(TOP)
最近有網友(bāng-iú)寫一張『e- mail』予我，講起竹仔會開花結子的代誌，內底有文章佮圖像的附檔。我是學自然科學的，對我來講這應該是真平常的代誌，無啥物稀奇。
咱台灣俗語內底，對竹仔開花就有「竹仔開花歹年冬」的講法，聽講佇中國佮印度嘛有類似的講法。竹仔便若開花，四箍輪轉的竹仔嘛相紲開花，規大片的竹仔林攏齊死了了，這對一寡靠竹仔咧生活的人，當然是一種真大的損失，對一寡倚靠竹仔咧討食的大大細細的生物，嘛會造成生存的危機，尤其是專門食竹葉的『大熊貓』。
俗語咧講的「竹仔開花歹年冬」，這並毋是迷信抑是傳說 (thuân-suat)，是有科學根據的。科學家發現見若遇著大洘旱(khó-huānn)的時陣，規大片的竹仔林就會相連紲開花、焦蔫(ta-lian)佮死亡。聽講是因為竹仔本身感受著塗肉傷過頭焦燥(ta-sò)，抑是講塗肉的成分有較大的變化，欠缺某種的成分，影響伊的生存，為著欲趕緊會當生湠後代，所以就緊開花結子，遮的種子就有可能會經過風佮水的流動，抑是其他親像鳥鼠仔類的動物來食竹仔米（竹仔的種子）閣再放出來的過程，徙去到適當的所在，等待好所在，抑是好時機，予後代會當繼續傳(thn̂g)落去；若無按呢，這種竹仔真可能早就絕種去矣，無可能傳(thuân)到這陣。聽講「鐵樹開花」嘛是仝款的意思。
有一件可能較少人知影的代誌，就是佇台灣佮泰國中間，有一項合作計劃號做「泰皇山地計劃」，是台灣派農業專家去泰國北方的山區，將遐原本種鴉片的規大片地，慢慢改做一般農業的生產。內底就有提台灣的竹仔子、種竹仔佮竹仔產品加工的技術，共竹仔子提去泰北遐生湠。
咱台灣自古早就有竹仔，聽講高雄的古早地名「打狗」，就是當時遐『Siraya』平埔族的話「竹林」的意思。佇咱台灣俗語內底有一句罵人的話佮竹仔有關係，毋過予人罵的人聽著攏袂受氣，這句話就是「歹竹出好筍」。咱若見著親朋好友的囝兒序細誠成功，誠有出脫，就會滾耍笑共伊講：「毋成猴喔，歹竹閣出好筍。」表面上聽起來是一句罵人的話；毋過實際上是咧呵咾伊的序細，予人罵的人聽著嘛袂受氣。另外嘛有一句話紲落去講：「歹竹出好筍，好竹出ku-lún」，ku-lún就是奇形怪狀的竹仔，就是因為環境無好所致的；意思嘛是咧警告做人序大的，著愛好好仔教示囝兒序細，才袂去予變歹囝，造成社會的負擔。(TOP)
「飼後生養iúnn老垂(suê)，這句話佇以前是天公地道的代誌。古早人，會生生甲袂生，一岫囝規十个。一般的家庭，真正無法度栽培甲逐个攏偌爾仔有成就；若有一、兩个仔較出脫、較有孝，予爸母有面子，年老的時有通倚靠，這就前世燒好香矣。社會進化的跤步真緊，人的思想嘛綴咧行，這馬少年人囝生少，生一、兩个就無愛生矣，無論是生查埔抑是生查某，攏是金囝，疼命命、寶te-te，逐个爸母攏嘛專心咧栽培寶貝仔囝。閣較無錢，喙齒根咬咧，儉腸凹(neh)肚，嘛盡量予讀冊，共栽培，向望別日仔有出脫，佮人會比並。
囡仔自細漢著愛雕(tiau-tok)無論是生查埔抑是生查某，攏是爸母的心肝仔寶貝。毋過《三字經》(sam-jū-king)講：「玉不琢，不成器；人不學，不知義」。因為爸母知影：「春耕做無好，耽誤一冬；囡仔教無好，耽誤一世人。」這是咧強調教育的重要。俗語閣講：「食果子拜樹頭，食米飯愛拜田頭。」這是咧教人愛知恩報本的意思。受人的人情，毋通「船過水無痕，受恩毋免論」。俗語也有講：「細漢偷挽瓠，大漢偷牽牛。」又閣講：「細漢若無鬱，大漢鬱袂屈。」這攏是講教育愛自囡仔細漢教起。
古早的爸母攏真注心教育，教囡仔攏真嚴，講一就是一，講兩就袂使是三。大部分的囡仔嘛攏足聽話，袂反抗，乖甲！這馬咧！拄仔好倒反，爸母疼囝若性命，伊若吵鬧就會贏。所以囡仔人𠢕「應喙應舌」、「無大無細」。疼囝的爸母，的心肝仔囝若佇學校受委屈，磕袂著，就搬出「兒童福利保護法」來，欲告老師。老師歹做，僫(oh)教，毋知是欲按怎教育。
俗語講：「倖(sīng)囝不孝，倖豬夯灶。」這是予咱做爸母的一種提醒，像這馬按呢寵倖(thíng-sīng)囡仔，後擺大漢一定毋成人(tsiânn-lâng)。
爸母心、惜囝情：疼、倖愛分明。疼囝著愛有站節，傷嚴也毋好，人講「嚴官府出厚賊，嚴爸母出阿里不達」，傷倖也是袂使得。按怎做較拄好？這是每一个做人爸母攏愛研究的問題。向望逐个爸母攏會當教出有出脫，對社會有貢獻的囡仔。(TOP) (轉去主目錄)
沒有留言:
張貼留言