2011
07112358100 年閩南語朗讀文章教育院校組朗讀內容
100 年閩南語朗讀文章 (內容下載)
01 故鄉的荖(láu)仔 張志成
02 臺灣歌謠．臺語情 張詩瑄(suan)
03 mî-sín(ミシン)佮『麻吉』老爺 陳士彰
04 予我上數念的彼个人 許沛(phài)琳
05 講古講未來 王秀容
06 輕聲細說講諺語 陳憲國
07 雜菜園 陳廷(tîng)宣
08 來去崁仔頂 賴錫(sik)真
09 落山風佮月琴 黃瓊儀(gî)
10 來一隻厝鳥仔人客 陳潔(kiat)民 (轉去100 年閩南語朗讀文章目錄)
============================================
阮的故鄉佇臺南佳里，這个地名恐驚仔無幾个人知影。佳里是小所在，高速公路、縱貫(tshiòng-kuàn)公路佮鐵路攏無對遐經過，人口嘛無真濟，差不多五萬外，若是比臺北附近的一寡鄉鎮市，是輸人有較濟。
佳里並無啥物名產，佇臺南縣內底，無算一个真有特色的鄉鎮。佳里的農業無比別人較發達，毋過遮(tsia)有出一種其他三十鄉鎮市種袂起--來的，就是荖仔。
荖藤這種植物(si̍t-bu̍t)對一般人來講可能較生疏，伊大部分攏用佇檳榔內底。佳里是當時開始種荖仔--的，無人知影。佳里這个所在，較早是平埔族的大本營，有可能佇彼个時陣就有種檳榔；若有檳榔，嘛差不多就有荖仔--矣。嘛有人講，荖仔是鄭成功來臺灣了後，臺灣氣候澹濕(tâm-sip)，士兵有水土袂合的困擾，無意中發現荖仔會使預防傳染病，才開始種作--的。毋管按怎講，第一欉荖仔是佇阮阿公、抑是阮阿公的阿公出世進前就存在--矣。
佇較早，佳里的老人家己種檳榔，抑是家己包檳榔--的滿滿是。包檳榔會用著伊的花、根佮葉。共檳榔破開了後，有人共荖花，抑是根的切片包佇檳榔內底，嘛有人佇規粒檳榔外口包一片荖葉仔。無仝材料，氣味嘛無仝，毋過，薟(hiam)味仝款。遮的物件嘛攏是對仝一種植物來--的。你若行過荖仔園，就會鼻著荖仔彼種誠特殊的氣味，彼種氣味，講芳嘛毋是，臭嘛毋是，橫直鼻--一擺就知--矣。
荖仔這種物件足奇怪，別个鄉鎮種袂起--來，干焦佳里有法度種。看會著的所在，攏種佇佳里本庄附近，親像三五甲、菜寮、東勢角。故鄉佳里的荖仔，煞變做離鄉遊子回鄉的路箭，逐(ta̍k)改坐車轉去故鄉，見若看著荖仔欉，就會共家己講：「佳里到--矣！佳里到--矣！」
考牢(tiâu)大學了後，我就離開故鄉出外做流浪人，罕得轉--去。一个人佇臺北，上想欲看--著的，毋是故鄉的溪、牛車路，嘛毋是故鄉的人，是荖仔園。逐个所在攏有人、有路、有溪，毋過我會使真驕傲講，故鄉內底有一項上有特色--的，彼就是荖仔。 (TOP)
桌仔頂的喇叭響起「異鄉的我，一个人起畏寒……」歌詞配合旋律(suân-lu̍t)，歌曲內底的世界不知不覺浮現佇我的面頭前，慢慢仔𤆬(tshuā)我行入時間的旅行，看見臺灣歌謠生湠(thuànn)的故事。
遮的歌謠咧吟唱時代上時行的旋律，一个音符、一葩(pha)歌詞，攏咧表達生活佇這塊土地頂懸每一个人的情感佮生活。烏狗兄的熱情，烏貓姊的妖嬌，彼當陣上時行的打扮佮流行歌曲，陪伴足濟人度過青春少年時。
這馬的CD佮過去的舊曲盤真無仝款，彼種對留聲機流--出來的歌聲，雖然我聽無幾擺，毋過彼種聲音聽--起來有五○年代特殊(ti̍k-sû)的感情佮氣味；就是彼當時上流行、上有名的代表，像〈孤女的願望〉、〈人生〉、〈港都戀歌〉等等，真濟歌到這陣(tsit-tsūn)攏猶予逐家數(siàu)念。這馬閣放出來聽--一擺，感覺真熟似，敢若捌聽--過的款--呢！好聽的歌謠會永遠流傳--落去，爸母少年時代的歌，有彼个時代的特色，陪伴行過快樂、行過傷心；總--是歌謠的時代意義真大，嘛影響足濟人！
離鄉背井來到臺中讀大學，一條〈落雨聲〉引起我思鄉的情緒。親像命運的交響曲，一个音、一个音彈奏--出來，敢若是為我寫的曲，予我感動，閣一擺記錄我佮這个時代的故事。
臺仔頂老師認真咧講臺灣歌謠發展的故事，一條一條對喇叭放送--出來的歌，無論是描寫女主角予人放捒(pàng-sak)、寂寞心情的〈青春悲喜曲〉；抑是〈鑼聲若響〉歌詞內面，彼種船未到就咧等待，船走了後閣毋甘的心情，我攏會那聽歌那想歌詞內底的故事，予我感覺有一點仔稀微。臺灣歌謠百百條，無法度逐條攏來聽清楚。
上課的時，老師講，每一个時代攏有家己的故事佮歌曲，予我印象上深的是〈安平追想曲〉。有一擺，夜市仔人𤲍(kheh)人的時陣，聽著這條歌，我感覺真熟似。後--來上課的時閣再聽，對照老師分予--阮的歌詞，解說歌曲的故事佮伊過去時代的特色，就有真無仝款的感覺。這條歌是陳達儒作詞，許石作曲(tsok-khik)，發表佇一九五一年，佇臺灣流行歌謠史占真重要的地位，江蕙、洪榮宏佮張清芳等等，真濟出名的歌手攏捌唱--過。 (TOP)
看我這臺『má-tsih』的老爺，水啉甲差不多--矣，『ia̋n-jín』的溫度嘛加降真濟，無閣再趕緊出發袂使--得；因為到高雄猶有一半路，規个頭殼底，想講阿娘這陣倒佇加護病房，毋知有要緊--無？
想到遮，就閣想著五年前，阿娘對一樓跋落地下室彼擺。蹛佇加護病房三禮拜久，對頭殼頂開始，到兩肢跤骨，插甲規个攏是管(kóng)。阮兄弟姊妹，逐擺若入去加護病房，就是目箍紅紅--出來。這擺毋知會像頂擺按呢--袂？
車那開，對面車燈射過來一條一條的光線，射對頭殼底，變成一條一條的醫療管，若親像一條一條的線，穿(tshng)過阿娘彼臺『mî-sín』的針鼻仝款。
會記得讀小學四、五年的時陣，阿娘就淡薄仔有老歲仔目。逐擺若欲車物件進前，攏會叫我的二兄，代先將線穿過針鼻。因為二兄毋但聽話，也是阮所有的囡仔，上𠢕變工藝(pìnn-kang-gē)--的，所以阿娘比較較信任--伊。
有時陣我嘛會要求阿娘，予我穿一擺線看覓--咧，總--是攏予阿娘拒絕：「生雞卵無，放雞屎有，小等--咧針予你毀(huí)歹--去，我就加食力--的！」
有一日下晡，阿娘閣叫二兄共伊穿針，了後就去灶跤煮飯。我趁著機會，就一直共二兄姑情(tsiânn)：「二兄！拜託--咧啦！予我穿一擺看覓--咧好--無？」
「若去予阿娘知影，咱兩个攏會去予伊修理甲金觸觸(kim-tak-tak) ！」講--起來，二兄佇阮囡仔內底，比較較無膽。
「免驚--啦！袂--啦！」我一直共伊姑情，精差欠一个跪。
二兄除了無膽以外，嘛是上蓋軟心--的。伊予我吵甲無法度，就--起來換我穿。俗語咧講：「坐轎--的毋知扛轎--的艱苦。」手提著線一直咇咇掣(phi̍h-phi̍h-tshuah)，『mî-sín』彼枝針㽎(sìm)--一下㽎--一下，我舞甲大粒汗細粒汗，線猶閣是攏穿袂過針。
「你的正跤愛共跤踏仔小糸寒 (hân)--咧，彼枝針毋才袂㽎走--去。」二兄看袂得過，就共我教。
照伊的話，正跤糸寒跤踏仔，有影彼枝針袂閣㽎，就強欲共線穿予過，嘛是無法度。
「針鼻傷細空，你愛用喙瀾共線頭小可沾(tsam)--一下，毋才穿會過！」二兄講話的聲音，聽會出--來伊緊張甲欲死--去。 (TOP)
昨昏暝我又閣夢著你--矣……
佇咧夢中的你，猶原是真莊嚴(tsong-giâm)，佮你在生的時陣仝款，一點仔都無變……自從你過身了後，這是我第二擺夢著你……
我永遠都會記得頭一擺夢著你，是你過身無偌久，去嘉義共你送上山了後，我的心情就親像是拄著大風的海湧，無法度平靜。彼暝，我真數(siàu)念--你，倒佇眠床頂，反(píng)來反去，睏袂落眠。頭殼內，干焦想講你到天頂了後，敢會共我放袂記？後擺我若是想--你、我若是有話想欲共你講，按呢我欲按怎？我一个人覕佇棉襀(tsioh)被內底，那看你的相片人那吼，吼甲睏--去。講--起來，嘛是真聖(siànn)，彼暝，我就夢著你--矣。
佇咧夢中，是下課時間，你坐佇教室頭前，同學攏咧做家己的代誌，予你罵慣勢的我，目睭根本都毋敢相(siòng)對你彼爿(pîng)去。啥人知影，你雄雄共我叫--去，講：「是按怎交男朋友無共老師講？」我聽了煞驚一趒(tiô)，就睏袂去。精神--過來，才知影原來這是一場夢，嘛因為看著你真安心，所以我真緊就閣睏--去矣。
最近，我為著學業的代誌咧操煩，毋知影到底欲去考研究所抑是欲去實習(si̍t-si̍p)做老師？我就想起著佇我高中的時陣，你三不五時攏會講，畢業了後的學姊(ha̍k-tsé)定定攏嘛會轉來揣你講心事，無論是學業抑是愛情。彼時陣，阮攏毋相信，心內想講：「老師遮爾歹，到底有[啥人] (siáng)會閣轉來揣你討論？家己褒較袂臭臊--啦。」啊毋過，到這馬我才知影，老師你講--的攏是事實。高中三年，逐工攏佮你生活做伙，讀冊做伙、食飯做伙食、耍嘛耍鬥陣，我敢講：「你是全學校上認真、負責的導師，嘛是全校上關心學生的老師！」
咱學校，是一間私立中學，升學的壓力已經真大，而且你佮恁翁閣攏是𤆬(tshuā)資優班，閣再加上你的身體本來就無好，欲𤆬阮三冬，真正是一个真食力的工課。佇咧阮高三的時陣，有幾若擺，你攏因為身體袂堪--得，煞來請假。有當時仔，課上到一半，你就會雄雄頭楞(gông)，無法度講課，叫阮家己看冊。自阮一年仔到三年，你講課自來就毋捌用『mài-khuh』；毋過彼站仔，你攏愛靠伊才有法度上課，阮逐家攏真煩惱。 (TOP)
教冊若像徛佇大舞臺。若無--兩步七仔，下跤的觀眾朋友，毋是戇神覆(phak)佇桌頂補眠，就是偷看尪仔冊；較無規矩--的，會開始嗤嗤呲呲（tshi-tshi-tshu̍h-tshu̍h）咧開講，講一寡五四三--的；較惡質--的，可能會搬海反(huán)，坐袂牢(tiâu)，徛起來烏白趖(sô)，遮觸(tak)--一下，遐觸--一下。
感心的學生囡仔嘛有，有的是毋管偌吵，猶原是目神有彼種予老師看了想欲閣較認真教的光彩，親像燒烙(lō)的日頭，予老師有一種活--落去的勇氣佮拍拚的動力(tōng-li̍k)；雖然講甲喙角全波，嚨喉喝甲梢(sau)聲，烏枋寫甲手麻，跤徛甲發(puh)青筋，關節炎加腰痠背疼，毋過一切攏有價值、有意義，值得拍拚。另外閣有一款感心--的，若看同學傷吵，伊會起來喝聲，叫人恬恬莫吵；雖然上吵的聲，就是咧喝的聲，毋過有這號(lō)為老師鬥出嚨喉的體貼佮勇氣，嘛會當算做是老師的菩薩--矣！
一樣米飼百樣人，囡仔百百款，教冊的趣味勝過百百行！若去𨑨迌，總會希望體驗著無仝款的風景，引起佮平常時無仝的思考，會當欣賞著萬物的變化，會當發現著較特出的趣味。做老師--的，是世間上幸福--的，每一分鐘，攏是咧創作無仝的故事。一班三十外个囡仔，對無仝所在來，受過無仝的家庭教育，想法無仝，做法無仝，講話的方式無仝，交--出來的作業無仝，興趣的物件嘛無仝，致使每一个人發生的故事攏無仝。多元的人生，多元的變化，囡仔活佇這个多元的世界，老師就愛用多元的教法，來雕塑(tiau-sok)多元的未來。
雖然我只是一个小小的老師，毋過，我嘛是一个工程師，咧做一件比錢銀閣較有價值的性命工程，咧寫家己的故事，嘛咧寫學生囡仔的故事，甚至是咧寫咱人類的故事。人生誠奇妙，是一種循環，一項代誌，一个人，一分鐘，一秒鐘，對這个世界，攏有料想袂到的影響。
我的學生，未來猶會入去這个循環內底。我誠重要；閣愈重要。
我會當教啥？欲挃(ti̍h)啥？欲按怎教--咧？
課程的專業傳授是上基本--的，毋過佇傳授的過程，囡仔除了學著專業的智識來應付未來的考試以外，學著你對專業的熱情佮責任感，學著你教冊認真的態度佮組織表達能力，學著你佮人盤撋(puânn-nuá)講話的智慧，學著你情緒的控制，學著你對人的尊重佮對幸福的堅持。講--起來，欲學的物件實在誠濟，有形--的佮潛在(tsiâm-tsāi)--的，攏誠重要。 (TOP)
全世界各種語言，攏有伊的諺語，伊是某一个語言族群文化的結晶。講著臺語的諺語，是非常豐富--的；咱對日常生活上來講起：
無論是新抑是舊的臺灣人，攏是敬「天」、敬「神」的族群，所以古早人共咱講：「一枝草，一點露」、「天無絕人的生路」、「好心就有好報」；閣講：「人飼人一枝骨，天飼人肥tsut-tsut」、「人咧做、天咧看」、「攑(gia̍h)頭三尺有神明」，叫人著愛做好事，毋通做歹事。所以嘛講「天公疼戇人」、「人欲(beh)害人天毋肯，天欲害人佇眼前(gán-tsîng)」……。
毋過，實際上無一定是按呢，所以講：「做天也袂得中(tìng)眾人意」，有時陣是：「好心--的倒咧餓，歹心--的戴王帽」、「好心--的予雷唚(tsim)」、「好心--的予雷拍，歹心--的食雷肉」、「好心好行(hīng)，無衫通穿；做惡做毒，騎馬碌硞(lo̍k-kho̍k)。」這款歹人會受人詈(lé)，按怎詈？詈講：「你歹心烏漉肚，欲死著初一十五，欲扛去埋拄著風颱雨，欲抾骨閣揣無路……。」
雖然是按呢講，毋過嘛有叫人毋通迷信，所以講：「佛食扛、人食妝」，佛若無人扛就無神，人若無妝，就較無好看相。「問神明就有毋著，看醫生著愛食藥」，無事袂去問神，看醫生一定就有提藥。嘛有講：「算命仔喙，糊瘰瘰(hôo-luì-luì)」，真濟算命仙仔，鐵喙直斷的「命相者」，連家己的命都算袂準，閣有人會相信，所以才有人講「家己揹(phāinn)黃(hông)金，閣欲替別人看風水(suí)。」
講著天地無常，「千算萬算，毋值得天一劃(ue̍h)」，一下地動，就山崩地裂；人生在世，「歹竹會出好筍，好竹嘛會出ku-lún」，生長環境若無好，好竹嘛會生出奇形怪狀的竹仔；閣有講：「有時星光，有時月明」、人生是「聳勢(sáng-sè)無落衰(lo̍h-sue)--的久」，所以講「人生有起有落」，若拄著天年，「喝(huah)水會堅凍」、「衝(tshìng)甲掠袂牢(tiâu)」，若拄著落衰的時陣，人講：「人若衰，種匏仔生菜瓜」、閣講「倚山山崩，倚壁壁倒，倚豬牢死豬母」，彼就有夠衰--的；所以勸人「好天著存(tshûn)雨來糧」。 (TOP)
讀大學了後，我開始『拈花惹草』，對花草真有興趣。自彼當陣開始，我心肝穎仔(ínn-á)一直有一个願望，想欲愛有一座家己的花園。這个願望對出外讀冊的我來講是真譀(hàm)古的代誌，散赤的大學生，共人稅厝做厝跤(kha)，有一位仔通跔(ku)就真好--矣，哪閣有通起一座花園，講『bàng-kah』--的較緊。
山袂轉(tńg)路轉；啊若路袂轉--咧？頭腦捎(sa)來轉--啊！佇財力佮空間袂拄好的情形下，嘛賰(tshun)這步通行--啊！爛田準路，凡勢愈行愈大步嘛無的確！無試看--咧哪會知！
共彼臺拍報告、聽歌用的舊電腦整理理--咧，該刣、該敨(tháu)的雜草仔、害蟲攏盡掃。本底是一片拋荒(pha-hng)的田地，我用一睏工，共伊一坵一坵分予伊清楚。佇這个「80G」的田園--裡，有電影館，愛唱「卡拉OK」我嘛有攢(tshuân)。啥？無愛唱歌，愛聽歌--喔！免驚，看是欲葉啟田唱的「山頂的烏狗兄」抑是『余天』唱的『榕樹下』，佇遮(tsia)攏真利便。一稜(lîng)一稜的塗稜我耙(pê)齊全(tsiâu-tsn̂g)--矣，菜瓜架仔、苦瓜棚，嘛攏搭好--矣！閣再來就賰種的工夫--looh ！
上忝(thiám)--的就是這步--啦！花草我是真愛，毋過論真欲做一个園丁實在是無簡單--呢。人講路是問--出來的，我三揣四問--人。好佳哉，這寡社會菜園藝術大學出業的博士博真熱情，我請教一項，報三項予我捌(bat)，完全無崁(khàm)步。
我對簡單的野草開始熟似起，漸漸，我共一欉一欉徙(suá)來我的花園，予佇遮生湠(thuànn)。會共人黏的刺查某就是按呢來到我的花園--的啦！毋通嫌伊𠢕粘--人，顧人怨--呢！彼段酸甘蜜甜的戀愛故事是對伊開始--的喔。沓沓仔(ta̍uh-ta̍uh-á)徙栽，彼日我無張持煞驚--著，我的花園毋但(m̄-nā)是有花草、樹仔佮青菜，連水果嘛有--喔！
除了徙栽，下(hē)感情嘛真要緊--呢！這是我彼段出走山城的時，赤跤『nì-sàng』共我千交代萬吩咐--的。伊講做農的無撇(phiat)步--啦！講破毋值三仙(sián)錢，若是下真情落去共栽，免下肥，果子嘛會甜，花是比啥都較媠(suí) ！
註：「刺查某」，草名。 (TOP)
「上鮮的佇遮--啦！上鮮的佇遮--啦！」逐尾魚仔毋但滑溜閣攏金鑠鑠(siak-siak)，若像大日頭照佇海面，目睭仁攏掠阮金金相，敢若是叫阮愛共買轉去。
基隆的崁仔頂漁仔市佇清國時代就有--矣，彼陣先民利用舢舨仔(sam-pán-á)共魚鮮運到旭(hiok)川河，然後崁仔起--去路面，才閣將貨割予魚販仔，這个河邊頂懸的「崁仔頂」就成做這馬的魚仔市。
我有同學蹛佇咧崁仔頂，我捌去過，所以路草我猶會認得。阮到位的時天邊干焦貓霧仔光(bâ-bū-á-kng)，漁仔市內底的人挨挨陣陣，逐个擔仔位攏真交易(ka-ia̍h)。
阮老爸不止仔老古錐，佇初入戰場猶捎無寮仔毛的時，看著一堆目睭金爍爍(sih-sih)，身軀紅金紅金猶閣趒咧趒咧的紅目鰱，喝魚仔的高手干焦喝：200，200，200，手閣比比--咧；老爸的手竟然嘛綴咧比--出去，閣誠有氣魄的喝講：「包--起來！」結果一包就是17斤半，總共三千五；當場予人看--起來就誠倯(sông)的阮兩爸仔囝自按呢煞愣(gāng)佇遐。彼頭家食--過的鹽濟過阮食--過的米，對阮這款人客嘛是白矸仔貯豆油—看出出--矣，特別閣問一句：「欲挃--無？」聽著總價數了後隨就反悔的阮，當然是一直搖頭--的啦！趕緊行對下一擔(tànn)去。
邊仔彼幾擔攏是蝦仔，攏有囥『氧氣筒』予遐的蝦仔維持鮮沢(tshinn-tshioh)。有一个漢草袂䆀的查埔人徛佇--咧上頭前，看--起來袂輸行仔內的款，伊連鞭(liâm-mi/pinn)喝(huah)聲，連鞭頕(tìm/tàm)頭，手嘛綴咧連鞭比懸連鞭比低(kē)；一觸(tak)久仔，遮的活跳跳的海產就攏予伊貿(bāu)--去矣，我想這位大哥應該會當賣著真好的價數，會當予某仔囝過好日子--囉！
天色漸漸光--矣，買賣嘛開始欲煞鼓--矣；看老爸的眼神，若親像無買一寡魚仔轉去誠毋甘願的款。就佇阮又閣踅(se̍h)一輾，佇我看人咧喝紅魽(kam)沙西米看甲踅神--去的時，我雄雄看著頭家提一大袋魚仔予老爸，想袂到老爸的跤手遮爾猛掠(mé-lia̍h) ！ 閣較怪奇的是，當頭家又閣提另外一篩(thai)仝款品種又閣仝款幾若十尾的魚仔，問老爸看欲愛--無的時，老爸目睭攏無𥍉(nih)--一下，隨應講：「橐(lok)--起來！」hânn ！遮濟仝款的魚仔，是欲食到啥物時陣--咧！ 我喙--裡嗷(nga̍uh)嗷唸：「爸！你買傷濟--矣啦！敢會頭家咧賣貨頭摒貨底，俗物無好貨--啦……」老爸講：「袂--啦！遮肉魚仔誠鮮，恁阿媽上愛食，進前阮蹛庄跤的時定定煎來食，足芳--的呢！咱提一寡來去送予恁阿叔--啦！」 (TOP)
佇恆春有流傳一句俗語講：「恆春有三怪，落山風、思想枝(su-siáng-ki)、檳榔。」對這句俗語就共恆春特殊的風土人情講甲一清二楚。咱定定咧講「風土」、「風物」，若對恆春來講，「風土」佮「風物」是真正對風引起--的，「落山風」是干焦佇恆春才有的特色，無論伊是屬佇自然景色的風土風物，抑是歸屬佇咧人文的風俗民情。
每一年的十--月紲(suà)到隔轉(tńg)年的四月份，佇恆春有半冬外的時間，是落山風的季節，風力真強，每一秒有當時閣超過二十公尺，親像一个輕度的風颱仝款。「落山風」佮恆春的地形有密切的關係。中央山脈對楓港(Hong-kańg)開始勻勻(ûn-ûn)仔變成山崙仔，東北季風的冷空氣才會使搧(siàn)過遮的山崙(lūn)直接對恆春落--來。百外年來，在地人攏共伊叫做「落山風」。
「落山風」對在地的環境有真大的影響，透風的時，人、車著徛(khiā)予在，若無是會予搧(siàn)落海去，逐(ta̍k)口灶的窗仔門攏關牢牢(tiâu-tiâu)，街仔路攏走甲無看見人影。佇農業方面，這時陣的果子嘛無才調結果，每一欉樹仔攏予伊吹甲連樹葉都焦焦(ta)--去，離離落落、東倒西歪。一九八七年的十一月二十九，是有史以來，透風上大的一擺，一秒大約有三十七公尺。彼(hit)當時，電火柱予風吹倒，無水閣無電，有七成的農作物焦死--去，損失真嚴重。
「落山風」予恆春敢若攏是無好的影響，毋過，蹛佇恆春的在地人，早就認份佮伊做伙鬥陣生活，規氣利用「風」來種蔥頭佮瓊麻(khîng-muâ)，枋山(Pang-suann)、柴城(Tshâ-siânn)佮恆春三鄉鎮所種的蔥頭，總面積佔臺灣全島的百分之九十七，瓊麻嘛因為恆春的落山風佮好天的日頭，上加(siōng-ke)兩工，就會當成(tsiânn)做成品。恆春人共「落山風」看準是恆春三大奇之一，閣利用天公伯仔賞賜予這个天然的資源，廢物利用，用落山風配合鈴鈃(giang)仔，叮叮噹噹，逐口灶的門跤口，攏掛一捾(kuānn)風鈴，頂頭寫「鈴響平安，年年有餘」，予人看著真感心，「落山風」也彌補原底佇寒天較清冷的觀光人潮。 (TOP)
彼工，我佇厝--裡的後壁尾咧披(phi)衫，聽著鳥仔咧叫的聲。阿母講可能是鳥仔囝佇咧學飛摔--落來，愛共伊揣--出來，才袂予枵(iau)死。阮兩个母仔囝，就開始佇後壁尾四界反(píng)。反甲落尾，阮阿母佇一个倒崁(khàm)的面桶跤揣(tshuē)著一隻鳥仔囝。
這是一隻厝鳥仔，真細隻，猶無我手盤的一半大，翼股(si̍t-kóo)嘛猶未硬(ngē)，毛嘛猶未發完全，看這个範勢(pān-sè)，伊猶未學會曉飛，就摔--落來。阿母決定欲共伊飼甲翼股硬，會當家己飛才共伊放--去，才袂變做附近遐(hia)貓仔的點心。
阿母揣一跤(kha)紙箱仔，共鳥仔安佇內底；我是去揣一个甌(au)仔，內底貯(té)清水，閣用另外一个清氣觳(khok)仔，囥(khǹg)一寡仔『苜蓿子』，予伊做飼料。共鳥仔囥--入去的時陣，一時無注意，煞予伊走--去！是講佳哉走無偌遠，一時仔就予阿母掠(lia̍h)--轉來。為著莫(mài)予鳥仔閣走--出來，阮就佇箱仔的頂懸崁(khàm)一个像網仔的塑膠蓋。按呢，總算共伊安搭(tah)好勢，予伊有一个暫時安居的所在。
阮查某孫仔『小羽』是一个真好玄(hònn-hiân)的三歲囡仔，伊當然嘛對這隻新來的人客真好(hònn)奇，拄安搭好厝鳥仔無五分鐘，伊就去共蓋掀起來看，厝鳥仔就趁縫(phāng)飛--出來矣，一時仔就無看見鳥仔影，毋知覕(bih)去佗位。
阮阿母佮我、猶閣有查某孫仔，三个人佇厝內四界揣，總算看著鳥仔覕佇桌跤，阿母跤手誠猛(mé)，三兩下手就掠著鳥仔--囉！逐个總算會當安心去做家己的代誌。
我繼續去坐佇電腦頭前寫論文，阿母佮『小羽』兩个坐佇客廳看電視。我提出一塊號做「美妙的山中鳥鳴」的CD放落去聽，想袂到，阮兜這个人客，煞對我這塊CD放送出來的鳥仔聲叫，媽孫仔嘛聽著鳥仔佇咧對CD叫的聲，逐家相看對笑，不止仔趣味。
天光，聽著阿母的叫聲：「害--矣，今(tann)鳥仔哪會死--去啦？」阿母的喝(huah)聲，予我雄雄精神，趕緊對樓頂走落來問予清楚：「媽！你講啥？」我一下落來，就看著阿母頭殼犁犁，目箍(khoo)紅紅，伊的手盤內底，鳥仔的身軀勼(kiu)做一个，予人看著誠不忍心。 (TOP) (轉去主目錄)
沒有留言:
張貼留言