2010
06091639啥較好聽
(原本的對話和情景攏是用華語，這馬用台語來表達。)
「我講華語比台語較優雅閣好聽。」對方表示高高在上的態度。
「%#@$&..........」我就馬上用華語刁工罵一大串噪姦戮撟漩的話共伊應話。做過兵，啥物無水準的話嘛講會出來。
「你曷(khah)會使遐爾仔無水準共人罵？」對方無代無誌感覺受侮辱，毋甘願咧抗議。
「我拄才是用華語抑是台語？」我隨切入重點。
「華語。」對方猶無注意著，我已經開始牽龜落甕矣。
「就著毋！一个語言好聽歹聽是講話者的修養問題。我若選聽起來歹聽的詞講話，予人感覺著是足歹聽的。我問你，你捌聽著我講台語足歹聽無？」用按呢證明對方一開始講華語較優雅是毋著的。
「好，咱來一項仔一項仔討論。」經過拄才的開頭，對方開始願意來討論矣。「咱對上細的單位開始，我問你，一个語言是聲調濟較好聽抑是少較好聽？」哈哈，無論濟少攏會予我講甲雞喙變鴨喙。
大部分的人會按呢回答：「當然嘛是聲調濟的較好聽啊。」逐个攏想著英語是一个聲調的，所以會足自然按呢回答。
「按呢台語的聲調比華語較濟，照按呢講台語加較好聽。」嘿嘿，對方閣輸一回合矣。
閣經過幾若回合了後，當然對方是一路輸到底。
「講著詞，一个語言是會當分別意思較精密的較優雅抑是無法度分辨的較優雅？」這回注定對方閣愛輸矣。
「當然嘛分別意思的較精密較好。」對方足有自信華語的意思一定是較精密。
「好，來，阮兜和咱兜華語是啥物？」對方干焦有法度講出一个『我們家』。
「閣來，我遮會癢和我遮會擽(ngiau)？」一定一个答案『我這兒會癢』。
這款形式的問題，我會使一直問一直問，所得著的華語答案一定是一个爾爾。因為華語本身的產生背景就是意思範圍足粗的，是欲用來兩个無仝語言之間做溝通用的，意思精密是袂當存在的條件。
逐遍佮人爭論這的時間，上少攏愛一點鐘的時間。將近進入尾聲矣。
「咱來換到上大的單位--一句話。我問你：阮欲去高雄。華語按怎翻？」我一改問一句，就是無愛予對方知影我的後一句是啥物。
「當然嘛是：我們要去高雄。」遮爾仔簡單，對方攏嘛是隨問隨回答。
「第二句：阮愛去高雄。」免講回答閣是仝款的。
「第三句：咱欲去高雄。」回答仝款無變。
「第四句：咱愛去高雄。」回答猶是仝款。
四句完矣，對方才發現著。四句哪會攏仝款。這時陣想欲詳細區別in的無仝已經袂赴矣。因為咱生本用華語的時就是按呢，無去講究遐詳細。
這款類似的例彼時陣我攏會當隨時舉例。
研究所拄入去的前半冬，差不多每一个熟似的人攏捌佮我相諍過這个問題。攏真正予我講甲心服口服。無法度，台語經過刻意的thun2踏，逐个人對伊的印象攏是無經過思考就認為伊是無水準閣足歹聽的。我彼時陣會當做的就是只要無修養的台語詞絕對袂講出喙，所以，甚至有人會講聽我講台語哪會特別感覺袂輸咧聽人演布袋戲的主角仝款，斯斯文文a袂歹聽。
(2010.06.09)
(轉去主目錄)
沒有留言:
張貼留言