2010
03092040文字ｅ形式
就外形來講，文字ｅ[的]形式是百百種，伊和咱所欲表達ｅ[的]意思結合以後，會凍[當]hoo[予]人就字音和字形ｅ[的]關係來分類，大約分做表音文字和表意文字二種。
佇形、音、意三角關係來講，字形和語音ｅ[的]關係卡[較]接近就算表音文字，字形和語意ｅ[的]關係卡[較]密切就歸類為表意文字。一般來講，英文是以表音文字為主，咱ｅ[的]中文以表意文字為主。當然，有人一定會未[袂]讚成中文是表意文字為主ｅ[的]形式。
如果中文字(漢字)是以表音文字為主，是按怎有真濟台語運動者(其中有認為漢字是表音文字ｅ[的]人)欲堅持某一字是正確ｅ[的]字。若是表音文字，只要用任何一字仝音字代替則可，何必為著某一猶未固定ｅ[的]字而爭論不休？致使台語常用字ｅ[的]「ｅ[的](『的』)、欲(卜，『要』)、未[袂](昧，『不會』)、毋(吥，『不』)...」等等ｅ[的]寫法無仝。in[𪜶]攏堅持某一派ｅ[的]寫法有問題。結果，有ｅ[的]字ｅ[的]寫法將近有十款寫法，可見認為漢字系統為表音文字ｅ[的]人，佇文字表達上ｅ[的]觀念和堅持，真明顯就表明漢字本身是表意文字為主ｅ[的]文字形式，就因為按呢才會為著台語文ｅ[的]文字形式來爭戰未[袂]停。
論真來講，咱嘛會使講英文是表意文字，譬如講"car"(轎車)ｅ[的]第一個字母"c"發/k/ｅ[的]音，咱若是將"car"拼做"kar"ｅ[的]文字形式，in[𪜶]並無因為"kar"有可能會凍[當]讀和"car"仝音來代替"car"ｅ[的]意思，或[抑]是二字攏是仝一個[个]意思；in[𪜶]嘛未[袂]因為"in"和"inn"仝音來凊采[彩]用，互相替代。所以，一但文字無論用佗一種形式來表達某一個[个]固定ｅ[的]意思，毋管是表音或[抑]是表意文字，目的攏是欲借用文字來表達作者ｅ[的]意念，借著上下文ｅ[的]內容以及仝一個[个]語言使用者ｅ[的]普遍接受來固定某一個[个]意思落來，按呢文字形式自然固定落來。
所以，何必佇台語ｅ[的]文字表達方式猶未固定落來以前咧爭論不休，互相傷和氣，就算咱有法度找[揣]出來正字，使用者無法度接受，未凍[袂當]來普遍、大量又閣方便ｅ[的]使用，就會因為語言本身ｅ[的]代謝作用、時代變遷、生活方式改變、文化背景無仝、工具ｅ[的]使用等等，致使咱猶原無法度挽救某一字ｅ[的]文字形式。
所以，為著咱家己ｅ[的]文化，hoo[予]咱ｅ[的]台語會凍[當]更加容易生湠，咱勿[莫]受著文字ｅ[的]形式縛著著[牢牢]，來纏腳[跤]絆手，文字是咱ｅ[的]工具，咱借著文字來清楚表達咱ｅ[的]理念，借著文字來保存先人ｅ[的]慧智和文化，用文字來發揚咱現在ｅ[的]文化，經過文字將[共]咱ｅ[的]文化傳落後一代。咱毋是文字ｅ[的]奴隸，若受著受[束]縛，就會受到限制，限制了後自然發揮ｅ[的]空間有限。
咱一定愛體認著無停止ｅ[的]文字形式論戰顛倒會hoo[予]咱失去重要ｅ[的]代誌，何必為著這款ｅ[的]論戰來犧牲咱更加閣卡[較]重要ｅ[的]任務咧？
1995.07.04
2010.08.18改網頁的字體格式兼
共教育部的用字囥佇[ ]內底
沒有留言:
張貼留言