-仔前變調聲音分析圖

 2010

04110849-仔前變調聲音分析圖

457聲韻篇

圖一: 雞仔、鳥仔、兔仔、鴨仔    來去網路下載wasp.exe落來耍  去看SFS的相關軟體

圖二: 鵝仔、狗仔、柚仔、鹿仔 

【後記】這个檔案是佇2007.08.26透早1:22分做的。嘛袂記得是佇佗一年的佗一工，佇網路去揣著這个免費的wasp聲音分析程式。就共伊下載落來耍。可惜我已經研究所畢業矣。佇我咧讀研究所的時，攏無機會通仔耍著聲音分析程式，佇彼个年代，聽講想欲愛有分析程式的設備著愛開二百萬左右，實在是驚死人。學校就準講有，遮爾仔貴的設備嘛無可能予學生用。

    無這个程式以前，講台語的聲調的時，永遠就是停佇理論的階段，每一个人的講法攏有出入。毋閣，我一直相信我佇《歡喜講台語》內底所講的〈仔前變調〉的調值(tat8)佮規則是正確的。我的講法一直無法度來證明是正確的。

    揣著這个分析程式了後，就會使證明我講的理論是無毋著的。我想，我若猶是佇咧讀研究所，我可能會逐工無暝無日來做聲音的分析研究。有這个程式了後，講聲韻學就會使得著實際的印證(雖然程式有時仔會有出箠的時陣，尤其是我的聲音算足低音的，講第三調或是第四調的u韻的時，聲調就因為超過程式的分析範圍，就去分析袂出來)。

    因為有這个wasp的程式，見若佮人論起台語音，意見有袂合的時，攏會叫人講若是毋相信就來做聲音分析就會知影矣。

    這个程式無法度顯示母音的F1和F2的聲音頻律。其實，我足想欲知影F1和F2聲音頻律的頻律數字。因為若有這兩个數字，就會使用來印證我對台語母音呵咾的呵字的實際發音的講法。因為目前呵咾的呵字逐派的講法攏無仝。毋閣，我猶是認為我講的無毋著，需要實際的證明。

    假使若有線頂的朋友有揣著會使顯示F1和F2數值(tat8)的程式麻煩通知予我知。

    我的部落格頂面的大頭貼是後來閣揣著的分析程析。我講著的程式攏有囥佇網站連結內底。

(繼續看落去)(轉去主目錄)

 

(2010.04.11)

 

【後記2】想講時間過足濟冬的，就想講加減閣來揣看覓咧，佇相關的程式內底下載幾若个程式落來一个一个耍看覓咧。經過兩點外鐘的試驗，確定揣著Esection220.exe會當來顯示F1和F2的頻率出來。

    我嘛有閣去下載新版的WASP落來看覓一下，發現伊的顯示較清楚，較無像較早的程式遐會出箠。嘛有新功能通用矣。

 p.s. 來去下載有顯示母音的F1和F2的程式Esection220.exe落來耍。

【後記3】今仔日(2010.05.25)想講閣來揣我到底當時開始耍wasp的，想著講伊的副檔名叫sfs，所以就用副檔名去揣電腦內的檔案。去揣著一下足奇怪的檔名tmp9D36E.sfs，就共伊開看覓咧，揤play了後發出 "到底是欲按怎耍咧" 的聲，真正是我的聲，所以確定我是佇2006.02.08.pm07:17下載程式落來耍的。07:25錄音的。閣來就三禮拜後才有錄另外一个檔案。看第二个檔案，我已經是熟手的作法矣:)

 

(繼續看落去)(轉去歡喜講臺語)(轉去主目錄)