水管噴水

 2010

06081944水管噴水

225心路篇

細漢的時陣，毋知影啥物款的物理原理，自然就會曉按呢耍(sng2)。

便若落雨天，就是囡仔愛耍水的時陣。

細漢的時陣，阮兜有兩个四角形的紅毛塗做的水缸，嘛毋知佗位來的水管有通仔四界遺(i)。完全袂記得是按怎會曉按呢耍。

彼兩个水缸是囥佇砛簷跤(gîm-tsînn-kha)，便若落雨就會承(sin5)厝頂流落來的雨水，水若一半滇(tinn7)就到我的腰身矣。閣揣一支水管比我身懸較長淡薄仔，阮幾个兄弟仔就會peh起去水缸頂。倒手提(theh8)水管，正手崁(kham3)佇水管頂頭，共水管直直直插佇水裡，開始一起一落一直用，經過連紲(sua3)的起落作用，水管內底的水會沓(tauh8)沓仔peh懸，peh到阮手崁的所在，閣繼續用，水就會對崁牢的所在衝出來，起落的速度愈緊，水噴的就愈緊嘛會較遠，若有人做伙耍，這時陣就會開始變成噴水比賽，當然目標是和對方相噴。

這款的耍法，毋知按怎，自然就會曉耍。因為今仔日去阿吉仔的網頁，看著人用水管做樂器，才想著細漢時陣用水管耍水的情形。

因為完全袂記得彼是當時耍的，干焦會當確定的是我國小五年的進前的代誌，因為我國小五年的以後就無蹛佇彼間厝矣，彼間厝其實應該是一間寮仔，寮仔底有一个古井，一頂kheh阮一家伙仔六个人的眠床，一塊食飯桌就無啥物物件矣。

這馬，小思考一下就知影這款耍水的方法的物理的原理矣。手塞佇水管頂頭就是咧做活栓(sng)仔，水管撞(tong7)落去，水peh懸，空氣走對活栓仔出去，水管抽起來，活栓仔共空氣阻擋牢咧，予水袂當降落，閣共水管快速撞落去，利用水壓的力量，共原本的水管內的水閣共積予伊較懸咧，經過幾遍了後，水就積到活栓仔的所在，閣繼續撞落去，積佇活栓仔的所在的水就只好噴出來矣。原理就是按呢，對一个咧耍水的囡仔來講，按呢就會當耍足久的，嘛足好耍的。毋信(sian3)，你會當試看覓咧。

(轉去心路篇目錄) (轉去主目錄)

回應

2010-06-12 21:41:10發現台灣A水A老大 email給發現台灣A水A老大 前往發現台灣A水A老大的日誌

毋知這第4000名的人客，有獎品否？

於2010-06-12 22:26:28回覆

To 發現台灣A水A老大

第一个愛請的是shine, 因為阮佇3000的時, 伊先到, 伊講伊請, 昨最後嘛是伊比我較接近4000, 想講伊會比我較緊, 我嘛叫是我明仔載才會到4000, 想袂到今仔日就到4000矣, 更加予我意外的是這一點鐘猶閣有32个人入來. 愛感謝眾熱心的線頂朋友的支持, 才兩禮拜的時間爾爾就有1000个人數來遮行踏.
更加予我意外的是, 我變更選項, 理論上隔轉工有做書簽抑是加上我的最愛連結的朋友應該攏無法度入來, 叫是人數會像我拄開站的時, 一工貼貼猶無十个人來, 結果彼工嘛有一百初頭个入來, 予我誠意外:)

2010-06-12 21:05:34發現台灣A水A老大 email給發現台灣A水A老大 前往發現台灣A水A老大的日誌

喔喔....您也在線上喔，好巧喔。很高興認識您。

您過獎了，其實我沒有那麼好啦。

有些字為了要讓格友看得懂，所以不用正統的台語字，方便格友閱讀。

於2010-06-12 21:24:43回覆

To 發現台灣A水A老大

只要人看捌你寫啥就好矣, 袂共你的意思讀毋著去就好矣. 看起來你有需要去看我彼篇愛著甲骨文:)本來寫文章毋是欲予家己一个人看的, 是欲予人咱感受咱的心情, 咱的看法, 用文字來傳達予看咱的文章的人.
佇教育部猶袂公佈用字的時, 我的物件嘛是佮你仝款的做法, 只求予人看有為重點.
拄才我嘛閣去你遮行踏踅踅咧才轉來爾, 看過你上新的文章祝賀閣看兩篇文章了後就隨轉來, 想欲看我遮的歷史記錄, 累積人數4000人, 時間佇9:10分. 一下換這个畫面就變成4008, 看情形是有袂少熱心的格友攏咧搶做第4000个人客:)

2010-06-12 20:37:17發現台灣A水A老大 email給發現台灣A水A老大 前往發現台灣A水A老大的日誌

好厲害，整篇文章都是河洛話，我只會寫幾個字而已，有些字還真的不是很認識，不過大約知道您寫什麼。

給您拍拍手，鼓掌。

不好意思，我的回應沒辦法也跟您一樣，整篇都用河洛話來寫。

於2010-06-12 20:56:47回覆

To 發現台灣A水A老大

文媠在精不在多, 好文章寫了讚, 自然就是高手, 老大的, 佇我的心目中, 你是寫台語的高手. 我看你寫的詩嘛是規篇攏台語文. 其實, 你若欲用台語文來寫, 應該是足簡單的代誌:)