2010
11172022目睭看的無一定是真的
捌佇網友遐看過遮的一部分的圖，其實，我對這款圖足有興趣的。因為，這款圖需要停起來去看、去想，in攏會共咱的目睭騙去。
看起來無平長無平大的物件，實際去量的答案是平長平大的；角度看起來無平大，量起來是平大的。明明是一層比一層閣較懸，結果綴咧行，上懸的所在就是上下(ke7)的所在，又閣踅還頭；當然嘛有彼款上頭前變成上後壁的。
明明是無存在的圓點、三角形抑是柱仔等等，目睭看著伊佇咧。抑若講著彼隻象，明明看是有跤的，實際上是無跤的，因為咱揣無完整的跤。看起來歪篙揤斜的線其實是直線；有看起來是共線延伸過是面頂條連過正爿的線，實際上是下跤條的線是連彼條線的。有的物件看起來是lap落起，閣重看的時就變phok起來。有的是按倒爿看過來佮按正爿看過來的變成無仝款的物件。正看倒看嘛會無仝款。直的看佮橫的看嘛會無仝款。抑是換一下角度看嘛無仝。
有當時仔是看無仝的色彩會產生無仝的圖，大部分攏是烏白的圖。印象內底，我第一遍看著這款圖是人性的弱點的冊面看著的。看白色的是一个頭殼骨，看烏的是一个咧畫妝的美女。是一个人抑是一陣人？是美女抑是巫婆？嘛有彼款近的看無看字，遠的看就有看字，毋知恁有看著有寫LIFT彼張無？另外一張是字母E。
嘛有中央一塊挖起來換角度囥，咱就看著一項物件浮起來。猶閣有一款圖是目睭看起來是無仝色的，一个較深一个較淺，實際比對起來，兩个色是仝色的。嘛有一款立體圖，按四方向去看攏無仝，其實這款圖是平面的。
上厲害的時明明無振動的圖，咱看起來煞有咧振動。
上神奇的是中央是黑點彼張。毋知你若按無仝角度來看，敢有看著？彼本無字天書嘛是仝款！
當然，嘛有一寡圖是我看無的，毋知伊是欲予咱看啥物！
(轉去網站連結目錄) (轉去主目錄)
回應
2010-11-20 23:03:54帥安 email給帥安 前往帥安的日誌真是有趣
於2010-11-20 23:11:06回覆
To 帥安
佇youtube拍illusion就會使搜揣著這款的影片:)
