2010
06012350褪赤跤
細漢褪赤跤是因為阮兜實在有夠散赤
大漢褪赤跤是因為一心想欲腳踏實地
這馬褪赤跤是想欲來體會阿母的心情
佇我的印象內底，我國小二年的進前毋捌穿過鞋仔。毋過，想想咧敢有可能一年的時，學校會當容允我無穿鞋仔讀冊。
佇我的印象內底，除了讀冊去學校上課以外，我佇厝完全攏毋捌穿過鞋仔。所以，褪赤跤佇庄跤四界走是我生活中足自然的一部分。
出外讀大學，顧著禮數，我出門一定是穿皮鞋出門佮上課的。因為高中的時，學校的製服就規定愛穿皮鞋。
大學三年的時，佇淡水，我蹛佇黃帝神宮附近。彼時陣散步去遐我就攏是按蹛的所在就褪赤跤出門。
彼是因為阮老爸捌講過一个故事予我聽，大概就是講一个好額人因為穿好食好蹛好，攏無suh著塗氣，所以長期身體足bai2，了後道士叫伊愛睏佇塗跤suh塗氣，調解身上的五行，按呢就會好矣。好額人照做，真正身體就勇健起來矣。
我佇淡水嘛一直水土袂合，身體厚毛病。便若身體無爽快才會褪赤跤行一寡過。毋過，無啥敢光明正大的褪赤跤行佇外口。
大學三年的時，有讀小說，內底足gau5用象徵來代表意義。所以佇穿插方面阮嘛會加減用一寡象徵的做法，根本袂去管人的眼光佮想法。
有一工，我去讀著一篇小故事，大概是講一个拄做和尚無偌久的人，伊共師父棄嫌講和尚穿草鞋實在是足寒酸的。伊的師父共講，穿草鞋是欲叫你便若ang3頭看著跤所穿的鞋，著會看著破空的草鞋。就是叫你凡事著愛看破。用這不時來提醒你家己愛看破紅塵俗事。
所以，自彼工開始，散步去黃帝神宮的時，我就大大方方褪赤跤，除了suh土氣以外，用這做一个象徵，就是提醒我做人愛跤踏實地。
轉來南部了後，我蹛的所在附近有一个小公園，佇我無頭路彼站仔，有當時仔會去公園散步，我嘛是會褪赤跤佗公園行。
佇遐褪赤跤，逐个人看著的反應攏無仝。老一輩的人看著，攏會呵咾我，講我身體足勇，有法度褪赤跤行路，因為in攏無法度褪赤跤行路矣。
半冬前，看著網路一篇新聞(2023.09.09更新超連結)，講褪赤跤是上好的運動，講褪赤跤比穿任何的鞋較好。
阮阿母，佇我讀研究所二年的時，毋知啥物原因想袂開，就來離開這个世間。佇印象內底，阮阿母除了去山裡做工課有穿鞋以外，伊佇厝佮出去厝邊跤兜攏毋捌穿鞋。
阮阿母離開世間遐濟冬矣。毋過，我根本就毋知影伊的心肝頭咧想啥物。顛倒這幾冬，對阿母的思念是愈來愈深。有可能是我的歲數一冬比一冬接近伊離開世間的歲數，所以，才予我無形中來想著伊愈來愈深。
自阮囝開始讀國中的開始，我就開始咧體會阮阿母對待我到底是用啥物款的心情對待讀國中的我。嘛因為按呢，我開始對阿母的思念是na2來na2深。沓沓仔我的生活敢若是阮阿母的生活的翻版仝款。所以，當我這馬褪赤跤跤踏實地咧行路的時，我行出去的每一个跤步就是想欲用心體會阮阿母的心情。
我的家好豐富, 朋友多而幽點, 集合各路人馬, 人才濟濟, 當然這些朋友人馬和人才也包括小姑姑您在裡面:)多謝你的捀場.